Ou Yu Kyan Nuo Ef Sitn Chuu?

1. Ou yu fiil bout di chuut we de iina Gad Wod?

DI CHUUT we de iina Gad Wod, di Baibl, a sitn we Jeuova piipl dem lov. An wi biliiv evriting we it se. (Ruo. 10:17) Wi nuo se Jeuova a yuuz im aaganaizieshan tide fi “sopuot an uol op di chuut.” (1 Tim. 3:15) An wen ‘di wan dem we a liid wi’ yuuz di Baibl fi mek wi nuo wa Jeuova waahn wi fi du, wi api fi lisn tu dem an du wa dem se.​—Iib. 13:17.

2. Azkaadn tu Jiemz 5:19, wa kyan apm aal afta wi lorn di chuut we de iina Gad Wod?

² Bot aalduo wi lov di chuut we de iina Gad Wod, an wi chos se wa Jeuova aaganaizieshan a tiich wi a di chuut, Sietan kyan stil chrik wi wid im lai dem. (Riid Jiemz 5:19.) An a dat Sietan waahn fi du​—im waahn wi fi no chos wa iina di Baibl an di sitn dem we Jeuova aaganaizieshan tel wi fi du.​—Ifii. 4:14.

3. Wa mek wi fi nuo di chuut an lov it? (Ifiijan 6:13, 14)

³ Riid Ifiijan 6:13, 14. Suun suun Sietan a-go yuuz wan bag a lai fi mek aal a di piipl dem iina difrant difrant konchri jain op tugeda gens Jeuova. (Rev. 16:13, 14) An wi nuo se Sietan a-go wok aad aad fi chrik chrik op Jeuova piipl dem tu. (Rev. 12:9) So a das wai wi afi lorn fram nou ou fi nuo wen sitn chuu an wen sitn a lai, an ou wi kyan du di sitn dem we wi nuo se a chuu. (Ruo. 6:17; 1 Pii. 1:22) An dis a wan big ting kaaz a onggl so wi a-go go chuu di wos sofarieshan.

4. Wa wi a-go luk pan iina da lesn ya?

⁴ Iina da lesn ya, wi a-go luk pan tuu a di wiez dem we wi fi av we a-go elp wi fi nuo se sitn a chuu bies pan wa wi nuo di Baibl se. An wi a-go si ou wen wi av dem tuu wiez ya, it kyan elp wi fi fala di sitn dem we Jeuova aaganaizieshan tel wi fi du. Den wi a-go luk pan chrii a di ting dem we wi kyan du we a-go elp wi fi stik tu di chuut.

SOM WIEZ WE WI FI AV WE A-GO ELP WI FI NUO SE SITN A CHUU

5. Wen wi av nof rispek fi Jeuova, ou dat kyan elp wi fi nuo ef sitn a chuu?

⁵ Av nof rispek fi Jeuova. Ef wi av nof rispek fi Jeuova, dat miin se wi lov im an wi naa go du notn fi ort im. An kaa wi waahn fi du di sitn dem fi mek Jeuova api, wi niid fi nuo wa rait fram wa rang, an di sitn dem we a chuu fram di sitn dem we a lai. (Pr. 2:3-6; Iib. 5:14) An ef wi a-go mek Jeuova api, wi afi lov im muo dan ou wi fried a piipl, kaa nof a di sitn dem we piipl waahn wi fi du a no di ting dem we Jeuova waahn wi fi du.

6. Kaa di ten Izrel spai dem did fried a di Kienanait dem, ou dat mek dem taak sitn we no riili go so?

⁶ Yu si wen wi fried a piipl muor dan ou wi rispek Jeuova, it kyan mek wi biliiv sitn we a no chuu. Tingk bout wa did apm wid di 12 man dem we dem did sen fi go spai out di Lan we Jeuova did pramis fi gi di Izrel piipl dem. Ten a di man dem did fried a di Kienanait dem muor dan ou dem did lov Jeuova. Kaaz a dat, dem mek di Izrelait piipl dem nuo se di Kienanait dem chrangga dan dem an dem kyaahn fait dem an win dem. (Nom. 13:27-31) Di Kienanait piipl dem did chrangga dan di Izrelait piipl dem fi chuu, bot dem kuda win dem ef Jeuova did elp dem. So wa wuda elp dem ten man de a ef dem did a tingk bout wa Jeuova did waahn di Izrelait dem fi du. An ef dem did tek di taim fi tingk bout wa Jeuova did jos du fi dem, dat wuda mek dem si se di chrent we di Kienanait man dem av a no notn wen it kom aan tu aal a di powa we Jeuova av. Jashwa an Kieleb neehn tan laik dem ten man de, dem did waahn fi mek Jeuova api. So dem mek di piipl dem nuo se ef dem du wa Jeuova se, im wuda mek shuor se dem get di lan.​—Nom. 14:6-9.

7. Wa wi kyan du fi rispek Jeuova muor an muor? (Luk pan di picha tu.)

⁷ Ef wi a-go rispek Jeuova muor an muor, wi afi mek shuor se evriting we wi mek op wi main fi du a sitn we a-go mek im api. (Sa. 16:8) Wen yu a riid di Baibl, yu kyan aks yuself: ‘Wa mi wuda du ef dis did apm tu mi?’ Laik yu kyan picha se yu de de an a tek iin wa di ten Izrelait man dem we did spai out di lan a se. Yu wuda biliiv wa dem a se bout di Kienanait dem an staat fi fried a dem tu, ar yu wuda du wa Jeuova Gad waahn yu fi du kaa yu lov im? Kaa di Izrelait dem neehn biliiv di chuut we Jashwa an Kieleb did a tel dem, it did mek uol iip a dem ded iina di wildanes an neehn get fi go iina di Lan we Jeuova pramis dem.​—Nom. 14:10, 22, 23.

8. Wa a wan a di wiez dem wi fi wok aad fi av, an wa mek?

⁸ Wi fi ombl. Jeuova mek di wan dem we ombl demself nuo di chuut. (Mat. 11:25) An a kaa wi did ombl wiself mek wi lou sumadi fi tiich wi di chuut. (Aks 8:30, 31) Bot wi afi mek shuor se wi no staat fi get ful a wiself. Kaa wen wi ful a wiself, wi mait-a staat fi fiil se piipl fi tek wa wi se siem wie laik ou dem tek wa di Baibl an Jeuova aaganaizieshan se.

9. Wa a-go elp wi fi gwaan ombl wiself?

⁹ Ef wi a-go gwaan ombl wiself, wi afi memba se wi a no notn wen it kom aan tu ou big an powaful Jeuova bi. (Sa. 8:3, 4) An wi kyan prie an aks Jeuova fi elp wi fi ombl wiself so das im kyan tiich wi an mek wi nuo wa fi du. An wen wi du dat, Jeuova wi yuuz im Wod, di Baibl, an Im aaganaizieshan fi mek wi nuo ou im tingk bout tingz, an dat beta dan eniting els we wi kuda kom op wid. Wan a di sitn dem we yu kyan du wen yu a riid di Baibl a fi luk ou Jeuova lov piipl we ombl, an ou im iet it wen piipl ful a demself an tingk se dem beta dan ada piipl. An ef yu get no speshal wok fi du fi Jeuova, chrai aad aad fi ombl yuself.

WA KYAN ELP WI FI STIK TU DI CHUUT NO MATA WA?

10. A uu an uu Jeuova did chuuz fi mek im piipl dem nuo wa dem fi du?

¹⁰ Gwaan chos di sitn dem we Jeuova aaganaizieshan tel wi fi du. Wen Jeuova did a ruul uova di Izrelait piipl dem, im did yuuz Muoziz an Jashwa fi mek dem nuo di sitn dem we im waahn dem fi du. (Jash. 1:16, 17) Wen di Izrelait dem did chos se wa dem man ya a se a wa Jeuova waahn dem fi du, dem get nof blesn. An uol iip a ier afta dat, Jeuova did a yuuz di 12 apasl dem fi mek di breda an sista dem iina di difrant difrant kanggrigieshan dem nuo wa fi du. (Aks 8:14, 15) An afta dat, yu did av som ada elda iina Jeruusilem we did a elp wid da wok de tu. Wen di breda an sista dem iina di kanggrigieshan dem du wa dem man ya tel dem fi du, dem “get chrangga an chrangga iina wa dem biliiv an evridie muor an muor piipl jain dem gruup.” (Aks 16:4, 5) An a siem so it go iina fi wi taim tu. Wen wi du wa Jeuova aaganaizieshan tel wi fi du, wi get nof blesn tu. Bot ou yu tingk Jeuova wuda fiil ef wi mek op wi main se wi naa lisn tu di wan dem we im a yuuz fi tel wi wa fi du? Fi get di ansa fi da kwestiyan ya, wi a-go luk pan wa did apm tu di Izrelait dem wen dem did a go iina di Lan we Jeuova pramis dem.

11. Wa did apm tu di wan dem we did a fait gens Muoziz iina di taim wen Jeuova did pik im fi liid di Izrelait dem? (Luk pan di picha tu.)

¹¹ Wen di Izrelait dem did a go iina di Lan we Jeuova pramis dem, som a di tap man dem staat fi fait gens Muoziz an a se im naa no rait fi de tel dem wa fi du. Dem kliem se a no jos Muoziz wan did a du di sitn dem we rait iina Jeuova yai, aal a dem did a dwi’it tu, an Jeuova did de mongks dem tu. (Nom. 16:1-3) Bot aalduo aal a dem did a du wa Jeuova waahn dem fi du, a Muoziz Jeuova did pik fi liid dem. (Nom. 16:28) An di man dem we did a fain faalt wid Muoziz did riili a fain faalt wid wa Jeuova tel dem fi du. Dem onggl did a tingk bout wa dem waahn, dem neehn a tingk bout wa Jeuova waahn. Dem did waahn muor powa, an waahn piipl fi si dem an big dem op. Bot Jeuova did kil aaf dem man de we did a fait gens Muoziz, an im did get rid a uol iip a di piipl dem we did jain op wid dem tu. (Nom. 16:30-35, 41, 49) Dis mek wi si se Jeuova no api wid di wan dem tide we a fait gens di sitn dem we im aaganaizieshan tel wi fi du.

12. Wa mek wi kyan aalwiez chos di sitn dem we Jeuova aaganaizieshan tel wi fi du?

¹² Wi kyan aalwiez chos di sitn dem we Jeuova aaganaizieshan tel wi fi du, kaa wen sitn fi chienj, weda a sitn we wi andastan fram di Baibl ar a ou wi priich an tiich, di wan dem we a liid wi naa ich fi chienj dem sitn de. (Pr. 4:18) An dem du dis kaa dem lov Jeuova. An wen dem mek op dem main fi du sitn, dem mek shuor se dem naa tiich notn difrant fram wa di Baibl se.

13. Wen Paal did taak bout “di sitn dem we [im] tiich,” a wa im did a taak bout, an wa wi fi du wid dem sitn de?

¹³ “Yu si di sitn dem we mi tiich, tek kier an fala dem, no tiich notn difrant.” (2 Tim. 1:13) Wen Paal did taak bout ‘di sitn dem we im a tiich,’ im did a taak bout aal a di sitn dem we Jiizas tiich we de iina di Baibl. (Jan 17:17) An a dem sitn ya aal a di sitn dem we wi biliiv bies pan. An Jeuova aaganaizieshan aalwiez a tiich wi fi stik tu di sitn dem we di Baibl tiich. Wen wi du dat, wi kyan shuor se Jeuova a-go bles wi.

14. A ou som a Jiizas falara dem neva ‘tek kier an fala aal a di sitn dem we Jiizas tiich we de iina di Baibl’?

¹⁴ Wa kuda apm ef wi no ‘tek kier an fala aal a di sitn dem we Jiizas tiich we de iina di Baibl’? Tingk bout wa did apm iina di taim wen di fos set a Kristiyan dem did de bout: Som a di breda an sista dem did av it fi se Jeuova die kom aredi. An dat did apm kaa it luk laik se wan leta did a go roun, we luk laik se a Paal did rait it, we se Jeuova die kom aredi. An kaa som a di breda an sista dem we de iina Tesalonaika neva tek di taim fi fain out ef a chuu, dem staat fi biliiv da lai de an tel ada piipl se a so it go. Bot ef dem did memba di sitn dem we Paal did tiich dem wen im did de de wid dem, dem wuda nuo se notn no go so. (2 Tes. 2:1-5) Paal did tel di breda an sista dem se dem no fi biliiv evriting we dem ier. An fi elp dem, iina di laas paat a di sekan leta we Paal did rait tu dem, im tel dem se: “Dis a mi, Paal. Mi a rait dem wod ya wid mi uona an fi shuo unu se da leta ya a fram mi. A so mi rait aal a mi leta dem.”​—2 Tes. 3:17.

15. Wa wi kyan du fi no mek di piipl dem we a fait gens wi chrik chrik wi op wid dem mek op tuori dem? Tel wi bout wan a di taim wen sitn laik dis apm. (Luk pan di picha dem tu.)

¹⁵ Wi kyan lorn nof tingz fram wa Paal did tel di breda an sista dem iina Tesalonaika. Wan a di sitn dem we wi lorn a dat wen wi ier sitn we no mach op wid wa wi lorn fram di Baibl, an wen wi ier som tuori we shak wi we wi kyaahn biliiv se a so it go fi chuu, wi fi tingk ef dem riili mek sens. Iina di konchri dem we did paat a di Suoviyet Yuuniyan, di piipl dem we did a fait gens wi did a sen roun wan leta an mek it luk laik se it kom fram di worl ed afis. Di leta did a mek som a di breda dem nuo se dem fi staat wan difrant aaganaizieshan, wan we neehn av notn fi du wid Jeuova aaganaizieshan. Bot di breda an sista dem we did a stik tu Jeuova aaganaizieshan neehn mek dat fuul dem, kaa dem did si se wa di leta a se neva mach op wid di sitn dem we dem did nuo aredi. A siem so tide, som a di taim di piipl dem we a fait gens wi yuuz di intanet an dem ting de fi tel wi lai fi chrai plit plit wi op. So insted-a ‘mek nobadi twis op wi ed an fraitn wi so dat wi kyaahn iivn tingk chriet,’ wi fi tek di taim fi tingk bout di sitn dem we wi ier ar di sitn dem we wi riid fi si ef dem mach op wid di sitn dem we wi lorn aredi.​—2 Tes. 2:2; 1 Jan 4:1.

16. Azkaadn tu Ruoman 16:17, 18, wa wi fi du ef sumadi ton we fram di chuut?

¹⁶ Stik tu di wan dem we a stik tu Jeuova. Jeuova waahn di uol a wi fi sorv im tugeda az wan. An dat a-go onggl apm ef wi stik tu di chuut, kaa enibadi we ton we fram di chuut, a chrai dem a chrai fi plit op di kanggrigieshan. An Jeuova tel wi se wi “no [fi] av notn fi du wid dem,” kaa ef wi miks op miks op wid dem, dat kyan mek wi ton we fram di chuut tu.​—Riid Ruoman 16:17, 18.

17. A ou it elp wi wen wi nuo di sitn dem we a chuu an wi stik tu dem?

¹⁷ Wen wi nuo di sitn dem we chuu an stik tu dem, it a-go elp wi fi stie kluos tu Jeuova. (Ifii. 4:15, 16) An it a-go mek Sietan no kech wi wid aal a im lai dem, an wi naa go biliiv di sitn dem we di piipl dem we a fala im a tiich, an it a-go elp wi fi go chuu wen di wos sofarieshan a gwaan. An wen wi stik tu di sitn dem we chuu, ‘Gad, di onggl wan we kyan gi wi piis iina wi aat an main, im wi bles wi.’​—Fil. 4:8, 9.