Piyé Carané Bèn Aku Isa Nduwé Kebiasaan Mangan sing Séhat?

Kebiasaan mangan sing ora séhat kuwi isa ngrusak keséhatanmu. Nèk kowé nduwé kebiasaan mangan sing ora séhat wektu enom, kuwi bakal dadi kebiasaanmu sakterusé. Mula, kowé kudu nduwé kebiasaan mangan sing séhat mulai saiki.

• Kebiasaan mangan sing séhat kuwi apa?

• Piyé carané bèn aku isa terus nduwé kebiasaan mangan sing séhat?

• Kandhané kanca-kancamu

Kebiasaan mangan sing séhat kuwi apa?

Alkitab ngomong nèk awaké dhéwé kudu ”isa ngendhalèni dhiri ing kabèh perkara”, lan kuwi termasuk kebiasaan mangané awaké dhéwé. (1 Timotius 3:11) Pathokan Alkitab kuwi isa mbantu kowé nduwé kebiasaan mangan sing séhat. Apa sing termasuk kebiasaan mangan sing séhat kuwi?

• Mangan panganan sing bergizi. Ana limang jenis panganan yaiku makanan pokok, lauk pauk, buah-buahan, sayuran, lan susu. Ana wong-wong sing ora mangan salah siji utawa luwih saka limang jenis panganan sing disebutké mau, merga mikir nèk kuwi isa ngurangi berat badané. Ning, kebiasaan kuwi malah isa nggawé kowé ora éntuk gizi sing dibutuhké.

  Cobanen: Golèka katrangan sing luwih akèh utawa takon karo dokter soal manfaat saka gizi sing ana ing pangananmu. Contoné:

  Karbohidrat kuwi sumber ènergi. Protéin isa nglindhungi kowé saka infèksi lan ndandani sèl-sèl ing badanmu sing rusak. Lemak sing cukup isa mbantu ngurangi résiko penyakit jantung lan nggawé kowé tetep nduwé tenaga.

  ”Aku ora pilih-pilih soal panganan. Aku mangan panganan sing séhat. Ning, aku ya tetep mangan coklat lan gorèngan, sing penting aja kakèhan.”​—Brenda.

  

• Ora èkstrim. Wong sing nduwé kebiasaan mangan sing èkstrim kuwi biasané sengaja ora mangan, milih-milih panganan, utawa malah nggragas.

  Cobanen: Gatèkna kebiasaan manganmu saksuwéné sesasi. Sepira kerepé kowé nindakké kebiasaan mangan sing èkstrim mau? Apa sing isa mbok tindakké kanggo ngubah kebiasaanmu kuwi?

  ”Mbiyèn aku biasané ngitungi jumlah kalori sing tak pangan. Kadhang, aku mangan panganan sing akèh kaloriné, ning ing liya dina aku mung mangan panganan sing kaloriné sithik. Ning akhiré, aku mutuské ora ngitungi manèh jumlah kalori ing pangananku. Aku ya ngupaya bèn ora kakèhan mangan lan mandheg mangan sakdurungé wareg. Ora gampang sih, ning saiki aku nduwé kebiasaan mangan sing séhat.”​—Hailey.

Piyé carané bèn aku isa terus nduwé kebiasaan mangan sing séhat?

• Nggawé rencana. Alkitab kandha, ”Rancangané wong sregep iku nekakaké kalubèran.” (Wulang Bebasan 21:5) Bèn isa nduwé kebiasaan mangan sing séhat, kowé kudu nggawé rencana.

  ”Gawéa rencana bèn kowé isa nduwé kebiasaan mangan sing séhat. Contoné kowé isa masak dhéwé. Mungkin kuwi ora gampang, ning manfaaté gedhé kanggo kowé. Kuwi ya isa mbantu kowé dadi hémat.”​—Thomas.

• Ngganti panganan sing ora séhat. Alkitab kandha, ”Kawicaksanan aja nganti sumingkir saka ing ngarepmu.” (Wulang Bebasan 3:21) Kowé kudu wicaksana. Wong sing wicaksana bakal nggolèk cara bèn nduwé kebiasaan mangan sing séhat.

  ”Aku mulai ngganti kebiasaan manganku. Contoné, ketimbang mangan sing manis-manis aku luwih milih mangan apel. Suwé-suwé aku dadi nduwé kebiasaan mangan sing séhat.”​—Kia.

• Kudu masuk akal. Alkitab kandha, ”Panganen rotimu kalawan bungah.” (Kohèlèt 9:7) Nèk nduwé kebiasaan mangan sing séhat, kowé tetep isa mangan panganan sing énak lan ora perlu kuwatir karo apa waé sing arep mbok pangan. Senajan kowé péngin ngurangi berat badanmu, élinga nèk sing paling penting kuwi keséhatanmu. Kowé kudu masuk akal.

  ”Akhir-akhir iki beratku mudhun 13 kilogram. Padahal aku ya tetep mangan kaya biasa, malah aku ya ngemil sing manis-manis. Aku dadi ngerti nèk péngin ngurangi berat badan kuwi butuh wektu lan aku dhéwé ya kudu ngubah kebiasaan manganku.”​—Melanie.