Ugho nọ A be Raha Fihọ Ẹmo Evaọ Akpọ na U Bu Vi Edọla Imaima Ivẹ No—Eme Ebaibol na Ọ Ta?

Evaọ 2022, ugho nọ a jọ akpọ na raha fihọ ẹmo u bu te edọla imaima ivẹ, ima-odu egba ivẹ gbe udhuvẹ ($2.24 trillion), koyehọ enaera imaima egba-izii gbe udhegbizii (₦929,000,000,000,000). Oware nọ o mae whae ze nọ a rọ raha ugho bu te ere họ, fikinọ Russia ọ vẹruọ Ukraine. Ukoko jọ nọ a re se Stockholm International Peace Research Institute (SIPRI), o niyẹrẹ evaọ Ane 2023 kpahe ekiakiẹ jọ nọ a ru. A jọ iyẹrẹ na ta nọ evaọ 2022:

• Ugho nọ erẹwho Europe a raha fihọ ẹmo o rehọ “isia ikpegbesa (13%) bu vi epaọ ọsosuọ, yọ unu nana họ unu nọ o mai bu kpaobọ nọ erẹwho Europe a raha no evaọ ukpe ọvo no anwọ 1991 ze.”

• “Araha Russia…o rehọ isia izii gbọ (9.2%) bu vi epaọ ọsosuọ, yọ onana o wha riẹ ze nọ o ro no orẹwho avọ isoi kpohọ orẹwho avọ esa nọ o be mae raha ugho kpaobọ evaọ akpọ na.”

• United States họ orẹwho nọ o be mae raha ugho kpaobọ fihọ ẹmo, keme “a tẹ ghale ugho nọ a be raha fihọ ẹmo evaọ akpọ na kpohọ abọ udhusoi, ae ọvo a be raha bu te ọgbagbizii (39%).”

Edọktọ jọ nọ a re se Dr. Nan Tian, nọ ọ jọ usu ahwo nọ a niyẹrẹ SIPRI na ọ ta nọ: “Nọ orọnọ anwọ ikpe jọ ze na egọmeti akpọ na a be raha ugho fihọ ẹmo vi epaọ ọsosuọ na, onana u dhesẹ nọ ma be rria akpọ nọ o bi yoma kẹdẹ kẹdẹ.”

A jọ Ebaibol na ruẹaro nọ erẹwho nọ e mae ga evaọ akpọ na a te họre ohwohwo, yọ Ebaibol na o dhesẹ oware nọ o rẹ sae wha udhedhẹ ze.

Ebaibol na ọ ruẹaro kpahe ẹmo nọ a ti fi evaọ eria sa-sa

• A jọ Ebaibol na se oke nọ ma be rria na “oke urere.”—Daniẹl 8:19.

• A jọ obe Daniẹl ruẹaro nọ evaọ oke urere na, erẹwho nọ e mai wo ogaga evaọ akpọ na a ti hrowo oma. Erẹwho nana a ti “muabọ,” koyehọ a ti lele ohwohwo hrowo oma re a riẹ ọnọ ọ mae ga. Edhere jọ nọ a ti ro ru onana họ, a te rọ “ekwakwa-aghae” hayo igho dẹ eware ẹmo buobu.—Daniẹl 11:40, 42, 43.

Re whọ gbẹ riẹ kpahe eruẹaruẹ Ebaibol nana viere, iviena rri ividio na Eruẹaruẹ nọ I Rugba—Daniẹl Uzou avọ 11.

Oghẹrẹ nọ uvi udhedhẹ o te rọ ziọ akpọ na

• Ebaibol na ọ ta nọ Ọghẹnẹ o ti si egọmeti ahwo-akpọ no. Ọ “te rehọ uvie jọ mu, onọ a te raha vievie he. Yọ a te rehọ uvie nana kẹ amọfa ha. O te guọghọ jẹ rehọ ivie nana kpobi te oba, oye ọvo u ve ti dikihẹ bẹdẹ bẹdẹ.”—Daniẹl 2:44.

• Kẹle na, Jihovaa Ọghẹnẹ o ti ru oware nọ ahwo-akpọ a be sai ru hu. O ti ru nọ udhedhẹ o te rọ jọ akpọ na soso bẹdẹ bẹdẹ. Ẹvẹ o ti ro ru ei? Ọ te rọ Uvie riẹ nọ ọ rrọ obọ odhiwu raha ekwakwa ẹmo kpobi no, je si ozighi notọ riẹriẹriẹ.—Olezi 46:8, 9.

Re who gbe wuhrẹ kpahe oware nọ Uvie Ọghẹnẹ u ti ru, se uzoẹme na “Under God’s Kingdom ‘Peace Will Abound.’”