Gwaan Luk Fi Di Siti We A-Go Laas Fi Eva

1. A wa Jiizas did se wuda apm tu Jeruusilem?

KOPL die bifuo Jiizas ded, im did mek im falara dem nuo som tingz we wuda gwaan wid Jeruusilem. Im tel dem se wan die dem a-go si som “suoja soroun Jeruusilem.” (Luuk 21:20) So im mek dem nuo se wen dem si dem suoja de dem fi lef di plies siem taim an no lie lie.​—Luuk 21:21, 22.

2. A wa Paal did tel di breda an sista dem we did a liv iina Judiya an Jeruusilem?

² Kopl ier bifuo di Ruoman suoja dem soroun Jeruusilem, di apasl Paal did rait wan impuotant leta tu di breda an sista dem we did a liv iina Judiya an Jeruusilem. Aal a wa iina da leta de a wa mek op di Baibl buk we niem Iibruu. Iina da leta de, Paal did a elp di breda an sista dem fi si wa dem niid fi du fi get redi fi wa did a-go apm tu Jeruusilem. An chuu Jeruusilem did a-go get mash dong, ef di breda an sista dem neehn waahn fi ded dem wuda afi redi op demself fi lef dem ous an dem wok. So Paal mek di breda an sista dem nuo se “wi naa no siti we a-go laas fi eva ya-so” an den im se “bot wi a luk fi di siti we a-go kom.”​—Iib. 13:14.

3. Wa a di siti we “tan op pan som chrang foundieshan,” an wa mek wi fi luk fi’it fi kom?

³ Wen som a di breda an sista dem did mek op dem main fi lef Jeruusilem an Judiya, nof piipl mait-a did laaf aafa dem an mek dem fiil laik se we dem du neehn mek no sens. Bot yu nuo se a dat siev dem laif duo! An a siem so tide piipl mait-a aal laaf aafa wi an mak wi kaa wi naa ron dong moni an dem ting de, an wi naa luk tu man fi fiks di prablem dem iina da worl ya, kaa wi nuo se da wikid worl ya naa go de bout fi eva. So wi a gwaan luk fi di siti we “tan op pan som chrang foundieshan,” dat a di wan “we a-go kom,” an da siti de a Gad Kindom govament.a (Iib. 11:10; Mat. 6:33) Iina da lesn ya, wi a-go luk pan chrii sitn: (1) Wi a-go luk pan ou wa Paal did se did elp di breda an sista dem fi gwaan chos iina Gad govament, (2) ou Paal did elp dem fi get redi fi wa did a-go apm iina di fyuucha, an (3) ou wa im se a elp wi tide.

CHOS IINA JEUOVA KAA IM NAA GO LEF YU

4. A wa mek Jeruusilem did wot nof tu di Kristiyan dem?

⁴ Jeruusilem did wot nof tu di Kristiyan dem iina dem taim de. Wan a di riizn fi dis a kaa di fos kanggrigieshan did staat iina da siti de iina 33 C.E. An a iina da siti de di man dem we did de pan di Govanin badi did liv. Pan tap a dat, nof a di breda an sista dem did av dem uona ous an dem did av moni an dem ting de, bot Jiizas did waan im falara dem se dem wuda afi lef outa Jeruusilem an Judiya.​—Mat. 24:16.

5. Ou Paal did elp di breda an sista dem fi get redi fi wa did a-go apm tu Jeruusilem?

⁵ Fi get di breda an sista dem redi fi wa did a-go apm, Paal did elp dem fi si ou Jeuova fiil bout Jeruusilem. So im did waahn dem fi memba se Gad ous we de iina Jeruusilem, an di priis dem we wok de an di sakrifais dem we dem did a gi op de neehn miin notn tu Jeuova agen. (Iib. 8:13) Nof a di piipl dem we did liv iina da siti de neehn biliiv se Jiizas a di Mesaiya, an kaa a dat dem neehn waahn av notn fi du wid im. So piipl neehn afi go a Jeruusilem fi worship Jeuova agen kaa it did a-go get mash dong.​—Luuk 13:34, 35.

6. Wa mek di breda an sista dem did niid fi ier wa Paal did se a Iibruu 13:5, 6?

⁶ Wen Paal did rait di buk we niem Iibruu, piipl did lov fi go a Jeruusilem dem taim de. Matarafak, wan man we kom fram Ruom we yuus tu rait buk dem taim de se: “Iina da paat a da worl de, piipl yuus tu jos lov go a Jeruusilem muor dan eni ada plies.” Evri ier di Juu piipl dem wuda go a Jeruusilem fi kip dem festival dem an dem wuda spen wol iip a moni iina di siti. An yu si kaa a dat, som a di Kristiyan dem mait-a did a mek wol iip a moni tu. So eni wie yu tek it moni did a ron iina di siti, an miebi a das wai Paal did tel dem se: “Unu no fi lov moni. Unu fi satisfai wid wat-eva unu av.” Den im tel dem sitn we Jeuova did tel im piipl dem fi mek dem nuo fi shuor se Jeuova wuda tek kier a dem, im se: “Mi naa go lef unu non at aal, nuo mi naa lef unu fi fen fi unuself.” (Riid Iibruu 13:5, 6; Dyuu. 31:6; Sa. 118:6) Di breda an sista dem we did a liv iina Jeruusilem an Judiya did niid fi nuo dis kaa likl afta dem get da leta de dem did afi lef dem ous, dem wok, an nof a di sitn dem we dem av. An dem did afi go mek laif somwe els an dat neehn a-go bi iizi fi dem.

7. Wa mek wi fi wok aad fi chos iina Jeuova rait ya nou?

⁷ Wa wi kyan lorn fram dis: Likl fram dis di wos sofarieshan a-go staat an “piipl a-go sofa bad bad,” an da worl ya a-go get mash dong. (Mat. 24:21) So jos laik ou di Kristiyan dem iina dem taim de did afi gwaan chos iina Jeuova an redi op demself fi wa did a-go apm, a di siem ting wi afi du tide. (Luuk 21:34-36) Wen di wos sofarieshan a gwaan, wi mait-a afi ron we lef wi ous an eniting els we wi av, an a dem taim de wi afi go chos se Jeuova a-go tek kier a im piipl dem. Bot rait ya nou bifuo di wos sofarieshan staat, wi kyan shuo se wi chos iina Jeuova. So aks yuself da kwestiyan ya, ‘Di sitn dem we mi a du nou an wa mi plan fi du wid mi laif a shuo se mi a ron dong moni ar it a shuo se mi a-go chos se Jeuova a-go tek kier a mi?’ (1 Tim. 6:17) Ye, a chuu se wi kyan lorn som sitn fram wa did gwaan wid dem Kristiyan de, bot di wos sofarieshan we a-go gwaan iina di fyuucha a-go wosa dan wa dem did go chuu. So ou wi a-go nuo wa fi du wen da sofarieshan de staat?

LISN TU DI WAN DEM WE A LIID WI

8. A wa Jiizas did tel di Kristiyan dem iina Judiya an Jeruusilem fi du?

⁸ Kopl ier afta di Kristiyan dem iina Judiya an Jeruusilem did get di leta we Paal did rait dem, dem si di Ruoman suoja dem soroun Jeruusilem an dat did mek dem nuo se a taim fi dem ron we an go somwe els kaa Jeruusilem did a-go get mash dong. (Mat. 24:3; Luuk 21:20, 24) Bot a we dem wuda ron go? Kaa Jiizas did onggl tel dem se: “Evribadi iina Judiya fi ron go op iina di mountn dem.” (Luuk 21:21) Yu did av uol iip a mountn bout di plies, so a wich wan dem wuda ron go?

9. A wa mek di Kristiyan dem mait-a did a wanda bout wich mountn fi ron go? (Luk pan di map tu.)

⁹ Tingk bout som a di mountn dem we di Kristiyan dem kuda ron go. Yu did av di mountn dem we de a Samieriya, di wan dem we de iina Gyalalii, Mount Orman, an di mountn dem we de a Lebanan, an yu did av som mountn we de kraas di Jaadn Riva tu. (Luk pan di map.) Som a di plies dem we did de iina dem mountn ya mait-a did luk laik se dem sief fi ron go. Laik yu did av wan siti we de ai op iina wan mountn we niem Gyamla, an it neehn so iizi fi piipl riich op de. So som a di Juu piipl dem did tingk se a di bes plies fi dem ron go. Bot a iina Gyamla wan big waar did gwaan wid di Juu piipl dem an di Ruoman suoja dem, an kaa a dat nof a di piipl dem we did liv de ded.b

10-11. (a) A ou Jeuova mait-a did mek di Kristiyan dem iina dem taim de nuo we fi ron go? (Iibruu 13:7, 17) (b) Kaa di breda an sista dem did lisn tu di wan dem we did a liid dem, a ou it did elp dem? (Luk pan di picha tu.)

¹⁰ It did luk laik se Jeuova did yuuz di breda dem we did a liid di kanggrigieshan dem taim de fi mek di breda an sista dem nuo we dem fi go. Wan man we niem Yuusibiyos, we rait bout tingz we gwaan dem taim de, did rait an se: “A Gad mek di man dem we did a liid di Kristiyan dem nuo se dem fi lef Jeruusilem an go a Pela we de iina Periya.” An Pela did luk laik se a did di bes plies fi go kaa fi wan ting, it neehn faar fram Jeruusilem so it did iizi fi dem riich de. An wan neda ting, a dat muos a di piipl dem iina Pela a neehn Juu an dem neehn a chrai fait gens di Ruoman dem, so dat did mek it siefa dan di ada plies dem we dem kuda ron go.​—Luk pan di map.

¹¹ Di Kristiyan dem we ron go a Pela did a du wa Paal se, wen im did tel dem se dem fi lisn tu di wan dem we did a liid dem. (Riid Iibruu 13:7, 17.) An kaa dem did lisn dem neehn ded. Kaa dem Kristiyan de did a wiet pan di siti we “tan op pan som chrang foundieshan,” we a Gad Kindom govament, Jeuova neehn lef dem non at aal.​—Iib. 11:10.

12-13. A ou Jeuova mek im piipl dem nuo wa fi du wen tingz get rof?

¹² Wa wi kyan lorn fram dis: Wi a lorn se Jeuova a yuuz di breda dem we a liid wi fi mek wi nuo wa fi du. Wen wi luk iina di Baibl, wi si wol iip a taim wen Jeuova did yuuz difrant difrant man fi mek im piipl dem nuo wa fi du wen dem did a go chuu wan rof taim. (Dyuu. 31:23; Sa. 77:20) An tide wi kyan si klier klier se Jeuova a yuuz di breda dem we a liid wi fi mek wi nuo wa fi du.

¹³ Wen KUOVID-19 did a go roun, di breda dem we a liid wi did mek wi nuo wa fi du. Dem did mek di elda dem iina di kanggrigieshan dem nuo wa dem fi du so dat wi kuda gwaan kip wi miitn dem. Likl afta KUOVID brok out, wi kip wan kanvenshan iina muor dan 500 difrant difrant langwij we piipl kuda wach pan di intanet an TV an lisn pan di riediyo tu. An yu waahn nuo se no kanvenshan laik dis neva apm bifuo. So KUOVID neehn tap Jeuova piipl dem fram get aal a wa dem fi get so dat dem kuda stie kluos tu im. An kaaz a dat, wi did get fi gwaan wok tugeda az wan. So wi kyan nuo fi shuor se no mata wa apm tu wi iina di fyuucha, Jeuova a-go gwaan elp di breda dem we a liid wi fi mek wi nuo di bes ting we wi fi du dem taim de. Wi nuo se fi chos iina Jeuova an fi lisn tu di man dem we a liid wi a-go elp wi fi redi op wiself fi di wos sofarieshan. Bot wa els wi niid fi du fi redi op wiself an shuo se wi waiz dem taim de?

GWAAN SHUO SE YU LOV DI BREDA AN SISTA DEM AN SE YU REDI FI TEK DEM IIN AN ELP DEM

14. Azkaadn tu Iibruu 13:1-3, wa di Kristiyan dem did afi du bifuo Jeruusilem get mash dong?

¹⁴ Wen di wos sofarieshan staat, a dat taim de wi afi go shuo umoch wi lov wi breda an sista dem. Bot it naa go dis apm so, wi afi a shuo lov fi wan aneda fram nou. An a dat di breda an sista dem iina Jeruusilem an Judiya did du, dem did aalwiez a shuo lov tu dem wan aneda. (Iib. 10:32-34) Bot kopl ier bifuo Jeruusilem get mash dong, di breda an sista dem did afi du muor fi shuo se dem lov dem wan aneda an dem du aal we dem kuda du fi tek iin an elp dem wan aneda tu.c (Riid Iibruu 13:1-3.) An a di siem ting wi afi go du wen di wos sofarieshan a gwaan.

15. Afta di Kristiyan dem did lef Jeruusilem an ron go a Pela, wa mek dem did afi shuo se dem lov dem wan aneda an se dem redi fi tek iin an elp dem wan aneda?

¹⁵ Di Ruoman suoja dem did soroun Jeruusilem an aal av a sodn dem dis lef so, an kaaz a dat di Kristiyan dem get di chaans fi ron go op iina di mountn dem bot dem bieli kuda kya notn wid dem. (Mat. 24:17, 18) So di Kristiyan dem did afi a dipen pan dem wan aneda wen dem go op iina di mountn dem, an wen dem kech a Pela dem did afi elp dem wan aneda fi fain wan plies fi liv an fi fain wok tu. Wi nuo se nof a di breda an sista dem neva av no fuud fi nyam, kluoz fi wier an somwe fi liv wen dem riich a Pela, so dis wuda gi di ada breda an sista dem di chaans fi shuo umoch dem lov dem wan aneda wen dem redi fi tek dem iin an gi dem wa dem niid.​—Taitos 3:14.

16. A ou wi kyan shuo se wi lov di breda an sista dem we niid wi elp? (Luk pan di picha tu.)

¹⁶ Wa wi kyan lorn fram dis: Wi lorn se a lov a-go push wi fi elp wi breda an sista dem wen dem niid wi elp. Wen di breda an sista dem ron we fram dem konchri kaaz a waar an orikien an dem ting de, nof a di breda an sista dem redi fi gi dem fuud an dem ting de an elp dem fi stie kluos tu Jeuova. An wi kuda si dis wid wan sista we kom fram Yuukrien we did afi ron we lef ar yaad kaaz a waar, shi se: “Mi kuda si ou Jeuova yuuz di breda an sista dem fi mek wi nuo wa wi fi du an fi elp wi. Dem did shuo wi se dem api fi si wi, an dem elp wi wen wi de iina Yuukrien, an wen wi de iina Onggari an iina Jormani we wi de ya nou.” Yu si wen wi du tingz fi elp wi breda an sista dem an redi fi tek dem iin, a wok wi a wok wid Jeuova fi elp dem.​—Pr. 19:17; 2 Kor. 1:3, 4.

17. Wa mek wi fi a shuo se wi lov wi breda an sista dem fram nou an redi fi tek dem iin wen dem niid elp?

¹⁷ Wen di wos sofarieshan a gwaan, a da taim de wi breda an sista dem a-go niid wi fi di de fi dem muor dan eni ada taim. (Aba. 3:16-18) So rait ya nou Jeuova a shuo wi ou wi fi lov wi wan aneda an ou wi no fi ich fi tek iin wi breda an sista dem an elp dem wen dem niid it. Kaa wen di wos sofarieshan a gwaan, a dem sitn de a-go elp wi an di breda an sista dem fi mek it chuu.

A WA A-GO APM IINA DI FYUUCHA?

18. A ou wi kyan du laik di Kristiyan dem we did ron we lef Jeruusilem?

¹⁸ Di Kristiyan dem we did ron we fram Jeruusilem an go op iina di mountn dem neehn ded wen Jeruusilem did get mash dong. So iivn duo dem did afi ron we lef evriting we dem did av, Jeuova did tek kier a dem. Ye, a chuu se wi no nuo evriting we a-go gwaan iina di fyuucha. Bot fi wan ting, Jiizas elp wi fi si se wi fi redi op wiself fi eniting we mait-a apm. (Luuk 12:40) Wan neda ting we wi kyan du fi get redi fi wa a-go gwaan a wen wi du di sitn dem we Paal did rait tu di breda an sista dem we did a liv iina Judiya an Jeruusilem we wi riid iina di buk a Iibruu. An pan tap a dat, no mata wa gwaan iina di fyuucha, Jeuova mek evri wan wi nuo se im naa go lef wi non at aal. (Iib. 13:5, 6) So mek wi gwaan wok aad rait ya nou fi luk fi di siti we a-go laas fi eva, we a Gad Kindom govament, kaa a da taim de wi a-go get wol iip a blesn an enjai laif fi eva.​—Mat. 25:34.