Si Kẹle Ọghẹnẹ
Ọmemama nọ O Te kẹ Ujiro
KỌ WHỌ nọ oma ra no ẹdẹjọ inọ, ‘Eme họ ẹjiroro uzuazọ?’ Ahwo nọ a ta nọ ẹkwoma eghrorotha ahwo a rọ ziọ akpọ a be sae ruẹ uyo onọ onana ha. Rekọ o rrọ ere he kẹ ahwo nọ a rọwo uzẹme uvevẹ na inọ obọ Jihova Ọghẹnẹ uzuazọ u noze. (Olezi 36:9) A riẹ inọ o wo ẹjiroro nọ ọ rọ ma omai. A dhesẹ ẹjiroro nana evaọ Eviavia 4:11. Joma ruẹ epanọ eme nana nọ Jọn ukọ na o kere fihotọ na i ro dhesẹ ẹjiroro nọ ma rọ rrọ uzuazọ.
Jọn o kere inọ ọ ruẹ ikọ-odhiwu nọ e be so ole jiri Ọghẹnẹ nọ: “Who teri, eyo Ọnowo nọ o re mie oro gbe adhẹẹ gbe ogaga, keme whẹ ọ ma eware na kpobi, jegbe fiki awere ra a rọ rọ, a rọ mae na.” Jihova ọvo o te ọnọ a rẹ kẹ oruaro gbe adhẹẹ otiọye na. Fikieme? Keme ọye “ọ ma eware na kpobi.” Kọ eme onana o rẹ wọ emama riẹ nọ i wo iroro ru?
Ikere nana e ta nọ Jihova o te ọnọ o re “mie” orro, adhẹẹ gbe ogaga. Avro ọ riẹ hẹ, ọye o wo orro, adhẹẹ gbe ogaga nọ o mae rro kpaobọ evaọ ehrugbakpọ. Rekọ ahwo-akpọ buobu a rọwo ho inọ ọye ọ ginẹ ma ai. Dede na, u wo ahwo jọ nọ a be jọ eware nọ ọ ma ruẹ ekwakwa-aghae riẹ. (Ahwo Rom 1:20) Fiki edẹro nọ a wo, oma o be wọ ae kẹ Jihova orro gbe adhẹẹ. A bi dhesẹ imuẹro ivevẹ na kẹ ahwo kpobi nọ a gwọlọ yo inọ Jihova họ ọnọ ọ ma eware igbunu nana kpobi, fikiere o te ọnọ ma rẹ gọ jẹ kẹ orro.—Olezi 19:1, 2; 139:14.
Kọ ẹvẹ Jihova o bi ro mi ogaga evaọ obọ idibo riẹ? Uzẹme, ohwo-akpọ ọvo ọ sae kẹ Ọmemama oride na ogaga ha. (Aizaya 40:25, 26) Rekọ fikinọ Ọghẹnẹ ọ ma omai evaọ uwoho riẹ, ma wo ọkpọ ekwakwa-aghae Ọghẹnẹ, ogaga yọ ovo rai jọ. (Emuhọ 1:27) Ma te gine wo edẹro kẹ eware nọ Ọnọ ọ ma omai o ru kẹ omai no, udu o rẹ wọ omai rehọ ogaga gbe ẹgba mai ro jiri jẹ kẹe orro. Ukpenọ ma rẹ rehọ ẹgba mai kpobi le eware obọmai ọvo, ma vuhumu inọ Jihova Ọghẹnẹ o te ọnọ ma rẹ rehọ ẹgba mai kpobi gọ.—Mak 12:30.
Kọ fikieme ma rọ rrọ uzuazọ? Abọ ekuhọ Eviavia 4:11 na o ta nọ: “Fiki awere [hayo, oreva] ra [eware kpobi nọ whọ ma] a rọ rọ, a rọ mae na.” Mai ọvo ma ma omai mai hi. Fiki oreva Ọghẹnẹ ma rọ rrọ uzuazọ. Fikiere, nọ ohwo o te bi yeri uzuazọ riẹ kpobi kẹ isiuru omobọ riẹ ọvo, uzuazọ riẹ u re wo otofa ha. Re ma ruẹsi wo uvi udhedhẹ, evawere, gbe evevọwẹ, o gwọlọ nọ ma re wuhrẹ kpahe oreva Ọghẹnẹ je yeri uzuazọ mai rọwokugbe oyena. Ere oruo ọvo ma te sae rọ ruẹ ẹjiroro nọ a rọ ma omai, nọ ma rọ rrọ uzuazọ.—Olezi 40:8.
[Ẹnọ i wo Uwoho nọ o rrọ ẹwẹ-obe avọ 19]
NASA, ESA, gbe A. Nota (STScI)