Yérémia
28 Ing taun kuwi, ing awal pamréntahané Zédékia+ raja Yéhuda, yaiku ing taun kepapat sasi kelima, Nabi Hanania anaké Azur saka Gibéon+ kandha marang aku ing omahé Yéhuwah ing ngarepé para imam lan rakyat, 2 ”Iki sing diomongké Yéhuwah pemimpiné pasukan Gusti Allahé Israèl: ’Aku bakal mbébaské kowé saka perbudakané raja Babilon.*+ 3 Ing wektu rong taun, barang-barang ing omahé Yéhuwah sing digawa Nébukhadnézar raja Babilon saka panggonan iki menyang Babilon bakal Tak balèkké mréné.’”+ 4 ”’Yékonia+ anaké Yéhoyakim+ raja Yéhuda lan kabèh wong Yéhuda sing ditawan ing Babilon+ ya bakal Tak gawa bali, merga Aku bakal mbébaské wong-wong kuwi saka perbudakané raja Babilon,’* kandhané Yéhuwah.”
5 Terus, Nabi Yérémia ngomong marang Nabi Hanania ing ngarepé para imam lan rakyat sing ngadeg ing omahé Yéhuwah. 6 Nabi Yérémia ngomong, ”Amin.* Muga-muga Yéhuwah nindakké kuwi. Muga-muga Yéhuwah nggawé ramalanmu kuwi bener-bener kelakon, lan barang-barang saka omahé Yéhuwah lan kabèh tawanan digawa bali saka Babilon menyang panggonan iki. 7 Ning, tulung rungokna apa sing bakal tak sampèkké marang kowé lan rakyat. 8 Mbiyèn, para nabi sakdurungé aku lan sakdurungé kowé kerep nyampèkké ramalan soal akèh negara lan kerajaan gedhé, soal perang, bencana, lan wabah penyakit. 9 Nèk ana nabi sing nyampèkké ramalan soal kedamaian lan omongan kuwi kelakon, wong bakal ngerti nèk nabi kuwi pancèn diutus Yéhuwah.”
10 Wektu krungu kuwi, Nabi Hanania njupuk kayu sing dipasang ing guluné Yérémia, terus nugel kayu kuwi.+ 11 Bar kuwi, Hanania ngomong ing ngarepé rakyat, ”Iki sing diomongké Yéhuwah: ’Ya kaya ngéné iki, ing wektu rong taun, Aku bakal mbébaské kabèh bangsa saka perbudakané Nébukhadnézar raja Babilon.’”*+ Terus, Nabi Yérémia lunga saka kono.
12 Sakwisé Nabi Hanania nugel kayu sing dipasang ing guluné Yérémia, Yéhuwah kandha marang Yérémia, 13 ”Ngomonga marang Hanania, ’Iki sing diomongké Yéhuwah: ”Kowé nugel kayu sing dipasang ing gulu,+ ning kayu kuwi bakal diganti nganggo wesi.” 14 Iki sing diomongké Yéhuwah pemimpiné pasukan, Gusti Allahé Israèl: ”Aku bakal nggawé kabèh bangsa iki dadi budhak* lan nglayani Nébukhadnézar raja Babilon. Wong-wong kuwi kudu nglayani dhèwèké.+ Malah, kéwan liar ing padhang bakal Tak wènèhké marang dhèwèké.”’”+
15 Nabi Yérémia kandha marang Nabi Hanania,+ ”Hé Hanania, tulung rungokna. Yéhuwah ora ngutus kowé, ning kowé nggawé rakyat iki percaya omonganmu sing ngapusi.+ 16 Mula iki sing diomongké Yéhuwah, ’Aku bakal nyingkirké kowé saka bumi. Taun iki, kowé bakal mati merga kowé ngejak rakyat bèn padha mbrontak nglawan Yéhuwah.’”+
17 Mula ing sasi kepitu taun kuwi, Nabi Hanania mati.