Piipl Naa Chos Di Palitishan Dem So Moch Agen—⁠Wa Di Baibl Av Fi Se Bout Dis?

Wi neva yet av so moch ilekshan a gwaan iina wan ier laik wa a-go gwaan iina 2024. Bot iivn duo so moch ilekshan a-go gwaan, nof piipl naa chos di palitishan dem laik wan taim.

• Dem aks som piipl we liv a Merika bout dis, an nof a dem se a no kaa muos a di palitishan dem waahn fi elp piipl mek dem a du wa dem a du, bot a kaa “dem waahn fi elp demself.”a—Pew Research Center, Septemba 19, 2023.

Wol iip a yong piipl no chos di palitishan dem.

• “Di tiinieja dem waahn fi si difrant difrant prablem iina di worl get saat out. Bot dem no fiil se di palitishan dem bizniz bout dem sitn ya we a bada dem.”—The New York Times, Janiweri 29, 2024.

• “Dem aks som yong piipl uu dem chos muo, di piipl dem we put op tingz pan YouTube ar di palitishan dem, an dem se di piipl dem pan YouTube.”—The Korea Times, Janiweri 22, 2024.

So yu tingk wi kyan chos di palitishan dem fi mek tingz beta fi wi? A uu wi riili kyan chos?

A no evribadi yu fi chos

Wi kyaahn bliem piipl ef dem no chos eni an enibadi. Di Baibl se: “Di sumadi we no nuo nof sitn jomp an redi fi biliiv evriting we piipl se, bot di wan we av sens tingk bout wa dem a-go du bifuo dem dwi’it.”—Pravorbz 14:15.

• Fi fain out ou yu kyan chek fi si ef wa yu ier bout go so fi chuu, riid dis: “Protect Yourself From Misinformation.”

Aal ef yu fain som palitishan we riili waahn fi elp di piipl dem, dem kyaahn du evriting we dem waahn fi du. A das wai di Baibl se:

• “No chos iina no ruula fi siev yu, an no luk tu no ada man fi du dat niida kaa im na’av di powa fi siev yu.”—Saam 146:3.

Wan liida we yu kyan chos iina

Di Baibl mek wi nuo se Gad pik Jiizas Krais fi ton wi liida. Jiizas a di bes liida wi kyan av, an wi kyan chos iina im. (Luuk 1:32, 33) A im a di King fi Gad Kindom we a Gad govament we de a evn.—Matyu 6:10.

• Fi nuo wa mek wi kyan chos iina Jiizas an fi fain out wa im a-go du fi saat out wi prablem dem, riid dem ya: “Uu A Di King We A Ruul Iina Gad Kindom?” an “Wa Gad Kindom A-Go Du Fi Wi?”