Fuud A Ron Shaat Kaaz A Waar An Wa A Gwaan Wid Di Weda—Wa Di Baibl Av Fi Se Bout Dis?

Aal uova di worl, piipl a fain it aada an aada fi fain fuud fi nyam kaaz a di waar iina Yuukrien an wa a gwaan wid di weda. Bot tingz wos fi di konchri dem we puor, we piipl did a fain it aad aredi fi fain fuud fi nyam.

“Iina nof plies, it a get aada an aada fi di konchri dem gruo di fuud we dem niid an fi piipl get di fuud tu. Dis a kaaz a tingz laik di uol iip a waar dem, di prablem dem wid di weda, an di uol iip a moni we afi a spen fi gruo di fuud an get it tu piipl.”—António Guterres, di man we inchaaj a di Yuunaitid Nieshan, Julai 17, 2023.
“Piipl we andastan wa a gwaan se wi kyaahn shuor se di worl a-go av wa fuud it niid kaa Rosha neehn kip dem pramis fi du fi dem paat wen it kom aan tu dis. An a dat a-go kaaz di prais a fuud fi get diera an diera iina di konchri dem we puor aredi, laik som a dem we iina Naat Afrika an di Migl Iis.”—Atalayar.com, Julai 23, 2023.

Mek wi luk pan wa di Baibl se bout ou fuud a-go shaat an ou da prablem de a-go saat out iina di fyuucha.

Di Baibl did mek wi nuo se fuud wuda shaat

Jiizas did se: “Wan set a piipl a-go waar gens wan neks set a piipl, an kindom a-go fait gens kindom. Fuud a-go shaat iina nof nof plies an uol iip a piipl a-go staav.”—Matyu 24:7.
Iina Revilieshan, di Baibl tel wi bout fuo man we a raid aas. Wan a dem man de we de pan di aas tan fi di waar dem we a gwaan iina di worl. Di wan we kom afta im tan fi staavieshan kaaz fuud wuda shaat an piipl kyaahn go bai it kaaz a ou di fuud prais dem ai. “Mi si wan blak aas! Di wan we sidong pan it av wan skiel iina im an. Den mi ier sopm laik wan vais . . . a se, ‘Wan poun a biekin flowa a-go kaas wan uol die pie, an siks poun a kounta flowa a-go kaas wan uol die pie.’”—Revilieshan 6:5, 6.

Dem sitn ya we di Baibl taak bout, a dem wi si a gwaan rait ya nou kaa wi de iina di taim we di Baibl kaal “di laas die dem.” (2 Timoti 3:1) Fi fain out muor bout “di laas die dem” an di fuo man we a raid aas we Revilieshan taak bout, wach di vidiyo we niem Fram 1914 Til Nou, Di Worl A No Di Siem an riid dis: “The Four Horsemen—Who Are They?”

Ou di Baibl kyan elp wi

Di Baibl av uol iip a sitn iina it we kyan elp wi fi diil wid di prablem dem we wi av iina laif laik wen fuud a get tuu dier ar it shaat. Riid dis fi si som sitn we kyan elp yu fi diil wid dis: “How to Live on Less.”
Di Baibl mek wi nuo fi shuor se beta mos kom. It tel wi bout wan taim wen “uol iip a fuud a-go de pan di ort” an evribadi a-go av nof fuud fi iit. (Saam 72:16) Fi fain out muor bout di gud sitn dem we di Baibl se a-go apm iina di fyuucha an wa mek yu kyan nuo fi shuor se dem sitn de a-go apm, riid dis: “A Real Hope for a Better Tomorrow.”