DI LESN FI STODI 12
SANG 119 Wi Niid Fiet We Chrang
Liv Yu Laif Bies Pan Wa Yu Biliiv Iina
“Wi no liv wi laif bies pan wa wi kyan si wid wi yai dem bot pan wa wi biliiv.”—2 KOR. 5:7.
A DIS WI A-GO LUK PAN
Wi a-go luk pan ou wi kyan liv wi laif bies pan wa wi biliiv iina wen wi av som big tingz fi mek op wi main bout.
1. Wa mek di apasl Paal kuda fiil gud bout di wie ou im liv im laif?
DI APASL PAAL did get fi fain out se dem suun kil im, bot iivn duo im did nuo dat, im did fiil gud fi nuo se im liv im laif di wie ou Gad waahn im fi liv it. An kaaz a dat, im kuda se: “Mi ron da ries ya til it don an no gi op. Mi a-go sorv im til mi ded.” (2 Tim. 4:6-8) Paal did mek op im main fi yuuz im laif fi sorv Jeuova, an im did nuo se Jeuova did api wid wa im du. Wi waahn fi du di siem ting wid wi laif so dat Jeuova kyan api wid wi tu. A ou wi kyan du dat?
2. A wa it miin fi liv wi laif bies pan wa wi biliiv?
2 Wen Paal did a taak bout imself an som ada Kristiyan, im se: “Wi no liv wi laif bies pan wa wi kyan si wid wi yai dem bot pan wa wi biliiv.” (2 Kor. 5:7) Wa Paal did riili a se a dat di wie ou wi liv wi laif fi shuo se wi biliiv se Jeuova a di bes Sumadi fi tel wi ou fi liv wi laif. An di ting dem we wi du a-go shuo se wi biliiv se Jeuova a-go bles wi wen wi liv wi laif azkaadn tu ou im Wod se wi fi liv it. (Sa. 119:66; Iib. 11:6) Bot ef sumadi onggl a liv dem laif bies pan di sitn dem we dem a si, dat wuda miin tu se dem a-go du tingz bies pan we dem si, an wa dem ier, an ou dem fiil.
3. Wa a som a di gud sitn dem we a-go apm ef wi liv wi laif bies pan di sitn dem we wi biliiv iina? (2 Korintiyan 4:18)
3 Ye, som a di taim wi a-go du som sitn bies pan wa wi si an wa wi ier, bot ef a dat wi du laik wen wi av som big tingz fi mek op wi main bout, wi a-go onggl en op iina prablem. An dat a kaa di ting dem we wi si an ier, som a di taim a no so it riili go. An iivn ef a so it go, ef wi onggl liv bai wa wi si an ier, wi mait-a no lisn tu wa Gad se. (Iik. 11:9; Mat. 24:37-39) Bot wen wi du tingz bies pan wa wi biliiv, wi a-go mek op wi main fi du “we di Laad riili waahn [wi] fi du.” (Ifii. 5:10) Wen wi du wa Gad tel wi fi du, wi a-go av piis iina wi aat an main an wi a-go api tu. (Sa. 16:8, 9; Aiz. 48:17, 18) An ef wi gwaan liv wi laif bies pan di sitn dem we wi biliiv iina, wi a-go kyan get fi liv fi eva.—Riid 2 Korintiyan 4:18.
4. A ou sumadi kyan nuo ef dem a liv dem laif bies pan wa dem biliiv iina ar ef dem a liv it bies pan di sitn dem we dem kyan si?
4 Fi nuo ef wi a liv wi laif bies pan di sitn dem we wi biliiv ar bies pan di sitn dem we wi si, wi afi aks wiself dem kwestiyan ya: Wa elp mi fi mek op mi main bout sitn? Mi onggl dwi’it bies pan di sitn dem we mi si? Ar mi du di sopm dem we mi du kaa mi chos we Jeuova se? Mek wi luk pan ou wi kyan shuo se wi biliiv di sitn dem we wi biliiv iina wen it kom aan tu dem chrii sitn ya: (1) wen wi a luk wok, (2) wen wi a luk sumadi fi marid tu, an (3) wen Jeuova aaganaizieshan tel wi fi du sopm. Fi evri wan a dem, wi a-go taak bout tingz we wi kyan tingk bout we a-go elp wi fi du di rait ting.
WEN YU A LUK WAN WOK
5. A wa wi fi tingk bout wen wi a tingk bout di kain-a wok we wi fi tek?
5 Aal a wi waahn fi kyan tek kier a wiself an wi fambili. (Iik. 7:12; 1 Tim. 5:8) Som a di wok dem we wi kyan du pie wi nof moni, an it mek wi kyan tek kier a wiself an av som moni fi pudong. Bot som ada wok mek wi kyan bieli tek kier a wiself an wi fambili. Wen wi a tingk bout wich wok fi tek, wi a-go a tingk bout di moni we wi a-go get tu, bot ef di sumadi jos a tingk bout di moni we dem a-go get, dem wuda a liv dem laif bies pan wa dem kyan si.
6. Wen wi a mek op wi main bout di kain-a wok we wi a-go tek, a ou wi kyan shuo se wi a dwi’it bies pan wa wi biliiv iina? (Iibruu 13:5)
6 Ef wi a liv wi laif bies pan di sitn dem we wi biliiv, wi a-go tingk bout ef di wok we wi a-go tek a-go mek wi an Jeuova no fren agen. So wi kuda aks wiself: ‘Da wok ya we mi a-go tek, it a-go mek mi du tingz we Jeuova iet?’ (Pr. 6:16-19) ‘It a-go tap mi fram go a miitn an dem ting de, ar it a-go mek mi no get fi spen nof taim wid mi fambili ar it a-go mek mi de we fram dem nof?’ (Fil. 1:10) Ef a dem sopm ya it a-go du, it no mek no sens yu tek da wok de iivn ef it aad fi fain wok. Kaa wi a liv wi laif bies pan wa wi biliiv, wi a-go du tingz fi shuo se wi nuo fi shuor se Jeuova a-go tek kier a wi.—Mat. 6:33, NWT; riid Iibruu 13:5.
7-8. Wa Javan did du fi shuo se im a liv im laif bies pan wa im biliiv? (Luk pan di picha tu.)
7 Luk pan ou Javan,a wan breda we kom fram Sout Amerika, did si se im afi du tingz bies pan wa im biliiv. Im se: “Mi did a chrai fi get wan big tap-a-tap wok we wuda mek mi get tuu taim di mount a moni we mi did a get, an tingz wuda gud wid mi.” Bot Javan did wel waahn fi paiyanier. Im se: “Sumadi did tel mi bout wan jab intavyuu we mi kuda go du wid wan a di tap-a-tap man dem. Bifuo di man staat aks mi no kwestiyan, mi prie tu Jeuova an aks im fi elp mi kaa mi nuo se im nuo wa gud fi mi. Ye, mi did waahn fi get wan tap-a-tap wok, bot mi neva waahn da wok ya ef it neehn did a-go mek mi get fi du wa mi waahn fi du fi Jeuova.”
8 Javan se: “Wen im a aks mi di kwestiyan dem, di man mek mi nuo se mi wuda afi wok muor owaz dan di naamal owaz dem. Mi mek im nuo se mi kudn du dat kaa mi afi go a fiil sorvis.” Ye man, Javan neehn tek di wok. Tuu wiik afta dat, im staat fi paiyanier. An iina di siem ier, im fain wan wok we im neehn afi wok evridie. Im se: “Jeuova did a lisn tu mi prieya dem an im mek mi get wan wok we kuda mek mi paiyanier. Mi riili api fi av da wok ya we mek mi kuda yuuz muos a mi taim fi sorv Jeuova an elp out mi breda an sista dem.”
Ef dem a gi yu wan beta wok a di plies we yu wok we a-go mek yu mek muo moni, bies pan wa yu du it a-go shuo ef yu riili biliiv se Jeuova a-go tek kier a yu. (Luk iina paragraaf 7-8)
9. Wa yu lorn fram wa did apm tu Trenton?
9 Wa ef wi fain out se di wok we wi a du nou naa mek wi liv wi laif bies pan di sitn dem we wi biliiv iina? Wi a-go luk pan wa did apm tu wan breda we niem Trenton we kom fram Konggo. Im se: “Di wok we mi did a du nou, mi did nuo se a wan wok we mi kudn get agen, kaa mi did a mek chrii taim di mount a moni we mi did a mek bifuo da wan ya, an nof piipl did rispek mi.” Bot Trenton neehn a get fi go nof a di miitn dem kaa im did afi wok liet nof a di taim. An dem did waahn fi get im iina som bandulu bizniz tu. So Trenton did waahn fi lef di wok bot im did a fret bout wa wuda apm ef im dwi’it. Im se: “Abakok 3:17-19 elp mi fi nuo se ef mi lef mi wok Jeuova a-go stil tek kier a mi, so mi lef di wok.” Im se: “Nof piipl tingk se ef dem gi yu wan wok we mek yu a mek wol iip a moni, yu a-go redi fi du eniting we dem waahn yu fi du. Bot ef yu du dat, dat wuda miin tu se yu naa go get fi spen nof taim wid yu fambili an du di sitn dem we Jeuova waahn yu fi du. Mi api se mi did du aal we mi kyan du fi tan kluos tu Jeuova an mi fambili. Wan ier afta dat, Jeuova elp mi fi fain wan likl wok we kuda mek mi tek kier a mi fambili an av muor taim fi du tingz fi Jeuova. Wen wi mek Jeuova ting bi di big ting iina wi laif wi mait-a av som moni prablem bot Jeuova a-go tek kier a wi.” Ye man, ef wi chos wa Jeuova tel wi se im a-go du fi wi an gwaan du di sitn dem we wi biliiv iina, im a-go bles wi.
WEN WI A LUK SUMADI FI MARID TU
10. Wa a som a di sitn dem we sumadi mait-a onggl a tingk bout wen dem a pik sumadi fi marid tu?
10 Wen Jeuova mek wi so dat wi kyan marid, a wan nais sitn dat im mek wi kyan du, so notn no rang ef sumadi waahn fi marid. Laik wen wan sista a tingk bout wan breda we shi waahn fi marid tu, shi mait-a a tingk bout ou im luk, ou im gwaan, an wa ada piipl tingk bout im, di mount a moni we im av an ef im a tek kier a im piipl dem ar jos ou im mek shi fiil.b Ye, shi fi tingk bout dem sitn ya bot a no onggl dem sitn ya shi fi tingk bout. Kaa ef a onggl dem sitn ya shi a tingk bout, shi wuda onggl a tingk bout di sitn dem we shi kyan si.
11. Wen wi a pik sumadi fi marid tu, a ou wi kyan shuo se wi a liv wi laif bies pan di sitn dem we wi biliiv iina? (1 Korintiyan 7:39)
11 Jeuova api wid wi breda an sista dem we du wa di Baibl se wen dem a pik sumadi fi marid tu, an we wiet til dem “paas di taim iina laif we dem wuda wel waahn fi av seks muo dan eni ada taim iina laif” bifuo dem staat fi luk sumadi fi marid tu! (1 Kor. 7:36, NWT ) An dem a-go mek shuor se dem luk fi sumadi we av di wiez dem we Jeuova se wan ozban ar wan waif fi av. (Pr. 31:10-13, 26-28; Ifii. 5:33; 1 Tim. 5:8) So ef sumadi we a no wan Jeuova Witnis a luk dem fi marid tu, dem naa go marid tu dem—dem a-go mek shuor se dem marid tu sumadi we a “wan a Gad pikni,” bies pan wa iina 1 Korintiyan 7:39. (Riid.) An dem a-go gwaan liv dem laif bies pan di sopm dem we dem biliiv iina an nuo fi shuor se Jeuova a-go tek kier a dem iina evri wie, beta dan ou sumadi els kuda tek kier a dem.—Sa. 55:22.
12. Wa wi lorn fram wa did apm tu Rose?
12 Luk pan wa did apm tu Rose, wan paiyanier sista we liv iina Kolombiya. Di wok we shi did a du mek shi a spen nof taim wid wan man we a neehn wan Jeuova Witnis we did a luk ar. An Rose did laik im tu. Shi se: “Im did a wan nais man—im aalwiez a du tingz iina im komyuuniti fi elp ada piipl an im neehn a du tingz fi mash op im badi. An mi did lov ou im did a chriit mi. An im did av di kain-a wiez dem we mi did waahn iina wan ozban, bot di onggl ting a dat im neehn a sorv Jeuova.” Shi se: “It did aad fi mi tel im nuo kaa mi did riili laik im. An dem taim de, mi did fiil laik mi neehn av nobadi an mi did wel waahn get marid, an mi kudn fain nobadi we a sorv Jeuova fi marid tu.” Bot Rose neehn a tingk bout onggl wa shi kyan si, shi did a tingk bout ou it wuda mek shi an Jeuova no fren agen ef shi go marid tu im. So shi mek shuor se shi no av notn fi du wid im agen an staat fi du nof fi Jeuova. Likl afta dat, dem invait ar fi go a di skuul we niem School for Kingdom Evangelizers. An rait ya nou ya, Rose a wan speshal paiyanier. Shi se: “Jeuova mek mi api bad.” Aalduo it mait-a no iizi fi du di sitn dem we wi biliiv iina, wen a sitn we yu wel waahn fi du iina yu aat, it aalwiez ton out gud wen yu du wa Jeuova waahn yu fi du.
WEN JEUOVA AAGANAIZIESHAN TEL WI FI DU SOPM
13. Wen di breda dem tel wi fi du sopm, wa wi mait-a du we shuo se wi onggl a liv bai di sitn dem we wi kyan si?
13 Muo wail a di elda dem, di sorkit uovasiya dem, ar di breda dem a di branch afis an di Govanin Badi wuda tel wi wa fi du so dat wi kyan gwaan worship Jeuova. Bot wa ef wi no andastan wa mek dem tel wi wa dem tel wi fi du? Wi mait-a onggl a luk pan di bad sitn dem we kyan apm tu wi kaaz a we dem tel wi fi du. An wi mait-a onggl a luk pan di bad wiez dem we di breda dem we a tel wi wa fi du av.
14. Wa a-go elp wi fi liv wi laif bies pan di sopm dem we wi biliiv iina wen di breda dem we a liid wi tel wi wa fi du? (Iibruu 13:17)
14 Wen wi a liv wi laif bies pan di sopm dem we wi biliiv iina, it a-go shuo se wi a chos Jeuova. An it a-go mek wi api fi lisn tu wa im a se kaa im nuo evriting we wi a go chuu. (Riid Iibruu 13:17.) Wen wi du dat, it mek wi an wi breda an sista dem wok tugeda az wan. (Ifii. 4:2, 3) An it mek wi memba se iivn duo di breda dem we a tel wi wa fi du no porfek, Jeuova a-go stil bles wi wen wi lisn tu wa dem a se. (1 Sam. 15:22) So ef sitn iina di kanggrigieshan fi fiks, wi a-go wiet pan Jeuova fi fiks it.—Mai. 7:7.
15-16. A ou wan breda did shuo se im a liv im laif bies pan di sopm dem we im biliiv, wen im did a wanda ef im did fi fala we di wan dem we a liid wi did se im fi du? (Luk pan di picha tu.)
15 Wi a-go luk pan wa did apm wid di breda an sista dem iina Peruu we mek wi se it wok out gud fi wi wen wi liv wi laif bies pan di sitn dem we wi biliiv iina. Iina Peruu, a Spanish muos a di piipl dem taak, bot yu av som ada likl langwij we nof a di piipl dem taak tu. An wan a dem langwij de a Kechuwa. So fi wol iip a ier, di breda an sista dem we chat Kechuwa wuda go sorch fi di piipl dem we taak da langwij de so dem kuda priich tu dem. Bot di govament mek wan laa we mek dem afi chienj op di wie ou dem a luk fi di piipl dem fi priich tu dem. (Ruo. 13:1) An kaaz a dat, som a dem mait-a did a tingk se it a-go aad fi fain di piipl dem we chat Kechuwa. Bot di breda an sista dem lisn tu wa di breda dem we a liid dem se, an kaa dem du dat Jeuova bles dem an dem fain nof piipl we chat Kechuwa.
16 Kevin a did a wan elda iina wan a di kanggrigieshan dem we dem chat Kechuwa, an im a did wan a dem we did a wanda ef di wie ou dem did a luk fi di piipl dem we taak Kechuwa ya nou wuda wok out. Im se: “Mi tingk tu miself se, ‘A ou mi a-go fain piipl we chat Kechuwa?’” Bot Kevin neehn mek dat tap im. Im se: “Mi memba wa Pravorbz 3:5 se an mi tingk bout Muoziz. Im did fi kya di Izrelait piipl dem outa Iijip, an it wuda luk laik se we im fi kya dem it wuda mek it iizi fi di Ijipshan dem kech dem. Bot Muoziz lisn tu wa Jeuova se, an kaa im lisn, Jeuova wok wan mirikl fi siev dem.” (Ek. 14:1, 2, 9-11, 21, 22) Kevin did redi fi chienj op tingz wen im did a priich. An kaaz a dat, im kuda se: “Mi did shak fi si ou Jeuova bles wi. Bifuo nou wi did afi waak wol iip iina fiil sorvis fi fain jos wan ar tuu piipl we chat Kechuwa. Bot nou wi a fain muor piipl fi taak tu so wi a get fi stodi di Baibl wid muor piipl, an so muor an muor piipl a kom a wi miitn nou.” Ye man, wen wi liv wi laif bies pan di sitn dem we wi biliiv iina, Jeuova a-go aalwiez bles wi.
Di breda an sista dem fain se nof a di piipl dem we dem si kyan shuo dem iina di ieriya wich paat di piipl dem de we chat Kechuwa we dem kyan taak tu (Luk iina paragraaf 15-16)
17. Wa yu lorn iina da lesn ya?
17 A no onggl wen wi a luk wok, a luk sumadi fi marid tu, an wen Jeuova aaganaizieshan tel wi fi du tingz wi fi shuo se wi a liv wi laif bies pan di sitn dem we wi biliiv iina. Bot wi fi dwi’it tu wen it kom aan tu di ting dem we wi du fi enjai wiself, an wen wi fi mek op wi main bout di mount a skuulin wi a-go du, ar ou wi a-go gruo wi pikni dem. So eniting yu a mek op yu main fi du, yu no fi dwi’it onggl bies pan di sitn dem we yu kyan si, bot yu a-go du wa yu du kaa yu an Jeuova a fren. An memba se eniting we Jeuova tel yu fi du a fi yu uona gud, an im pramis yu se im a-go tek kier a yu an a dat im a-go du. An it a-go mek wi an Jeuova bi fren fi eva an eva.—Mai. 4:5.
SANG 156 Mi Nuo Fi Shuor!
a Som a dem niem ya a no dem rait niem; wi chienj dem.
b Fi mek it iizi fi wi, da paragraaf ya a taak bout wan sista we a luk wan breda fi bi ar ozban. Bot a di siem ting go fi wan breda we a luk wan waif tu.