Perang Ora Mung Ngentèkké Biaya Triliunan, Apa Manèh Dampak Liyané?

Biaya sing ditokké kanggo perang kuwi akèh banget.

• ”Taun wingi, pamréntah ing sak donya ngetokké biaya nganti 2,2 triliun dolar AS kanggo perang. Jumlah kuwi luwih akèh ketimbang taun-taun sakdurungé.”—The Washington Post, 13 Februari 2024.

Perang ora mung ngentèkké akèh biaya tapi ya ana dampak liyané. Misalé dampak merga perang ing Ukraina:

• Tentara. Para ahli ngomong nèk selama rong taun iki mèh 500.000 tentara mati utawa luka-luka merga perang.

• Masyarakat. Menurut Perserikatan Bangsa-Bangsa (PBB) ana luwih saka 28.000 sing mati utawa luka-luka merga perang. Pejabat PBB ngomong, ”Merga ana perang, awaké dhéwé ora isa mastèkké mengko sepira akèhé masyarakat sing bakal mati.”a

Merga ana perang ing sak donya, kuwi nggawé akèh wong sengsara.

• Kèt September 2023, ana luwih saka 114 juta sing ngungsi merga ana perang.

• Ana 783 juta wong sing ngalami kelaparan. ”Kira-kira 70 persèn wong sing kelaparan kuwi merga ing dhaérahé lagi ana perang. Dadi penyebab utamané kelaparan kuwi merga ana perang.”—Program Pangan Dunia.

Apa perang bakal ana terus? Apa isa keadaané dadi luwih apik? Apa isa kemiskinan lan kelaparan ora ana manèh? Ana keterangan apa ing Alkitab?

Ramalan soal perang wis kelakon

Ing Alkitab ana keterangan nèk perang sing ana ing sak donya digambarké kaya salah siji penunggang jaran.

• ”Terus, ana jaran liya metu, wernané abang mbranang. Sing numpak jaran kuwi diwènèhi pedhang gedhé lan diijinké kanggo ngrampas perdamaian saka bumi bèn manungsa patèn-patènan.”—Wahyu 6:4.

Penunggang jaran kuwi dietutké loro penunggang jaran liyané sing nggambarké kelaparan lan kematian merga penyakit utawa penyebab liyané. (Wahyu 6:5-8) Bèn luwih paham karo ramalan Alkitab kuwi lan luwih yakin nèk ramalan kuwi wis kelakon saiki, wacanen artikel ”Jaran Papat lan sing Nunggang—Sapa Waé Kuwi?”

Masa depan sing luwih apik

Sukmbèn ora ana perang, dadi ora butuh biaya kanggo perang. Tapi masalah kuwi ora isa dirampungi karo manungsa. Ing Alkitab ana keterangan:

• Gusti Allah bakal ”ngendhegké perang ing bumi”.—Mazmur 46:9.

• Gusti Allah bakal nyingkirké kabèh kesusahan sing disebabké perang. ”Gusti Allah bakal ngusapi air matané wong-wong kuwi. Ora bakal ana manèh kesusahan, tangisan, lan rasa lara. Malah, kematian ya ora bakal ana manèh. Kabèh sing mbiyèn nyebabké awaké dhéwé sedhih wis ora ana manèh.”—Wahyu 21:4.

• Gusti Allah ngekèki jaminan nèk kabèh wong uripé isa ayem. ”Bangsaku bakal manggon ing panggonan sing aman, tenang, lan nggawé ayem.”—Yésaya 32:18.

Ramalan soal perang lan peristiwa-peristiwa liyané sing kelakon saiki nggawé awaké dhéwé yakin nèk janjiné Gusti Allah ora suwé manèh bakal kelakon.

Piyé Gusti Allah nggawé keadaan ing bumi dadi damai? Kuwi isa kelakon liwat pamréntahané sing ana ing swarga utawa Kerajaané Gusti Allah. (Matius 6:10) Bèn ngerti luwih akèh apa Kerajaané Gusti Allah kuwi lan apa manfaaté pas Kerajaan kuwi mréntah, deloken vidéo Kerajaané Gusti Allah Kuwi Apa?