Carané Bèn Isa Ayem lan Bahagia
Awaké dhéwé kabèh, ora soal wis nikah utawa durung, tuwa utawa enom, mesthi péngin uripé ayem lan bahagia. Sang Pencipta ya pénginé awaké dhéwé kaya ngono. Makané Dhèwèké mènèhi naséhat-naséhat sing apik.
Sregep Nyambut Gawé
”Dhèwèké kudu nyambut gawé sing tenanan lan nindakké apa sing apik bèn dhèwèké isa mbantu wong sing kekurangan.”—ÉFÉSUS 4:28.
Sang Pencipta péngin awaké dhéwé seneng nyambut gawé. Lha ngapa? Wong sing sregep nyambut gawé isa bahagia merga dhèwèké isa nyukupi kebutuhané dhéwé lan keluargané. Terus, dhèwèké mungkin ya isa mbantu wong liya. Wong-wong mesthi ya seneng karo wong sing nyambut gawéné sregep. Makané, wong sing sregep nyambut gawé biasané bakal betah karo gawéané lan dipercaya karo majikané. Menurut Kitab Suci, hasil kerja kerasé wong sing sregep kuwi ”hadiah saka Gusti Allah”.—Pengkhotbah 3:13.
Jujur
”Aku yakin nèk aku nduwé hati nurani sing resik, lan aku péngin jujur wektu nindakké apa waé.”—IBRANI 13:18.
Nèk jujur awaké dhéwé dadi nduwé harga diri, pikirané isa ayem, lan turuné angler. Terus, wong liya ya isa percaya lan ngajèni awaké dhéwé. Wong sing ora jujur bakal rugi dhéwé, terus pikirané ya ora tenang merga wedi konangan.
Dhuwit Kuwi Dudu sing Paling Penting
”Aja nresnani dhuwit. Kowé kudu ngrasa puas karo apa sing wis mbok duwèni.”—IBRANI 13:5.
Awaké dhéwé mémang butuh dhuwit kanggo tuku panganan lan kebutuhan liyané. Tapi, aja nganti awaké dhéwé nresnani dhuwit. Wong sing nresnani dhuwit biasané wektu karo tenagané entèk mung dienggo golèk dhuwit, terus dadi ora nduwé wektu dienggo bojoné lan anak-anaké. Terus, dhèwèké dhéwé ya isa dadi lara. (1 Timotius 6:9, 10) Wong sing nresnani dhuwit biasané ya isa dadi ora jujur. Ana peribahasa sing kandha, ”Wong sing setya bakal nampa akèh berkah, ning wong sing péngin cepet sugih mesthi bakal nindakké kesalahan.”—Wulang Bebasan 28:20.
Gelem Sinau saka Gusti Allah
”Terusa tumindak wicaksana lan gunakna kemampuan kanggo mikir.”—WULANG BEBASAN 3:21.
Ing sekolah awaké dhéwé diajari bèn isa dadi wong sing apik lan isa dipercaya. Tapi nèk mung sinau ing sekolahan thok, durung mesthi awaké dhéwé isa bahagia lan ayem uripé. Nèk péngin uripé bener-bener suksès awaké dhéwé kudu sinau saka Gusti Allah. Kitab Suci ngomong nèk wong sing gelem ngrungokké Gusti Allah kuwi ”kabèh sing ditindakké mesthi bakal berhasil”.—Mazmur 1:1-3.