Manfasiinxe Gennetenaaꞌn Ijjenda Fuldinoqqe

1. Manfasiinxi gennete maachcho? Maa assateeꞌe murte assedha hasissa?

TAꞌIXXE yannaꞌn eloxxa yaane assaꞌneeke manninni woꞌmiteexxi fakkeeniinxi gennete hexxeen. Isenna dhugaatika nageꞌa afeeki heddo milooneꞌn laakkoꞌemaaki manni hedhaꞌneexxe bakkan. Kunni gennete giddo hedhaꞌneeki ardi ise giddiiꞌn fula gophateꞌe murteessedheeken. Insaꞌnenna tenne haranga gargarti hexxeexxe bakkaꞌn heddi manni insaꞌnenni welti hedhoꞌa hansaꞌneen. Tinni bakka habate? Manfasiinxe Genneten!a

2. Manfasiinxa Gennete uddaaxxa manbeꞌa assitaaxxi yaane maachcho?

² Manbeꞌa assitaaxxa, Yihowwa tennee nageꞌiki woꞌmiteexxa bakka dadeeki, Seexani manji weliꞌaan weli gibaashsha, fuggoxxi yaane woꞌmitaashshanna elobaaxxi bala hexxashsha asseexxe butta giddon. (1 Yoha. 5:19; Leellisha. 12:12) Noꞌoki jaalalatiki Mageni tinni aada noꞌoꞌn geesissaꞌneexxa rakko egeꞌneꞌeen, manfasiinxe hedhonni nophphinannoshsha gargaartaaxxa yaane qophpheseen. Isixxi Qaalenna, tennee manfasiinxa gennete ‘gollikinna’ ‘wodeꞌe godditeexxe hiddichchiinxe bakkanni’ fakkeesitaan. (Isa. 4:6; 58:11) Yihowwaxxe eebbanni, tenne haranga haꞌurtitte kaddeexxe muuxamiinxe barruwwaꞌn, tenne genneteꞌn hedhaaki manni manfasiinxe hedhon nophpha dandeꞌeen.—Isa. 54:14; 2 Ximo. 3:1.

3. Isayaasi 65 keꞌn hexxeexxi tinbiite qarixxe yannaꞌn muuxendeeki hittate?

³ Yihowwa wabeekkichcho Isayaasi darreeꞌn manfasiinxe gennete giddo hedhaaki manni hitta hexxeexxa hedho hedhaaxxa haasoꞌeen. Kunni yaadinna Isayaasi hafuura adhdha 65 keꞌn afemaaken, tinni tinbiitenna taakkaaꞌa muuxendeeki 537 K.I.E.D.ni. Tinni yannanna, aadde aageeki Ayudooti Baabiloonxe mootummaxxe boojiꞌonaaꞌn fule, bogi ifikibaa higemmaxxe yannan. Yihowwanna arda isika eebbiseen, ittan diigemeemmaka Iyyerusaalemika qachcha, haarooba ijaarraashanna qullitte magenefachchoke oddoola kadeeka mageneffachchotika mine Isiraꞌeeli giddo hiisinne ijaarraasha gargaareen.—Isa. 51:11; Zekka. 8:3.

4. Isayaasi hafuura adhdha 65 keꞌn kulendeexxi tinbiite barro noꞌokeꞌn muuxendeeki hittate?

⁴ Isayaasixxi tinbiite langaxxe yannaaꞌa muuxema saffeeki 1919 K.I.U.ni. Tinni yannanna konne barixxi Yihowwaxxi mageneeffatoole, lumoxxe Baabiloonnixxe boojiꞌonaaꞌn fuldeexxe yannan. Okkooꞌn tinni manfasiinxi gennete butta duuchchaꞌn baꞌlattaꞌn meꞌa saffeen. Hinaaffe afeeki mootummatika lallaba kulaammaki manni, heddo gubaꞌe orgeseen, ittan gumma manfasiinxanna gummiseen. Jallotixxa huje hujaammakinna biniinchiinka adaba afeemmaki meyyakinna labbaki manni ‘Mageniinxe fedhiishsha dadendeexxa haarooxxa ayyunte oddoꞌween.’ (Effe. 4:24) Isayaasiꞌni kulemeeki kunni heddi badhaadhi, hedheenshshanni muuxemaꞌneeki ediꞌaa daggaaxxe haarooxxe buttaꞌniten. Kaddomaleꞌe, taꞌinxe yannaꞌninni tenne manfasiinxe genneteꞌn gargarti hedheeke orinni laꞌo alfateꞌni heꞌnennen. Tinni manfasiinxi gennete noꞌaꞌa laꞌo affeeki hittate kaddeexxanna isenaaꞌn fula hasissabaaki mayeete kaddeexxa mariꞌanto.

MANFASIINXE GENNETE GIDDO HEDHAAKE MANNIKA JEEJA

5. Isayaasi 65:13 keꞌn, hexxeexxe kakoshsha, manfasiinxe gennete giddo heꞌnanno wodda maa alfinanno?

⁵ Fayyuntenna haaroꞌma. Isayaasixxi tinbiite, manfasiinxe gennete giddo hedhaꞌneeke mannixxi hedho maa fakkaattaaxxanna ise gadhi darre hedheeke mannixxi hedho maa fakkaattaaxxa ifissaan. (Isayaasi 65:13 yaansis.) Yihowwa isixxe mageneeffatoolexxa manfasiinxa halcha dinbiliqqi asse wonshaan. Manfasa qullichcha isika, borreseendeexxa Qaalenna ‘ita, haꞌwa, ittan gammada’ dandeennannoxxa dinbiliqqi hiteexxa manfasiinxa sagale anfeennen. (Leellisha Yohaannisixxa 22:17 keꞌn hokkokkisiis.) Wele darrenaaꞌn kinni, manfasiinxe gennete gadho hedhaaki manni kinni ‘solloꞌwaan, dheeboꞌwaan ittan shooko baꞌedhaan’. Insaꞌnenna manfasiinxe halchaxxa dheebo fullabaan.—Amo. 8:11.

6. Iyuꞌeeli 2:21-24 qicoꞌn, noꞌaa qophpheessendeexxi manfasiinxi uwwa ifisendeeki hittate? Tinni yaanuwwa naꞌa laꞌo affeeki hittate?

⁶ Iyuꞌeeli, tinbiite isixxeꞌn midhatishsha, woyinetishanna woyiriinxe zayiteshsha hexxeexxa yaane laꞌoonfatee, Yihowwa arda isikeꞌe hasissaaxxa yaane, ittan manfasiinxa sagale arjunteti insaꞌnaa uwwaaxxa ifiseen. (Iyu. 2:21-24) Tenne yaanuwwanna assaꞌneeki Maxaafa Qullichchakenaaꞌninna Maxaafa Qullichchakeꞌn hundesendeexxe borresiluwwa nooxxi gamiiꞌn, noꞌoxxe webisayiten, ittan bukkiit, lummolla bukkiinni darreeꞌniten. Duuchchinii wodda tenne manfasiinxe sagalenaaꞌn ita dandeennannon, tennenaaꞌn kexxeexxa fayyunte alfinannon ittan haaroꞌminnannon.

7. ‘Qalbe noꞌoxxa gammaddaashsha assitaaxxi yaane’ maachcho? (Isayaasi 65:14)

⁷ Gammashshonna itita. Mageniinki ardi qalbe insaꞌneexxi giddo hexxeexxe saadinonaaꞌn kexxeexxa “gammashshoti ilili” hiyyaan. (Isayaasi 65:14 yaansis.) Mageniinxe Qaale giddo afendaaxxi jabaxxi dhugaaꞌa, dayyeessaaki tasfinna Kirsitoosixxe wodoꞌni anfeennexxi dhugaatixxi adde ‘qalbe noꞌoxxi gammaddaashsha’ assitaan. Tenneꞌa yaane uuddaaxxa addetike jaaluwwa noꞌokinni haasoꞌa gammandannoshsha assitaan!—Faaro 34:8; 133:1-3.

8. Manfasiinxe gennete giddo hexxexxi lame laꞌo affeexxi yaane heente?

⁸ Yihowwake ardixxe oddoꞌn hexxeexxi jaalalanna mittunte, manfasiinxe gennete giddo hexxeexxe lame laꞌo affeexxe yaanuwwan. Kunni “mittuntetiki usurri” Yihowwaxxi ergantoole, haarooxxe buttaꞌn taꞌinaaꞌn caaldeexxa jaalalanna mittunte alfitaa wodda, hitta hexxeexxa hedho heꞌnannoxxa egennannoshsha gargaartaan. (Qola. 3:14) Mitte Kirsitaana kaddeexxi dayyo taakkaaꞌa Yihowwake ardinni afendemma wodda maachcho hubatteexxa haasootteen: “Minni hado ankinninni gammade hedhanno qico egeꞌneennabaan, taakkaxxe yannaa manji weliꞌaan weli dhugaatixxa jaalala leellishaaꞌna uudenneki Yihowwaxxe Naqaashe giddon.” Ayyinna dhugaatixxa gammasho alfanna itite hedha hasaaki duuchchi manfasiinxe gennete giddo hedhiyyo hasissaan. Butta tinni, Yihowwaxxa ergantooleeyye uuddaaxxa, eeteexxa yaane heddoolenna butta duuchchike Yihowwake mini hadi giddo, ulfeesemeeka summa anfeen.—Isa. 65:15.

9. Isayaasi 65:16, 17 keꞌn yaadissaaxxa yaane uuddaaxxa maa hiyyaki tasfi hedhe?

⁹ Foorfatanna sigga. Isayaasi 65:14 manfasiinxe gennete gadhi darre hedhatee melledheeka manna ‘qalbe haꞌnooxxixxe yaaddonnaaꞌn kexxeexxa raartinaan [ittan] manfasi haꞌnookinna enqemeexxeꞌe weedditinaan’ hiyyaan. Kaddomaleꞌe, Mageniinka arda yaadashshanna rakkataashsha assitaaxxa yaane uuddaaxxa maa hiyya dandeessissa? ‘Ediꞌa tinni yaanuwwa dedhendaan [ittan] [Mageniinxe] ille ediiꞌninna shoꞌondaan.’ (Isayaasi 65:16, 17 yaansis.) Yihowwa rakko noꞌoꞌn geltaꞌneexxa duuchcha balleessaan. Eettene yaana rakko noꞌoꞌn geesisseeka miidhdhama ijjenda qalli hinabeꞌnoshsha assaan.

10. Kirsitaana kaddeexxe dayyuwwanni mittooma noꞌaa eebbaten hinaanneki mayeete? (Fakke uudi.)

¹⁰ Taꞌixxe yannaꞌninna kaddoole, Kirsitaaniinxe bukkiiꞌn afemmanno wodda, qalbe noꞌoxxi hafuura adhdhitaan, ittan tinni fuggaaleette butta geesissaꞌneexxa yaane deeneꞌe itinteenneke kada dandeennannon. Dayyuwwa noꞌoxxee Mageniinke manfasixxa gummuwwa; jaalala, gammasho, nageꞌa, arjuntenna shaqqunte leellishat itinte heꞌnaashsha gargaarraannon. (Gela. 5:22, 23) Mageniinxe organni mittooma noꞌaꞌa hittatta hexxeexxe eebba! Manfasiinxe gennete giddo hedhaꞌneeki manni “haarooxxi iimanna haarooxxi butta” dadendaaxxa haasoꞌaaki tasfi muuxemaa wodda uudaan.

11. Isayaasi 65:18, 19 xxe, hundaayyeshshanni Yihowwa dadeexxi manfasiinxi gennete noꞌo maa assinannoshsha tirtirsita?

¹¹ Galateeffachchonnaa dayyaꞌa. Isayaasi ittin lebeexxi, manfasiinxe gennete giddo ‘dayyaanaannekinnaa gammandaanneki’ mayeete kaddeexxa ifiseen. Tenneꞌe fakkeeniinxa gennete dadeeki Yihowwaten. (Isayaasi 65:18, 19 yaansis.) Manfasiinke jeejinni bagge kaakki hite cindeexxe tenne buttaxxe organaaꞌn, manfasiinke jeejinni haranga danchoondeexxe gennetebaa manna akenkannoshsha isi noꞌoꞌo laꞌoonfataꞌneexxi mama affeexxebaan! Dhugaati giddo hedhatenaaꞌn kexxeexxa alfinenneki badhaadhi gammandannoshsha assaan, ittan konneꞌe badhaadha uuddaaxxa welekeenna kullannoshsha tirtirsaan.—Ermi. 31:12.

12. Isayaasi 65:20-24 qicoꞌn, kulemeeki tasfi maachchi ateꞌn laqemaashsha assee?

¹² Manfasiinxe gennete giddo hedhatika konne tasfa alfinennexxeꞌe galateeffantaannen ittan gammandaannen. Mageniinxe haarooxxe butta giddo, uundannoxxannaa assinannoxxa yaane duuchcha hedateꞌe woꞌlaanne! Maxaafi Qullichchinna iitta hiyyaaka tasfa uwwaan: ‘shiixxooxxe barraaꞌa calla hexxaxxi annonna kadde wogga goddabaaki geerchi hedhabaan. Minenna ijjaarrannon isoꞌninna heꞌnannon ittan woyinenna kaansannon gummatanna indannon.’ Yihowwa noꞌoꞌo eebbisaammaxxeꞌe ‘tolla eloonnabeꞌnoꞌn.’ Isi addachchiissaaxxannaa gammachchiissaaxxa dhugaatixxa hedho heꞌnannoxxa kako aageen. “Yeꞌnebeꞌnong edise,” hansaannexxa yaane duuchcha egeꞌneemmaxxeꞌe hedho affeexxe dada duuchchixxa yorte wonshaan.”—Isa. 65:20-24; Faaro 145:16.

13. Isayaasi 65:25 keꞌn, manji Yihowwaꞌa ergatema safaa wodda hedho isixxeꞌn assaaxxi jijjiirra ifisendeeki hittate?

¹³ Nageꞌanna fayya. Yihowwake manfasike gargaarsinni edi wodda biniinchinkika adaba afeemmaki heddi manni manbeꞌa assaake garinni hedho insaꞌnexxi jijjiirendeꞌeen. (Isayaasi 65:25 yaansis.) Edo hedhemmaka hasisabaaka adaba balleessatee ifi leenjinseꞌeen. (Roome 12:2; Effe. 4:22-24) Dhugaaten, noꞌo Mageniinki ardi qulliyyete kada gonpheennaxxee dedha huja gattabaan. Yihowwa ‘duuchchiinga manjo’ jaalalatike taꞌabaake ussurrinninnaa nageꞌiki mittoonseꞌeen. (Tiito 2:11) Kunni duuchchiinxa dandeꞌaaki Mageni calli hujaake baasan!

14. Isayaasi 65:25 keꞌn, hedheeki yaadi mitte dayyixxe hedhoꞌn dhugaate kadeexxa leelleeki hittate?

¹⁴ Manjiinxi ayyunte dhugaandinni jijjiirema dandeettaa? Tenneꞌe hedhotixxa baranno uudi. Heddo yannaꞌa usurriinke mineꞌn usuremaammake elobaaka adaba afeekinna jallotixxa hedho akeekammaki 20 woggaki dargaggeesi hedhemman. Isinna kaamole moorat, mulqatinna wele jajjabba wonjaluwwa hujatenaaꞌn kexxeexxa usuremeemman. Isi ayyinninna lolemateꞌe qophphoꞌeekemman. Isinna taakkaxxe yannaꞌa, Maxaafi Qullichchiinxa dhugaa laqeꞌe, Yihowwaxxe Naqaashexxe bukkiiꞌn afema safeexxa yanna manfasiinxe gennete giddo hedhaashsha assitaaxxa yaane alfeexxa kokeen. Cuuphemeꞌe Yihowwaxxe Naqaashe kadeechchi uduma, Isayaasi 65:25 keꞌn, hedheeki yaadi hedho isixxeꞌn hitta muuxemeexxa duuchchinii wodda hedaamman. Isinna jallummati neenqa fakkaattammaxxe ayyuntenaaꞌn jijjiiremeꞌe nageꞌiinke manjo kadati gedhechcho fakkaateen.

15. Welli manni manfasiinxe gennete giddo noꞌonni hedhaashsha yeꞌnaanneki mayeete? Iitta assa dandeennannoki hittate?

¹⁵ Isayaasi 65:13 iitta hiyyaake lallabinni safaan: “Lumoxxe Baalleki Gooti Yihowwa iitta hiyyaꞌneen.” Laakkoossi 25: “Yihowwa iitta hiyyaꞌneen” hitaaxxe hiyyan muuxemaan. Isi haasoꞌeexxi yaane duuchchinii wodda muuxendaan. (Isa. 55:10, 11) Manfasiinxi gennete taꞌanna hexxeexxen, Yihowwa gargarti hexxeexxa isoꞌo mageneffattaꞌneexxa maate kophpheesseꞌeen. Konne mini hadixxe una kandeennaxeꞌe, tenne jalloti woꞌmiteexxe buttaꞌninni dandesiisse qicoꞌn nageꞌikinna fayyat heꞌnaannen. (Faaro 72:7) Tenne buutonaaꞌn kexxeexxa, heddi manni, Kirsitaana kadeeke dayyuwwixxe maabarinxe una kadaashsha dandeennenne qicoꞌn gargaarateꞌe hansaannen. Tennenna assa dandeennannoki hordofoole assatixxe hujeꞌn miꞌlachcho assatiten.—Mat. 28:19, 20.

WELINNA MANFASIINXE GENNETEBAA DAGAASHSHSA ASSINANNOKI HITTATE

16. Manji manfasiinxe gennnetebaa dagaashsha assitaaxxi yaane maachcho?

¹⁶ Noꞌo duuchchiing manfasiinxi gennete, weli mannixxa hubanno butattaaxxe bakka kaddaashsha assa dandeennannoxxi yaane hexxeen. Tenne yaane assa dandeennannoki, Yihowwaꞌa fakkaatatiten. Isi manna fedhiꞌi insaꞌneexxi belo orga isixxibaaꞌa dagaashsha assabaan. Tenne irra manna laanki isibaa “harkissedhaan.” (Yoha. 6:44; Ermi. 31:3) Qajeelto qalbe afeeki manni, Yihowwaka jaalalatika adabuwwanna manbeꞌa assitaaxxa isixxa ayyunte egeꞌnaa wodda, ifixxe yannaꞌn isibaa harkisemaan. Eloke adabuwwa noꞌokinninnaa eloke meꞌichchi noꞌokinni manni manfasiinxe gennetebaa dagaashsha assinnannoki hittate?

17. Welinna tenne manfasiinxe gennetebaa dagaashsha assa dandeennannoki hittate?

¹⁷ Manni manfasiinxe gennetebaa dagaashsha assinnannoki mitti ori, addetika jaaluwwa noꞌoka jaalalatinna baꞌluntet abidatiten. Haarooki bukkiiteꞌn afemaaki manni, qarixxe Qorontoosixxe bukkiiꞌn Kirsitaana kadebaaki afemeemaki manni, hasoꞌeemmashshanni taꞌanna haasoꞌaa hansaannen. “Dhugaandinni Mageni oddo haꞌnooxxen hedheen” hine haasoonneemman. (1 Qoro. 14:24, 25; Zekka. 8:23) Tenneꞌaa, “weliꞌaan weli nageꞌiki hedhdhe” hiyyaꞌneeka gorsa hujeteꞌn hosisa hasissaan.—1 Tese. 5:13.

18. Manji noꞌoxxe orgabaa dagaashsha assitaaxxi yaane maachchco kada dandeetta?

¹⁸ Duuchchinii wodda, Kirsitaana kaddeexxa dayyuwwa noꞌoxxa Yihowwashsha uudateꞌe woꞌlaancho assa hasissaan. Iitta assa dandennannoki, baꞌa gattabaaxxe gonphe insaꞌnexxeꞌn kaddeebaangi eloke adaba insaꞌneekeꞌn miꞌlachcho assatiten. Oddo noꞌoxxeꞌn hexxeexxa gargarunte jaalalatike manfasinni duuchchinni wodda “welekeꞌe baꞌlake kadati qalbe giddixxinni mararatinna weliꞌaan weli tolanga gattowaal hiyyati” tika dandeennannon. (Effe. 4:32) Okkooꞌn jaalalatike orinni abindoꞌaa hasaammaki manni tenne manfasiinxe gennetebaa dagaan.b

MANFASIINXE GENNETE GIDDIIꞌN FULDINOQQE

19. (a) “Fulleemman Hingee Dangeen,” hitaꞌneexxe kolloꞌn mitti mitti manfasiinxe gennetebaa hige dageechchi uduma maa hiyye? (b) Maa assatee murteesedha hasissa? (Fakke uudi.)

¹⁹ Manfasiinxe gennete noꞌoxxeꞌe lumoxxa saadino anfeennen! Isenna edi irran caala danchondeꞌeen, ittan irran caala Yihowwaaꞌa jajaꞌneeki manni hedhaꞌneexxe bakka kaddeen. Yihowwa tenneꞌe manfasiinxa gennete noꞌaa dadeexxeeꞌe duuchchinii wodda galateeffanto. Ayyinna haaroꞌmoꞌaa, ititoꞌaa, siggoꞌaanna nageꞌiki hedhatee hasaꞌneeki duuchchi, manfasiinxe gennetebaa dagowaal ittan isenaaꞌninna ijjenda fuloqqe! Seexan tenne bakkanaaꞌn noꞌoꞌo fulchateꞌe jabaxxa woꞌlaancho assaꞌneexxa deenonnoqqe. (1 Pheex. 5:8; Leellisha. 12:9) Yaane isiꞌa qabaashsha midditte uwwiyyo hasissabaan. Tenne manfasiinxe gennetexxa danchumma, caꞌuntenna nageꞌa iseka heqqateꞌe dandeennennexxa duuchcha assinno.