Erere Usiuwoma na kẹ Ẹwho Ra

EVAỌ akpọ inẹnẹ na ma re yo nọ ahwo a rẹ ta nọ: “Ehri-izi Egagọ-Ileleikristi i w’iruo ho. I w’otọ họ evaọ akpọ ọkpakpakre inẹnẹ na.” Ghele na, ẹme nọ osu Hindu na Mohandas K. Gandhi ọ ta kugbe Ohwo-Ẹro Britain evaọ India, Lord Irwin, e hẹrioma no eriwo ọyena gaga. A ta nọ Lord Irwin ọ nọ Gandhi oware nọ o roro nọ u ti furie ebẹbẹ nọ e rọ udevie Great Britain avọ India na. Gandhi ọ tẹ tọlọ Ebaibol o te rovie kpohọ uzou avọ isoi orọ Matiu ọ tẹ ta nọ: “Okenọ orẹwho ra avọ ọmẹ a tẹ rọwo kugbe ọvo evaọ iwuhrẹ nọ Kristi o fihọ otọ evaọ Ovuẹ Ugbehru na, yọ ẹbẹbẹ akpọ na soso ma kuhọ no na orọnikọ ọmai ọvo ho.”

Ovuẹ oyena o ta kpahe ẹgwọlọ rọkẹ edikihẹ abọ-ẹzi gbe ẹjọ wowolẹ, udhedhẹ, ohrọ, gbe uyoyou ẹrẹreokie. Orọnikọ o brukpe ohwo-okpe ọvo ho rekọ o brukpe ofu nọ a re mu kẹ amọfa, orọnikọ ẹnwae-obro ọvo ho rekọ iroro isiuru ẹnwae-obro. O brukpe ugbẹfa orọo nọ o rẹ hẹriẹ iwou jẹ rọ uye bẹ emọ. O ta k’omai nọ: ‘Tube you enọ i mukpahe owhẹ, kẹ enọ o rẹ bẹ, siọ amọfa ẹdhọ evega ba eguo, ru amọfa epanọ whọ gwọlọ nọ a ru owhẹ.’ A te fi ohrẹ nana kpobi h’iruo o rẹ wha irere buobu ze. Epanọ ahwo nọ a be jọ ẹwho ra ru lele ai a bu te, ere ẹwho ra o re woma te!

Isẹri Jihova a rrọ obufihọ evaọ abọ nana. Ebaibol na o wuhrẹ i rai re a rọ adhẹẹ kẹ orọo. A rẹ rehọ emamọ izi wuhrẹ emọ rai. A re fiẹgbahọ epanọ uviuwou u wuzou te. Iviuwou okugbe yọ oghale kẹ ẹwho ra, tubẹ rọ kẹ orẹwho ra. Ikuigbe e vọ avọ iriruo egaga akpọ nọ e bẹre t’otọ evaọ okenọ ọgbakugbe uviuwou na o te whrehe nọ ọfariẹ-ogbe o je vihọ. Epanọ ahwo gbe iviuwou nọ Isẹri Jihova a fiobọhọ kẹ re a rria lele ehri-izi Ileleikristi i bu te, ere ethube, ọfariẹ-ogbe, gbe ugbarugba o rẹ kawo te evaọ ẹwho ra.

Ebẹbẹ ilogbo jọ nọ e be raha ewho gbe erẹwho họ omohẹriẹ uyẹ. Wo ohẹriẹ, Pita ukọ na ọ ta nọ: “Umuomẹ ẹro no nọ Ọghẹnẹ ọ rẹ jẹ ahwo ọvo rehọ họ, rekọ evaọ korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.” Yọ Pọl o kere nọ: “U gbe ti wo nọ ọjọ ọrọ Ju hayo Griki hi, ọvia gbe ọmuyẹ hẹ, ọzae gbe aye he: keme whai kpobi oma-ovo eva Kristi Jesu.” (Iruẹru 10:34, 35; Ahwo Galesha 3:28) Isẹri Jihova a jẹ onana rehọ. Ahwo uyẹ gbe ovioma kpobi a be rria je ruiruo kugbe evaọ oria uzou rai, evaọ iwou-egha, gbe evaọ ikoko.

Evaọ Africa ahwo uyẹ jọ a rẹ sae jọ kugbe he ababọ ohọre. Rekọ, evaọ ikokohọ Isẹri Jihova evaọ obei, ahwo uyẹ sa-sa a rẹ re emu, kiẹzẹ, jẹ gọ kugbe evaọ okugbe ọvo gbe omakugbe oruọruọ. U re gbe ahwo egọmeti unu a tẹ ruẹ onana. A t’ẹme kpahe oriruo ọrọ okugbe nọ o re no Egagọ-Ileleikristi uzẹme ze evaọ Amsterdam News, obe-usi New York, ọrọ August 2, 1958. Oware nọ o wha usi nana ze họ uruemu nọ a muẹrohọ evaọ okokohọ akpọ-soso nọ ma jọ obehru fodẹ na onọ Isẹri nọ i bu vi udhusoi-akuakpe ẹko egba ivẹ gbe ikpe isoi a jọ kokohọ evaọ New York City.

“Evaọ oria na kpobi ahwo-biebi, ewawae gbe erọ Ovatha-Ọre, erọ ekwa sa-sa evaọ uzuazọ nọ i no abọ akpọ na kpobi ze, a bi kuomagbe odode avọ oghọghọ. . . . Isẹri nọ e be gọ na nọ i no ekwotọ 120 ze a gọ kugbe no avọ udhedhẹ, bi dhesẹ kẹ ahwo America epanọ o lọhọ te re a ru ei. . . . Okokohọ na yọ oriruo obọdẹ ọrọ epanọ ahwo a rẹ sai ro ruiruo jẹ rria kugbe.”

Ahwo buobu a rẹ sae ta nọ ehri-izi Egagọ-Ileleikristi i w’iruo kẹ akpọ inẹnẹ hẹ. Ghele na, oware ofa vẹ u w’iruo no hayo oware vẹ u ti w’iruo? Ehri-izi Ileleikristi e rẹ sae jọ uvi erere otẹrọnọ a fi rai h’iruo evaọ ẹwho mai obọnana, yọ o te jọ ehri nọ ‘erẹwho, erua, gbe ahwo’ a ti ro kuomagbe evaọ akpọ na soso evaọ okenọ Uvie Ọghẹnẹ u ti su ahwo-akpọ.—Eviavia 7:9, 10.

[Ẹme nọ a fi ẹgba họ nọ ọ rrọ ẹwẹ-obe avọ 23]

Uyẹ gbe ovioma kpobi a bi ruiruo kugbe

[Ẹme nọ a fi ẹgba họ nọ ọ rrọ ẹwẹ-obe avọ 24]

Egagọ-Ileleikristi u w’iruo. Oware ofa vẹ u ruiruo no?