Wa Wi Kyan Lorn Fram Di Ting Dem We Jiekob Did Se Bifuo Im Ded​—Paat 1

1-2. A wa Jiekob did du wen im did suun fi ded, an wa mek im du dat? (Luk pan di picha tu.)

WEN Jiekob did op iina iej, im an im fambili muuv fram Kienan an go liv a Iijip, an a 17 ier im di de a sorv Jeuova fa. (Jen. 47:28) Jiekob did wel api fi si Juozif agen we im did tingk se ded, an im did api fi si aal a im bwai pikni dem tugeda agen. Bot im did si se im suun ded, so im kaal aal a im bwai pikni dem fi kom tu im kaa im did av sitn wel impuotant fi tel dem.​—Jen. 49:28.

² Iina dem taim de, a wan naamal sitn fi wen di ed a di fambili a-go ded, fi im kip wan miitn wid evribadi iina di fambili so dat im kuda tel dem wa im waahn fi apm an wa im waahn dem fi du afta im ded. (Aiz. 38:1) An so iina da miitn de im mait-a tel dem uu im waahn fi bi di ed a im fambili afta im ded.

3. Azkaadn tu Jenisiz 49:1, 2, wa mek wa Jiekob did se a did wan big ting?

³ Riid Jenisiz 49:1, 2. Bot dis a neehn wan naamal fambili miitn. Jiekob a did wan prafit, an iina da miitn ya, Jeuova mek im taak bout som sitn bout wa wuda apm tu im bwai pikni dem an dem pikni pikni dem iina di fyuucha.

4. Wa wi fi memba wen wi a luk pan wa Jiekob did se a-go apm? (Luk tu pan di paat we niem “Jiekob Fambili.”)

⁴ Iina da lesn ya, wi a-go luk pan wa Jiekob did se tu fuor a im bwai pikni dem: Ruuben, Simiyan, Liivai an Juuda. An iina di neda lesn, wi a-go taak bout wa Jiekob did se tu im ada iet bwai pikni dem. An wi a-go si se Jiekob neva did onggl taak bout fi im bwai pikni dem, bot im taak bout fi dem pikni pikni dem tu, we wuda ton out fi bi di Izrelait dem. Wen wi luk pan wa did gwaan wid di Izrelait dem, wi a-go si ou wa Jiekob did se did apm fi chuu, an wi a-go si wa wi kyan lorn fram wa im did se we kyan elp wi fi mek Jeuova api wid wi.

RUUBEN

5. Wa Ruuben mait-a did tingk se im wuda get fram im faada?

⁵ Jiekob taak tu Ruuben fos an tel im se im a im fos pikni. (Jen. 49:3) Kaa Ruuben did a im fos pikni, im did nuo se im wuda get tuu taim a wa im ada breda dem wuda get. An im mait-a did tingk tu se afta im faada ded a im wuda ton di ed fi di fambili, an se afta im ded fi im pikni wuda ton di ed fi di fambili tu.

6. Wa mek Ruuben neva get wa im did tingk se im did a-go get? (Jenisiz 49:3, 4)

⁶ Bot Ruuben neva get wa im did tingk se im did a-go get. (1 Kr. 5:1) Ruuben mada a did wan a Jiekob waif we niem Liya. Di ada waif fi Jiekob did niem Riechel, an Bila did a fi ar sorvant, an shi did mek Bila ton wan a Jiekob waif tu. Bot afta Riechel ded, Ruuben did sliip wid Bila. (Jen. 35:19, 22) Wi no nuo fi shuor wa mek Ruuben did du dat. Miebi im did lov aaf Bila, ar miebi im did waahn Jiekob fi iet Bila an lov im mada muor. Bot no mata di riizn we mek im du wa im du, Jiekob an Jeuova neva laik wa im did du.​—Riid Jenisiz 49:3, 4.

7. Wa did gwaan fi Ruuben an im pikni pikni dem? (Luk tu pan di paat we niem “Wa Jiekob Did Se A-Go Apm.”)

⁷ Jiekob did tel Ruuben se notn gud neehn a-go gwaan fi im. An wa Jiekob did se did apm fi chuu, kaa notn no de bout we se non a Ruuben pikni pikni dem did get fi ton king, priis, ar prafit. Bot Jiekob did stil gi im sitn kaa Ruuben pikni pikni dem did a wan a di chraib dem iina Izrel. (Jash. 12:6) An yu did av som ada taim wen Ruuben did shuo se im av som gud wiez, an wi no ier notn bout Ruuben a du no seks sin agen.​—Jen. 37:20-22; 42:37.

8. Wa a som sitn we wi kyan lorn fram wa did gwaan wid Ruuben?

⁸ Wa wi kyan lorn fram dis? Wi fi wok aad aad fi kanchuol wiself an kip we fram aal kain-a seks sin. Yu si ef wi iivn fiil laik fi du sitn rang, wi fi tap an tingk bout ou it a-go ort Jeuova, wi fambili, an ada piipl tu ef wi dwi’it. Wi fi memba tu se “eniting we [wi] plaant a dat [wi] a-go riip.” (Gya. 6:7) Bot wa apm wid Ruuben tu mek wi memba se Jeuova redi fi paadn wi, kaa aalduo wi mait-a sofa kaaz a di rang sitn dem we wi du, ef wi ton we fram wi sin dem an staat fi du wa rait, Jeuova a-go paadn wi an im a-go bles wi tu.

SIMIYAN AN LIIVAI

9. Wa mek Jiekob neehn api wid wa Simiyan an Liivai did du? (Jenisiz 49:5-7)

⁹ Riid Jenisiz 49:5-7. Afta Jiekob don taak wid Ruuben, im ton tu Simiyan an Liivai an mek dem nuo se im neva api wid wa dem did du. Kaa yu si wa apm a dat kopl ier a bak, wan man fram Kienan we niem Shiikem did riep aaf Jiekob daata we niem Daina. Ye, aal a Jiekob bwai pikni dem did beks bad bout wa apm tu dem sista, bot Simiyan an Liivai did tek it tu wan difrant levl. Dem did tel di man dem fram Shiikem wan lai se ef dem get sorkomsaiz dem wudn kom waar gens dem agen, an di man dem did aarait wid dat. Bot wen di man dem did get sorkomsaiz an did stil iina pien, Simiyan an Liivai no du notn muor dan tek dem suod an go iina di siti go kil aaf evri man we de iin de.​—Jen. 34:25-29.

10. A ou wa Jiekob did se did a-go apm tu Simiyan an Liivai did apm fi chuu? (Luk tu pan di paat we niem “Wa Jiekob Did Se A-Go Apm.”)

¹⁰ Jiekob did beks se Simiyan an Liivai did kil aaf so moch piipl. An kaaz a dat, im mek dem nuo se dem wuda get skyata skyata aal uova Izrel. An dat did apm fi chuu muor dan 200 ier afta Jiekob se dis, wen di Izrelait dem go iina di Lan we Gad did pramis dem. Simiyan chraib did get som likl likl piis a lan outa di big piis a lan we Juuda chraib did get. (Jash. 19:1) An Liivai chraib did get 48 siti we skyata skyata aal uova Izrel.​—Jash. 21:41.

11. Wa a som a di gud sitn dem we Simiyan an Liivai chraib did du?

¹¹ Simiyan an Liivai pikni pikni dem neva did du di bad sitn dem we Simiyan an Liivai did du. Liivai chraib did stik tu Jeuova an worship im wan. Wen Muoziz did go op a Mount Sainai an get di Laa fram Jeuova, uol iip a di Izrelait dem did staat fi worship di kyaaf we dem mek outa guol. Bot di Liivait dem neva fala dem, an dem elp Muoziz fi kil aaf aal a di wan dem we did a worship di kyaaf. (Ek. 32:26-29) So Jeuova did pik som man fram Liivai chraib fi ton priis fi im. (Ek. 40:12-15; Nom. 3:11, 12) An den wen di Izrelait dem did a tek uova di Lan we Gad pramis dem, Simiyan chraib did elp Juuda chraib fi fait gens di Kienanait piipl dem fi get di piis a lan we dem did fi get.​—Joj. 1:3, 17.

12. Wa an wa wi kyan lorn fram wa did gwaan wid Simiyan an Liivai?

¹² Wa wi kyan lorn fram dis? Yu no fi mek op yu main fi du eni an eniting jos kaa yu beks bout sitn. A wan naamal ting fi yu get beks wen sumadi chriit yu bad ar chriit sumadi we yu lov bad. (Sa. 4:4) Bot wi fi memba se Jeuova naa go laik it ef wi se sitn ar du sitn tu sumadi fi ort dem jos kaa dem chriit wi bad. (Jmz. 1:20) So wen sumadi chriit wi bad​—weda dem a sorv Jeuova ar dem naa sorv im​—wi a-go du tingz fi stil mek Jeuova api wid wi. An dat miin tu se wi naa go se ar du notn we a-go ort dem. (Ruo. 12:17, 19; 1 Pii. 3:9) An yu si aal ef yu mada an faada a du tingz we Jeuova no laik, yu fi memba se yu na’afi fala dem. An no bada tingk se yu kyaahn du notn fi mek Jeuova api wid yu. Jeuova naa go ich fi elp di wan dem we a chrai fi du wa rait, an im a-go bles dem fi dat tu.

JUUDA

13. Wa mek Juuda mait-a did staat fret wen a did fi im taim fi ier wa im faada av fi se tu im?

¹³ Di neks bwai pikni we Jiekob staat fi taak tu a did Juuda. Afta Juuda ier aal a di sitn dem we im faada se tu im biga breda dem, im mos did staat fret. Kaa memba se ino, im did du som bad sitn tu. Laik afta Simiyan an Liivai did kil aaf di man dem iina Shiikem, im an di res a im breda dem did go a Shiikem an tek we di piipl dem sitn dem. (Jen. 34:27) An im did elp im breda dem fi sel Juozif tu som man fi ton sliev an den go tel dem faada lai bout wa apm tu Juozif. (Jen. 37:31-33) An afta im bwai pikni ded, im aal did en op sliip wid im daata-in-laa we niem Tiemaar kaa im did tingk se shi a did wan uor.​—Jen. 38:15-18.

14. Wa a som a di gud sitn dem we Juuda did du? (Jenisiz 49:8, 9)

¹⁴ Bot iivn duo Juuda did du aal a dem sitn de, Jeuova mek Jiekob big op Juuda an bles im. (Riid Jenisiz 49:8, 9.) Juuda did shuo se im kier nof bout im faada we op iina iej, an im shuo se im kier bout im likl breda we niem Benjamin tu.​—Jen. 44:18, 30-34.

15. Wa a di blesn dem we Juuda get?

¹⁵ Jiekob se Juuda wuda ton liida mongks im breda dem. Bot bout 200 ier wuda afi paas bifuo dat wuda apm, an dat a afta di Izrelait dem lef Iijip an a go chuu di wildanes fi go a di Lan we Gad did pramis dem. Iina dem taim de, evritaim di chraib dem a muuv, a Juuda chraib wuda de iina di front. (Nom. 10:14) An uol iip a ier afta dat, Jeuova did mek Juuda bi di fos chraib fi go fait gens di Kienanait dem iina di Lan we im did pramis dem. (Joj. 1:1, 2) Pan tap a dat, a uol iip a king did kom fram Juuda chraib, an Dievid did a di fos wan. Bot wa Jiekob did se bout Juuda did gwaan iina wan biga wie tu.

16. A ou wa Jiekob did se a Jenisiz 49:10 did apm fi chuu? (Luk tu pan di paat we niem “Wa Jiekob Did Se A-Go Apm.”)

¹⁶ Jiekob did se di wan we fi ton di riil Ruula fi di ort wuda kom fram Juuda an dat im wuda ruul fi eva. (Riid Jenisiz 49:10.) Da ruula de a Jiizas Krais. Wan ienjel did se dis bout Jiizas: “Di Laad Gad gweehn gi im di chuon wa im faada Dievid did av.” (Luuk 1:32, 33) An di Baibl mek wi nuo se Jiizas a “di Laiyan we kom fram Juuda Chraib.”​—Rev. 5:5.

17. Wa wi kyan du fi shuo se wi a luk pan piipl di wie ou Jeuova luk pan dem?

¹⁷ Wa wi kyan lorn fram dis? Aalduo Juuda did du som bad sitn, Jeuova did stil bles im. Juuda breda dem mait-a did a wanda a wa Jeuova si iina im. Bot ef dem did a tingk so ar nat, Jeuova did si di gud iina Juuda, an kaa a dat Jeuova bles im fi it. Bot a ou wi kyan du laik Jeuova? Wen sumadi get wan speshal wok fi du fi Jeuova, wi mait-a staat luk pan som likl wiez we dem av an a wanda a ou dem get da wok de. Bot wi fi memba se Jeuova luk pan di gud we aal a wi a du, so mek wi chrai fi du di siem ting.

18. Wa mek wi niid fi wiet pan Jeuova?

¹⁸ Wan neda lesn we wi lorn fram wa did gwaan wid Juuda a dat wi fi wiet pan Jeuova. Jeuova aalwiez du wa im se im a-go du, bot im mait-a no dwi’it wen wi tingk im wuda dwi’it ar ou wi tingk im wuda dwi’it. Non a Juuda pikni pikni dem neehn get fi ton liida fi Gad piipl siem taim afta Jiekob did se wa im se. Bot dem did stil bak di wan dem we Jeuova did pik fi liid im piipl dem, laik Muoziz we a did Liivait, Jashwa we a did Iifriemait, an King Saal we a did Benjaminnait. An a siem wie so wi waahn fi bak di wan dem we Jeuova pik fi liid wi tu.​—Iib. 6:12.

19. Wa wi kyan lorn bout Jeuova bies pan wa Jiekob did se wuda gwaan wid fuor a im bwai pikni dem?

¹⁹ Bies pan wa wi taak bout aredi bout wa Jiekob did se wuda apm wid im fuor bwai pikni dem, wi kyan si se ou piipl luk pan tingz a no di wie ou Jeuova luk pan tingz. (1 Sam. 16:7) Jeuova tek im taim wid piipl an im paadn dem tu. Im no laik wen wi du bad tingz, bot im nuo se wi no porfek niida. Jeuova wi aal bles di wan dem we sin bad az lang az dem sari fi wa dem du, an ton we fram dem sin, an staat du wa rait agen. Iina di neda lesn, wi a-go luk pan wa Jiekob did se tu im ada iet bwai pikni dem.