3 | Iku Ahwo nọ E Rrọ Ebaibol na E Sai Fiobọhọ kẹ Owhẹ

EBAIBOL NA O DHESẸ NỌ . . . Ezae gbe eyae nọ e gọ Ọghẹnẹ evaọ oke anwae a jọ ahwo “wọhọ omai na.”—JEMIS 5:17.

Oware nọ Onana U Dhesẹ

A jọ Ebaibol na gbiku ezae gbe eyae buobu nọ a ta epanọ eware e jọ kẹ ae. Nọ ma te bi se iku rai, ma sai se ku iku ohwo jọ nọ o wo ọkpọ ẹbẹbẹ mai.

Oghẹrẹ nọ Iku Rai E Sai ro Fiobọhọ

Nọ oware o te ru omai, ma rẹ gwọlọ nọ amọfa a riẹ epanọ oware na o be kẹ omai uye te. Yọ epọvo na ohwo nọ ọ be mọ ẹyao iroro ọ rẹ gwọlọ nọ ahwo a riẹ epanọ ẹyao na ọ be kẹe uye te. Ma te se iku ahwo nọ e rrọ Ebaibol na, ma rẹ ruẹ nọ eware nọ i ru ahwo jọ eye i bi ru omai na. Onana u re fiobọhọ kẹ omai thihakọ nọ ma tẹ be ruawa hayo roro iroro egaga, keme ma riẹ nọ eware nana e via kẹ amọfa no re.

Eware nọ i ru ahwo jọ evaọ oke anwae e kẹ rai uye te epanọ a rọ ta nọ a gbẹ sai thihakọ họ. Kọ oware nọ u ru owhẹ ẹdẹ jọ o kẹ owhẹ uye ga te epanọ who ro roro nọ whọ gbẹ sai thihakọ họ? O jọ ere kẹ Mosis, Elaejah, gbe Devidi.—Ikelakele 11:14; 1 Ivie 19:4; Olezi 55:4.
A jọ Ebaibol na gbiku aye jọ nọ a re se Hana. Ebaibol na ọ ta nọ “eva e jẹ were Hana vievie he” keme o yẹ ọmọ họ yọ ovruvrẹ riẹ ọ jẹ hae wọviẹ iẹe.—1 Samuẹle 1:6, 10.
A jọ Ebaibol na gbiku ọzae jọ nọ a re se Job re. Dede nọ o wo ẹrọwọ gaga, eware nọ e via kẹe e kẹ riẹ uye te epanọ ọ rọ ta nọ: “Uzuazọ mẹ o vẹso omẹ no; mẹ gwọlọ gbẹ jọ uzuazọ họ.”—Job 7:16.

Ma te se kpahe epanọ ahwo nana nọ a gbiku rai fihọ Ebaibol na a sai ro thihakọ jẹ whaha ekpehre iroro, u re fiobọhọ kẹ omai thihakọ eware nọ e be kẹ omai uye.

Epanọ Ebaibol na O bi ro Fiobọhọ kẹ Kevin

Ọkora Ọgaga Ọ rẹ Jọ Omẹ Oma

“Nọ mẹ jọ enwenọ ikpe udhuvẹ gbikpe, a tẹ jọ obọ ọspito vuẹ omẹ nọ me wo ẹyao ọkora ọgaga. Ẹsejọ oma o rẹ riẹ omẹ ru ziezi, me ve roro nọ me wo ẹgba nọ mẹ sai ro ru oware kpobi. Rekọ ẹsibuobu, o rẹ jọ omẹ oma nọ o mai woma re me whu.”

Epanọ Ebaibol na O bi ro Fiobọhọ kẹ Omẹ

“Iku Pita evaọ Ebaibol na i bi fiobọhọ kẹ omẹ. Fikinọ eware buobu e thọ riẹ obọ, o je rri omariẹ nọ o fioka ha. Rekọ ukpenọ Pita o re rri omariẹ enẹ ọvo, ọ nyusu kugbe ahwo nọ a fiobọhọ kẹe. Ẹdẹ kpobi nọ ọkora mẹ na ọ tẹ ga, eware nọ e thọ omẹ obọ e rẹ kẹ omẹ uye gaga, me ve bi roro nọ me fioka ha. Nọ o tẹ via ere, mẹ rẹ rọ aro kele Pita. Mẹ rẹ jọ kugbe egbẹnyusu mẹ nọ e rẹ tuduhọ omẹ awọ.

“Iku omọfa jọ evaọ Ebaibol na nọ ọ rẹ lẹliẹ oma sasa omẹ họ, iku Devidi. Ẹsibuobu nọ o te rri eware nọ e be via kẹe, eva e rẹ were iẹe he, yọ eware nọ e thọ riẹ obọ e jẹ kẹe uye gaga re. Epanọ o jọ Devidi oma na ere o rrọ kẹ omẹ re. Ẹsejọ mẹ rẹ ta eme hayo ru eware jọ nọ mẹ rẹ vioja rai uwhremu na. Eme nọ Devidi ọ ta evaọ obe Olezi 51 na e rẹ sasa omẹ oma. Evaọ owọ avọ 3, Devidi ọ ta nọ: ‘Mẹ riẹ iruthọ mẹ vevẹ, yọ uzioraha mẹ o rrọ aro mẹ ẹsikpobi.’ Enẹ o rẹ jọ omẹ oma nọ ọkora mẹ na ọ tẹ rrọ gaga, ekpehre eware ọvo me re roro kpahe omamẹ. Devidi ọ ta evaọ owọ avọ 10 na nọ: ‘Kẹ omẹ udu ofuafo, O Ọghẹnẹ, re who fi ẹzi ọkpokpọ họ omẹ oma, onọ o rrọ gaga.’ Mẹ rẹ ta ọkpọ eme Devidi nana re. Mẹ rẹ lẹ se Ọghẹnẹ re o fiobọhọ kẹ omẹ rri omamẹ epanọ u fo. Ofariẹ, eme nọ ọ ta evaọ owọ avọ 17 na e rẹ sasa omẹ oma. Ọ ta nọ: ‘O Ọghẹnẹ, whọ te siọ udu nọ o vọ avọ ọkora gbe uweri hi.’ Oria Ebaibol nana o ru omẹ riẹ nọ Ọghẹnẹ o you omẹ.

“Fikinọ mẹ be hai se iku ahwo nọ e rrọ Ebaibol na je roro kpahe eware nọ Jihova o bi ru kẹ omẹ, me wo ẹruore nọ eware i ti woma evaọ obaro. Me fievahọ Jihova inọ o ti ru eyaa riẹ gba. Eware nana i bi fiobọhọ kẹ omẹ thihakọ.”