Abọ 6—Oware nọ O So Riẹ nọ Ọghẹnẹ Ọ jẹ Kẹ Uvẹ Kẹ Uye Oruẹ
1, 2. Ẹvẹ ọsẹ gbe oni ọsosuọ mai a rọ raha emuhọ owowoma ọsosuọ nọ Ọghẹnẹ ọ kẹ rai fiẹ?
DIDI oware othọ? Eme ọvia nọ ọ raha emuhọ owowoma nọ Ọghẹnẹ ọ rọ kẹ ọsẹ gbe oni ọsosuọ mai evaọ Aparadase ọ Idẹn na? Fikieme, viukpọ udhedhẹ gbe okugbe Aparadase, emuemu gbe uye oruẹ u je bi vihọ evaọ ikpe idu nọ evrẹ na?
2 Oware nọ o so riẹ ze họ Adamu avọ Ivi a rehọ okẹ uno-eva-ze rai ro ru iruo thọ. O tẹ thọrọ ai ẹro nnọ a ma rai re a wo obokparọ ababọ Ọghẹnẹ gbe izi riẹ hẹ. A tẹ gwọlọ nọ a rẹ rria ababọ Ọghẹnẹ, bi roro nọ onana o te wha enwene ze uzuazọ rai. Fikiere a tẹ nya vrẹ uzi uno-eva-ze nọ Ọghẹnẹ o fihọ kẹ ai.—Emuhọ, izou 3.
Avro Osu ọrọ Ehrugbakpọ
3-5. Fikieme Ọghẹnẹ ọ gbẹ raha Adamu avọ Ivi no re ọ jẹ wariẹ muhọ ha?
3 Kọ eme Ọghẹnẹ ọ gbẹ nwane raha Adamu avọ Ivi no re ọ wariẹ rehọ ọzae avọ aye ọfa muhọ ha? Fiki nọ esuo ehrugbakpọ riẹ, koyehọ, udu isuẹsu riẹ nọ a rẹ sai mi ei ha na, a vro riẹe.
4 Onọ na họ: Ono o wo udu ọ esuo, yọ esuo ono o kiehọ? Fiki nọ ọye họ ọnọ ọmaero gbe Ọmemama ọrọ emama kpobi na o kẹ Ọghẹnẹ udu re o su ai. Nọ ọrọ ọnọ ọ mai wo areghẹ na, esuo riẹ ọ mai woma kẹ emama kpobi. Whaọ enẹna a vro esuo Ọghẹnẹ no. Ofariẹ, kọ oware jọ o jọ emama riẹ thọ ọrọ—ohwo? Ma te kiẹ-rri evaọ obaro epanọ u ro kpomahọ onọ ẹgbakiete ohwo.
5 Nọ ohwo o si oma no Ọghẹnẹ, onọ ofa o tẹ rehọ oma via: Kọ ahwo a te mai riẹ ru nọ Ọghẹnẹ o gbe su ai ha? Ababọ avro Ọmemama na ọ riẹ uyo na, rekọ edhere nọ ahwo a rẹ sae rọ riẹ k’oma rai họ a rẹ kẹ ai ufuoma ulele nọ a gwọlọ na. A sa onọ uno rai eva-ze, fikiere Ọghẹnẹ ọ tẹ k’uvẹ na.
6, 7. Ẹvẹ Ọghẹnẹ ọ jẹ kẹ ahwo ufuoma riẹriẹriẹ kri te enẹ?
6 Nẹkwoma oke ulele nọ ọ kẹ ahwo re a rehọ ufuoma vọvọ rọ kiẹ oma rai, Ọghẹnẹ o ve ti ku ei họ kpobi riẹriẹriẹ jọ o rẹ mae woma kẹ ahwo evaọ otọ esuo Ọghẹnẹ hayo a tẹ rọ orọ obọ rai. Yọ oke nọ a kẹ uvẹ riẹ na u re thei te epanọ o rẹ sae rọ kẹ ahwo uvẹ re a te ọnyaba ọrọ isuẹsu, oria eware i kuo, iruẹru egbaeriariẹ, gbe ekwakwa imu nọ a sae daoma wo te obọ kpobi.
7 Fikiere, Ọghẹnẹ ọ tẹ rehọ uvẹ esuo rọ kẹ ahwo rri te edẹ mai nana re o dhesẹ ababọ avro sọ esuo ohwo ababọ riẹ o sae wo obọkparọ. Fikioye, ohwo ọ rọ sae rọ rrọ no udevie ẹwo gbe eva-ega, udevie uyoyou gbe omukpahọ, udevie ẹrẹreokie gbe ababọ ẹrẹreokie. Rekọ ọ rẹriẹ ovao ku oware nọ u bi no erarọ riẹ ze re: ewoma gbe udhedhẹ hayo emuemu gbe uye oruẹ.
Ọwọsuọ Emama ọ Izi
8, 9. (a) Ẹvẹ ọwọsuọ o ro muhọ evaọ obọ akpọ izi na? (b) U te no Adamu avọ Ivi no ono ọfa Setan ọ lẹliẹ họ re a kuomagbe ọwọsuọ riẹ?
8 Oware ọfa jọ o riẹ nọ ma re roro kpahe. Ọsẹ gbe oni ọsosuọ mai evo họ enọ e wọso esuo Ọghẹnẹ hẹ. Rekọ ono ọfa ọ jọ uzuazọ eva oke oyena? Emama izi. Taure Ọghẹnẹ ọ tẹ te ma ohwo, ọ ma ahwo jọ nọ i wo uzuazọ nọ e mai kpehru, enjẹle buobu, re a rria evaọ obọ odhiwu. A ma rai re avọ okẹ uno-eva-ze gbe ẹgwọlọ omurokpotọ kẹ esuo Ọghẹnẹ.—Job 38:7; Olezi 104:4; Eviavia 5:11.
9 Ebaibol na i dhesẹ nọ ọwọsuọ ọ kaki muhọ no obọ akpọ izi na ze. Omama ẹzi jọ ọ gwọlọ ufuoma kpobi. Ọ tubẹ gwọlọ nọ ahwo a gọe dede. (Matiu 4:8, 9) Ọwọsuọ ẹzi ọnana o te zihe ruọ okwakwa nọ o jẹ kpọ Adamu avọ Ivi re a wọso re, be ta erue nnọ Ọghẹnẹ ọ be gbọ ai emamọ oware jọ. (Emuhọ 3:1-5) Fikiere a re se i nọ Ẹdhọ (Ọtaraha) gbe Setan (Ọwọsuọ). Uwhremu na, ọ tẹ lẹliẹ emama izi efa họ re a wọso. A tẹ te riẹ ai wọhọ idhivẹri.—Iziewariẹ 32:17; Eviavia 12:9; 16:14.
10. Eme ono ọwọsuọ ahwo gbe emama izi na ze?
10 Nọ ahwo a wọso Ọghẹnẹ, a tẹ ze otọ isuẹsu Setan gbe ọrọ idhivẹri riẹ. Oye jabọ nọ Ebaibol na i je se Setan nọ “ọghẹnẹ eyero eware enana,” ọnọ “o wuhu iroro enọ e rọwo ho di no.” Fikiere, Ẹme Ọghẹnẹ ọ ta nnọ “akpọ na kpobi ọ rọ obọ ogaga oyoma na.” Jesu oma riẹ o se Setan nọ “osu akpọ ọnana.”—2 Ahwo Kọrint 4:4; 1 Jọn 5:19; Jọn 12:31.
Avro Ivẹ
11. Rọ kpahe ẹme avro ọfa ọvẹ Setan o ro seha kẹ Ọghẹnẹ?
11 Setan ọ wha avro ọfa ze nọ ojọ ehaise kẹ Ọghẹnẹ. Wọhọ oware nọ u no rie ze, ọ ta nnọ Ọghẹnẹ o ru thọ evaọ oghẹrẹ nọ Ọ rọ ma ahwo jegbe nnọ a te fi ahwo họ otọ ọyawẹ, ọvuọvo ọ rẹ sai ru oware nọ ukiẹrẹ hẹ. Evaọ uzẹme, ọ tubẹ ta nọ evaọ otọ odawọ a rẹ la Ọghẹnẹ eka dede. (Job 2:1-5) Evaọ edhere otiọye Setan o ro se ẹgbakiete emama ahwo ze onọ.
12-14. Ẹvẹ oke u re ti dhesẹ uzẹme na kpahe avro ivẹ nọ Setan ọ wha ze na?
12 Fikiere, Ọghẹnẹ ọ tẹ kẹ uvẹ ziezi kẹ emama nọ i wo eriariẹ re ọ ruẹ epanọ avro ọnana gbe avro udu esuo Ọghẹnẹ i ti ro kuhọ. (Wawo Ọnyano 9:16.) Ukuhọ riẹ eware nọ evia no eva ikuigbe ohwo u ve ti dhesẹ uzẹme avro ivẹ enana.
13 Orọ ọsosuọ, kọ eme oke u ti dhesẹ kpahe avro ọrọ esuo ehrugbakpọ, udu ọ esuo Ọghẹnẹ na? Kọ ahwo a sai su oma rai woma vi Ọghẹnẹ? Kọ eyero esuo ohwo nọ ọ hẹriẹ oma no ọrọ Ọghẹnẹ ọ te rehọ akpọ nọ ọ kare ẹmo, ethube, gbe ẹdhoguo-okienyẹ rọ ze? Kọ ojọ o sai ti si uvuhu no jẹ rehọ emamọ uzuazọ kẹ ahwo kpobi? Kọ ojọ o sai ti fi ẹyao, owho, gbe uwhu kparobọ? A ruẹrẹ esuo Ọghẹnẹ fihọ re o ru eyena kpobi.—Emuhọ 1:26-31.
14 Rọ kpahe ẹme avro avivẹ na, eme oke u re ti dhesẹ kpahe aghare ẹma ohwo? Kọ othọ Ọghẹnẹ obọ nọ ọ rọ ma ohwo evaọ oghẹrẹ utioye na? Kọ ọvo rai jọ ọ sai ti ru oware nọ ukiẹrẹ evaọ otọ odawọ? Kọ ahwo jọ a ti dhesẹ nọ a gwọlọ esuo Ọghẹnẹ viukpe ọ esuo omobọ ohwo?
[Uwoho nọ o rrọ ẹwẹ-obe avọ 13]
Ọghẹnẹ ọ kẹ uvẹ ulele re ahwo a te ọnyaba omodawọ rai
[Ọnọ o wo uwoho]
Irupre: Erọ ifoto NASA