Sitn We De Iina Di New World Translation We Kyan Elp Yu Wen Yu A Stodi

Iina di Ingglish New World Translation of the Holy Scriptures Baibl we dem print, yu av som skripcha iina di migl a di piej we av som leta saida it. Dem kaal dis marginal references. Dem skripcha ya elp wi fi si se di uol a di Baibl kanek op, an it elp wi fi fain som skripcha we a-go elp wi fi andastan muor tingz bout wa wan vors a se. Wen yu a riid wan vors, yu wi si se wan likl leta de saida som a di wod dem. An wen yu luk iina di migl a di piej, yu wi si se da sed leta de, de saida som skripcha. Bot pan jw.org ar iina di JW Library^® ap, fi si di skripcha dem we lingk wid da vors de, aal yu afi du a toch di likl leta we de saida di wod.

Di skripcha dem we av di leta saida dem we de iina di migl a di piej kyan elp yu fi fain uol iip a tingz iina di Baibl. Si som a dem ya:

1. Som a di skripcha dem we de iina di migl a di piej a tel yu bout di siem ting we a apm iina da vors de we yu a riid, bot we de iina wan difrant Baibl buk. Fi si sitn laik dis, yu kyan luk pan 2 Samwel 24:1 an 1 Kranikl 21:1.

2. Somtaim yu a riid wan vors an it tel yu bout sitn we sumadi se we kom fram somwe els iina di Baibl. Som a di skripcha dem we de saida di likl leta dem kyan elp yu fi fain wich paat iina di Baibl yu kyan fain wa di sumadi se. Fi si sitn laik dis, yu kyan luk pan Matyu 4:4 an Dyuutaranami 8:3.

3. Somtaim yu mait-a de riid wan vors we tel yu bout sopm we di Baibl se a-go apm. Di skripcha dem we de saida di likl leta dem iina di migl a di piej kyan elp wi fi fain di paat a di Baibl we taak bout ou di sitn dem we da vors de se wuda apm did riili apm fi chuu. Fi si sitn laik dis, luk pan Matyu 21:5 an Zakaraiya 9:9.