Mek It Iizi Fi Dem Andastan

Wa Jiizas Did Du

VIDIYO: Jiizas Yuuz Wan Tuori Fi Shuo Wi Ou Wi Faada Tek Kier A Wi

1. Wach di VIDIYO, ar riid Matyu 6:25-27. Den ansa dem kwestiyan ya:

1. Ou Jiizas did yuuz wan tuori fi mek wi si ou Jeuova tek kier a wi?

2. Iivn duo Jiizas did nuo uol iip a tingz bout di bod dem, wa a di wan likl ting we im did tel dem bout dem? Wa mek dat a did wan gud wie fi tiich?

Wa Wi Lorn Fram Wa Jiizas Did Du?

2. Wen wi tiich iina wan wie we iizi fi piipl andastan, dat wi elp dem fi memba wa wi a tiich dem an di sitn dem wi riich iina dem aat.

Du Laik Wa Jiizas Did Du

3. No chat tu moch. No bada tel dem evriting we yu nuo bout di sitn we unu a taak bout. Jos diil wid wa de iina di buk ar pamplet we unu a stodi. Wen yu aks dem wan kwestiyan, gi dem taim fi ansa. Ef yu si se dem no nuo di ansa ar dem se sitn we go gens wa di Baibl se, yuuz som ada kwestiyan fi elp dem fi riizn pan tingz. Wen yu si se di sumadi andastan di mien ting we yu a tiich, jos go tu di neks ting.

4. Elp dem fi yuuz di sitn dem we dem nuo aredi fi andastan di nyuu sitn dem we yu a-go tiich dem. Laik ef yu a-go tiich dem bout ou Gad a-go mek ded piipl kom bak alaiv, bifuo yu staat da lesn de, yu kyan tek likl taim fi taak bout wa dem nuo aredi bout wa apm tu piipl wen dem ded.

5. Wen yu a yuuz tuori an dem ting de fi tiich, yuuz dem gud. Bifuo yu yuuz wan tuori ar sitn laka dat, aks yuself:

1. ‘Da tuori ya a-go miks op miks op dem ed?’

2. ‘Mi Baibl stodi a-go kyan andastan it?’

3. ‘Dem a-go memba di mien ting we dem did a lorn an no onggl jos a tingk bout di tuori?’