Ono Họ Ovie Uvie Ọghẹnẹ?

• Ọnọ Ọghẹnẹ ọ salọ. “Mẹ omamẹ mẹ rọ ovie mẹ mu no . . . Mẹ te kẹ owhẹ erẹwho re e jọ ukuoriọ ra jẹ kẹ owhẹ otọakpọ na soso re o jọ ora.”​—Olezi 2:6, 8.

• Ohwo uyẹ Devidi ovie na. “A yẹ ọmọ jọ kẹ omai no, a kẹ omai ọmọzae jọ no . . . Isuẹsu riẹ e te kẹre thabọ yọ udhedhẹ u ti wo oba ha, evaọ agbara-uvie Devidi gbe uvie riẹ re ọ ruẹse rehọ iẹe dikihẹ gaga.”​—Aizaya 9:6, 7.

• Ọnọ a ti yẹ evaọ Bẹtlẹhẹm. “O whẹ Bẹtlẹhẹm . . . , eva ra ọnọ ọ te jọ osu kẹ omẹ . . . o ti no ze . . . Oruaro riẹ u ti te oka avọ oka otọakpọ na.”​—Maeka 5:2, 4.

• Ọnọ ahwo-akpọ a te se je kpe. “A jẹ riẹ kufiẹ, yọ ma se rie gbe oware ovo ho. . . . A duwu i rie fiki uzioraha mai; ọ reoja gaga fiki iruthọ mai.”​—Aizaya 53:3, 5.

• Ọnọ a te kpare no uwhu ze jẹ kẹ oruaro. “Whọ te siọ omẹ ba Uki hi. Whọ te kuvẹ re ọnọ ọ talamu owhẹ na ọ ruẹ ọgọdọ họ. . . . Evawere e rrọ obọze ra bẹdẹ bẹdẹ.”​—Olezi 16:10, 11.

Jesu Kristi O Gine Te Ohwo nọ O re Su

Evaọ ikuigbe ahwo-akpọ, omọvo ọvo a jọ omariẹ ruẹ eware nana kpobi no nọ o te ọnọ ọ rẹ jọ Osu, ọye họ Jesu Kristi. Ukọ-odhiwu jọ ọ tubẹ ta kẹ Meri, oni Jesu inọ: “Ọghẹnẹ ọ te kẹe agbara-uvie Devidi ọsẹ riẹ, . . . yọ Uvie riẹ u ti wo oba ha.”​—Luk 1:31-33.

Okenọ Jesu ọ jọ otọakpọ, ọ jọ osu hu. Ukpoye, ọ te jọ Ovie Uvie Ọghẹnẹ nọ o ti su ahwo-akpọ no obọ odhiwu ze. Fikieme Jesu o ro te je fo ohwo nọ ọ rẹ jọ Osu? Joma ta kpahe eware nọ Jesu o ru okenọ ọ jọ otọakpọ.

• Jesu ọ rẹrote amọfa. Jesu o fiobọhọ kẹ te ezae te eyae, te emaha te ekpako, ghelọ oghẹrẹ nọ a jọ gbe oria nọ a no ze kẹhẹ. (Matiu 9:36; Mak 10:16) Okenọ ọmoti jọ ọ jẹ lẹe nọ: “O tẹ ruọ owhẹ, whọ sai ru omẹ fo,” ohrọ riẹ o re Jesu, o te siwi ei.​—Mak 1:40-42.

• Jesu o wuhrẹ omai epanọ ma sai ro ru Ọghẹnẹ eva were. Ọ ta nọ: “Wha sae gbodibo kẹ Ọghẹnẹ gbe Efe he.” Ọ tẹ jẹ ta nọ ma re ru eware nọ ma gwọlọ nọ amọfa a ru kẹ omai kẹ ai re. Ehri-uzi nana a se Obọdẹ Uzi Uruemu na. U te no ere no, o wuhrẹ nọ orọnikọ oware nọ ma bi ru ọvo o rrọ Ọghẹnẹ oja ha, rekọ te eware nọ ma bi roro kpahe. Fikiere, re ma sai ru Ọghẹnẹ eva were, o gba omai họ nọ ma rẹ whaha ekpehre iroro. (Matiu 5:28; 6:24; 7:12) Jesu ọ ta nọ re ma sae ginẹ wereva, o gba omai họ nọ ma re wuhrẹ oware nọ Ọghẹnẹ ọ gwọlọ nọ ma ru, ma ve je ru ei.​—Luk 11:28.

• Jesu o wuhrẹ omai epanọ ma re ro you amọfa. Eme nọ Jesu ọ ta gbe eware nọ o ru i duobọte ahwo nọ a jẹ gaviezọ kẹe udu. “Oghẹrẹ nọ o ro wuhrẹ gbe eware nọ o wuhrẹ i te gbe ogbotu na unu, keme o je wuhrẹ ae wọhọ ohwo nọ o wo udu.” (Matiu 7:28, 29) O wuhrẹ i rai nọ: “Wha gbẹ hai you ewegrẹ rai.” Ọ tubẹ lẹ roro ejọ evaọ usu ahwo nọ a kpe rie, inọ: “Ọsẹ, rọvrẹ ai, keme a riẹ oware nọ a bi ru hu.”​—Matiu 5:44; Luk 23:34.

Jesu o gine te ohwo nọ o re su akpọ na keme ọ rrọ wowou yọ ọ rẹ sai ru ẹgwọlọ ahwo-akpọ kẹ ae. Rekọ oke vẹ o ro muhọ esuo?