Aal A Unu We A Mada An Faada​—Elp Unu Pikni Fi Get Chrang Iina Wa Dem Biliiv Iina

1-2. Wa di mada an faada dem fi du wen dem pikni dem aks dem kwestiyan bout wa wi biliiv?

EF YU a wan mada ar wan faada, wi nuo it tek uol iip a wok fi gruo yu pikni. An wi waahn fi big unu op fi ou unu a wok aad fi elp unu pikni dem fi get chrang iina wa dem biliiv iina. (Dyuu. 6:6, 7) Bot yu mait-a fain se di biga yu pikni get a di muo kwestiyan dem a-go aks yu bout di sitn dem we wi biliiv iina an di sitn dem we di Baibl se rait an wa it se rang.

² Wen dis staat fi apm, yu mait-a staat fi wanda ef yu pikni riili chos iina Gad. Bot wa wi fi memba se a dat di biga wan pikni get a di muor kwestiyan im a-go aks fi si ef wa im biliiv a so it go fi chuu. (1 Kor. 13:11) So ef yu a wan mada ar wan faada, yu na’afi wori ar fret wen yu pikni aks sortn kwestiyan. Wa yu kyan du a elp dem fi chos iina Gad an di sitn dem we di Baibl se.

3. Wa wi a-go luk pan iina da lesn ya?

³ Iina da lesn ya, wi a-go luk pan som sitn we di mada an faada dem kyan du fi elp dem pikni (1) fi get chrang iina wa dem biliiv iina, (2) fi lov di sitn dem we di Baibl se rait an fi iet wa it se rang, an (3) fi redi fi taak op bout di sitn dem we dem biliiv iina. An wen wi a luk pan dem chrii sitn ya, wi a-go si ou di mada an faada dem kyan luk pan di kwestiyan dem we dem pikni a aks iina wan gud wie an wa dem kyan du wid dem pikni dem we wi gi dem di chaans fi taak bout wa wi biliiv iina.

OU YU KYAN ELP YU PIKNI FI GET CHRANG IINA WA IM BILIIV IINA?

4. Wa a som kwestiyan we yu pikni mait-a aks, an wa mek?

⁴ Wan mada an faada we a sorv Jeuova nuo se dem pikni no baan a chos iina Gad. So wan pikni mait-a staat fi tingk bout an aks kwestiyan laik: ‘A ou mi nuo se Gad de fi chuu? Mi kyan riili biliiv wa di Baibl se?’ Matarafak, di Baibl mek wi nuo se wi fi nuo ‘ou fi worship Gad’ an se wi fi “tes evriting.” (Ruo. 12:1; 1 Tes. 5:21) So ou wi kyan elp wi pikni dem fi chos iina di sitn dem we wi biliiv iina?

5. Wa di mada an faada dem kyan du fi elp dem pikni fi chos iina di Baibl muor? (Ruoman 12:2)

⁵ Elp yu pikni fi pruuv fi imself se wa im a lorn fram di Baibl a chuu. (Riid Ruoman 12:2.) Wen yu pikni aks yu kwestiyan bout wa wi biliiv, tek di taim fi shuo im ou fi yuuz di Sitn We Di Jeuova Witnis Dem Kyan Yuuz Fi Luk Op Tingz fi fain di ansa dem. An yu kyan tel dem fi luk pan jw.org fi som vidiyo an difrant difrant sitn we kyan elp dem fi nuo fi shuor se di Baibl a no jos wan gud buk we man rait, bot a riili “Gad Wod.” (1 Tes. 2:13) Si sitn we yu kyan du ya: Mek yu pikni luk op tingz bout di siti we niem Ninive we did de iina Asiriya. Som piipl we taak gens di Baibl av it fi se no plies neehn de bout we niem so, bot iina di 1850’z dem dig op wan plies an fain di siti we did niem Ninive. Dis mek wi nuo se wa di Baibl did se bout Ninive a chuu. (Zef. 2:13-15) Ef yu waahn fi mek yu pikni nuo muor bout ou wen dem did mash dong Ninive it mek wa di Baibl se a-go apm apm, yu kyan mek im luk pan di paat we niem “Did You Know?” iina The Watchtower fi Novemba 2021. Wen yu pikni get di chaans fi luk pan wa di buk an pamplet dem se bout dem sitn ya an fi si se dem fain tingz we bak op wa di Baibl se, it kyan elp dem fi pruuv fi demself se wa iina di Baibl a chuu.

6. Tel wi sitn we di mada an faada dem kyan du fi elp dem pikni fi si se wa di Baibl se a chuu. (Luk pan di picha tu.)

⁶ Elp yu pikni fi si se wa di Baibl se a chuu. Di mada an faada dem av uol iip a difrant taim we dem kyan taak tu dem pikni bout di Baibl an elp dem fi chos iina Gad muor. Laik dem kyan du dis wen dem go a wan plies we av som uol iip a uol taim sopm, ar wan plies we av uol iip a difrant difrant kain-a flowaz, ar ef dem go a wan a di branch afis dem we av som tingz fram lang taim we a tel yu bout di Baibl. So ef yu get fi go a non a dem plies ya, yu kyan shuo yu pikni som a di sitn dem we mek wi si se wa di Baibl se, a so it go. An yu kyan yuuz di kompyuuta an difrant difrant buk fi shuo dem dem sopm ya tu. Yu pikni nuo se Jeuova niem de pan di Mowabait stuon we de bout fi bout 3,000 ier nou? Da stuon de iina Frans rait ya nou. An ef unu get fi go a di Worl Ed Afis fi di Jeuova Witnis dem we de iina Waarwik Nyuu Yaak, unu a-go get fi si wan stuon we luk laik it we av Jeuova niem pan it. Da stuon ya mek wi si se di king we did niem Miisha we kom fram Mowab did a fait gens di Izrel piipl dem, an a dat di Baibl did se. (2 Ki. 3:4, 5) Wen yu pikni get fi si fi imself se di sitn dem we de iina di Baibl a so it go fi chuu, it wi mek dem get chrangga iina wa dem biliiv iina.​—Luk pan 2 Kranikl 9:6.

7-8. (a) Tel wi bout wan a di priti shiep dem we yu si an wa wi kyan lorn fram it. (Luk pan di picha tu.) (b) A wa a som kwestiyan we yu kuda aks yu pikni fi mek dem si se a Gad mek evriting?

⁷ Elp yu pikni dem fi luk pan di nais sitn dem we Jeuova mek. Ef yu an yu pikni get fi go a konchri, ar unu liv de, ar wen yu a luk bout yu flowaz dem, yu kyan shuo dem di difrant difrant priti shiep dem we Jeuova yuuz wen im a mek dem sopm de. Mek dem si se di sumadi we mek dem sopm de waiz. Di saiyantis dem we stodi fi uol iip a ier bout di priti shiep dem we go roun an roun, laik di kain-a shiep we di siishel av, wan a dem we niem Nicola Fameli se wen yu kount di mount a taim we di shiep a sopm mait-a go roun an roun fa, dem fain se aal a di nomba dem we dem av lain op di siem wie. Dem kaal dem nomba ya Fibonaachi siikwens. Wi kyan si dem shiep ya wen wi luk pan di gyalaksi dem we outa spies, an wen yu luk pan wan siniel shel, an wen wi luk pan di shiep we som liif av, an di migl paat a di sonflowaz.a

⁸ Wen yu pikni de a skuul, yu a-go fain se dem a-go lorn se di difrant difrant ting dem we dem si roun dem, laik di chrii an dem ting de, a-go shiep sortn wie. Laik som chrii av baak an den yu av wan biga branch an som ada likl branch we kom fram it. Dem kaal dem kain-a shiep ya fraktals. Bot a uu yu tingk mek dem sopm ya shiep so? Yu tingk dem jos kom bout so? Wen di pikni dem tingk bout dem kain-a kwestiyan ya, it a-go mek dem nuo fi shuor se a Gad mek evriting. (Iib. 3:4) Yu kuda aks dem da kwestiyan ya: “Ef a Gad mek wi, it no mek sens se a im fi tel wi ou fi liv wi laif so wi kyan api?” Den yu kuda mek dem nuo se a di Baibl a-go shuo dem di bes wie ou fi liv dem laif an bi api.

NASA, ESA, an di Hubble Heritage (STScl/​AURA)-ESA/​Hubble Collaboration

ELP YU PIKNI DEM FI LOV DI SITN DEM WE DI BAIBL SE RAIT AN FI IET DI SITN DEM WE IT SE RANG

9. Wa kuda mek yu pikni waahn fi aks kwestiyan bout wa di Baibl se bout wa rait fram wa rang?

⁹ Som a di taim yu pikni dem mait-a aks yu kwestiyan bout wa di Baibl se rait fram wa rang. Chrai fi andastan wa mek dem aks dem kwestiyan ya. Kaa yu mait-a fiil se dem a aks dem kwestiyan ya kaa dem no fiil se wa di Baibl se mek sens, bot dem mait-a jos a chrai fi fain out ou dem kyan gi sumadi di ansa fi dem kwestiyan ya. Bot no mata wa mek dem aks di kwestiyan dem we dem aks, yu kyan yuuz di buk we niem Yu Kyan Bi Api Nou An Fi Eva!b fi stodi wid dem.

10. Ou yu kyan elp yu pikni fi si Jeuova az wan gud fren?

¹⁰ Elp yu pikni fi si Jeuova az im gud fren. Wen yu a stodi di Yu Kyan Bi Api Nou An Fi Eva! buk wid yu pikni, aks im di kwestiyan dem an yuuz op di tuori dem iina di buk fi nuo wa im a tingk. (Pr. 20:5) Laik iina lesn 8 it mek wi si se Jeuova komiin laik wan gud fren we tel wi tingz we gud fi wi. Afta yu don taak bout 1 Jan 5:3, yu kuda aks yu pikni da kwestiyan ya, “Kaa yu an Jeuova a gud fren, ou yu fi fiil bout wa im tel yu fi du?” Da kwestiyan de mait-a luk laik wan iizi kwestiyan, bot it a-go elp im fi si se eniting we Jeuova tel im fi du, a kaa im lov im.​—Aiz. 48:17, 18.

11. Wa yu kyan du fi elp yu pikni dem fi lov di sitn dem iina di Baibl we wi kyan yuuz fi riizn pan tingz? (Pravorbz 2:10, 11)

¹¹ Shuo yu pikni dem ou di sitn dem we de iina di Baibl we wi kyan riizn pan kyan elp wi. Wen yu a riid di Baibl an di skripcha fi di die wid yu pikni dem, yu kyan shuo dem ou dem sitn de we unu a riid a elp yu fambili fi liv wan beta laif. Laik, yu kyan elp yu pikni dem fi si di gud sitn dem we apm kaa unu wok aad an unu anis. (Iib. 13:18) An yu mait-a aal shuo yu pikni dem ou it mek wi api an aati wen wi du di sitn dem we wi lorn iina di Baibl. (Pr. 14:29, 30) Wen yu taak bout dem sitn ya wid yu pikni, it a-go elp dem fi lov di sitn dem we di Baibl tel dem fi du.​—Riid Pravorbz 2:10, 11.

12. Wa wan faada did du fi elp im pikni fi lov di sitn dem iina di Baibl we wi kyan yuuz fi riizn pan tingz?

¹² Wan faada we liv iina Frans we niem Steve tel wi ou im an im waif elp dem tiinieja we niem Ethan fi lov di sitn dem we Jeuova se wi fi du. Steve se: “Wi aks im kwestiyan laik, ‘Wa mek Jeuova se wi fi du dis? Wa im du fi shuo se im lov wi? Wa wuda apm ef wi no du sitn we Jeuova se wi fi du?’” Kaaz Ethan an im mada an faada taak bout dem sitn ya, it elp im fi lov di sitn dem we Jeuova lov an iet di sitn dem we im iet. An Steve se: “Wa mi waahn a fi Ethan si se eniting we Jeuova se beta dan eniting we nobadi kuda eva se.”

13. Tel wi wa di mada an faada dem kyan du fi tiich dem pikni fi yuuz di sitn dem iina di Baibl we wi kyan yuuz fi riizn pan tingz.

¹³ Tiich yu pikni ou fi yuuz di Baibl fi riizn pan tingz. Yu kyan du dat wen yu pikni get wan buk fi riid fi im uomwork. Di buk mait-a av som piipl iina it we a du aal kain-a seks sin ar uu lov fi fait, an a dem piipl de a get di big op iina di buk so yu pikni dem mait-a waahn fi fala dem. Yu kuda aks yu pikni fi tingk bout ou Jeuova fiil bout wa di difrant difrant piipl dem iina di tuori a du. (Pr. 22:24, 25; 1 Kor. 15:33; Fil. 4:8) Wen yu an yu pikni dem taak bout dem sitn ya, it kyan elp dem fi taak op bout Jeuova wen di tiicha an di ada pikni dem iina di klaas a taak bout di sitn dem we de iina di buk.

ELP YU PIKNI FI TAAK OP BOUT DI SI SITN DEM WE DEM BILIIV IINA

14. Wa a sopm we wan yong sumadi mait-a fried fi taak op bout, an wa mek im mait-a fried?

¹⁴ Som a di taim di pikni dem mait-a fried fi taak op bout di sitn dem we dem biliiv iina, laik wen di tiicha dem mait-a tiich se wi an di ada ting dem we de pan di ort we a liv jos kom bout so. Dem mait-a fried fi mek di tiicha an di ada pikni dem iina di klaas nuo se dem no biliiv dat. So ef yu a wan mada ar wan faada, ou yu kyan elp yu pikni fi tan op chrang fi wa im biliiv iina?

15. Wa kyan elp wan yong breda ar sista fi get chrang iina wa dem biliiv iina?

¹⁵ Elp yu pikni fi get chrang iina wa im biliiv iina. Yu pikni na’afi fiil shiem kaa im biliiv se a Sumadi mek wi. (2 Tim. 1:8) Kaa iivn nof saiyantis biliiv se di ting dem roun wi no jos kom bout jos so. Wen dem stodi bout di priti flowaz dem an di animal dem we de roun wi, dem get fi si se a mos Sumadi we waiz mek dem. So dem saiyantis ya no biliiv se tingz jos kom bout jos so laik wa som tiicha a tiich se. Fi elp yu pikni, yu kyan mek dem luk pan som a di tuori bout som a wi breda an sista dem we yuus tu biliiv se a no sumadi mek wi, an yu kyan mek dem si wa an wa elp dem nuo fi shuor se a Sumadi mek wi.c

16. Ou di mada an faada dem kyan elp dem pikni fi redi fi mek ada piipl nuo wa mek dem biliiv se a Sumadi mek wi? (1 Piita 3:15, NWT ) (Luk pan di picha tu.)

¹⁶ Elp yu pikni fi redi fi mek ada piipl nuo wa mek im biliiv se a sumadi mek wi. (Riid 1 Piita 3:15, NWT.) Fi du dat, yu kyan yuuz di difrant difrant tingz pan jw.org we taak bout ef laif jos kom bout so ar ef a sumadi mek wi. Afta yu du dat, yu kyan elp yu pikni fi pik out som sitn we im kyan yuuz fi elp ada piipl fi si se a Sumadi mek wi. Bot mek im memba se im no fi de de a aagyu-aagyu wid dem, bot jos riizn wid dem iina wa wie we mek sens fi elp dem fi andastan wa im a se. Laik ef wan a di pikni dem iina im klaas se: “Mi no biliiv iina Gad kaa mi kyaahn si im,” yu pikni kuda ansa dem an se: “Picha yu a waak iina wan faar faar plies we ful op a bush we nobadi no liv an yu bok op pan wan nais ous. Yu wuda tingk se a sumadi mek it, no chuu? Ef a mos sumadi mek da ous de, den a no mos Sumadi mek di ort an di staar an di ada sitn dem we de outa spies?”

17. Tel wi ou wan mada an faada kyan elp dem pikni fi yuuz di chaans we dem get fi tiich ada piipl bout di Baibl.

¹⁷ Elp yu pikni fi yuuz di chaans dem we dem get fi tiich ada piipl bout di Baibl. (Ruo. 10:10) Yu kyan elp yu pikni fi si se wen dem afi taak tu ada piipl bout wa dem biliiv iina, it komiin laik wen sumadi a lorn fi plie wan gitaar ar wan piyano. Wen dem fos staat lorn ou fi plie, dem staat wid sitn iizi. An den di muor di sumadi plie a di muor dem get beta an beta. A siem so wen yu pikni a priich tu sumadi, dem kyan staat wid sitn iizi, laik yu pikni kuda aks wan a di pikni iina im klaas se: “Yu did nuo se di piipl dem we mek kyaar an dem sitn de luk pan di animal dem an dem sitn de an mek dem aafa it? Mek mi shuo yu wan likl vidiyo.” An den dem kyan shuo dem wan a di vidiyo dem we niem A Sumadi Did Mek It? Den im kuda aks di ada pikni se: “Ef saiyantis kyan luk pan di animal dem an mek sitn aafa it an den get di big op fi wa dem mek, den a uu yu tingk fi get di big op fi mek di animal dem?” Wen yu pikni riizn dem kain-a wie ya wid wan neda pikni we de iina dem klaas, it mait-a mek dem waahn fi lorn muor bout Jeuova.

NO TAP ELP YU PIKNI FI GET CHRANG IINA WA DEM BILIIV IINA

18. Wa a som a di sitn dem we di mada an faada dem fi a du fi elp dem pikni fi gwaan chos iina Jeuova?

¹⁸ Memba se wi liv iina wan worl we ful op a piipl we no chos iina Jeuova. (2 Pii. 3:3) So aal a unu we a mada an faada fi mek shuor se wen unu a stodi di Baibl wid unu pikni, unu a elp dem fi stodi bout tingz we a-go mek dem rispek di ting dem we de iina di Baibl muor. Dat a-go mek dem waahn fi du di ting dem we Jeuova se rait an no du di sopm dem we im se dem no fi du. Elp dem fi luk pan di difrant difrant ting dem we Jeuova mek so dat dem kyan chos im muor. Mek dem luk pan di ting dem we Jeuova did se im a-go du we im du aredi so dat dem si se evriting we Jeuova se im a-go du a dat im du. An wan a di bigis ting we yu fi du a prie wid yu pikni an prie fi dem. An wen yu du aal a wa yu fi du, jos nuo se Jeuova a-go bles wa yu du fi elp yu pikni fi get chrang iina di sitn dem we dem biliiv iina.​—2 Kr. 15:7.