A Ou Jeuova Elp Wi Fi Gwaan Eng Aan An No Gi Op?

1. Wa an wa mait-a mek it aad fi wi eng aan an gwaan tan op chrang, an uu a-go elp wi? (1 Piita 5:10)

AAL a wi av aal kain-a prablem we wi a diil wid. An kaaz a dat, som a di taim wi mait-a fiil se it aad fi gwaan eng aan til da worl ya don. Som a wi mait-a sik fi wan lang taim, ar wi mait-a sad bad kaaz sumadi we wi lov ded. An yu av som a wi breda an sista dem we a go chuu wan rof taim kaa dem fambili ar di govament a fait gens dem kaaz a wa dem biliiv iina. (Mat. 10:18, 36, 37) Bot yu kyan nuo fi shuor se no mata wa kain-a prablem yu a diil wid ya nou, Jeuova a-go elp yu fi go chuu an no gi op.​—Riid 1 Piita 5:10.

2. A wa mek wi kyan eng aan an no gi op?

² Wen wi a eng aan an tan op chrang, no mata wa kain-a prablem a gwaan iina wi laif, aal ef piipl a fait gens wi kaaz a we wi biliiv iina ar wi a get presha fi du sitn rang, wi naa go gi op kaaz wi nuo se tingz a-go get beta. So wen wi go chuu dem prablem ya an no gi op, wi nuo se a no kaa wi chrang we mek wi kyan du dat, bot wi nuo se ‘a Jeuova we av aal a di powa a elp wi.’ (2 Kor. 4:7) Iina da lesn ya, wi a-go taak bout fuor sitn we Jeuova gi wi we kyan elp wi fi eng aan an no gi op. An wi a-go si wa an wa wi kyan du so dat dem sitn ya kyan elp wi.

PRIEYA

3. Wa mek wi kyan se prieya a wan mirikl?

³ Jeuova du sitn gud fi wi we mek wi kyan eng aan an no gi op. Wi kyan taak tu im iivn duo wi a sina. (Iib. 4:16) Jos tingk bout it: Wi kyan prie tu Jeuova enitaim an bout eniting. An it no mata wich langwij wi a taak wen wi a prie tu im ar we wi de. Aal ef wi de bai wiself ar wi iina prizn, im stil a-go ier wi tu. (Juona 2:1, 2; Aks 16:25, 26) Yu si ef kaaz a we yu a go chuu tingz jos aad an yu no nuo ou fi tel im ou yu a fiil, Jeuova stil nuo wa yu waahn fi se. (Ruo. 8:26, 27) Ye man, prieya a riili wan mirikl fi chuu!

4. Ou wi nuo se wen wi prie tu Jeuova fi elp wi fi eng aan an no gi op im a-go elp wi fi chuu?

⁴ Iina di Baibl, Jeuova mek wi nuo se im “wi ier wi prieya wen wi aks im fi di sitn dem we im waahn wi fi aks fa.” (1 Jan 5:14) So dat miin se wi kyan aks Jeuova fi elp wi fi eng aan an no gi op kaa dat a sitn we im wuda waahn wi fi prie fa. An wi nuo dis kaa memba se Sietan aalwiez a chat bad bout Jeuova ino. So wen wi stik tu Jeuova an du wa im waahn wi fi du an no gi op, a so im a-go kyan ansa Sietan. (Pr. 27:11) Pan tap a dat, di Baibl tel wi se Jeuova “si di wan dem we a sorv im wid aal a dem aat, an im wel waahn fi du sitn fi elp dem.” (2 Kr. 16:9) So wi nuo fi shuor se Jeuova av di powa an im wel waahn fi elp wi fi eng aan an no gi op.​—Aiz. 30:18; 41:10; Luuk 11:13.

5. A ou Jeuova gi wi piis iina wi aat an main wen wi prie tu im? (Aizaiya 26:3)

⁵ Di Baibl tel wi se wen wi a prie aad aad bout tingz we de pan wi main, ‘Gad wi gi wi piis iina wi aat an main iina wan wie we [wi] kyaahn iivn andastan. Im a-go du it so wi no afi wori bout notn.’ (Fil. 4:7) Wi api se dat kyan gwaan fi wi. Di piipl dem we naa sorv Jeuova an a go chuu aad taim mait-a fain som difrant difrant wie fi get da piis ya. Laik som a di sopm dem we dem du a fi sidong an fuos demself fi no tingk bout notn at aal fi a wail. Bot dis kyan mek di diiman dem kom iin an chrap dem. (Luk pan Matyu 12:43-45.) Bot notn we dem du kyaahn mach op tu di piis we Jeuova gi wi wen wi prie tu im. An wen wi prie tu Jeuova, wi shuo se wi a dipen pan im an a so im a-go gi wi “piis iina [wi] aat an main.” (Riid Aizaiya 26:3.) Wan wie im gi wi da piis ya a wen im elp wi fi memba di sitn dem we wi lorn fram di Baibl. Dem sitn de memba wi se im lov wi an waahn fi elp wi, an so it kaam wi aat.​—Sa. 62:1, 2.

6. Wa an wa yu kuda prie bout? (Luk pan di picha tu.)

⁶ Yu kyan du dis: Wen yu a go chuu no chraiyal, “chuo yu bordn pan Jeuova,” an prie fi im gi yu piis iina yu aat an main. (Sa. 55:22) Yu kyan prie tu fi im mek yu waiz so yu kyan nuo wa fi du. (Pr. 2:10, 11) An wen yu a prie fi im elp yu, yu fi tangk im fi wa im du fi yu aredi. (Fil. 4:6) Luk fi tingz iina yu laif we shuo se Jeuova a elp yu wid yu prablem dem, an tangk im fi ou im a elp yu tu. No mek kaaz a wa yu a go chuu yu no si di blesn dem we Jeuova gi yu aredi.​—Sa. 16:5, 6.

GAD WOD

7. Ou di Baibl kyan elp wi fi eng aan an no gi op?

⁷ Jeuova gi wi im Wod, di Baibl, fi elp wi fi eng aan an no gi op, an a nof skripcha de de we mek wi nuo fi shuor se Jeuova a-go elp wi. Wan a dem a Matyu 6:8, we se: “Yu Faada nuo wa yu niid aal bifuo yu aks im fi’it.” A Jiizas did tel wi dat, an im nuo Jeuova beta dan enibadi els. So wi kyan nuo fi shuor se Jeuova kier bout wi an im fiil it fi wi wen wi a go chuu aad taim. Di Baibl av nof muor vors laik dis we kyan gi wi di chrent we wi niid an kyan elp wi fi tan op chrang.​—Sa. 94:19.

8. (a) Tel wi wan ting we di Baibl tiich wi we kyan elp wi fi eng aan an go chuu. (b) Wa kyan elp wi fi memba di sitn dem we wi lorn iina di Baibl we wi afi riizn pan wen wi niid fi memba dem?

⁸ Tingz we wi lorn iina di Baibl we wi afi riizn pan kyan elp wi fi eng aan an no gi op kaa dem kyan mek wi waiz so dat wi kyan mek op wi main fi du di rait ting. (Pr. 2:6, 7) Laik di Baibl tel wi se evridie av it uona prablem dem, so it no mek no sens fi a wori bout wa a-go gwaan tumaro ar wa naa go gwaan. (Mat. 6:34) So ef wi aalwiez a riid di Baibl an a tingk bout wa wi a riid, wi a-go memba dem sitn ya we wi kyan riizn pan, an wi a-go kyan mek op wi main fi du di rait sitn ar nuo wa fi du fi go chuu wi prablem dem.

9. Ou it mek yu fiil wen yu riid di Baibl bout ou Jeuova elp di wan dem we a worship im?

⁹ Di Baibl tel wi bout som piipl laik wi we chos iina Jeuova, an it tel wi bout ou im elp dem tu. (Iib. 11:32-34; Jmz. 5:17) Wen wi tingk bout dem piipl ya, it elp wi fi nuo se Jeuova “a kip wi sief an a im a mek wi chrang, wen wi a go chuu aal kain-a prablem, im eva de de fi elp wi.” (Sa. 46:1) So wen wi luk pan ou dem piipl ya we a sorv Jeuova stik tu im an du wa im tel dem fi du, it push wi fi waahn fi du di siem ting laik dem an eng aan an no gi op.​—Jmz. 5:10, 11.

10. Wa yu kyan du fi get aal a di elp we yu kyan get fram di Baibl?

¹⁰ Yu kyan du dis: Riid di Baibl evridie an rait dong som Baibl vors we kyan elp yu. Nof a di breda an sista dem fain se evri maanin wen dem riid di skripcha we wi get fi di die, it gi dem sitn gud fi tingk bout fram di Baibl. Wan sista we niem Mariea fain se a dat did elp ar wen shi fain out se ar mada an faada did av kyansa. Dis a wa shi se did elp ar wen shi did a tek kier a dem kopl mont bifuo dem ded: “Evri maanin mi wuda riid di skripcha fram di buk we niem Examining the Scriptures Daily an sidong an tingk bout we it se. An wen mi du dis evridie, it elp mi fi tingk bout Jeuova an di nais sitn dem we im tiich wi fram di Baibl insted-a fi tingk bout aal a di prablem dem we mi did a diil wid.”​—Sa. 61:2.

WI BREDA AN SISTA DEM

11. Wa it du fi wi wen wi tingk bout ou wi breda an sista dem eng aan an no gi op wen dem a go chuu dem prablem dem?

¹¹ Jeuova gi wi wi breda an sista dem fi elp wi fi eng aan an no gi op. Yu si kaa wi nuo se wa wi a go chuu “[wi] breda an sista dem we de aal uova di worl a go chuu di siem kain-a sofarieshan,” it mek wi nuo se wi no de pan wi uon. (1 Pii. 5:9) So no mata wa wi a go chuu, wi nuo se wi breda an sista dem go chuu sopm laik dat an dem did eng aan an no gi op, an dat miin se wi kyan eng aan an go chuu tu.​—Aks 14:22.

12. A wa wi breda an sista dem kyan du fi elp wi, an wa wi kyan du fi dem? (2 Korintiyan 1:3, 4)

¹² Bies pan wa wi breda an sista dem se an wa dem du fi wi, dat kyan elp wi fi eng aan an no gi op. An di apasl Paal did get fi si se a so it go fi chuu. Iina di leta dem we im did rait, im kaal di niem a di wan dem we elp im wen im kudn lef im ous kaa im did de anda lakdong, an im tangk dem fi wa dem did du fi im. Dem breda an sista de did se tingz fi elp Paal fi eng aan an no gi op, an dem gi im tingz we im wuda niid tu. (Fil. 2:25, 29, 30; Kol. 4:10, 11) Tide wi breda an sista dem kyan osh wi an elp wi fi eng aan an no gi op wen wi a go chuu som rof taim tu. An wi kyan du di siem ting fi dem tu wen prablem a lik dem.​—Riid 2 Korintiyan 1:3, 4.

13. A wa did elp wan sista we niem Maya fi eng aan an no gi op?

¹³ Iina 2020, som poliis iina Rosha ron iin pan wan sista we niem Maya an sorch op sorch op ar ous. Den shi did afi go a kuot an taak op bout wa shi biliiv iina. Shi se iina dem taim de, di breda an sista dem se tingz fi elp ar fi fiil beta an gwaan eng aan. An shi se: “Mi aalwiez did nuo se mi de iina wan big fambili we lov mi, bot afta ou di breda an sista dem did di de fi mi iina 2020, mi nuo se dem riili lov mi fi chuu.”

14. Ou wi breda an sista dem kyan elp wi fi eng aan an no gi op? (Luk pan di picha tu.)

¹⁴ Yu kyan du dis: Wen yu a go chuu yu prablem dem, a wan gud sitn fi yu spen taim wid yu breda an sista dem an riili taak tu dem. An no ich fi aks di elda dem fi elp tu. Dem komiin laik ‘wan plies we yu kyan go fi kip sief fram di briiz, an wan plies we yu kyan go fi kip sief fram di staam.’ (Aiz. 32:2) Aalwiez memba tu se yu breda an sista dem a go chuu fi dem uona prablem dem tu. So wen yu du sopm fi sumadi we a go chuu wan rof taim, it a-go mek yu api an elp yu fi eng aan an no gi op.​—Aks 20:35.

JEUOVA GI WI SITN FI LUK FAAWOD TU IINA DI FYUUCHA

15. Kaa Jiizas did a luk faawod fi get di sitn dem we Jeuova pramis fi gi im, ou dat did elp im, an ou dat kyan elp wi tu? (Iibruu 12:2)

¹⁵ Wi nuo fi shuor se di sitn dem we Jeuova pramis fi du fi wi iina di fyuucha boun fi apm, an dat elp wi fi eng aan an no gi op. (Ruo. 15:13) An a siem so wen Jiizas did a go chuu di rofis die a im laif pan da ort ya, im kip im main pan di sitn dem we Jeuova pramis fi du fi im, an dat did elp im fi eng aan an no gi op. (Riid Iibruu 12:2.) Jiizas did nuo se ef im stik tu Jeuova an du aal we im waahn im fi du, im wuda shuo se a bie lai Sietan did a tel pan Jeuova, an se a Jeuova fi get di ana an rispek. Jiizas did a luk faawod fi go bak tu im Faada iina evn, an den afta a wail, fi ruul iina Gad Kindom govament wid di 144,000. A siem wie so, kaa wi a luk faawod tu di nyuu worl we Jeuova pramis fi gi wi, no mata wa kain-a prablem lik wi, wi a-go eng aan an no gi op.

16. A ou di sitn dem we Jeuova pramis fi gi wi iina di fyuucha did elp wan sista we did a go chuu wan rof taim, an ou wa shi se kyan elp wi?

¹⁶ Tingk bout ou di sitn dem we Jeuova pramis fi gi wi did elp wan sista iina Rosha we niem Ana. Dem did lak op ar ozban iina prizn, an im did afi stie de til a did taim fi im go a kuot. So wen dis did apm, Ana se: “Mi aalwiez a prie tu Jeuova an tingk bout di sitn dem we im pramis fi gi mi iina di fyuucha, an dat elp mi fi eng aan an no gi op. Mi nuo se dis ya rof taim ya we mi a go chuu ya nou naa go gwaan fi eva, kaa Jeuova a-go don we wid im enimi dem an gi wi di ting dem we im did pramis fi gi wi.”

17. Wa an wa wi kyan du fi shuo se wi tangk Jeuova fi di sitn dem we im pramis fi gi wi iina di fyuucha? (Luk pan di picha tu.)

¹⁷ Yu kyan du dis: Tek som taim fi tingk bout aal a di gud sitn dem we Jeuova av pudong fi gi wi iina di fyuucha. Tingk bout ou laif a-go nais iina di nyuu worl wen wi de roun aal a wi fambili an fren dem an evribadi api. So wen wi tingk bout aal a dem nais sitn ya we a-go apm iina Paradais, wi a-go fain se it iiziya fi diil wid eni prablem we wi a go chuu ya nou an it mek wi memba se dem prablem ya “naa go laas fi eva.” (2 Kor. 4:17) Pan tap a dat, du aal we yu kyan du fi mek piipl nuo bout di gud sitn dem we Jeuova pramis fi gi wi iina di fyuucha. Jos tingk bout ou laif rof fi di piipl dem iina da worl ya kaa dem no nuo bout di gud sitn dem we Jeuova pramis fi gi wi. So iivn ef wi jos taak tu dem fi wan likl taim, wi mait-a se sitn we mek dem waahn fi lorn muor bout Gad Kindom govament an di sitn dem we Jeuova pramis fi gi wi iina di fyuucha.

18. Wa mek wi nuo se Jeuova a-go du wa im pramis fi chuu?

¹⁸ Afta Juob go chuu nof tingz iina laif an im stil eng aan an no gi op, im tel Jeuova se: “Nou mi a get fi si se yu kyan du evriting. Notn no de we yu waahn fi du, we yu kyaahn du.” (Juob 42:2) So Juob get fi si se notn kyaahn tap Jeuova fram du wa im waahn fi du, an dis kyan elp wi fi eng aan an no gi op tu. Laik se yu av wan uman we sik fi wan lang taim an shi did fiil sad bad kaa shi go a nof dakta an dem kudn elp ar. Bot afta dat shi fain wan gud dakta we tel ar wa did a mek ar sik an im taak bout ou im wuda elp ar fi get beta. Siem taim shi wuda fiil gud iivn duo shi nuo se it a-go tek likl taim fi shi get beta. So dis wuda elp ar fi gwaan eng aan kaa shi nuo se shi a-go get beta. A siem so wi a-go kyan eng aan an go chuu kaa wi nuo se wa Gad pramis wi bout Paradais a-go apm fi chuu.

19. Wa wi kyan du so dat wi kyan eng aan an tan op chrang?

¹⁹ Jos laik wa wi taak bout aredi, Jeuova elp wi fi eng aan an tan op chrang wen wi a go chuu wi prablem dem. Im mek wi kyan prie tu im, im gi wi im Wod​—di Baibl, im gi wi wi breda an sista dem, an im gi wi sitn gud fi luk faawod tu. So ef wi yuuz aal a dem sitn ya we Jeuova gi wi, im a-go elp wi no mata wa kain-a sofarieshan wi a go chuu ya nou. An wi a-go kyan gwaan go chuu an tan op chrang til da worl ya we Sietan a kanchuol don.​—Fil. 4:13.