Wi Fi Briev Laik Ziedak

1-2. A uu Ziedak did bi? (1 Kranikl 12:22, 26-28)

PICHA dis: Yu si 340,000 man de wan plies fi mek Dievid ton king a Izrel. Fi chrii die dem did de de api a taak wid dem wan aneda an a sing sang fi priez Jeuova. Di wie ou dem did api yu kuda tan a di il dem nier Ebran an ier dem. (1 Kr. 12:39) Iina da kroud de yu did av wan yong man we niem Ziedak we nobadi mait-a neehn nuo se did di de. Bot Jeuova mek shuor se wi nuo se im did di de. (Riid 1 Kranikl 12:22, 26-28.) Bot a uu Ziedak did bi?

² Ziedak a did wan priis we wok wid Abaiyataar, di liida fi di priis dem. An Jeuova did mek im waiz so im kuda nuo wa Jeuova did waahn fi apm. (2 Sam. 15:27) So piipl wuda go tu im wen dem waahn sumadi fi elp dem fi nuo wa fi du. An im did briev tu. So iina da lesn ya wi a-go luk pan wa im did du fi shuo se im did briev.

3. (a) Wa mek Jeuova piipl dem afi briev? (b) Wa wi a-go luk pan iina da lesn ya?

³ Iina dem laas die ya, Sietan a du evriting we im kyan du fi presha Gad piipl fi du wa rang. (1 Pii. 5:8) Bot miintaim wi a wiet pan Jeuova fi get rid a Sietan an da wikid worl ya, wi afi briev. (Sa. 31:24) Mek wi luk pan chrii wie we wi kyan du laik Ziedak an shuo se wi briev.

SHUO SE A GAD GOVAMENT YU SE

4. Wa mek wi afi briev fi shuo se a Gad govament wi a bak? (Luk pan di picha tu.)

⁴ Wi nuo se Jeuova piipl a du evriting we dem kyan du fi shuo se a Gad govament dem a se, bot wi afi briev fi du dat. (Mat. 6:33) Laik wi afi briev fi du di sitn dem we Jeuova waahn wi fi du an fi priich di gud nyuuz bout im Kindom govament. (1 Tes. 2:2) An wi afi briev fi no tek no said iina palitiks. (Jan 18:36) Pan tap a dat, nof a Jeuova piipl dem a diil wid moni prablem, ar dem biit biit dem op an chriit dem bad, ar lak dem op iina prizn kaa dem naa tek no said iina palitiks ar go fait iina no waar.

5. Wa mek Ziedak did afi briev fi go elp Dievid?

⁵ Ziedak neehn jos go a Ebran kaa im did api se Dievid did ton king. Bot im go de wid im suod an dem ting de redi fi go elp Dievid fait. (1 Kr. 12:38) So Ziedak did redi fi go wid Dievid an go fait fi di Izrel piipl dem. Im mait-a did yong bot im did briev bad.

6. Wa Dievid did du fi shuo se im briev, an ou dat did elp Ziedak? (Saam 138:3)

⁶ Ziedak did av wol iip a man roun im we did chrang an briev, so dat did elp im fi briev tu. Laik yu did av Dievid we did briev an a liid di Izrel piipl dem wen dem a go a waar, an dis did mek aal a di piipl dem iina Izrel redi fi bak im. (1 Kr. 11:1, 2) Wen Dievid did a fait gens im enimi dem, im aalwiez dipen pan Jeuova fi elp im. (Sa. 28:7; riid Saam 138:3.) An Ziedak did av som ada man we im kuda fala tu, laik Jeyaiyada an im bwai pikni Benaiya we kuda fait gud, an 22 ada liida fi di piipl dem we did di de wid Dievid. (1 Kr. 11:22-25; 12:26-28) Aal a dem man ya du sopm fi shuo se a Dievid dem waahn fi ruul dem.

7. (a) A uu wi av ya nou we a shuo se dem briev we wi kyan fala? (b) Wen yu wach di vidiyo wid Breda Nsilu, wa yu lorn fram it?

⁷ Wen wi luk pan som piipl we a du tingz fi shuo se a Gad govament dem a bak an wi si ou dem briev an no friedi friedi, it kyan elp wi fi briev tu. Fi wi King, Jiizas Krais, neva mek nobadi presha im fi get miks op iina palitiks an dem ting de iina da worl ya we Sietan a kanchuol. (Mat. 4:8-11; Jan 6:14, 15) Bot im aalwiez dipen pan Jeuova fi elp im. An wi av wol iip a yong breda nou we naa go fait iina waar ar get miks op iina palitiks an dem ting de we wi kyan fala tu. Wi kyan luk pan som a di tuori dem bout dem laif we de pan jw.org.a

ELP YU BREDA AN SISTA DEM

8. Wa mait-a apm we mek di elda dem afi briev so dat dem kyan elp di breda an sista dem?

⁸ Jeuova piipl dem lov fi elp out dem wan aneda. (2 Kor. 8:4) Bot som a di taim dem afi briev fi du dat. Laik wen waar brok out iina wan ieriya, di elda dem nuo se di breda an sista dem a-go niid elp fi go aan, an dem a-go niid tingz laik Baibl an buk an pamplet an dem ting de, an fuud an waata an dem ting de tu. Aalduo sopm kyan apm tu dem, di elda dem stil du wa dem niid fi du so dat dem kyan go gi di breda an sista dem wa dem niid fi go aan. (Jan 15:12, 13) Wen di elda dem du dem sitn ya, dem a shuo se dem briev laik Ziedak.

9. A wa 2 Samwel 15:27-29 se Dievid did aks Ziedak fi du? (Luk pan di picha tu.)

⁹ Dievid bwai pikni Absalam did mek op im main se im a go kil Dievid, so dat im kuda staat fi ruul. (2 Sam. 15:12, 13) Dievid did afi mikies an ron we fram Jeruusilem! So im tel im sorvant dem se: “Git op! An kom mek wi ron we, kaaz ef Absalam kech wi, non a wi naa go get we fram im.” (2 Sam. 15:14) Bot afta evribadi a go we, Dievid riyalaiz se im niid sumadi fi tan de so im kyan nuo wa Absalam op tu. So im aks Ziedak an som ada priis fi tan iina di siti so dat dem kyan mek im nuo wa a gwaan. (Riid 2 Samwel 15:27-29.) Wa dem man de did fi du a did sitn we ef dem kech dem dem wuda kil dem. So dem did afi nuo wa dem a du. Kaa tingk bout it, Absalam a did wan man we ful a imself an im wuda ort enibadi we naa bak im. So ef im fain out wa Ziedak an di ada priis dem a du fi Dievid, im wuda waahn get rid a dem.

10. A wa Ziedak an di ada man dem did du so dat dem kuda protek Dievid?

¹⁰ Dievid plan op wid Ziedak an wan neda wan a im fren we niem Ushai so dat dem kyan mek im nuo wa Absalam a du. (2 Sam. 15:32-37) So Ushai fren op Absalam so dat Absalam staat fi chos im. An Ushai tel im wan wie ou im kuda fait gens Dievid. Bot wa im did riili a du a gi Dievid taim fi redi op imself fi fait dem. An afta dat, Ushai tel Ziedak an Abaiyataar wa dem plan fi du. (2 Sam. 17:8-16) So afta dat, Ziedak an Abaiyataar kuda sen go tel Dievid wa dem plan fi du. (2 Sam. 17:17) Aal a dis mek wi si se Jeuova did a elp Ziedak an di ada priis dem so dat Absalam no get fi kil Dievid.​—2 Sam. 17:21, 22.

11. Ou wi kyan shuo se wi briev laik Ziedak wen wi a elp wi breda an sista dem?

¹¹ Ef som bad sopm staat fi gwaan iina di ieriya we yu de an dem aks yu fi elp out di breda an sista dem, ou yu kyan du laik Ziedak an shuo se yu briev? (1) Du wa di breda dem tel yu fi du. Wen tingz laik dis a gwaan, a da taim de wi afi wok tugeda az wan. So du wa di breda dem a di branch afis se yu fi du. (Iib. 13:17) Di elda dem fi mek shuor se dem aalwiez a luk pan di sitn dem we di branch afis sen dem we a-go mek dem nuo wa fi du bifuo an afta orikien an dem ting de gwaan. (1 Kor. 14:33, 40) (2) Briev op yuself bot du tingz iina wan wie we shuo se yu waiz. (Pr. 22:3) So no du notn we yu na’afi du we a-go mek tingz ton out wos fi yu. (3) Dipen pan Jeuova. Memba se Jeuova no waahn notn bad apm tu yu an di breda an sista dem. An im kyan elp yu fi du tingz fi yu breda an sista dem iina wan sief wie.

12-13. Wa yu lorn fram wa Viktor an Vitalii did go chuu? (Luk pan di picha tu.)

¹² Mek wi luk pan wa tuu a wi breda dem we niem Viktor an Vitalii did du so dat dem kuda kya fuud an waata go gi som a di breda an sista dem iina Yuukrien wen di waar did a gwaan. Viktor se: “Wi luk evri we fi si ef wi kyan fain fuud. An muor taim a bier shuutin did a gwaan roun wi. Wan breda gi wi som fuud outa we im did av stuor op. An a so koms nof a di breda an sista dem kuda get fuud fi nyam fi a taim. Wen wi did a put di fuud iina wi van, wan bum lan bout 66 fut fram wich paat wi did de. Fi di wol a da die de mi no tap beg Jeuova fi mek mi briev so dat mi kuda gwaan du wa mi a du fi elp di breda an sista dem.”

¹³ Vitalii se: “Wi did afi briev fi du wa wi did du. Di fos taim wi kya tingz go gi di breda an sista dem, it did tek 12 owa. An di wol taim mi did a go, mi did a prie tu Jeuova.” Iivn duo Vitalii did so briev, im did shuo se im waiz tu. Im se: “Mi beg Jeuova fi elp mi fi waiz an nuo wa mi kyan du fram wa mi kyaahn du. So mi onggl jraiv pan di ruod dem we di govament did se wi fi jraiv pan. An wen mi si ou di breda an sista dem wok tugeda az wan, dat did elp mi tu. Di breda an sista dem muuv di sitn dem fram outa di ruod, an dem gi wi fuud an kluoz an ada tingz fi gi di ada breda an sista dem, an dem elp fi luod dem op iina di van tu, an dem gi wi fuud an somwe we wi kyan stie wen wi a chravl tu.”

AALWIEZ STIK TU JEUOVA

14. Ef sumadi we wi lov tap sorv Jeuova, ou dat mait-a mek wi fiil?

¹⁴ Wan a di aadis ting fi sumadi we a sorv Jeuova a wen wan a dem fambili ar wan a dem gud fren tap sorv Jeuova. (Sa. 78:40; Pr. 24:10) Di kluosa wi an da sumadi de did bi, a di aada it a-go bi fi diil wid wa apm. Ef yu go chuu sopm laik dat, wa Ziedak did afi diil wid kyan elp yu fi stik tu Jeuova.

15. Wa mek Ziedak did afi briev so dat im kuda gwaan stik tu Jeuova? (1 Kingz 1:5-8)

¹⁵ Wen Ziedak gud fren we niem Abaiyataar neehn stik tu Jeuova, Ziedak neehn du laik im. Wa did apm a dat wen Dievid did suun ded im bwai pikni we niem Adonaija did a chrai fi tek uova an staat fi ruul insted-a im breda Salaman, we Jeuova did pik fi ton king. (1 Kr. 22:9, 10) Abaiyataar did a bak Adonaija insted-a Dievid da taim ya. (Riid 1 Kingz 1:5-8.) Bot a no onggl Dievid im did ton im bak pan, im did ton im bak pan Jeuova tu! An Ziedak did mos fiil a wie bout dat. Kaa fi bout faati ier a di tuu a dem did a wok tugeda. (2 Sam. 8:17) An a di tuu a dem did a luk aafa di baks we tan fi di pramis we Gad mek. (2 Sam. 15:29) An bifuo dat, a di tuu a dem did a bak Dievid wen im did a king, an dem yuus tu du nof muor tingz fi Jeuova tu.​—2 Sam. 19:11-14.

16. Wa mait-a did elp Ziedak fi gwaan stik tu Jeuova?

¹⁶ Ziedak neehn mek wa Abaiyataar did du mek im ton im bak pan Jeuova. An Dievid did nuo se no mata wa, Ziedak wuda stik tu im. Wen dem fain out wa Adonaija did op tu, Dievid mek Ziedak, Nietan, an Benaiya mek Salaman ton king. (1 Ki. 1:32-34) So kaa Ziedak did de roun man laik Nietan an som ada man we did a bak Dievid, it elp im fi briev an gwaan sorv Jeuova. (1 Ki. 1:38, 39) An wen Salaman ton king, im pik Ziedak fi bi di liida fi di priis dem insted-a Abaiyataar.​—1 Ki. 2:35.

17. Ou yu kyan du laik Ziedak ef sumadi fi yu ton dem bak pan Jeuova?

¹⁷ Ef sumadi we wi kluos tu ton dem bak pan Jeuova, wi kyan du laik Ziedak an shuo se wi naa fala dem. (Jash. 24:15) Jeuova a-go gi yu di chrent an im a-go elp yu fi briev tu. Prie tu im an shuo se a im yu a dipen pan, an gwaan stik tu di ada breda an sista dem we a stik tu Jeuova tu. Jeuova lov it wen yu stik tu im an im a-go bles yu fi it.​—2 Sam. 22:26.

18. Wa yu lorn fram wa Marco an Sidiya go chuu?

¹⁸ Luk pan wa did apm tu Marco an im waif, Sidiyab, we dem tuu daata tap sorv Jeuova wen dem get big. Marco se: “Wen yu pikni dem baan yu lov dem bad. Yu du evriting we yu kyan du so dat notn bad no apm tu dem. So wen dem tap sorv Jeuova it mash yu op bad.” An im se: “Bot Jeuova shuo se im de de wid wi an im mek shuor se enitaim mi fiil wiik a dat taim de mi waif chrang. An mi si se wen shi fiil wiik a dat taim de mi chrang.” An Sidiya se: “Wi kudn go chuu dis ef Jeuova neva gi wi di chrent we wi niid. Mi aalwiez a fiil se a fi mi faalt mek dis apm, so mi mek Jeuova nuo ou mi fiil. An likl afta dat, wan sista we mi no si fi wol iip a ier kom tu mi an put ar pan mi shuolda, an luk iina mi yai dem an se: ‘Sidiya, memba se a no fi yu faalt!’ So Jeuova elp mi fi gwaan sorv im an api stil.”

19. Wa yu mek op yu main fi du?

¹⁹ Jeuova waahn aal a di piipl dem we a worship im fi briev laik Ziedak. (2 Tim. 1:7) Bot im no waahn wi fi dipen pan wiself, im waahn wi fi dipen pan im. So ef sitn a apm iina yu laif we yu fi briev op yuself an du, a Jeuova yu fi mek elp yu. Wen yu du dat yu kyan nuo fi shuor se Jeuova a-go mek yu briev laik Ziedak!​—1 Pii. 5:10.