Nduwé Kanca sing Latar Belakangé Béda

Faktané

Awaké dhéwé bakal terus nduwé prasangka nèk terus-terusan mikir èlèk soal wong liya. Terus, nèk awaké dhéwé mung akrab karo wong-wong sing latar belakangé padha karo awaké dhéwé, kuwi isa nggawé awaké dhéwé mikir nèk perasaan, tumindak, lan cara mikiré awaké dhéwé kuwi sing paling bener.

Kandhané Alkitab

”Bukaken atimu sak amba-ambané.”—2 KORINTUS 6:13.

Apa artiné? ”Ati” isa dipadhakké karo perasaan lan rasa sayang. Nèk awaké dhéwé mung apikan karo wong-wong sing latar belakangé padha karo awaké dhéwé, kancané awaké dhéwé mung kuwi-kuwi thok. Dadi, awaké dhéwé kudu gelem kekancan karo wong-wong sing latar belakangé béda karo awaké dhéwé.

Manfaat Nèk Nduwé Kanca sing Latar Belakangé Béda

Nèk awaké dhéwé ngupaya luwih kenal karo wong-wong kuwi, awaké dhéwé dadi ngerti apa sebabé dhèwèké béda. Kuwi nggawé awaké dhéwé dadi ora mbédak-mbédakké wong-wong kuwi. Awaké dhéwé ya isa luwih ngajèni lan isa ngrasakké apa sing wong-wong kuwi rasakké.

Gatèkna conto saka Nazaré sing tau nduwé prasangka karo para imigran. Dhèwèké njelaské apa sing mbantu dhèwèké isa nyingkirké prasangka. Dhèwèké kandha, ”Merga aku kerja bareng karo para imigran, aku dadi ngerti nèk jebulé wong-wong kuwi béda banget karo apa sing dicritakké. Nèk njenengan gelem cedhak karo wong-wong sing béda latar belakangé, njenengan isa nyingkirké pikiran négatif karo wong-wong kuwi. Hasilé, njenengan isa ngajèni lan sayang karo wong-wong kuwi.”

Sing Isa Njenengan Tindakké

Golèka kesempatan kanggo omong-omongan karo wong sing béda basa, budaya, utawa bangsa. Terus, njenengan isa nindakké iki:

Ngejak ngobrol.
Ngejak mangan bareng.
Ngrungokké pengalamané.

Nèk njenengan ngerti pengalamané wong-wong kuwi, njenengan isa ngerti apa sebabé wong-wong kuwi nduwé sikap sing béda karo njenengan. Njenengan ya dadi nduwé pandangan sing apik soal wong-wong kuwi.

Pengalaman: Kandasamy lan Sookammah (Kanada)

”Aku lan Sookamah digedhèkké ing Afrika Selatan. Wektu kuwi, pamréntah kulit putih nggawé peraturan bèn wong sing rasé béda dipisah. Kuwi sing nggawé prasangkané wong-wong dadi tambah parah. Aku lan bojoku dudu wong kulit putih. Dadi, aku ora seneng karo wong-wong kulit putih, merga ana wong-wong kulit putih sing tau ngrendhahké aku lan bojoku. Merga ngrasa dadi korban, aku lan bojoku ora sadhar nèk jebulé wis nduwé prasangka.

”Bèn ora mikir kaya ngono, aku lan bojoku ngupaya kanggo nggolèk kanca sing latar belakangé béda. Wektu aku lan Sookammah bergaul karo wong-wong kulit putih, aku sadhar nèk sakjané aku lan wong-wong kuwi ora nduwé akèh perbédaan, termasuk nduwé masalah sing padha.

”Aku lan bojoku ngundang suami istri kulit putih kanggo nginep ing omahku. Aku dadi isa bergaul karo wong-wong kuwi. Akhiré, aku isa nduwé pandangan sing luwih apik karo wong-wong kulit putih.”