Wen Yu Pikni De Panlain A Kip Op Wid Wa Ada Piipl A Du, It A Du Dem Notn Bad?—⁠Ou Di Baibl Kyan Elp Di Mada An Di Faada Dem

“Wan big prablem we wi si tide a dat di yong piipl dem naa tingk chriet an dem schres out kaaz dem a chrai fi kip op wid wa ada piipl a du panlain.”—Dakta Vivek Murthy, wan big taim dakta we wok wid di govament iina Merika, New York Times, Juun 17, 2024.

Wa di mada an di faada dem kyan du fi protek dem pikni dem fram dem ting ya? Di Baibl tel wi som tingz we ef dem du dem, it wi wok.

Wa di mada an di faada dem kyan du

Si som sitn ya iina di Baibl we yu kyan riizn pan.

“Di wan we av sens tingk bout wa dem a-go du bifuo dem dwi’it.”—Pravorbz 14:15.

Kaa yu nuo se eniting kyan apm tu yu pikni wen dem de panlain, yu no afi fiil laik se yu afi mek dem go pan it. Bifuo yu mek yu pikni dem av no diilinz wid piipl panlain, mek shuor se dem nuo umoch taim fi spen pan it, uu fi kip fren wid, an ou fi tan we fram eniting we a-go korop dem main.

• Fi fain out muor bout dis, riid dem ya: “Should My Child Use Social Media?” an “Teaching Your Teenager Social Media Safety.”

“Evri chaans unu get fi du sopm gud, du it.”—Ifiijan 5:16.

Ef yu a-go mek yu pikni kip op wid wa ada piipl a du panlain, mek dem nuo wa dem kyan du an wa dem kyaahn du an ou dem sitn ya a-go elp dem. Yu fi aalwiez a luk out fi si ef wa dem a du panlain a mek dem a biyiev sortn an sortn wie. An dis wi mek yu nuo ef yu fi mek dem aadli go pan it ar no go pan it non at aal.

• Wach di waitbuod kaatuun we niem Yu Fi Nuo Wa Yu A Du Wen Yu A Diil Wid Piipl Panlain fi elp yu pikni andastan wa mek dem no fi spen tu moch taim pan dem sitn ya.

Fain out muor

Di Baibl tel wi se “iina di laas die dem tingz a-go get aad aad.” (2 Timoti 3:1-5) Bot di tingz we di Baibl tel wi kyan aalwiez elp wi fi diil wid wi prablem dem no mata a wa taim wi liv iina. Yu kyan fain muor dan 20 sitn we bies aafa di Baibl fi elp di mada an di faada dem an dem pikni dem iina da sitn ya pan wi websait we taak bout ou tiinieja no api an naa tingk chriet.