Piyé Carané Aku Isa Ngurangi Berat Badan?

• Apa aku pancèn kudu ngurangi berat badan?

• Apa cara sing paling apik kanggo ngurangi berat badan?

• Sing kudu mbok tindakké

• Kandhané kanca-kancamu

Apa aku pancèn kudu ngurangi berat badan?

Ana cah-cah enom sing péngin ngurangi berat badané, padahal . . .

• kuwi mung merga mentingké penampilané ketimbang keséhatané. Ana cah-cah enom sing nggunakké cara sing cepet kanggo ngurangi berat badané, contoné sengaja ora mangan utawa ngombé obat penurun berat badan. Ning, cara-cara kuwi biasané ora ana pengaruhé lan malah bahaya.

  ”Ana cah-cah wédok sing sengaja ora mangan bèn berat badané cepet mudhun. Padahal sakjané kuwi bahaya lan butuh wektu sing suwé bèn isa pulih manèh.”​—Hailey.

• kuwi ora perlu. Berat badané cah-cah enom kuwi sakjané normal. Ning, dhèwèké ngrasa lemu merga mbandhingké awaké karo kanca-kancané utawa karo pandhangané wong-wong soal awak sing ”idéal” sing ditampilké ing média.

  ”Wektu umurku 13 taun, aku mbandhingké awakku karo kanca-kancaku. Aku mikir nèk aku kudu langsing banget kaya kanca-kancaku bèn aku isa disenengi.”​—Paola.

Ning, ana cah-cah enom sing pancèn kudu ngurangi berat badané. Organisasi Kesehatan Dunia (WHO) nglaporké nèk . . .

• ing sak donya, ana 340 yuta cah enom sing umuré 5 nganti 19 taun sing kelemon.

• ing taun 1975, ana 4 persèn cah enom saka umur 5-19 taun sing kelemon. Ning, ing taun 2016, jumlahé mundhak dadi 18 persèn.

• ing akèh negara, luwih akèh wong sing kena obésitas ketimbang wong sing kurus.

• obésitas ya dialami karo wong-wong ing negara sing miskin. Malah, kuwi ya dialami karo wong-wong sing kurang gizi.

Apa cara sing paling apik kanggo ngurangi berat badan?

Endi sing mbok pilih?

1. Sengaja ora mangan.

2. Olahraga lan nduwé kebiasaan mangan sing séhat.

3. Ngombé obat penurun berat badan.

Sing bener: Nomer 2: Olahraga lan nduwé kebiasaan mangan sing séhat.

Sengaja ora mangan utawa ora mangan salah siji jenis panganan mungkin isa nggawé berat badanmu cepet mudhun. Ning, cara-cara kuwi ora séhat, lan isa waé berat badanmu mbalik manèh nèk kowé nduwé kebiasaan mangan kaya mbiyèn.

Ning, nèk tujuanmu ngurangi berat badan kuwi merga péngin séhat, kowé bakal éntuk hasil sing luwih apik. Dr. Michael Bradley ngomong, ”Cara sing paling aman, paling séhat, lan hasilé paling awèt kuwi . . . nèk kowé ngubah gaya hidup.”a Apa maksudé? Nèk péngin ngurangi berat badan, kowé ora perlu dièt. Kowé mung perlu ngubah gaya hidupmu.

Sing kudu mbok tindakké

Alkitab kandha nèk awaké dhéwé kudu ”isa ngendhalèni dhiri ing kabèh perkara”, kuwi termasuk kebiasaan mangané awaké dhéwé. (1 Timotius 3:11) Malah Alkitab ya ngomong nèk awaké dhéwé aja nganti kakèhan mangan. (Wulang Bebasan 23:20; Lukas 21:34) Pathokan-pathokan Alkitab kuwi isa mbantu kowé nduwé gaya hidup sing luwih séhat. Apa sing isa mbok tindakké?

• 

  Kudu ngerti apa waé sing termasuk kebiasaan mangan sing séhat.

  Aja berlebihan soal pilih-pilih panganan. Ning, kowé kudu tetep ngerti soal kandungan gizi ing pangananmu. Kuwi isa mbantu kowé nduwé kebiasaan mangan sing séhat. Kebiasaan mangan sing séhat bakal mbantu kowé nduwé berat badan sing normal.

• 

  Kudu luwih akèh gerak.

  Kowé kudu ngupaya bèn isa luwih akèh gerak. Contoné, ketimbang nganggo lift, kowé mendhing nganggo tangga. Ketimbang dolanan games, mendhing kowé mlaku-mlaku.

• 

  Ngganti panganan sing ora séhat karo panganan sing séhat.

  Cah enom sing jenengé Sophia ngomong, ”Bèn ora jajan sembarangan, aku nggawa bekal, kaya buah lan sayur.”

• 

  Mangan aja cepet-cepet.

  Ana wong-wong sing merga mangané cepet, dadi ora ngrasa nèk sakjané wis wareg. Mula, aja cepet-cepet wektu mangan. Kowé isa mandheg dhisik sakdurungé arep nambah panganan. Kowé bakal ngerti nèk sakjané kowé wis wareg.

• 

  Kudu ngerti sepira akèhé kalori ing pangananmu.

  Kowé isa maca katrangan gizi sing ana ing bungkusé bèn isa ngerti jumlah kalori ing pangananmu. Élinga nèk minuman bersoda, makanan cepat saji, lan panganan sing manis-manis kuwi akèh kaloriné lan isa nggawé kowé lemu.

• 

  Kudu seimbang.

  Sara sing umuré 16 taun ngomong, ”Mbiyèn, aku mesthi ngitungi jumlah kalori ing pangananku. Saben aku arep mangan, sing tak pikirké mung jumlah kaloriné.” Kowé kudu seimbang. Kowé isa tetep mangan panganan sing énak, ning aja akèh-akèh.

Saran: Kowé isa njaluk saran saka dokter. Dokter isa mbantu kowé bèn nduwé gaya hidup sing luwih séhat.