Yu Tingk Se Di Ting Dem We Yu Did Lorn Wen Yu Jos Staat Fi Stodi Di Baibl Kyan Elp Yu Tide?

1. Wen yu did jos staat fi lorn di sitn dem fram di Baibl, ou it did mek yu fiil?

DI TING dem we wi did lorn wen wi jos staat fi stodi di Baibl did elp wi fi chienj op tingz iina wi laif. Laik wen wi did lorn se Gad niem Jeuova, wi did staat fi du tingz so dat wi an im kuda ton fren. (Aiz. 42:8) An wen wi did lorn bout wa apm wen sumadi ded, wi neehn afi a wanda agen ef dem de somwe a sofa. (Iik. 9:10) An wen wi lorn se Gad a-go ton di ort iina wan paradais, it elp wi fi tap wori bout wa a-go apm iina di fyuucha, an dat mek wi shuor se wi kyan go liv fi eva an no onggl jos fi 70 ar 80 ier.​—Sa. 37:29; 90:10.

2. Wa mek Piita did afi memba di breda an sista dem we did a sorv Jeuova fi wan lang taim bout di ting dem we dem did lorn fram di Baibl aredi? (2 Piita 1:12, 13)

² Wi no fi tingk se di sitn dem we wi lorn wen wi jos staat fi stodi di Baibl no impuotant agen. Wen di apasl Piita did rait im sekan leta, im did rait tu di Kristiyan dem we did “a uol aan chrang pan di chuu mesij” aredi. (Riid 2 Piita 1:12, 13.) Bot yu did av som wikid piipl iina di kanggrigieshan we did a chrai fi mek di breda an sista dem ton dem bak pan Jeuova an staat fala dem. (2 Pii. 2:1-3) So Piita did waahn fi elp di breda an sista dem fi get chrangga iina wa dem biliiv iina so dat dem wudn biliiv di lai dem we di wikid piipl dem weehn a tel dem. An fi du dat, im memba dem bout som a di sitn dem we dem did lorn aredi, kaa dem sitn ya wuda elp dem fi gwaan sorv Jeuova.

3. Tel wi sitn we kyan elp wi andastan wa mek aal a wi we a Kristiyan fi gwaan tingk bout di ting dem we wi did lorn wen wi jos staat fi stodi di Baibl.

³ Aalduo wi mait-a a sorv Jeuova fi wan lang taim, wi kyan stil lorn nyuu tingz fram di ting dem we wi did lorn wen wi jos staat fi stodi di Baibl. Laik tingk bout dis: Wan mada we kyan kuk gud an ar daata mait-a yuuz di siem ting dem fi kuk suup. Bot afta a wail, di mada kyan yuuz di siem sitn dem we shi yuuz kuk di suup fi mek difrant difrant tingz we ties nais. A siem wie so di wan dem we a sorv Jeuova fi wan lang taim mait-a lorn som nyuu tingz fram di siem skripcha dem we di wan dem we jos a staat fi stodi di Baibl a lorn. Sins wi get baptaiz, tingz mait-a chienj op iina wi laif, an di ting dem we wi yuus tu di fi Jeuova mait-a chienj tu. Bot wen wi tingk bout di ting dem we wi did lorn wen wi jos staat fi stodi di Baibl, wi mait-a si som nyuu wie ou dem ting de kyan elp wi nou. So mek wi luk pan chrii tingz we di wan dem we a sorv Jeuova fi wan lang taim kyan lorn fram di ting dem we dem did lorn aredi.

JEUOVA A DI WAN WE MEK EVRITING

4. Kaa wi nuo se a Jeuova a di Wan we mek evriting, wa dat du fi wi?

⁴ Wi nuo se a Jeuova we waiz an av aal di powa mek di ort an evriting we de pan it. An a dat di Baibl se wen it se: “A Gad bil evriting.” (Iib. 3:4) An a uol iip a tingz wi kyan lorn fram dat. Laik kaa Jeuova mek wi, im nuo evriting bout wi. Pan tap a dat, im kier bout wi an im nuo wa gud fi wi tu. So kaa wi nuo se a Jeuova mek evriting, dat elp wi fi chienj op sortn tingz iina wi laif an mek wi av sitn gud fi liv fa.

5. Wa a sopm we wi lorn we kyan elp wi fi ombl wiself? (Aizaiya 45:9-12)

⁵ Di fak se wi nuo se a Jeuova mek evriting kyan elp wi fi ombl wiself. Laik fi a wail Juob did se som tingz bout Jeuova we neehn go so. Im did onggl a tingk bout imself an a chrai fi pruuv se wa im a se did rait. Bot Jeuova did afi mek im memba se a Im, Jeuova, a di Wan we powaful an mek evriting. (Juob 38:1-4) An dis elp Juob fi si se Jeuova aalwiez du di rait ting. An a das wai di prafit Aizaiya did rait se nobadi no fi tingk se dem waiza dan Jeuova.​—Riid Aizaiya 45:9-12.

6. A wen it wuda gud fi tingk bout ou waiz an powaful Jeuova bi an se a im mek evriting? (Luk pan di picha dem tu.)

⁶ Sumadi we a sorv Jeuova fi wan lang taim mait-a staat du tingz di wie ou dem tingk se rait insted-a fi a luk iina di Baibl an aks Jeuova fi elp fi nuo wa fi du. (Juob 37:23, 24) So ou it wuda elp da sumadi de fi tingk bout di fak se a Jeuova a di Wan we mek evriting an im waiz an powaful? (Aiz. 40:22; 55:8, 9) Wen im tingk bout dis, it wi elp im fi si se im no waiza dan Jeuova kaaz evriting we Jeuova se aalwiez rait, an dat wi elp im fi ombl imself tu.

7. A wa Rahela did du so dat shi kuda wok wid wan chienj we did gwaan iina di aaganaizieshan?

⁷ Wen Rahela, we liv iina Sloviiniya, tingk bout di fak se Jeuova a di Wan we mek evriting, dat elp ar fi wok wid di chienj dem we kom fram di breda dem we Jeuova a yuuz fi liid wi tide. Shi se: “Som a di taim it neehn iizi fi mi fi wok wid di chienj dem we dem breda de mek. Laik aalduo mi did wach Di Ripuot Fram Di Govanin Badi Fi 2023 #8, mi did stil shak di fos taim mi si wan breda wid bied a gi wan taak. So mi prie tu Jeuova fi elp mi fi wok wid da chienj ya.” Rahela get fi si se kaa Jeuova a di Wan we mek evriting, im aalwiez du wa rait an im nuo di bes wie fi liid im piipl dem. Ef di breda dem we a liid wi chienj op sitn an yu fain it aad fi wok wid it, tek di taim fi tap an tingk bout ou waiz an powaful Jeuova bi, di Wan we mek evriting.​—Ruo. 11:33-36.

WA MEK GAD LOU SO MOCH SOFARIN FI A GWAAN?

8. Kaa wi nuo wa mek Gad lou sofarin fi a gwaan, ou dat elp wi?

⁸ Wa mek yu tingk Gad lou so moch sofarin fi a gwaan? Som piipl uu no nuo di ansa fi da kwestiyan de en op get beks wid Gad, ar dem tingk se no Gad no de. (Pr. 19:3) Bot wi lorn se a no Jeuova kaaz piipl fi sofa an ded bot a di sin we wi get fram Adam kaaz dat fi apm. Wi lorn tu se Jeuova no don we wid sofarieshan yet kaa im a tek taim wid wi, so dat wuda gi uol iip muor piipl di chaans fi get fi nuo im an fi lorn bout ou di taim a-go kom wen im naa go mek nobadi sofa agen. (2 Pii. 3:9, 15) Dem sitn ya we wi lorn elp wi fi fiil beta an mek wi an Jeuova get kluos.

9. A wa an wa mait-a apm tu wi we mek wi niid fi tingk bout wa mek Jeuova lou sofarin fi gwaan?

⁹ Wi get fi si se wi jos afi gwaan wiet til di taim kom wen Jeuova a-go don we wid sofarieshan. Bot wen sumadi we wi lov ded, ar wen wi ar wi fambili a go chuu som rof taim, ar wen piipl naa chriit wi fier, wi mait-a get beks kaa wi fiil se Jeuova a tek tuu lang fi don we wid dem sitn ya. (Aba. 1:2, 3) Bot wen dem ting ya a apm tu wi, it wuda du wi gud fi tap an tingk bout wa mek Gad lou wi fi sofa.a (Sa. 34:19) An wi kyan tingk tu bout se Jeuova a-go don we wid sofarieshan.

10. A wa did elp Anne fi fiil beta afta ar mada ded?

¹⁰ Kaa wi nuo wa mek wi a sofa, it elp wi fi eng aan an no gi op. Anne, we liv pan di ailan we niem Maayat we de iina di Indiyan Uoshan, se: “Mi did sad bad wen mi mada did ded kopl ier ago. Bot mi aalwiez chrai fi memba se a no Jeuova a kaaz wi fi sofa, an im wel waahn fi don we wid di sofarieshan we wi a go chuu an mek wi fambili an fren dem we ded kom bak alaiv. Enitaim mi tingk pan dem sitn ya, it gi mi wan piis iina mi aat an main we mi neva tingk mi kuda fiil.”

11. Kaa wi nuo wa mek Jeuova lou piipl fi sofa, ou dat kyan elp wi fi gwaan priich?

¹¹ Kaa wi nuo wa mek Gad lou piipl fi sofa, dat kyan elp fi push wi fi gwaan priich di gud nyuuz. Piita did tel di Kristiyan dem se Jeuova tek im taim wid piipl kaaz im waahn dem fi sari fi di rang sitn dem we dem du an tap du dem so dat dem kyan get di chaans fi liv fi eva. Den im tel dem se: “A wa kain-a piipl unu fi bi, iihn? Unu fi liv unu laif fi Gad. Unu fi liv kliin kliin laif.” (2 Pii. 3:11) Wan a di sitn dem we dem did fi du we shuo se dem a ‘liv dem laif fi Gad’ a fi priich tu piipl. Jos laik Jeuova, wi lov piipl an wi waahn dem fi liv iina Paradais. Jeuova a tek im taim wid piipl so dat di wan dem we liv iina wi ieriya kyan get di chaans fi kom sorv im. A wan big ting fi wi kyan wok wid Jeuova an elp nof piipl fi lorn bout im bifuo da worl ya don!​—1 Kor. 3:9.

WI A LIV IINA “DI LAAS DIE DEM”

12. Kaa wi nuo wi liv iina “di laas die dem,” wa wi nuo fi shuor se?

¹² Di Baibl tel wi ou piipl wuda gwaan iina “di laas die dem.” (2 Tim. 3:1-5) So wen wi si ou piipl roun wi a gwaan, wi kyan si se wa di Baibl se a chuu. An wen wi si ou dem a get fram bad tu wos, dat mek wi nuo fi shuor se wi kyan chos wa di Baibl se.​—2 Tim. 3:13-15.

13. Bies pan Jiizas tuori we wi riid iina Luuk 12:15-21, wa an wa wi kuda aks wiself?

¹³ Kaa wi nuo se wi a liv iina di laas die dem, dat wi mek wi waahn fi yuuz wi taim nou fi mek wa Jeuova waahn bi di big ting iina wi laif. Mek wi luk pan wa wi kyan lorn bout dis fram di tuori we Jiizas did taak bout a Luuk 12:15-21. (Riid.) Wa mek iina di tuori it se di rich man did a wan “fuul”? A no kaa im did rich, bot a kaa im ‘siev op fi imself di sitn dem we de pan ort, an im neva rich iina di sitn dem we Gad kier bout.’ An dis did a wan siiros ting ino, kaa Gad tel di man se: “Tinait tinait, yu a-go ded.” So di wie ou di man did a yuuz im taim neehn waiz kaa im did suun ded. Wi kyan lorn sitn fram da tuori ya: Da worl ya suun don. So wi kuda aks wiself dem kwestiyan ya: ‘Di sitn dem we mi plan fi du a shuo se mi a yuuz mi taim nou fi mek wa Jeuova waahn bi di big ting iina mi laif? Wa kain-a plan mi a elp mi pikni dem fi mek fi di fyuucha? Mi a yuuz mi chrent, mi taim, an mi moni an dem ting de fi onggl du tingz fi miself, ar mi a du di ting dem we Gad waahn mi fi du?’

14. Bies pan wa gwaan wid Miki, wa mek a wan gud sitn fi wi fi memba se wi a liv iina di laas die dem?

¹⁴ Wen wi tingk bout se wi a liv iina di laas die dem, it wi elp wi fi nuo wa a di bes ting fi du wid wi laif. An a dat did gwaan wid wan sista we niem Miki. Shi se: “Wen mi lef ai skuul, mi did waahn fi fain wan wok we wuda gi mi di chaans fi stodi bout animal. An mi did waahn ton wan paiyanier tu an go somwe we dem waahn muor elp fi du di priichin wok. Bot som breda an sista we did iina mi kanggrigieshan did tel mi fi tingk gud bout it fi si ef mi kuda du di wok we mi waahn fi du an stil ton wan paiyanier ar go we dem niid muor elp fi du di priichin wok. Dem elp mi fi memba se da worl ya suun don, an dat iina di Paradais mi a-go get fi lorn bout aal a di animal dem fi eva. So insted-a fi go stodi bout animal, mi did go a wan skuul fi wan likl taim we did elp mi fi get wan wok so dat mi kuda paiyanier, an we elp mi fi muuv go a Ekwaduor we dem did niid muor elp fi du di priichin wok.” Miki an ar ozban a du sorkit wok iina da konchri de nou.

15. Ou wa did gwaan wid Jiemz elp wi fi si wa mek wi no fi gi op pan di piipl dem we no lisn tu wi wen wi a priich tu dem? (Luk pan di picha dem tu.)

¹⁵ Wi no fi gi op wen wi priich tu piipl bout di gud nyuuz an dem no waahn ier notn kaa piipl kyan chienj. Tingk bout Jiizas breda we niem Jiemz. Im did gruo op wid Jiizas an si im ton di Mesaiya, an im neva si nobadi we kuda tiich laik Jiizas. Bot fi uol iip a ier, Jiemz neehn ton wan a Jiizas falara. A onggl wen Jiizas did kom bak alaiv im did ton im falara, an im did wel waahn fi du aal we im kuda du fi Jeuova!b (Jan 7:5; Gya. 2:9) So no fiil se notn gud naa go kom outa it wen yu chrai fi priich tu yu fambili dem we a no Jeuova Witnis, ar wen yu chrai fi priich tu di wan dem we neehn lisn tu yu bifuo. Memba se wi a liv iina di laas die dem an piipl niid fi ier di gud nyuuz bifuo di worl don. So wi no fi ich fi priich tu piipl. An lieta dong, piipl mait-a memba we yu did tel dem se, an dat mait-a push dem fi waahn fi sorv Jeuova. An dis kuda bi iivn afta di wos sofarieshan staat.c

GWAAN SHUO SE YU TANGK JEUOVA FI DI TING DEM WE IM TIICH YU

16. Ou di ting dem we Jeuova tiich yu elp yu? (Luk tu pan di paat we niem “Yuuz Dem Fi Elp Ada Piipl.”)

¹⁶ Som a di sitn dem we Jeuova aaganaizieshan gi wi a fi piipl uu no nuo nof bout di Baibl. Laik di Baibl sorman we wi get a di wiiken miitn, sortn vidiyo an dem ting de we de pan di jw.org websait, an som a wi magaziin dem, a fi piipl we a no Jeuova Witnis. Bot dem sitn de stil elp aal a wi. Dem elp fi mek wi lov Jeuova muor, an fi chos muor an muor iina di sitn dem iina di Baibl, an dem elp wi fi tiich piipl di Baibl beta tu.​—Sa. 19:7.

17. Wen an wen wi fi tap an tingk bout di sitn dem we wi did lorn wen wi jos staat stodi di Baibl?

¹⁷ Wi we a sorv Jeuova fi wan lang taim wel api wen Jeuova aaganaizieshan elp wi fi andastan sitn iina di Baibl iina wan nyuu wie. Bot a no laik se wi no api fi di sitn dem we wi did lorn wen wi jos staat stodi di Baibl, kaa dem sitn de did elp wi fi get kluos tu Jeuova. Ef wi fiil laik se di wie ou wi tingk bout tingz beta dan wa Jeuova aaganaizieshan se, den wi fi ombl wiself an memba se a Jeuova a di Wan we mek evriting, an im waiz an powaful, an im a di Wan we a liid di aaganaizieshan. Wen wi ar sumadi wi lov a go chuu wan rof taim, wi fi tap an tingk bout wa mek Jeuova lou wi fi sofa, an wi fi gwaan wiet pan im fi don we wid sofarieshan. An wen wi a plan ou fi yuuz wi taim an di sitn dem we wi av, wi fi memba se wi a liv iina di laas die dem an wi no av uol iip a taim lef bifuo di worl don. So mek di sitn dem we Jeuova tiich wi elp wi fi du di sitn dem we waiz an fi gwaan push wi fi gwaan sorv im.