Si Kẹle Ọghẹnẹ

‘O Ọnowo, Whọ Riẹ Omẹ’

“U WO owha ovuọvo nọ o rẹ gbẹdẹ te onana ha, re ohwo ọ ruẹ nọ uvumọ ohwo ọ be daezọ riẹ hẹ, hayo bi wo otoriẹ ọdawẹ riẹ hẹ.”a Kọ who wo iroro itieye no ẹdẹjọ? Kọ o j’owhẹ oma no ẹdẹjọ inọ ohwo ọvo ọ be daezọ ra ha, hayo riẹ ẹbẹbẹ nọ whọ rẹriẹ ovao dhe he, kabikọ ewo otoriẹ ọdawẹ ra? O tẹ rrọ ere, eme nana e rẹ sae kẹ owhẹ omosasọ: Jihova ọ be daezọ idibo riẹ gaga te epanọ o bi ro muẹrohọ oware kpobi nọ o be via kẹ ae evaọ uzuazọ ikẹdẹ kẹdẹ rai. Eme ọ Devidi nọ e rrọ obe Olezi avọ 139 e kẹ imuẹro nana.

Fikinọ Devidi o wo imuẹro inọ Ọghẹnẹ o wo isiuru kpahe ọyomariẹ, o kere nọ: “O ỌNOWO, whẹ ọnọ ọ gwọlọ omẹ whọ tẹ riẹ omẹ!” (Owọ 1) Ẹme ẹwoho ọye Devidi ọ rọ ta ẹme evaọ etenẹ na. Ẹme Hibru nọ a jọ oria ikere nana fa nọ “gwọlọ” na, o rẹ sai dhesẹ epanọ a rẹ tọ gwọlọ ekwakwa-otọ na wọhọ ẹroo (Job 28:3), epanọ a rẹ kiẹ ẹkwotọ riwi (Ibruoziẹ 18:2), hayo epanọ a rẹ kiotọ ẹme evaọ ẹdhoguo (Iziewariẹ 13:14). Ẹhẹ, Jihova ọ riẹ omai ziezi te epanọ o rọ wọhọ ẹsenọ ọ be kiotọ kabọ kabọ uzuazọ mai. Ẹkwoma omobọriẹ nọ Devidi ọ ta ẹme kpahe inọ “omẹ” evaọ ikere yena, ọ be rọ ere wuhrẹ omai inọ Ọghẹnẹ o wo uvi isiuru kpahe idibo riẹ omomọvo. Ọ be kiẹ ai riwi, ọ tẹ riẹ ae omomọvo.

Devidi ọ ta haro kpahe epanọ Ọghẹnẹ ọ riẹ idibo riẹ te, inọ: “Whọ riẹ oke ẹkeria mẹ gbe oke etovrẹ mẹ; whọ riẹ ẹjiroro eva mẹ no anwọ abae ze.” (Owọ avọ 2) Evaọ ibiaro ohwo-akpọ, Jihova ọ rrọ ugbo obọ odhiwu thethabọ no omai. Ghele na, ọ riẹ oke ẹkeria mai, ẹsejọhọ nọ ma te ru iruẹru okpẹdoke na soso no, gbe nọ ma tovrẹ evaọ ohiohiẹ bi wobọ evaọ iruẹru ikẹdẹ kẹdẹ mai. Ọ tẹ jẹ riẹ iroro mai, isiuru mai, gbe eware nọ ma gwọlọ ru. Kọ o kẹ Devidi uduama inọ Jihova ọ be kiẹ ọyomariẹ kodo tere? Vievie, ukpoye, ọ tubẹ yare Ọghẹnẹ inọ ọ kiẹe riwi. (Owọ avọ 23 gbe 24) Fikieme?

Devidi ọ riẹ nọ emamọ ẹjiroro ọ be wọ Jihova kiẹ idibo riẹ riwi. Devidi o kere kpahe onana inọ: “Whọ gwọlọ ada mẹ via gbe oke ekiẹzẹ mẹ, [yọ whọ tubẹ riẹ idhere mẹ kpobi lafi. NW]” (Owọ avọ 3) Kẹdẹ kẹdẹ, Jihova ọ be ruẹ “ada” hayo idhere mai kpobi—ethobọ mai gbe iruo iwoma mai. Kọ eyoma mai ọ be tẹrovi manikọ ewoma mai? Ẹme Hibru nọ a jọ etenẹ fa nọ “gwọlọ” na, a sae rehọ iẹe dhesẹ epanọ a re “voro,” hayo “yẹyẹ” eware, wọhọ epanọ ohwo ọ rẹ yẹyẹ ẹgu rehọ o ve ku eyagha na fiẹ. Ẹme Hibru nọ o rẹ sai dhesẹ “rri ghaghae” oye a fa nọ ‘riẹ lafi’ na. Nọ Jihova ọ tẹ be kiẹ ẹme nọ idibo riẹ a be ta gbe eware nọ a bi ru kẹdẹ kẹdẹ, ọ be hai muẹrohọ uwoma nọ a ta hayo a ru. Fikieme? O rri omodawọ nọ a bi ru ro ru ei eva were ghaghae.

Olezi avọ 139 o wuhrẹ omai nọ Jihova o wo ọdawẹ odidi kpahe idibo riẹ. Ọ be kiẹ ai riwi je muẹrohọ ai nọ a bi yeri uzuazọ ikẹdẹ kẹdẹ rai na. Ere ọ be rọ riẹ ebẹbẹ nọ a be rẹriẹ ovao dhe, je bi wo otoriẹ edada iroro gbe ọyawọ nọ ebẹbẹ nana e be wha se ai. Kọ oma o gbẹ be wọ owhẹ re whọ gọ Ọghẹnẹ nọ o wo ọdawẹ ere? O tẹ rrọ ere, o rẹ sai mu owhẹ ẹro inọ: ‘Iruo ra gbe uyoyou nọ whọ be rehọ fiki riẹ dhesẹ’ e rẹ thọrọ Jihova ẹro vievie he.—Ahwo Hibru 6:10.

[Oruvẹ-obotọ]