Jọ Abọdekọ Ẹme O Fi Obọ Họ Kẹ Owhẹ

Kọ whọ gbẹ rọwo nọ Jesu họ Owuhrẹ nọ ọ mai rro nọ ọ rria akpọ na no? Ẹsejọhọ whọ daoma no re whọ rọ aro kele oghẹrẹ nọ ọ jẹ rọ rehọ enọ gbe etadhesẹ wuhrẹ amọfa. Kọ whọ kareghẹhọ nọ okenọ o je wuhrẹ ahwo, ẹsibuobu ọ jẹ hae ta nọ “rekọ” hayo ukpoye nọ ọ tẹ ta ẹme jọ fihotọ no?

Ahwo buobu a rẹ rọ “rekọ” dhesẹ ohẹriẹ nọ o rrọ eme ivẹ nọ a ta fihotọ. Ẹsejọ dede, ma rẹ riẹ okenọ ma re ro fi “rekọ” na ba ẹmeọta mai hi. Wọhọ oriruo, ohwo ọ sae ta nọ, “A ta nọ ibi-ire na kpobi e ware no, rekọ enana e re ware he.” Hayo, “Ọmọtẹ na ọ jẹ hae dhomovuọ gaga, rekọ enẹna ọ sasa kẹhẹ.”

Evaọ ẹmeọta utionana, whọ rẹ kake ta ẹme jọ fihotọ no, kẹsena whọ vẹ rehọ ẹme wọhọ rekọ, ukpoye, gbe evaọ abọdekọ riẹ ro mu ẹme ọfa họ. Whọ sai je fiẹgba họ ẹme jọ evaọ ẹme nọ whọ be ta ro fi ohẹriẹ họ ẹme na. Whọ tẹ be rọ oghẹrẹ utiona ta ẹme, ẹme ra ọ rẹ jọ vevẹ.

O tẹ make rọnọ ahwo jọ a rẹ ta ẹme enẹ evaọ ẹvẹrẹ rai hi, u fo nọ ma riẹ nọ ẹmeọta otiọna o re fi obọ họ gaga. Eme itiena buobu e rrọ Ebaibol na. Jesu ọ jẹ hai fi ohẹriẹ họ ẹme riẹ ẹsibuobu ro ru ẹme vẹ. Wọhọ oriruo, ọ ta nọ: ‘Ahwo a re tu ukpẹ re a rehọ iẹe họ otọ ọkpọro gbe he, rekọ ehru ure adada.’ ‘Mẹ ze te raha Uzi na ha, rekọ re me ru ei gba.’ ‘Wha yo nọ a ta nọ, “Who bruẹnwae he.” Rekọ mẹ ta kẹ owhai, kohwo kohwo nọ o re ri aye . . . ’ ‘A ta nọ, “Ẹro avọ ẹro, ubiakọ avọ ubiakọ.” Rekọ mẹ ta kẹ owhai nọ, who mudhe kẹ ọnọ oyoma ha. Rekọ ohwo nọ ọ tẹ tehe agba ọze ra, rẹriẹ ọdekọ kẹ ei re.’—Mat. 5:15, 17, 27, 28, 38, 39.

Ma rẹ jọ eria Ebaibol efa ruẹ oghẹrẹ ẹmeọta nọ a jọ dhesẹ ohẹriẹ nọ o rrọ eme ivẹ. E rẹ sai fi obọ họ kẹ owhẹ wo otoriẹ ẹme hayo riẹ edhere nọ ọ mai woma nọ whọ sai ro ru oware. Whọ tẹ rrọ ọyewọ, roro kpahe ohẹriẹ nọ o rrọ ẹme nana: ‘Whai esẹ, wha kpọ emọ rai eva ha, rekọ wha ru ai re a yo ẹme je wuhrẹ ai orọ Ọnowo na.’ (Ẹf. 6:4) O hae jọnọ Pọl ukọ na ọ ta ọvo nọ, ọsẹ (hayo oni) a wuhrẹ emọ fihọ edhere Ọnowo na, yọ ẹme ọvona ọ ta na. Ukpoye, ohẹriẹ nọ o fihọ ẹme na u ru ẹme na wo ẹgba ziezi nọ ọ ta nọ, ‘a kpọ emọ na eva ha, rekọ a wuhrẹ ai edhere Ọnowo na.’

Uwhremu na evaọ uzou ovona Pọl o kere nọ: ‘Orọnọ uwo gbe azẹ ma bi lele họra na ha, rekọ izi iyoma nọ e rọ eva eria ikpehru.’ (Ẹf. 6:12) Ẹsejọhọ ohẹriẹ oyena nọ Pọl o fihọ ẹme na u fi obọ họ kẹ owhẹ riẹ nọ whọ rrọ ohọre ulogbo. Orọnọ ahwo-akpọ gheghe who bi lele họre na ha, rekọ izi iyoma.

WO ERERE NO ABỌDEKỌ ẸME ZE

Eria sa-sa e rrọ obe Ahwo Ẹfẹsọs na nọ Pọl o jo fi ohẹriẹ họ ẹme. Ma te roro kpahe eme itieye na, u re fi obọ họ kẹ omai riẹ otọ eme Pọl na vevẹ gbe oware nọ u fo nọ ma re ru.

U ti woma re who se je roro kpahe eme nọ Pọl o fi ohẹriẹ họ evaọ obe Ahwo Ẹfẹsọs uzou avọ 4 gbe 5 nọ a ruẹrẹ fihọ ẹkpẹti na. Nọ who bi se kpahe ohẹriẹ nọ o rrọ eme na, roro kpahe omara. Nọ omara nọ: ‘Evaọ uzẹme, oghẹrẹ uruemu vẹ me wo? Mẹ tẹ riẹriẹ ovao dhe oware nọ a ta na hayo oware utioye ofa jọ, ẹvẹ me ti ru? Abọ vẹ evaọ eme ivẹ na ahwo a rẹ sae ta nọ u kiekpahe omẹ?’ Whọ tẹ ruẹ nọ u wo oria jọ nọ o gwọlọ nọ who re jo ru inwene, whọ raha oke he. Jọ abọdekọ ẹme na o fi obọ họ kẹ owhẹ.

Wha sae jẹ rọ eme nọ e rrọ ẹkpẹti na ru uwuhrẹ evaọ etoke egagọ uviuwou. Ahwo uviuwou na a sai kaki se eme na kpobi unọjọ utọjọ. Kẹsena omọvo jọ o ve se abọ ọsosuọ ẹme na, ọ vẹ kuvẹ re omọfa ọ ta oware nọ abọdekọ na o bi fiẹgba họ. Onana o rẹ sai fi obọ họ kẹ uviuwou na ta ẹme kugbe ziezi kpahe epanọ a sai ro fi abọdekọ ẹme na họ iruo ziezi. A tẹ be hae rọ oghẹrẹ utiona kiẹ eme na riwi o rẹ sai fi obọ họ kẹ ahwo uviuwou na dhesẹ emamọ uruemu nọ u fo nọ Oleleikristi o re wo evaọ uwou na gbe oria ofa kpobi.

Whọ tẹ riẹ epanọ ohẹriẹ nọ o rrọ ẹme u wuzou te, whọ te hai kaki rri rai mu evaọ Ebaibol na jẹ rehọ ae ru iruo evaọ usiuwoma ota. Wọhọ oriruo, whọ sae ta kẹ ohwo nọ whọ nyaku evaọ usiuwoma nọ: “Ahwo buobu a rẹ ta nọ ẹzi ohwo ọ rẹ gbẹ jọ uzuazọ nọ ohwo na o te whu no, rekọ rri oware nọ Ebaibol ọ ta.” Hayo whọ sae ta kẹ ohwo nọ who bi wuhrẹ obe nọ: “Ahwo buobu a rẹ ta nọ Ọghẹnẹ avọ Jesu yọ omọvo na; rekọ eme Ebaibol ọ ta kpahe iẹe? Kọ ovẹ whọ rọwo?”

Ẹhẹ, eria buobu e rrọ Ikereakere na nọ a jọ fi ohẹriẹ họ ẹme nọ ma re wuhrẹ oware no ze, yọ e rẹ sai fi obọ họ kẹ omai nya evaọ edhere Ọghẹnẹ. Yọ ma sae rọ abọdekọ ẹme fi obọ họ kẹ amọfa riẹ uzẹme na.

Eme jọ nọ I Wo Abọdekọ Evaọ Obe Ahwo Ẹfẹsọs Uzou avọ 4 gbe 5

Wha daoma rọ ẹkpẹti nana ru uwuhrẹ evaọ etoke egagọ uviuwou

Ma gbẹ jọ emaha ofa ha, nọ a fi kpenẹ a kpenẹ . . . fiki ẹghẹ ahwo gbe ẹghẹ ọwhariọ, eva uruemu ẹghẹ eviẹhọ.”—4:14.

‘Ikpoye, wha ta uzẹme eva uyoyou, re ma he kpohọ aro evaọ edhere kpobi, eruọ evaọ ọye nọ o wo uzou, Kristi.’—4:15.

“Otoriẹ [ahwo erẹwho na] u re biebi, . . . fiki ogbori nọ [ọ] rọ eva rai.”—4:18, 19.

‘Rekọ ere wha wuhrẹ eva Kristi hi, no wha yo jẹ jọ eva riẹ wuhrẹ.’—4:20, 21.

“Wha si obọnọ uruemu ẹdẹe nọ wha je yeri, ohwo anwae na.”—4:22.

‘Re wha ru iroro rai zihe ruọ ọkpokpọ jẹ whẹ ohwo ọkpokpọ na họ oma.’—4:23, 24.

“Jọ ọnọ o re tho uji na o gbe tho ofa ha.”—4:28.

‘Ukpoye a jọ o ru iruo, re ọ rehọ abọ riẹ ru oware nọ uwoma.’—4:28.

“Wha jọ eme ogbẹta u no enu rai ze he.”—4:29.

‘Rekọ onọ uwoma nọ o rẹ wha ohwo udu.’—4:29.

“Wha siobọno oghẹrẹ ẹgo oyoma kpobi, evedha, ofu, edo, ekela, gbe oware enwoma kpobi.”—4:31,NW.

“Rekọ wha dhesẹ uwowou kẹ ohwohwo, wo ohrọ-oriọ, jẹ rọvrẹ ohwohwo no eva ze.”—4:32, NW.

“Igberedha, gbe egbegbe kpobi, hayo eware amọfa eguọlọ, ufo re a gbẹ jọ udevie rai fodẹ ae he.”—5:3.

‘Ukpoye wha hẹ kẹ uyere.’—5:4.

“Okejọ wha jọ ebi.”—5:8.

‘Rekọ enẹna wha rọ elo eva Ọnowo na.’—5:8.

“Wha kuomagbe iruo ebi [hi] nọ e rẹ mọ ibi hi.”—5:11.

‘Ukpoye wha ru ai via.’—5:11.

“Wha fiẹrohọ otọ enẹna eva onya rai, o jọ wọhọ igheghẹ hẹ.”—5:15.

‘Rekọ wọhọ iwoareghẹ, wha raha oke he.’—5:15, 16.

“Wha jọ wọhọ igheghẹ hẹ.”—5:17.

‘Rekọ wha riẹ otọ epanọ oreva ỌNOWO na o rrọ.’—5:17.

“Wha jọ ọgba udi o da ha, nọ o rẹ vrẹ ẹta.”—5:18.

‘Rekọ jọ Ẹzi na ọ vọ owhai eva.’—5:18.

“Re ukoko na o ruẹsi wo erru evaọ aro [Kristi], ababọ oka hayo iriẹ nọ i siku hayo oware utioye jọ.”—5:27, NW.

“Rekọ re o jọ ọrẹri jẹ kare epe.”—5:27, NW.

“Ohwo ọvo o re mukpahe oma obọriẹ hẹ.”—5:29.

‘Rekọ ọ rẹ hẹ kuọ oma riẹ jẹ sẹro riẹ, wọhọ epanọ Kristi o ru ukoko na.’—5:29.