Nggatèkké Apa sing Apik saka Wong Liya
Faktané
Sikap égois kuwi isa nggawé njenengan nduwé prasangka. Wong sing égois isa nganggep dhèwèké luwih apik ketimbang wong liya. Kabèh wong isa dadi égois. Buku Encyclopædia Britannica kandha, ”Akèh kelompok nganggep nèk panganan, klambi, lingkungan, lan kepercayaané kuwi luwih apik ketimbang kelompok liyané.” Piyé carané bèn awaké dhéwé ora nduwé cara mikir sing kaya ngono?
Kandhané Alkitab
”Kanthi andhap asor nganggep wong liya luwih unggul ketimbang kowé.”—FILIPI 2:3.
Apa artiné? Awaké dhéwé kudu rendah hati. Aja ngrasa nèk awaké dhéwé luwih apik ketimbang wong liya.
Gatèkna contoné Stefan sing digedhèkké ing negara Komunis. Dhèwèké ngupaya bèn ora nduwé prasangka karo wong-wong saka negara sing dudu Komunis. Dhèwèké kandha, ”Aku yakin nèk aku nganggep wong liya luwih apik, kuwi isa nggawé aku dadi ora nduwé prasangka. Malah aku isa sinau akèh saka wong-wong kuwi.”
Sing Isa Njenengan Tindakké
Aja nganggep nèk njenengan ora tau salah. Terus, aja nganggep nèk kabèh wong nduwé kelemahan sing padha. Njenengan kudu sadhar nèk wong liya isa nindakké luwih apik ketimbang njenengan.
Ketimbang mikir èlèk soal wong saka kelompok liya, njenengan isa takon:
Njenengan kudu sadhar nèk wong liya isa nindakké luwih apik ketimbang njenengan
’Apa aku ora seneng karo wong kuwi mung merga dhèwèké nduwé sipat sing béda karo aku?’
’Apa wong kuwi ya isa nggolèki kesalahanku?’
’Ketrampilan apa sing nggawé wong kuwi luwih hébat ketimbang aku?’
Nèk njenengan jujur wektu njawab pitakonan-pitakonan kuwi, njenengan isa nyingkirké prasangka. Malah, njenengan isa ngajèni wong-wong kuwi.