Yérémia
21 Yéhuwah ngomong manèh marang Yérémia wektu Raja Zédékia+ ngutus wong loro nemoni Yérémia, yaiku Pasyur+ anaké Malkhiya lan Zéfanya+ anaké Maaséya. Raja nyampèkké pesen iki: 2 ”Tulung takona marang Yéhuwah apa sing bakal awaké dhéwé alami merga raja Babilon arep perang nglawan awaké dhéwé.+ Mungkin Yéhuwah bakal nggawé mukjijat kanggo awaké dhéwé bèn raja kuwi mundur.”+
3 Yérémia kandha marang para utusan kuwi, ”Iki sing kudu mbok omongké marang Zédékia: 4 ’Iki sing diomongké Yéhuwah Gusti Allahé Israèl: ”Senjata perang sing lagi mbok cekel kanggo nglawan raja Babilon+ lan wong Khaldéa sing ngepung kowé ing njaba témbok bakal Tak gunakké kanggo nyerang kowé dhéwé. Kabèh bakal Tak klumpukké ing tengah-tengah kutha iki. 5 Karo nesu banget, Aku bakal nglawan kowé+ nganggo tangan-Ku sing kuwat lan kuwasa-Ku sing gedhé.+ 6 Aku bakal nyerang kabèh manungsa lan kéwan ing kutha iki. Kuwi kabèh bakal mati merga wabah penyakit sing parah.”’+
7 ”’Yéhuwah kandha, ”Bar kuwi, Zédékia raja Yéhuda, para pelayané, lan penduduk kutha iki sing slamet saka wabah penyakit, pedhang, lan kelaparan bakal Tak serahké marang Nébukhadnézar* raja Babilon, yaiku mungsuh sing péngin matèni wong-wong kuwi.+ Dhèwèké bakal matèni wong-wong kuwi nganggo pedhang. Dhèwèké ora bakal ngrasa sedhih utawa mesakké marang wong-wong kuwi.”’+
8 ”Ngomonga marang bangsa iki, ’Iki sing diomongké Yéhuwah: ”Aku mènèhi kowé pilihan, yaiku dalan kehidupan utawa dalan kematian. 9 Wong sing tetep manggon ing kutha iki bakal mati merga dipatèni nganggo pedhang, merga kelaparan, lan merga wabah penyakit. Ning, wong sing metu lan nyerah karo wong Khaldéa, sing ngepung kowé, bakal tetep urip lan nyawané slamet.”’+
10 ”’”Aku wis nolak kutha iki. Kutha iki ora bakal ngalami sing apik, ning bakal ngalami bencana,”+ kandhané Yéhuwah. ”Kutha iki bakal diserahké marang raja Babilon+ lan bakal diobong.”+
11 ”’Hé keluargané raja Yéhuda, padha rungokna omongané Yéhuwah. 12 Hé keturunané Daud, iki sing diomongké Yéhuwah:
”Tindakna apa sing adil saben dina,
Lan tulungana wong-wong sing hartané dirampas karo para penipu,+
Bèn nesu-Ku ora murub kaya geni+ lan ngobong tanpa ana sing isa matèni
Merga tumindakmu sing jahat.”’+
13 ’Aku bakal ngukum kowé, hé wong-wong sing manggon ing lembah,
Hé wong-wong sing manggon ing kutha sing ana ing gunung watu,’ kandhané Yéhuwah.
’Kowé padha ngomong, ”Sapa sing bakal nglawan aku?
Sapa sing bakal nyerang panggonanku?”
14 Aku bakal ngukum kowé sesuai karo tumindakmu,’+ kandhané Yéhuwah.
’Aku bakal ngobong hutanmu, lan geniné bakal ngobong kabèh sing ana ing sekitarmu.’”+