Yèhèzkièl
19 ”Kowé kudu nyanyi lagu sedhih soal para pemimpiné Israèl: 2 Ngomonga,
’Ibumu kuwi kaya singa wédok sing ana ing antarané singa-singa.
Singa wédok kuwi turon ing antarané singa-singa enom sing kuwat* lan nggedhèkké anak-anaké.
3 Ana anaké siji sing diopèni nganti dadi singa enom sing kuwat.+
Singa enom kuwi ajar carané mburu mangsa,
Malah manungsa waé ya dipangan.
4 Bangsa-bangsa krungu soal singa enom kuwi lan njebak singa enom kuwi ing lubangé bangsa-bangsa kuwi,
Terus disèrèt menyang Mesir nganggo kait.+
5 Sakwisé nunggu lan ngerti nèk singa enom mau ora bakal bali manèh,
Ibuné singa kuwi njupuk anaké sing liyané lan diopèni nganti dadi singa enom sing kuwat.
6 Singa enom kuwi ya mlaku ing antarané singa-singa lan dadi singa enom sing kuwat.
Singa kuwi ajar carané mburu mangsa, malah manungsa waé ya dipangan.+
7 Singa kuwi mlaku mrana-mréné ing antarané menara-menara sing ana bèntèngé lan ngremuk kutha-kutha.
Swarané singa kuwi nganti tekan ing kabèh wilayah ing tanah sing telantar kuwi.+
8 Bangsa-bangsa saka dhaérah ing sekitaré padha nguncalké jaring kanggo nangkep singa kuwi,
Terus singa kuwi ketangkep ing lubangé bangsa-bangsa kuwi.
9 Singa kuwi disèrèt nganggo kait lan dilebokké kandhang, terus digawa marang raja Babilon.
Ing kana, singa kuwi dikurung bèn swarané ora tekan ing gunung-gunung Israèl.
10 Ibumu kaya wit anggur*+ sing ditandur cedhak banyu,
Sing ngetokké buah lan nduwé akèh cabang, merga ing kana banyuné akèh.
11 Cabang-cabangé dadi kuwat lan isa dadi tongkat penguasa.
Wit kuwi saya gedhé lan dadi luwih dhuwur timbang wit liyané.
Wit kuwi kétok cetha banget merga dhuwur lan rimbun.
12 Merga Gusti Allah nesu, wit kuwi dicabut+ lan diuncalké ing bumi.
Buahé dadi garing merga kena angin saka wétan.
Cabangé sing kuwat diceklèk lan dadi garing,+ terus diobong.+
13 Saiki wit kuwi ditandur ing padhang belantara,
Ing tanah sing gersang lan garing.+
14 Terus, geni sing ngobong cabangé ya ngobong tunas lan buahé.
Akhiré, wit kuwi ora nduwé cabang sing kuwat manèh sing isa dadi tongkat penguasa.+
”’Kuwi lagu sedhih sing bakal terus dinyanyèkké wong.’”