1. Apa Gusti Allah Sing Nyebabké Kesusahan?
Kenapa Kudu Ngerti Iki?
Akèh wong sing ora gelem nyembah Gusti Allah merga mikir nèk Gusti Allah sing nyebabké kesusahan.
Kanggo Dipikirké
Akèh pemimpin agama mulangké nèk Gusti Allah sing nyebabké kesusahan. Contoné, ana sing ngomong . . .
bencana alam kuwi hukuman saka Gusti Allah.
nèk ana bocah-bocah sing mati, kuwi berarti Gusti Allah mbutuhké luwih akèh malaékat ing swarga.
Gusti Allah ndhukung perang, lan perang kuwi dadi salah siji penyebab kesusahan.
Ning, piyé nèk sing diwulangké para pemimpin agama soal Gusti Allah kuwi salah? Piyé nèk sakjané Gusti Allah ora seneng karo pendapaté para pemimpin agama kuwi? Nèk ngono, apa awaké dhéwé isa percaya karo omongané para pemimpin agama kuwi?
SINAUA LUWIH AKÈH
Deloken vidéo Apa Sebabé Perlu Sinau Alkitab? sing ana ing jw.org.
Kandhané Alkitab
Gusti Allah ora nyebabké kesusahan.
Nèk Gusti Allah sing nyebabké kesusahan, kuwi ora cocog karo sipat-sipaté Gusti Allah sing dicathet ing Alkitab. Contoné:
”Jejeg sakèhé marginé [Gusti Allah]; . . . Panjenengané iku bener lan adil.”—PANGANDHARING TORÈT 32:4.
”Nglengkara yèn Gusti Allah nindakaké piala, utawa yèn Kang Mahakwasa tumindak culika.”—AYUB 34:10.
”Kang Mahakwasa ora mbèngkokaké kaadilan.”—AYUB 34:12.
Gusti Allah ora nampa agama sing mulangké ajaran sing salah soal Dhèwèké.
Kuwi klebu agama-agama sing mulangké nèk Gusti Allah sing nyebabké kesusahan lan agama-agama sing ndhukung perang lan kekerasan.
”Para nabi iku padha meca goroh atas asmaningSun! Ingsun ora ngutus lan paring dhawuh sarta ora paring pangandika marang para wong iku. Wong iku padha nglairaké wangsit goroh, pamecané kang kothong lan akal culikaning atiné dhéwé.”—YÉRÉMIA 14:14.
Yésus ora seneng karo pemimpin agama sing munafik.
”Ora saben wong sing kandha marang aku, ’Gusti, Gusti,’ bakal mlebu ing Kraton swarga. Nanging, mung wong sing nindakké kersané Bapakku ing swarga sing isa mlebu ing kana. Bakal ana akèh wong sing kandha ing dina kuwi, ’Gusti, Gusti, aku kan wis ngramal nganggo jenengmu, lan ngusir roh-roh jahat nganggo jenengmu, lan nindakké akèh mukjijat nganggo jenengmu, ta?’ Nanging aku bakal njawab wong-wong kuwi, ’Aku ora kenal karo kowé! Kowé wong-wong sing nglanggar hukum, lungaa kana!’” —MATIUS 7:21-23.