“Di Wan Dem We Liv Op Tu Wa Gad Waahn Dem Fi Du A-Go Api”

1-2. (a) Wa som govament a du tu Jeuova piipl, bot wa Jeuova piipl no tap du? (b) Aalduo dem a fait gens wi wa mek wi stil api? (Yu kyan tel wi bout di picha pan di kova.)

RAIT ya nou ya, di wok we di Jeuova Witnis dem a du anda lakdong iina muo dan 30 difrant konchri. Iina som a dem konchri ya, di govament dem lak op di breda an sista dem iina prizn. Bot wa yu tingk dem did du mek dem lak dem op? Aal dem did a du a riid dem Baibl an a stodi it, an tel ada piipl bout di sitn dem we dem biliiv iina, an ga’a dem miitn dem. An dem neehn a tek no said iina palitiks niida. A dem sitn ya dem did a du mek dem lak dem op. Aalduo dem a fait gens di breda an sista dem so moch dem stil a liv op an a du wa Jeuova waahn dem fi du,b an dem api tu!

² Yu mait-a aal si som picha a som a di breda an sista dem we a tan op chrang an a du wa Jeuova se an yu si ou dem luk api. Wa mek yu tingk dem stil api? Dem api kaa dem nuo se dem a du wa Jeuova waahn dem fi du. (1 Kr. 29:17a) Jiizas did se: “Di piipl dem we ada piipl mek sofa jos kaaz dem liv ou Gad waahn piipl fi liv, Gad bles unu. . . Mek unuself api wen dem sitn de apm tu unu; jomp op an dong wid jai iina unu aat, kaa nof gud sitn put dong . . . fi unu.”​—Mat. 5:10-12.

WI KYAN FALA DEM PIIPL YA

3. Bies pan wa Aks 4:19, 20 se, wa di apasl dem did du wen dem did a fait gens dem, an wa mek dem did du dat?

³ Dem breda an sista ya we di govament a mek tingz aad fi dem jos kaaz dem a du wa Jeuova se, a go chuu di sed ting laik wa Jiizas apasl dem did go chuu kaa dem did a priich bout im. A did muor dan wan taim di joj dem an di liida dem “waan dem se fi no priich ar tiich iina Jiizas niem tu di piipl at aal at aal.” (Aks 4:18; 5:27, 28, 40) So wa Jiizas apasl dem did du? (Riid Aks 4:19, 20.) Dem did nuo se a sumadi we av muor powa dan dem ruula de did se dem fi go ‘priich tu piipl an mek dem nuo se Jiizas a di wan we Gad pik.’ (Aks 10:42) So Piita an Jan weehn a taak op fi dem, an a tel di ruula dem se dem a-go du wa Gad se dem fi du an no wa piipl tel dem fi du, so dem naa go tap taak bout Jiizas. So wa dem did a tel dem se, a dat wa Gad tel dem fi du muor impuotant dan wa dem tel dem fi du.

4. Azkaadn tu Aks 5:27-29, wa di apasl dem did du an ou wi kyan du laik dem?

⁴ Chuu Kristiyan tide a du an a se di siem ting laik wa di apasl dem did se, dem se: “Wi afi du we Gad se wi fi du, bot wi no afi du wa piipl se wi fi du.” (Riid Aks 5:27-29.) Aalduo dem did biit dem, dem neehn tap liv op an du wa Jeuova waahn dem fi du. Wen di apasl dem lef wich paat di liida dem de, dem did “wel api kaaz Gad did tingk dem gud inof fi mek dem sofa fi Jiizas Krais,” an dem gwaan priich sed wie!​—Aks 5:40-42.

5. Wa’a som kwestiyan wi niid fi get di ansa fa?

⁵ Di apasl dem did du som tingz we mek wi afi aks som kwestiyan, laik wen dem did se wi afi du wa Gad se wi fi du bot wi no afi du wa piipl se wi fi du. We dem se neehn go gens wa di Baibl se, wen it se “evribadi mos du wa di govament se”? (Ruo. 13:1) Bot ou wi kyan mek shuor se wi du wa di apasl Paal se an “rispek an fala di ruula dem fi di konchri an di piipl dem we iina powa,” an stil liv op an du wa wi tap-a-tap Ruula se wi fi du?​—Taitos 3:1.

“DI GOVAMENT” DEM

6. (a) Wen Ruoman 13:1 se “di govament,” a uu it a taak bout, an wa an wa wi fi gi dem? (b) Wa wi kyan se bout di powa we di govament dem av?

⁶ Riid Ruoman 13:1. Iina da vors ya, wen it taak bout “di govament” dem it a taak bout di piipl dem we iina powa an a ruul uova ada piipl. An Kristiyan fi du wa dem se dem fi du kaaz a di govament mek tingz ron sortn an sortn wie iina di konchri, an mek shuor se piipl kip di laa, an som a di taim dem aal tek op fi Jeuova piipl dem tu. (Rev. 12:16) Das wai Jeuova tel wi se wi fi pie dem wa wi uo dem, an fi pie wi taks, an gi dem di rispek an big op we dem fi get. (Ruo. 13:7) Bot yu si di powa we dem govament ya av, dem onggl av it kaa Jeuova lou dem fi av it. A dat Jiizas did mek wan a di Ruoman ruula dem we niem Ponchos Pailat nuo. Wen Ponchos Pailat did a se im kuda kil Jiizas ar im kuda mek im gwaan liv, Jiizas mek im nuo se: “Yu wudn av no powa uova mi ef Gad neehn gi yu it.” (Jan 19:11) So jos laik ou Pailat neehn av no muo powa dan Gad, a siem so di govament dem we a ruul tide na’av muor powa dan Gad.

7. Wa’a som a di sitn dem we di govament mait aks wi fi du we wi naa go du, an wa di ruula dem niid fi nuo se?

⁷ So wi du evriting we di govament dem tel wi fi du az lang az dem no tel wi fi du sitn we Gad laa se wi no fi du. Laik wen dem aks di man dem iina di konchri fi ton suoja an fait iina waar, wan Kristiyan naa go du dat. c An wi naa tap worship Jeuova an riid wi Baibl an wi buk an pamplet dem aal ef di govament dem se wi no fi du dat. Eni ruula we yuuz dem powa fi mek piipl sofa kaa dem a fala Jiizas Krais an a du wa Jeuova waahn dem fi du, Jeuova a si wa dem a du an dem afi go pie fi it!​—Iik. 5:8.

8. Wa mek wi se di powa we di govament dem av difrant fram di powa we Jeuova av?

⁸ Di Baibl mek wi nuo se “di govament” dem av “nof nof powa.” Bot wid aal a dat it no miin se dem av muor powa dan Gad. It mek wi nuo se nobadi at aal no av muor powa dan Jeuova. A im a di wan we av “aal a di powa.”​—Dan. 7:18, 22, 25, 27.

‘DI WAN WE AV AAL A DI POWA’

9. Wa Daniyel did si iina di vijan dem?

⁹ Di prafit we niem Daniyel did get som vijan, an iina dem vijan de it shuo se kaaz a di powa we Gad av, di govament dem we a ruul kyaahn du notn muor dan wa Gad lou dem fi du. Di fos ting we Daniyel si a fuo animal we big an powaful, an dem animal de did av fi du wid som govament we ron tingz iina di worl aredi an som ada govament we did a-go ron tingz iina di worl. Govament laik Babilan, Miido-Porja, Griis an Ruom, an den yu wuda av di wan we a ron tingz tide we staat op fram Ruom we niem Britn an Merika. (Dan. 7:1-3, 17) Iina di vijan Daniyel did si wan chuon iina evn wid Jeuova Gad sidong pan it an aal a im ienjel dem roun im. (Dan. 7:9, 10) An di neda sitn we Daniyel si afta dat a sitn we fi mek di ruula dem ya nou nuo wa a-go apm tu dem ef dem no chienj.

10. Bies pan Daniyel 7:13, 14, 27, a uu Jeuova tek di powa we di govament dem av an gi’it tu, an wa dis mek wi nuo bout Jeuova?

¹⁰ Riid Daniyel 7:13, 14, 27. Gad tek we di powa we di govament dem pan ort av fi ruul an gi’it tu som ada piipl we fi get it an we av muor powa dan dem. Bot a uu a dem piipl de? A Jiizas we di Baibl se a “sumadi we luk laik wan man” an di 144,000 we di Baibl kaal di wan dem we uoli we bilang tu di wan we av aal a di powa, an dem a-go ruul fi eva an eva. (Dan. 7:18) So wen di Baibl taak bout di wan we av aal a di powa wi nuo se a Jeuova it a taak bout kaaz a im wan av di powa fi du wa im du.

11. Wa els Daniyel did rait dong we mek wi si se a Jeuova av aal a di powa?

¹¹ Wa Daniyel did si iina di vijan mek wi memba sitn we im did se bifuo, wen im did se di Gad we de a evn get rid a som king an put som iina powa. An Daniyel did se tu se: “Di Muos Ai Gad, im a di riil Big Man. Im kyan tek it fram sumadi an gi’it tu uu im waahn gi’it tu.” (Dan. 2:19-21; 4:17) So Jeuova eva riili get rid a som king an set op ada king? Ye man!

12. Tel wi bout wan taim wen Jeuova did get rid a wan king we a ruul. (Luk pan di picha.)

¹² Jeuova shuo wi se di powa we “di govament” dem av kyaahn mach op tu fi’im powa. Si chrii riizn wa mek wi se so ya. Yu av Fiero we did a ron tingz dong a Iijip we did av Jeuova piipl dem az sliev dong de, an im mek op im main se im naa let dem go. Bot Jeuova frii dem an joun aaf Fiero iina di Red Sii. (Ek. 14:26-28; Sa. 136:15) Den yu av wan king we did de a Babilan we niem Belshazar. Im uol wan a di bigis paati dem an staat fi big op imself an staat fi disrispek di Muos Ai Gad, an bifuo im priez Jeuova, im priez gad we mek outa silva an guol. (Dan. 5:22, 23) Bot Gad kot im dong tu saiz kaa da siem nait de dem kil Belshazar, an di Miid an Porjan dem get im govament an staat fi ruul. (Dan. 5:28, 30, 31) An wan neda wan a did King Erad Agripa 1 we did a ruul iina Palistain. Im did kil di apasl we niem Jiemz an den im tek di apasl Piita an put im iina jiel kaa im did plan fi kil im tu, bot Jeuova neehn mek im get fi du dat. “Wan a di Laad ienjel chraik dong Erad” kil im ded.​—Aks 12:1-5, 21-23.

13. Tel wi bout wan taim wen Jeuova yuuz im powa gens som king uu did a wok tugeda fi fait gens im an im piipl dem.

¹³ Bot a no jos wan wan king Jeuova yuuz im powa fi get rid a. Somtaim im afi yuuz im powa gens muor dan wan king we gyang op gens im piipl. Jeuova did afi elp di Izrelait piipl dem fi fait aaf 31 king fram Kienan so dat dem kuda tek uova di lan we Jeuova did pramis fi gi dem. (Jash. 11:4-6, 20; 12:1, 7, 24) An den yu did av som difrant difrant king fram Siriya, wan a dem did niem Beniedad. Jeuova elp im piipl fi fait aaf an win im an 32 ada king fram Siriya.​—1 Ki. 20:1, 26-29.

14-15. (a) Wa di king dem we did niem Nebikadneza an Daraiyos did se bout Jeuova govament? (b) Wa wan a di man dem we did rait wan a di Saamz did se bout Jeuova an im piipl dem?

¹⁴ Uol iip a taim Jeuova shuo se im a di wan we av aal a di powa. Laik wan a di taim wen King Nebikadneza a buos an a shuo aaf bout ou ‘im big an powaful’ bifuo im riyalaiz se Jeuova a di wan we big an powaful an Im fi get di big op. Siek-a dat Jeuova mek im mad out an wen im kom bak iina im rait main im priez an big op di “Muos Ai Gad”, an im se “[Jeuova] a-go ruul fi eva an eva. Nobadi kyaahn tap im fram du wa im waahn fi du.” (Dan. 4:30, 33-35) Afta dem did du tingz fi si ef Daniyel wuda liv op, laik wen dem did chuo im dong iina di uol we dem kip di laiyan dem an Jeuova siev im, di king we niem Daraiyos se: “Piipl fi fried an av nof rispek fi Daniyel Gad kaa im a di chuu Gad an di wan we a-go de ya fi eva. Fi im Kindom naa go mash op an im a-go ruul fi eva.”​—Dan. 6:7-10, 19-22, 26, 27, ftn.

¹⁵ Wan a di man dem we rait wan a di Saamz dem se: “Jeuova mek wa di konchri dem did a plan fi du no wok out, an im mash op di piipl dem plan tu.” An im se “Di piipl dem uufa Gad a Jeuova a-go wel api; a dem ya piipl ya im pik fi bi fi’im piipl.” (Sa. 33:10, 12) So aal a dis mek wi si wa mek wi fi liv op an du wa Jeuova se!

A YA SO IT DON FA

16. Wen di “wos sofarieshan” a gwaan wa wi kyan shuor bout, an wa mek? (Luk pan di picha.)

¹⁶ Wi riid di Baibl an si di ting dem we Jeuova du aredi. Bot wa im a-go du iina di fyuucha? Wan ting wi nuo fi shuor a das wen di “wos sofarieshan” a gwaan, Jeuova a-go siev di wan dem we stik tu im. (Mat. 24:21; Dan. 12:1) An im a-go du dis wen aal a di konchri dem gyang op gens im piipl dem iina wan wikid wie. Im kaal dem konchri ya Gag we kom fram Miegag. Aal ef a aal a di 193 konchri dem we mek op di Yuunaitid Nieshan gyang op gens Gad piipl, dem kyaahn go tan op gens di wan we av aal a di powa an im aami we de a evn. Jeuova se: “Mi a-go big op miself an mi a-go mek di piipl dem fram aal a di konchri dem nuo uu mi bi an dem afi go nuo se a mi a Jeuova.”​—Izii. 38:14-16, 23; Sa. 46:10.

17. Wa di Baibl se a-go apm tu di king dem pan di ort we a ruul ya nou an wa a-go apm tu di piipl dem we a liv op an a du wa Jeuova se dem fi du?

¹⁷ Wen di konchri dem we niem Gag we kom fram Miegag gyang op gens Gad piipl, a dat a-go mek di Aamagedan waar staat. An dis a-go bi di laas taim dem gyang op gens Jeuova piipl kaa Jeuova a-go don dem. (Rev. 16:14, 16; 19:19-21) Bot “a onggl di wan dem we a du wa rait a-go liv pan di ort, an di wan dem we a liv op an a du wa rait a-go tan pan it.”​—Pr. 2:21.

WI FI LIV OP AN DU WA JEUOVA SE WI FI DU

18. Wa uol iip a Kristiyan redi fi du, an wa mek? (Daniyel 3:28)

¹⁸ Fi uol iip a ier nou, nof Kristiyan we a sorv Gad di rait wie did redi fi go a jiel an did redi fi ded tu, kaa dem lov Jeuova an dem nuo se im a di wan we av di rait fi ruul uova evribadi an evriting. Dem wan ya komiin laik di Iibruu bwai dem we dem did fling iina di faiya an Jeuova siev dem kaa dem chos iina Jeuova we av aal a di powa an du wa im se.​—Riid Daniyel 3:28.

19. Wen Jeuova a joj im piipl dem, wa im a-go luk fi si ef dem a du, an kaa wi nuo dis wa wi a-go du?

¹⁹ Dievid did mek wi nuo wa mek it impuotant fi wi liv op an du wa Jeuova se, wen im se: “Jeuova a-go joj di piipl dem. Wen yu a joj mi Jeuova, mi a beg yu luk pan di gud sitn dem we mi a du, an ou mi a liv op an du wa yu se.” (Sa. 7:8) Wan neda taim im rait an se: “Kaa mi waahn kip sief mi a liv op an a du wa rait.” (Sa. 25:21) Rait ya nou ya, notn no beta dan fi wi liv op an du wa Jeuova Gad se an stik tu im no mata wa! An den wi a-go fiil laik wan a di man dem we rait wan a di Saamz dem we se: “Di wan dem we liv op an a du wa Gad waahn dem fi du a-go api, an dem a fala Jeuova laa tu.”​—Sa. 119:1.