UWOU-EBE ITANẸTE Uwou-Eroro
UWOU-EBE ITANẸTE
Uwou-Eroro
Isoko
Ọ
  • Ẹ
  • ẹ
  • Ọ
  • ọ
  • EBAIBOL
  • EBE GBE EWARE EFA
  • IWUHRẸ
  • g19 Ọrọ 2 ẹwẹ. 8-9
  • Epanọ A Sai ro Ru Oware Ghelọ Ebẹbẹ

Ọnana o wo ividio ho.

Eva e dha owhẹ hẹ, ividio na ọ rọwo kporo ho.

  • Epanọ A Sai ro Ru Oware Ghelọ Ebẹbẹ
  • Awake!—2019
  • Izoẹme-Esese
  • Onọ O Wọhọ E Riẹ
  • EME U DHESẸ RE OHWO O RU OWARE GHELỌ EBẸBẸ?
  • FIKIEME U RO WUZOU RE A RU OWARE GHELỌ EBẸBẸ?
  • OGHẸRẸ NỌ WHỌ SAI RO WUHRẸ ỌMỌ RA EPANỌ A RE RU OWARE GHELỌ EBẸBẸ
  • Kọ Ẹvẹ Mẹ Gudu Te?
    Izoge
  • Epanọ Who re ro Fiobọhọ kẹ Ọmọ Ra nọ Ọ Riẹ Ru Hu
    Obufihọ Rọkẹ Uviuwou
  • Eme U Fo nọ Me re Ru nọ A tẹ Kpọ Omẹ Họ?
    Izoge
  • Wuhrẹ Ọmọ Ra no Emaha Ze
    Edidi Evawere Uviuwou
Ruẹ Efa
Awake!—2019
g19 Ọrọ 2 ẹwẹ. 8-9
Oni jọ nọ o bi fiobọhọ kẹ ọmọtẹ riẹ nọ eva e be dha fikinọ ikeki nọ o ru o woma tere he

OWARE AVỌ 3

Epanọ A Sai ro Ru Oware Ghelọ Ebẹbẹ

EME U DHESẸ RE OHWO O RU OWARE GHELỌ EBẸBẸ?

Ohwo nọ o re ru oware ghelọ ebẹbẹ, o re gbe ru oware ghele nọ eware e gbẹ make riẹ nya kẹe he hayo nọ oware o tẹ make rrọ bẹbẹ kẹe. Ohwo o re wuhrẹ uruemu nana no eware nọ ọ rọ ẹro ruẹ no ze. Wọhọ oriruo, ọmọ nọ o bi wuhrẹ onya o re kie ẹsibuobu taure ọ tẹ riẹ epanọ ọ rẹ nya onya. Epọvo na re, taure emọ a te ti wuhrẹ epanọ a sai ro ru eware kiehọ evaọ uzuazọ, a rẹ rẹriẹ ovao dhe ebẹbẹ sa-sa.

FIKIEME U RO WUZOU RE A RU OWARE GHELỌ EBẸBẸ?

Udu u re whrehe emọ jọ nọ eware e gbẹ be riẹ nya kẹ ae he, nọ eware e tẹ rrọ gaga, hayo nọ ohwo jọ ọ tẹ fo ae rọkẹ oware jọ nọ a riẹ ru hu. Emọ efa a rẹ nwane siọ oware na ba eru riẹriẹriẹ. Rekọ u fo nọ a rẹ riẹ eware nana:

  • Orọnikọ oware kpobi nọ ohwo o ru oye o rẹ riẹ nya kẹe he.​—Jemis 3:2.

  • Ohwo kpobi ọ rẹ rẹriẹ ovao dhe ebẹbẹ ẹsejọ evaọ uzuazọ.​—Ọtausiuwoma Na 9:11.

  • Re ohwo ọ sae riẹ oware ru ziezi, o gwọlọ nọ amọfa a rẹ kpọe họ.​—Itẹ 9:9.

Nọ ọmọ ra o te wuhrẹ epanọ ọ sai ro ru oware ghelọ ebẹbẹ, onana u re fiobọhọ kẹe rẹriẹ ovao dhe ebẹbẹ nọ i ti te ei evaọ uzuazọ ududu.

OGHẸRẸ NỌ WHỌ SAI RO WUHRẸ ỌMỌ RA EPANỌ A RE RU OWARE GHELỌ EBẸBẸ

Nọ ọmọ ra o te ru oware jọ thọ.

OHRẸ EBAIBOL: “Ohwo okiẹrẹe ọ sai kie isiahrẹ, ọ vẹ wariẹ kpama.”​—Itẹ 24:16.

Fiobọhọ kẹ ọmọ ra re o rri eware evaọ oghẹrẹ nọ u fo. Wọhọ oriruo, eme ọmọ ra o ti ru nọ o te feli ẹdawọ evaọ obọ isukulu? Ọ sai roro nọ, “U wo oware ovo nọ mẹ be sae riẹ ru hu!”

Re whọ sai wuhrẹ ọmọ ra epanọ a re ru oware ghelọ ebẹbẹ, fiobọhọ kẹe roro kpahe epanọ ọ sai ro ru oware na woma viere evaọ ẹdẹfa. Nọ who te ru enẹ, ọ vẹ te daoma gwọlọ epanọ ọ sai ro ku ẹbẹbẹ na họ viukpenọ o re fi oma hotọ yọ oware na o be kẹe uye ọvo.

Evaọ oke ovona, who du nwani ku ẹbẹbẹ na họ kẹ ọmọ ra ha. Ukpoye, fiobọhọ kẹe roro kpahe epanọ ọ sai ro ku ei họ. Whọ sae nọ inọ, “Eme who roro nọ who re ru re whọ sai wo otoriẹ oware nọ whọ pase he na ziezi?”

Nọ oware uyoma o tẹ via.

OHRẸ EBAIBOL: “Wha riẹ oware nọ o te via kẹ uzuazọ rai odẹnotha ha.”​—Jemis 4:14.

Eware nọ ma rẹro rai hi e rẹ sae via evaọ uzuazọ. Ohwo nọ ọ rrọ ọdafe nẹnẹ ọ sai zihe ruọ oyogbe odẹnotha, yọ ohwo nọ o wo omokpokpọ nẹnẹ ọ sai kie ẹyao evaọ odẹnotha. Ebaibol na ọ ta nọ: “Ahwo nọ a riẹ ohrẹ ẹdhẹ gaga a rẹ kparobọ evaọ ohrẹ-odhẹ hẹ, yọ egba a re fi kparobọ ẹsikpobi evaọ ẹmo ho, . . . keme oke gbe eware nọ a rẹro rai hi i re kpomahọ aikpobi.”​—Ọtausiuwoma Na 9:11.

U fo nọ whẹ nọ ọ rrọ ọsẹ hayo oni whẹ rẹ dawo ẹgba ra kpobi re whọ thọ ọmọ ra no eware nọ e rẹ sae nwae oma. Rekọ fiki oghẹrẹ nọ uzuazọ o rrọ, o sae nwane lọhọ họ re whọ thọ ọmọ ra no eware iyoma kpobi.

Nọ orọnọ ọmọ ra ọ gbẹ maha na, o ri mu iruo họ eru hu fikiere a sai si ei no iruo ho, yọ ọ sae wo ẹbẹbẹ ugho wọhọ ohwo nọ eware i kiekpe he. Ghele na, whọ sai fiobọhọ kẹe nọ eware iyoma efa nọ e rẹ da ohwo gaga e tẹ via. Wọhọ oriruo, nọ egbẹnyusu riẹ a tẹ fa usu noi hayo nọ ohwo uviuwou riẹ jọ o te whu, whọ sai fiobọhọ kẹe thihakọ.a

Nọ a tẹ kpọ ọmọ ra họ re ọ sae riẹ oware jọ ru.

OHRẸ EBAIBOL: “Gaviezọ kẹ ohrẹ . . . re whọ ruẹsi wo areghẹ evaọ obaro.”​—Itẹ 19:20.

Nọ ohwo jọ ọ tẹ kpọ ọmọ ra họ, orọnikọ ọ gwọlọ ru ozọ mu ei hi hayo ta oware nọ o rẹ kẹe uye he, ukpoye ọ gwọlọ nọ ọmọ ra o re nwene re ọ sae riẹ oware ru ziezi.

Nọ who te wuhrẹ ọmọ ra re ọ hae jẹ ohrẹ rehọ, onana u ti ru nọ ọ gbẹ rọ so ẹme se owhẹ ẹdẹfa ha. Ọsẹ jọ nọ a re se John ọ ta nọ, “Nọ a tẹ be hae thọ othọ emọ ẹsikpobi nọ a te ru oware thọ, emọ na a re wuhrẹ oware ovo no oware nọ a ruthọ na ze he. Emọ itienana a rẹ so ẹme ẹsikpobi, yọ esẹgbini rai họ ahwo nọ a rẹ ruẹrẹ ẹme na. Onana o sai ru nọ akpọ o rẹ rọ vẹso ọsẹgboni na avọ ọmọ rai na.”

Nọ a tẹ kpọ ọmọ ra họ evaọ oware jọ, ẹvẹ whọ sai ro fiobọhọ kẹe ru lele ohrẹ nọ a kẹ riẹ na? O tẹ make rọnọ obọ isukulu a jọ kẹ ọmọ ra ohrẹ hayo oria ofa jọ kẹhẹ, who du ta kẹ ọmọ ra ha inọ ohrẹ na u kiehọ họ hayo inọ u fo nọ a hae kpọe họ họ. Ukpoye, whọ sae nọe inọ:

  • “Eme who roro nọ o wha riẹ ze nọ a rọ kẹ owhẹ ohrẹ na hayo kpọ owhẹ họ?”

  • “Ẹvẹ who roro nọ whọ sae rọ daoma viere ẹdẹfa?”

  • “Eme who ti ru ẹdẹfa nọ oware utioye o tẹ via kẹ owhẹ?”

Hae kareghẹhọ nọ a tẹ kẹ ọmọ ra ohrẹ hayo kpọe họ re ọ riẹ oware ru, u ti fiobọhọ kẹe enẹna gbe okenọ ọ tẹ kpako no.

a Rri uzoẹme na “Help Your Child Cope With Grief,” evaọ Uwou-Eroro Na, ọrọ Ahrẹ 1, 2008.

Oni jọ nọ o bi fiobọhọ kẹ ọmọtẹ riẹ nọ eva e be dha fikinọ ikeki nọ o ru o woma tere he

MU AE HỌ EWUHRẸ ENẸNA

Ọmọ nọ o re wuhrẹ no ethobọ riẹ ze je ru oware ghelọ epanọ o bẹ te kẹhẹ, ọ rẹ kake riẹ oware nọ a bi wuhrẹ iẹe je wo onaa ziezi evaọ oware na o tẹ make rọnọ o rrọ bẹbẹ.

Fi Emamọ Oriruo Họ Otọ Kẹ Ae

  • Nọ me te ru oware jọ thọ, kọ mẹ rẹ rọwo nọ me gine ruthọ manikọ mẹ rẹ fo amọfa?

  • Kọ mẹ rẹ ta kpahe eware nọ me ruthọ gbe oware nọ me wuhrẹ no ai ze?

  • Kọ me re se amọfa ẹkoko nọ a te ru oware jọ thọ?

Oware nọ Ma Ru . . .

“Orọnikọ ẹsikpobi ma re fiobọhọ kẹ emọ mai ru oware nọ o rrọ bẹbẹ kẹ ai hi. Yọ ma rẹ thọ othọ rai hi nọ a te ruthọ hayo nọ a gbẹ riẹ oware jọ ru hu. Mẹ jẹ hai thihakọ eware nana nọ mẹ gbẹ maha, yọ i fiobọhọ kẹ omẹ nọ mẹ kpako no. Mẹ sae ta nọ enẹna nọ emọ mai a kpako no na, a be hae daoma jọ owowa je rri eware epanọ u fo keme ma tete i rai ga hrọ họ.”​—Jeff.

“Nọ mẹ avọ aye mẹ ma te ru emọ mai oware jọ thọ, ma re wou unu ẹsikpobi. U fo nọ esẹgbini a rẹ vuẹ emọ rai kpahe eware jọ nọ a ruthọ evaọ oke nọ u kpemu gbe ebẹbẹ nọ a rẹriẹ ovao dhe no, keme onana u re dhesẹ kẹ emọ rai nọ ohwo kpobi ọ sai ruthọ ẹsejọ.”​—James.

    Ebe Isoko Kpobi (1992-2025)
    Noi No
    Rueva
    • Isoko
    • Vi Ei Se Omọfa
    • Ru Ei Fihọ Oghẹrẹ nọ O Were Owhẹ
    • Copyright © 2025 Watch Tower Bible and Tract Society of Pennsylvania
    • Izi Kpahe Eroruiruo Evuẹ Na
    • Izi Oria Evuẹ Omobọ Ra
    • Esẹtini Oria Evuẹ Omobọ Ra
    • JW.ORG
    • Rueva
    Vi Ei Se Omọfa