Wan Leta We Kyan Elp Wi Fi Eng Aan An Gwaan Chos Iina Jeuova

1-2. (a) A wa did a gwaan iina Judiya wen di apasl Paal did rait di leta tu di Kristiyan dem? (b) Wa mek di leta did ton out fi bi wan blesn fi dem Kristiyan de?

AFTA Jiizas ded, di Kristiyan dem we did a liv iina Jeruusilem an Judiya did go chuu som aad taim. Kaa likl afta di Kristiyan kanggrigieshan staat op, dem staat fi du dem som bad sitn kaaz a wa dem biliiv iina. (Aks 8:1) An 20 ier afta dat, di wan dem we did a fala Jiizas Krais did staat fi sofa an dem neehn av no fuud fi nyam, kaa fuud did shaat wich paat dem liv. (Aks 11:27-30) Bot wen yu tingk bout wa did a-go apm tu dem iina di fyuucha, tingz neehn so aad fi dem roun dem taim de iina 61 C.E. An a da taim de dem did get di leta fram di apasl Paal, an da leta de ton out fi bi wan blesn fi dem.

² Di leta we Paal did rait dem Kristiyan de wuda elp dem wen di dischrokshan wuda apm iina Jeruusilem we Jiizas did taak bout. (Luuk 21:20) Bot da taim de, niida Paal nar di Kristiyan dem iina Judiya neehn nuo wen da dischrokshan de wuda apm. Bot dem Kristiyan de kuda yuuz di taim we dem av fi redi op demself an shuo se dem chos iina Jeuova an dem a-go uol aan no mata wa.​—Iib. 10:25; 12:1, 2.

3. Wa mek wi fi waahn nuo wa de iina di leta we Paal did rait tu di Kristiyan dem we taak di Iibruu langwij?

³ Suun suun, wi a-go go chuu wan sofarieshan we wosa dan di wan we dem Kristiyan de did go chuu. (Mat. 24:21; Rev. 16:14, 16) So mek wi luk pan som a di sitn dem we Jeuova did mek dem get iina da leta de we did elp dem an we kyan elp wi tu.

“MEK WI GRUO AN GET CHRANG IINA WA WI BILIIV IINA”

4. Wa did mek it aad fi di Kristiyan dem we did a Juu? (Luk pan di picha tu.)

⁴ Di Juu piipl dem a did Jeuova speshal piipl. An a Jeuova did pik di king dem we did a ruul iina Jeruusilem, an a de-so Gad ous did de we dem kuda go go worship im. Aal a di Juu dem we did a fala di Laa we Jeuova did gi Muoziz wudn iit sortn tingz, an dem wuda sorkomsaiz di man dem, an dem wudn kip kompni wid nobadi we a neehn Juu. Bot afta Jeuova sen Jiizas fi kom gi op im laif fi wi, Im neehn ekspek dem fi du dem sitn de agen. So it did aad fi di wan dem we did a fala di Laa fi tap du dem sopm de. (Iib. 10:1, 4, 10) Aal Kristiyan we did chrang iina wa dem biliiv iina, laik di apasl Piita, did fain it aad fi tap du dem sitn de. (Aks 10:9-14; Gya. 2:11-14) Kaa dem did tap du dem sopm de, di Juu liida dem did a mek it aad fi dem Kristiyan de.

5. A wa di Kristiyan dem did fi luk out fa?

⁵ A tuu set a piipl did a fait gens di Kristiyan dem iina Judiya we dem did fi luk out fa. Dem did fi luk out fi di Juu liida dem we did a chriit dem laik se dem ton dem bak pan Gad an a chrai fi mek ada piipl fala dem tu. An dem did fi luk out fi di wan dem we se dem a Kristiyan, we kaa dem mait-a did fiil se ada piipl wuda mek tingz aad fi dem, did stil a du som a di sitn dem we di Laa did se dem fi du we dem neehn afi a du agen. (Gya. 6:12) Bot wa wuda elp di Kristiyan dem fi du di sopm dem we Jeuova waahn dem fi du?

6. A wa Paal did tel di breda an sista dem se dem fi du? (Iibruu 5:14–6:1)

⁶ Iina di leta we Paal did rait tu di Kristiyan dem iina Judiya, im tel dem fi stodi Gad Wod aad aad. (Riid Iibruu 5:14–6:1.) An im yuuz di skripcha dem we did rait iina Iibruu fi elp dem fi si se di wie ou dem a worship Jeuova nou beta dan di wie ou dem did a worship im,a kaa im did nuo se ef dem andastan dem sitn de beta, dem wudn mek di wan dem we naa worship Jeuova di rait wie kaaz dem fi tap worship Jeuova.

7. Wa mait-a mek it aad fi wi du di sitn dem we Jeuova waahn wi fi du?

⁷ Jos laik di breda an sista dem we did de iina Juuda, wi afi diil wid piipl we mek it luk laik se di sitn dem we Jeuova se wi fi du rang, laik wa wi biliiv bout seks sin an dem sitn de an wen wi put piipl outa di kanggrigieshan. Dem mek it luk laik se wi wikid wen wi du dem sopm de ar kaa wi biliiv dem sopm de, an se wi no laik wen piipl du wa dem waahn fi du. An wa dem biliiv wen it kom aan tu dem sitn ya na’av notn fi du wid di sitn dem we Gad Wod se wi fi du. (Pr. 17:15) So wi fi chrai aad aad fi nuo wen sitn a go gens wa Jeuova waahn wi fi du an wi no fi mek dem piipl ya tap wi fram du wa im waahn wi fi du.​—Iib. 13:9.

8. Wa wi kyan du fi get chrang iina wa wi biliiv iina?

⁸ Wen wi stodi Gad Wod aad aad, laik wa Paal did tel di Kristiyan dem iina Judiya fi du fi lorn ou Jeuova luk pan tingz, dat a-go elp wi fi get chrang iina wa wi biliiv iina. An wi fi gwaan du dis aal afta wi gi wi laif tu Jeuova an baptaiz. No mata ou lang wi a sorv Jeuova fa, aal a wi fi riid Gad Wod evridie an stodi it aafn tu. (Sa. 1:2) An dat wi elp wi fi du wa Paal did tel di breda an sista dem fi du iina di leta we a-go elp wi fi chos iina Jeuova muor.​—Iib. 11:1, 6.

‘CHOS IINA GAD SO IM WI SIEV WI’

9. Wa mek dem Kristiyan de did riili afi chos iina Jeuova?

⁹ Di Kristiyan dem we did de iina Judiya did afi riili chos Jeuova fi du wa im se dem fi du bifuo di plies get mash dong. (Iib. 10:37-39) Jiizas did tel im falara dem se wen dem si di suoja dem soroun Jeruusilem, dem fi ron go op iina di mountn dem. An aal a dem did fi du dis no mata wich paat dem liv. (Luuk 21:20-24) Dem taim de ef di piipl dem fiil se sopm a-go apm, dem wuda ron go iina wan siti we waal de roun, laik Jeruusilem, so dat di suoja dem we a rosh dem kudn kom ort dem. So fi go op iina di mountn dem wudn luk laik se it mek sens, so dem wuda riili afi chos iina Jeuova fi du dat.

10. Ef wan Kristiyan riili chos di wan dem we a liid dem, wa dem a-go du? (Iibruu 13:17)

¹⁰ Wan neda ting we dem Kristiyan de did afi du a fi chos di wan dem iina di kanggrigieshan we Jiizas did a yuuz fi liid dem. Di wan dem we did a liid dem wuda tel dem wa fi du so dat dem kuda du di ting dem we Jiizas tel dem fi du di rait taim an di wie ou dem fi dwi’it. (Riid Iibruu 13:17.) Di Griik wod we dem yuuz a Iibruu 13:17 fi “lisn” no miin tu se sumadi a-go du wa sumadi tel dem fi du kaa dem av di rait fi tel dem wa fi du. Bot dem a-go dwi’it kaa dem chos di sumadi an waahn fi dwi’it. So dem Kristiyan de did afi chos di wan dem we Jeuova did a yuuz fi liid dem bifuo tingz get wos fi dem. So ef sumadi a du wa di wan dem we a liid dem tel dem fi du wen tingz aarait, it a-go iiziya fi dem du wa dem tel dem fi du wen tingz get aad.

11. Wa mek wan Kristiyan afi riili chos iina Jeuova iina dem taim ya?

¹¹ Wi a liv iina wan taim wen nof piipl no biliiv wa di Baibl se bout ou da worl ya a-go don, so dem a laaf aafa wi an a mak wi. Bot wi afi chos iina Jeuova laik ou dem Kristiyan de did chos iina im. (2 Pii. 3:3, 4) Di Baibl tel wi nof tingz we a-go apm bifuo di wos sofarieshan brok out. Bot a nof tingz wi no nuo bout it. So wi afi chos Jeuova se da worl ya a-go don di taim wen im se it a-go don an nuo se im a-go tek kier a wi.​—Aba. 2:3.

12. A wa a-go elp yu fi go chuu di wos sofarieshan?

¹² Wi afi chrai aad fi chos di “waiz sorvant” we Jeuova a yuuz fi liid wi tide. (Mat. 24:45) Wen di wos sofarieshan staat, dem mait-a tel wi fi du tingz we a-go kyan siev wi laif wen wi dwi’it, jos laik ou di Kristiyan dem iina Judiya did ier tingz we wuda elp dem wen di Ruoman suoja dem soroun Jeruusilem. So wi fi du evriting we wi kyan du nou fi chos di wan dem we Jeuova a yuuz fi liid wi iina im aaganaizieshan. Ef wi no fain it iizi fi du di ting dem we dem a tel wi fi du nou, wi naa go fain it iizi fi du dem wen di wos sofarieshan a gwaan.

13. Wa mek wa Paal did se a Iibruu 13:5 did mek sens?

¹³ Wen di Kristiyan dem iina Judiya did a wiet pan di taim wen dem fi ron go op iina di mountn, dem did fi mek shuor se dem no “lov moni.” (Riid Iibruu 13:5.) Som a dem did de bout wen fuud did shaat an dem neehn av notn fi nyam. (Iib. 10:32-34) Aalduo dem did go chuu som rof taim fi gwaan sorv Gad, nof a dem did staat fi fiil se ef dem av moni an dem ting de, it wuda kyan kip dem sief. Bot no mount a moni we dem av kudn kip dem sief wen Jeruusilem a get mash dong. (Jmz. 5:3) Di wan dem we av wol iip a moni an ous an ting wuda fain it aad fi ron lef it go op iina di mountn.

14. Ef wi nuo fi shuor se da worl ya suun don, wa wi a-go du wen it kom aan tu moni an dem ting de?

¹⁴ Ef wi nuo fi shuor se da worl ya suun don, wi naa go go aafa moni an dem ting de. Dem taim de piipl a-go dash we dem moni iina di ruod kaa dem get fi si se it kyaahn siev dem wen da worl ya a don. (Izii. 7:19) So wi no fi a chrai get wol iip a moni an ting, bot di wie ou wi a liv wi laif fi shuo se a no dem sopm de wi lov. So wi naa go a baro baro moni we wi kyaahn pie bak, an wi naa go lov di sitn dem we wi av aredi muo dan notn els. (Mat. 6:19, 24) So miin taim wi a wiet pan da worl ya fi don, wi afi go shuo ef a moni an tingz wi lov ar a Jeuova.

“UNU AFI WOL AAN AN PRES CHUU”

15. Wa mek dem Kristiyan de did riili afi uol aan an pres chuu?

¹⁵ Di Kristiyan dem iina Judiya did afi shuo se dem riili chos iina Gad wen tingz staat get bad. (Iib. 10:36) Aalduo som a dem Kristiyan ya did go chuu som rof taim, nof a dem did ton Kristiyan iina wan taim wen tingz neehn so bad. Bot Paal did mek dem nuo se iivn duo dem did go chuu tingz we tes umoch dem chos iina Jeuova, dem no sofa so moch laik Jiizas we dem did kil. (Iib. 12:4) Bot yu si kaa di Juu dem did si se nof muor piipl a ton Kristiyan, dem did staat fi fait gens dem muor. Laik kopl ier bifuo wen Paal did go a Jeruusilem, wan kroud a piipl kom dong pan im. Muo dan 40 a dem “swier se tonda ruol an brok dem nek dem naa nyam ar jringk notn til dem kil Paal.” (Aks 22:22; 23:12-14) Aalduo dem tingz de did a gwaan roun dem, dem Kristiyan de did stil afi a go a dem miitn, an priich di gud nyuuz, an du tingz fi gwaan chos iina Jeuova muor.

16. A ou di leta we Paal did rait dem Kristiyan de kyan elp wi fi tingk bout di ting dem we wi a go chuu iina di rait wie? (Iibruu 12:7)

¹⁶ Paal did nuo se ef di Kristiyan dem iina Judiya did luk pan di prablem dem we dem did a go chuu iina di rait wie, it wuda elp dem fi go chuu. Im mek dem nuo se Gad mait-a lou dem fi go chuu som aad taim fi chrietn dem out, an it wuda elp dem fi get chrang iina di sitn dem we dem biliiv iina. (Riid Iibruu 12:7.) Wen dem go chuu dem sopm de, it wuda elp dem fi av som gud wiez we Kristiyan fi av. Wen dem tingk bout di gud sitn dem we wuda apm afta dem go chuu aal a dem sitn de, it wuda mek it iiziya fi dem uol aan an pres chuu.​—Iib. 12:11.

17. Wa Paal did si se kuda elp im fi go chuu im chraiyal dem?

¹⁷ Paal did elp dem Kristiyan de fi mek op dem main fi push chuu an go chuu dem chraiyal dem no mata wa. An im kuda du dat kaaz im nuo wa di wan dem we did a mek it aad fi dem wuda du tu dem, kaaz im a did wan a dem tu. An afta im ton wan Kristiyan, im did go chuu som wol iip a chraiyal tu. (2 Kor. 11:23-25) Im did mek dem nuo se wen dem a go chuu dem prablem dem a Jeuova dem fi dipen pan fi elp dem. Paal kuda se fi shuor se: “[Jeuova] a di wan we elp mi an mi naa go fried a notn.”​—Iib. 13:6.

18. Wa a-go apm tu aal a wi iina di fyuucha, an wa wi fi a du nou?

¹⁸ Dem a mek tingz aad fi nof a wi breda an sista dem ya nou kaaz a wa dem biliiv iina. Wen wi prie fi dem an du ada tingz fi dem, wi a shuo se wi de de fi dem. (Iib. 10:33) Di Baibl mek wi si klier klier se “enibadi we se dem a Gad piipl . . . afi go chogl chuu nof sitn tu.” (2 Tim. 3:12) So aal a wi fi redi op wiself fi wa a-go apm iina di fyuucha. Mek wi gwaan chos iina Jeuova an nuo se im a-go elp wi fi go chuu eni prablem we wi mait afi diil wid. An suun suun im a-go get rid a eniting we a kaaz prablem fi di wan dem we a worship im.​—2 Tes. 1:7, 8.

19. Wa a som a di sitn dem we wi fi du fi redi op wiself fi wen di wos sofarieshan kom? (Luk pan di picha tu.)

¹⁹ Wi nuo se di leta we Paal did rait tu di Kristiyan dem iina Judiya did elp dem fi redi op demself fi di sofarieshan we dem wuda go chuu. Iina it im tel dem se dem fi chrai fi nuo muor bout di sitn dem we iina Gad Wod, an dat gweehn mek dem nuo di sitn dem we piipl a tiich we no go so, so dat dem kyan kip we fram it. An im tel dem se dem fi chrai aad fi chos iina Gad muor an dat wuda mek dem fala wa Jiizas did tel dem fi du an fala di wan dem we a liid dem iina di kanggrigieshan. An im elp dem fi eng aan an push chuu wen dem a go chuu dem chraiyal dem an fi tingk bout dem iina di rait wie. An im elp dem fi si se Jeuova a lou dem fi go chuu dem sopm de fi chrien dem. An a dem sopm ya wi fi a du tu. Wen wi du dat it a-go elp wi fi eng aan an push chuu til di en a da wikid worl ya.​—Iib. 3:14.