WEN WI TAAK TU PIIPL FI DI FOS TAIM
LESN 3
Shuo Se Yu Kier Bout Piipl
Sitn We Yu Kyan Riizn Pan: “Wen sumadi av lov iina dem aat, dem kain tu piipl.”—1 Kor. 13:4.
Wa Jiizas Did Du
1. Wach di VIDIYO, ar riid Jan 9:1-7. Den ansa dem kwestiyan ya:
Wa a di fos ting we Jiizas did du—mek di blain man get beta ar tel im bout di gud nyuuz?—Luk pan Jan 9:35-38.
Wa mek wa Jiizas did du wuda mek di man waahn fi ier di gud nyuuz?
Wa Wi Lorn Fram Wa Jiizas Did Du?
2. Ef sumadi kyan si se wi kier bout dem, dem wi muor waahn fi lisn tu wi.
Du Laik Wa Jiizas Did Du
3. Shuo se yu fiil it fi di sumadi. Chrai fi tingk bout ou dem fiil.
Aks yuself: ‘Wa mait-a de pan im main? Wa mi kuda se we im wuda waahn fi ier ar we kuda elp im?’ Wen yu tingk bout dem sitn ya, it wi elp yu fi du sitn we mek dem si se yu riili kier bout dem fram yu aat.
Shuo se yu kier bout dem an lisn tu wa dem waahn fi taak bout. Ef dem a tel yu ou dem fiil bout sitn ar a taak bout wan prablem we dem a go chuu, no bada go taak bout notn els.
4. Shuo se yu rispek dem an taak tu dem nais. Wen yu fiil it fi sumadi an yu riili waahn fi elp dem, dem a-go kyan si’it iina di wie ou yu taak tu dem. Tingk gud bout wa yu a-go se an ou yu a-go se it bifuo yu staat taak, an chrai fi no se notn we wuda mek dem fiil a wie.
5. Elp dem. Chrai an si wa an wa yu kyan du fi elp di sumadi. Wen wi shuo se wi kain tu piipl an wi kier bout dem, dem mait-a waahn fi taak tu wi.