“Galfachchummatibaa Geyateeꞌe Woꞌlaancho Assino”

1. Yihowwa noꞌo maa assinonnaa hasaꞌne?

MITTE miniinka annanna miniinxa ama, fayyaka finna ilatenaaꞌn caaldeexxa gammandaashsha assaaki heenooki jeejuwwi hedheen. Kunni hadi reefi ilendeexxa anno eeyyaaxxenna kaddoole, nophphitebaangi sammi hite oosummandeꞌn hexxoꞌa hasabaan. Anno tinni nophpha gophpheexxe kaddoole kinni haranga yaandaaxxi egeꞌnendeexxen. Weli fakkaattaanxa, Yihowwa Yesuusixxe hordofooleeyye kadateꞌe, adhdhinennexxe tarkaaffeꞌn gammadoolenna manfasiinxe hedhonni oosete kandenneshshanni heꞌnonnaa hasaꞌnebaan. (1 Qoro. 3:1) Tenneꞌa irra ‘galfanteenneke’ Kirsitaana kandonnaa hasaꞌneen.—1 Qoro. 14:20.

2. Hoone qortumuwwiꞌaa hiissichcho alfinanno?

² Galfateeke Kirsitaana kadate hiyyo maa hiyyote? Galfateeke Kirsitaana kadeteꞌe maa assiyyo hasissa? Nophphinjo noꞌokeeꞌe manfasiinxi jabaxxi sagale maa laꞌo affee? Ittan miket iimi darre ifiꞌni addatatenaaꞌn bayyata hasisseeki mayeete? Tenne qoꞌneꞌni konne qortumuwwiꞌa hiissichcho alfinannon.

GALFATEEKE KIRSITAANA KADATE HIYYO MAA HIYYOTE?

3. Galfateeke Kirsitaana hiyyo maa hiyyote?

³ Maxaafa Qullichchakeꞌn Giriketike laagadanaaꞌn tikendeexxi “Galfata” hitaaxxi hiyya “qullichcha” nna “woꞌma” hitaaxxe tika affeen.a (1 Qoro. 2:6) Mitte anno nophphite lumolla kaddammashshanni, noꞌonna manfasiinxe hedhonni nophphineenneke manna kadiyyo hasissaan. Konne orinni galfateeke Kirsitaana kandannon. Konne herregaꞌni gennennexxenna kaddoole, ijjenda manfasiinxe hedhonni nophphinjo assa uurrisiyyo hasissabaan. (1 Ximo. 4:15) Noꞌo duuchchiing, ittan reefi nophphateꞌn hexxeexxe dargaggeeyyenna kaddoole, manfasiinxe hedhonni galfanteenneke kada dandeennannon. Mitti Kirsitaani galfateeke kadeexxa egeꞌnishshaaxxi yaanuwwa heente?

4. Mitti Kirsitaani galfateeke kadeexxa egeꞌnishshaaxxi yaane maachcho?

⁴ Galfateeki Kirsitaani, isi haseexxa yaane calla melledhaꞌn hordofaake kadebaangi, Mageni hasaꞌneeke darrinni hedho isixxa duuchcha akeekaaken. Dhugaaten, qullichcha kada gopheemmaxxee dedha hujaaxxinna egeꞌnendeexxen. Kaddomaleꞌe, Mageniinxe fedhiinni weli aagaa garinni hedaꞌneexxanna heene yaanenna assaꞌneexxa leellishaan. Haarooxxa ayyunte oddoꞌwaan, ittan hedino isixxi Mageniinxe hedinonni fakkaattaashsha assateꞌe duuchchinii wodda jabaxxa woꞌlaancho assaan. (Effe. 4:22-24) Maxaafi Qullichchiinke seeraꞌninna hundaayyetike seeraꞌn hundeessendeexxa beekkumiinxa murte murteessedhateꞌe ifi leenjiseꞌeen. Tenneꞌa isi maa assaaxxa kulaaki heddi seeruwwi isiꞌa hasisabaan. Murte assedhaaxxa yanna ifi hiratika adaba afeꞌeen.—1 Qoro. 9:26, 27.

5. Mitte galfatebaake Kirsitaanaꞌni huuni haꞌuraaki jeejuwwi geya dandeꞌa? (Effesooni 4:14, 15)

⁵ Wele darrenaaꞌn kinni, mitti galfatebaaki Kirsitaani ‘sobikinna’ ‘sobiinke maluwwinni’ sholla qicoꞌn sobemaan, ittan dhariinxa odo, suunsa, miidiyakeꞌn haasoꞌemaaka dhariinka tarjanna waakkatooletixxa dhariinxa barachcho addataaxxi hexxaan.b (Effesooni 4:14, 15 yaansis.) Dedha kunni manji, wele hinaafatee, lola keꞌissatee, mufetee yookiin hega uudematee shiqo hedheeke kada dandeꞌaan.—1 Qoro. 3:3.

6. Manfasiinxe hedhonni galfatatika nophphichcho, oosetike nophphichchinni fakkeessinaanneki mayeete kada dandeetta? (Fakke uudi.)

⁶ Iimiiꞌni uundenneshshanni, Maxaafi Qullichchi manfasiinxe hedhonni galfatatika nophphichcho, oosetike nophphichchinni fakkeessaan. Oose baꞌlaxxa hubanno afa gophphemmaxxeꞌe hadiinxi heqqonnaa xexxeꞌachcho hasissaan. Fakkeennakeꞌe, mitte ama belto isexxinni kaamoletika ora qaxxaamurtaa wodda, belto isexxi anga isexxa abixxitaashsha assitaan. Belto tinni nophphiteechchi uduma kinni, qofinni kaamoletika ora qaxxaamurtaashsha waaldoolena, belto isexxi ora qaxxaamurtaa wodda, middanna bitaꞌa uudde qaxxaamurtaashsha qalli assitaan. Belto tinni lumolla kaddeechchi uduma, bala iseꞌn geltabaashsha ifiꞌaan xexxeꞌattaan. Oose shiixxarammateꞌn fuggoxxi yaane geltabaashsha lumoliinki gargaarsi hasisammashshanni, galfatebaake Kirsitaannixxi manfasiinxi hedho balateꞌn ibbabaashshanna beekkumiinxa murte assedhaashsha heddo yanna galfateeke Kirsitaaniki gargaarsi hasisaan. Wele darrenaaꞌn kinni, galfateeki Kirsitaani murte assedhaa wodda, Yihowwa eettene yaaneꞌa afeexxa uushsho egeꞌnateꞌe, Maxaafi Qullichchiinka hundaayyetika seera firfirsaan, ittan akeette hundaayyetike seerixxa hordofaan.

7. Galfateeke manjiꞌaa wele manjiki gargaarsi hasisaa?

⁷ Iitta hinanno wodda, mitte galfateeke Kirsitaaniꞌa ijjenda ayyiki gargaasinna hasisabaan hiyyatee? Waawwot. Galfateeki manjinna wele manjika gargaarsa halsaaxxi yanna hexxeen. Kaddomaleꞌe, mitti manfasiinxe hedhonni galfatebaaki manji, weli manji isiꞌa maa assaaxxa kulaashsha yookiin isi ifiꞌaanni murteessedha hasissaaxxa yaane weli manji isiꞌa murteessaashsha heqqaaxxinna hexxaan. Wele darrenaaꞌn, mitti galfateeki Kirsitaani, beekkumannaa eloxxa hedhotixxa baranno afeeke manjika gargaarsa haseexxenna kaddoole, murte ifixxa ifiꞌaanni murteessedhat ifixxa “baꞌo ifiꞌaanni baꞌedhaashsha” Yihowwa isonaaꞌn heqqaꞌneexxa egeꞌneꞌeen.—Gela. 6:5.

8. Galfateeki Kirsitaani mitti welekenaaꞌn gargarti higaꞌneeki hoone oruwwinnite?

⁸ Manji bisiinxe dhagganni gargarunte afemmashshanni, galfateeki Kirsitaanuwwinna manfasiinke adabuwwixxa gargarunte afeen, kunniirinna; beekkuma, worbunte, arjuntenna manjiinxa rakko ifixxishsha asse uudaten. Ittin lebendaaxxa, lame galfateeke Kirsitaanaꞌni weli fakkaataaki jeeji futti hiyyaaxxa yanna, Maxaafi Qullichchiinke hundaayye seerinni murte asseꞌneexxe kaddoolenna murte insaꞌnexxi gargarti hexxeexxe kada dandeettaan. Heddo yanna tinni gargarunte hedha dandeettaaki wodaniki abidendeexxe murte kaddaa woddaten. Gargarunte tennenaaꞌn kexxeexxa mitti welekeꞌn murteessabaan. Tenneꞌa irra, insaꞌnee mittoonsitaaxxe yaaneꞌni miꞌlachcho assinaan.—Roome 14:10; 1 Qoro. 1:10.

KIRSITAANUMMATIXXE GALFACHCHOBAAꞌA NOPHPHINANNOKI HITTATE?

9. Kirsitaanummatixxe galfachchobaa nophphinannoki wiinamikitee? Ifisi.

⁹ Dadumiinke orinni nophphine lumolla kadatee qeerraaxxi yanna hasissaan, wiinamiki nophphe manfasiinxe hedhonni galfateeki ayyinna hedhebaan. Fakkeennakeꞌe, Qorontoosike bogaꞌn hexxaammaxxi dayyuwwa gammachchiissaaxxa odo laqqeemman, cuuphendeemman, qullichcha manfasa adhdhiteemman ittan hawaariya Phawuloosi insaꞌneꞌa qofinni uwwaꞌneexxe akeettenaaꞌn laꞌo alfiteemman. (Huje 18:8-11) Kaddomaleꞌe, cuuphemmeexxinni heddo wogga saxxoolenna insaꞌne giddiiꞌninni heddi manni galfateekemmabaan. (1 Qoro. 3:2) Manfasiinxe hedhoke nophphichchinni duuchchinii wodda boxxatenaaꞌn bayyata dandeennannoki hittate?

10. Galfanteenneke kadateꞌe assiyyo hasissaaxxi yaane maachcho? (Yihuda 20)

¹⁰ Galfanteenneke Kirsitaana kadateꞌe edinsennexxi galfanteenneke manjo kadatixxa halcha nossedhiyyo hasissaan. ‘Beekkuma gibaaki’ manni, manfasiinxe hedhonni oose kade hedha hasaammaxxee nophpha dandeꞌabaan. (Fakke. 1:22) Nophphe lumollange kadeꞌe, hadi isiki isiꞌaa murte assaashsha hasammake manjishsha kada hansaabeꞌnon. Tenneꞌa irra, ifiꞌaan manfasiinxe hedhonni nophphatee hansaannen. (Yihuda 20 yaansis.) Atinna galfateeke manjo kadatee woꞌlaancho assateꞌn hexxottole, Yihowwa “hujeteꞌe dammasitaaxxa halchanna hunna” uwwaashsha kadhat.—Filphisiyuusi 2:13.

11. Galfanteenneke Kirsitaana kandannoshsha noꞌoꞌo gargaartaaxxi hiini qophphe hexxe? (Effesooni 4:11-13)

¹¹ Yihowwa, mitte gargaarsi belo galfachchotike koobboꞌn gennonnaa hasaꞌnebaan. Kirsitaaniinxe bukkii giddo allalsanonna barsiisano kadde ergatendaꞌneexxi dayyuwwa, hedho manfasiinxen ‘galfateꞌe’, “Kirsitoosishsha woꞌma kadeeke garinni galfatatike koobboꞌni gennanno qicoꞌn” noꞌoꞌo gargaarateꞌe ifi qophpheeffatteꞌeen. (Effesooni 4:11-13 yaansis.) Yihowwanna, ‘Kirsitoosixxixxa hedino’ afa dandeenannoshsha manfasi qullichchiki noꞌoꞌo gargaaraan. (1 Qoro. 2:14-16) Ittanni lebendaaxxa, Yesuusi butta hedhemma wodda hitta hedaammaxxa, haasoꞌaammaxxanna maa asseexxa kulaaki shooli Wengeeletiki maxaafi noꞌaa borreessemaashsha asseen. Hedinotinna assitaattexxe yaanenni Kirsitoosiꞌi fakkaatati, atinna Kirsitaanunteti galfatatike herrega atikeꞌn geya dandeettatton.

JABAXXE SAGALEXXA LAꞌO

12. ‘Kirsitoosi uuddaaxxa barsiissaaxxi keꞌitiinxi barachcho’ heente?

¹² Galfanteenneke Kirsitaana kadateꞌe, ‘Kirsitoosiꞌi uuddaaxxa barantennexxe keꞌitiinxe barachchonaaꞌn’, tinninna Kirsitaaniinxe hundaayyetixxe barachchonaaꞌn saꞌne meꞌiyyo hasissaan. Fakkeennakeꞌe, tinni hundaayyetixxe hiyyendaaxxi barachchuwwa: aadde aaga, adde, cuuphenshanna reyotenaaꞌn keyaten. (Ibra. 6:1, 2) Tinni duuchchiniingi Kirsitaani addataaxxe keꞌitiinxe barachchuwwan. Tennenaaꞌn kexxeexxa, Pheenxeqoosixxexxa barra Pheexiroosi bukki hiyyeemmake kolbaꞌaꞌa lassee wodda tenne yaanuwwa haasoꞌeemman. (Huje 2:32-35, 38) Noꞌonna Kirsitoosixxe hordofooleeyye kadateꞌe tenneꞌe hundaayyetixxa barachchuwwa baratiyyo hasissaan. Fakkeennakeꞌe, hawaarya Phawuloosi, reyotenaaꞌn keꞌatixxa barachcho addatabaaki ayyinna, wele barachcho addateexxe kaddoolenna adde isixxi laꞌo affebaaxxa haasoꞌeen. (1 Qoro. 15:12-14) Kaddomaleꞌe, dhugaatixxa hundaayye barachcho calla egenne, anga mirqeꞌne ofoꞌliyyo hasissabaan.

13. Ibraawiyaane 5:14 keꞌn, kulendeexxe manfasiinxe sagalenaaꞌn laꞌo alfateꞌe maa assiyyo hasissa? (Fakke uudi.)

¹³ Hundaayyetixxe barachchonaaꞌn gargarti hedheeke orinni, jabaxxi manfasiinxi sagale, Yihowwaka seera calla kadebaang, isixxa hedino egeꞌna dandeennannoshsha gargaaraaka hundaayyetika seeruwwa abiddeen. Tenne sagalenaaꞌn laꞌo alfateꞌe; Mageniinxa Qaale qoꞌnisa, alalchanna barantennexxa yaane xexxeꞌachchoti hujeteꞌn hosisa hasissaan. Iitta assati, Yihowwaꞌa gammachchiissaaxxa murte assedhatee ifi leenjinsannon.c—Ibraawiyaane 5:14 yaansis.

14. Phawuloosi Qorontoosiki Kirsitaani manfasiinxe hedhonni galfataashsha gargaareeki hittate?

¹⁴ Heddo yanna galfatebaake Kirsitaanaꞌn, Maxaafi Qullichchiinka hundaayyetika seera, hubatanna hujeteꞌn hosisa hasisaaki jeeji futti hiyyaaxxa yanna, eloxxa murte assedhdha haꞌurtaan. Maxaafi Qullichchi giddo seeri fuleeki hedha gophoole, mitte mitte manjoꞌn haseexxa yaane assa dandeꞌaachcho fakkaattaan. Weli kinni, seeri hasisabaanxe yaaneꞌa seeri fulaashsha hasaakinna hedha dandeꞌaan. Fakkeennakeꞌe, Qorontoosike bogaꞌn hedhaammaki Kirsitaani, adibaareteꞌe tolchineexxa sagale ita dandeennaaxxanna dandeennabaaxxa Phawuloosi insaꞌnaa seera fulchaashsha qorreechcho fakkaattaꞌneen. Phawuloosi insaꞌne maa assinaaxxa kulati irra, duuchchiingi manji wodana ifika laꞌoonfateexxi hasaꞌneexxa yaane “melledhatixxa mabite” afeexxa ifiseen. Ittan duuchchiingi manji wele gugguffachchiisebaang wodana isikeꞌe nageꞌa alfaashsha assaaka hundaayyetika seeruwwa eereen. (1 Qoro. 8:4, 7-9) Phawuloosi Qorontoosika Kirsitaana, welekeꞌn irkatati irra yookiin seera halsati irra ifixxa qalbeeffachchotixxa dandeenne laꞌoonfatati manfasiinxe hedhonni nophphinaashsha gargaareen.

15. Phawuloosi Ibraawootiinki Kirsitaani manfasiinxe hedhonni nophphaashsha gargaareeki hittate?

¹⁵ Phawuloosi Ibrawootiinke Kirsitaaniꞌa borreesseexxe daddaabbenaaꞌn wele laꞌo affeexxa barachcho alfinannon. Mitti mitti gubaꞌe giddo hedhemmaki manni, manfasiinxe hedhonni nophpha itti sufeemmabaan; ‘jabaxxa [manfasiinxa] sagale itat irra higgeenni ado halsaamman.’ (Ibra. 5:12) Tennenaaꞌn kexxeexxa Yihowwa yannna yannandeꞌn gubaꞌeti darreeꞌn barsiisaꞌneexxa haarooxxa barachcho addate adhdha dandeenneemmabaan. (Fakke. 4:18) Fakkeennakeꞌe, Muuseki seeri Kirsitoosike tolchinni muuxemeꞌe, uurreexxinni 30 wogga saxxoolenna, konne seera heqqedhiyyo hasissaaxxa addataammaki heddi Ayhuudooti hedhemman. (Roome 10:4; Tiito 1:10) Yihuudiki Kirsitaani 30 wogga udumanna hedino insaꞌnexxa toggi assedhaashsha qora hasissaammaxxe yannabaan! Phawuloosi Ibrawootakeꞌe borreesseexxa daddaabbe yaansisaaki ayyinna, kunni maxaafi jabaxxa manfasiinxa sagale abideeke kadeexxa addata dandeꞌaan. Tinni daddaabbe, Kirsitaani kunni, Kirsitaaniinxi mageneeffachcho duuchchiinxe yaanenaaꞌn caldeexxe kaddeexxa, afeexxa adde jabeessedhaashsha hasissaaxxenna Ayhuudooti shorrichcho geesisoolenna lassatixxe hujeꞌn jabantaashsha insaꞌne gargaartaaxxemman.—Ibra. 10:19-23.

MIKETI IIMI DARRE IFIꞌNI ADDATATENAAꞌN HEQQEDHDHE

16. Galfanteenneke kadateꞌe wele maa assinannoxxi yaane hexxe?

¹⁶ Woꞌlaancho assa hasissaaki galfatateen calla kaddebaangi, galfantenneshshanni ittin ediꞌaa sufateeten. Tenneenna assateꞌe, miketi iimi darre ifiꞌn addatatenaaꞌn heqqedhiyyo hasissaan. (1 Qoro. 10:12) Nophphichcho assa ittin ediꞌaa sunfeennexxa kokateeꞌe ifi wirri hine uudiyyo hasissaan.—2 Qoro. 13:5.

17. Phawuloosi Qolaasiyaasi Kirsitaaniꞌa borreesseexxi daddaabbe galfanteenshanni ittin ediꞌa sufa hasissaaxxa leellishshaaki hittate?

¹⁷ Daddaabbeteꞌn, Phawuloosi Qolaasiyaasi hedhemmaki Kirsitaani, galfateeshshanni ittin ediꞌa sufa hasissaaxxa ifiseen. Insaꞌnenna galfateeke Kirsitaana kandoolenna, Phawuloosi buttatixxe hedinonni sobemmabaashsha xexxeꞌachchiiseen. (Qola. 2:6-10) Ittan, hedheeke jeejanaaꞌn uuda dandeessissaꞌneeshshanni, gubaꞌeteꞌn hedhemmaka manna adda egeꞌneemmaki Ephafira “muuxamii qicoꞌn jabaante uurinaashsha” duuchchinii wodda insaꞌnaa kadhataamman. (Qola. 4:12) Kabaaꞌn maa barantano? Phawuloosinna Ephafira galfanteenneke kande hedhatee ifixxi woꞌlaanchonna Mageniinki gargaarsi hasisaaxxa egenneemman. Insaꞌnenna Qolaasiyaasiki Kirsitaani hiini rakkonna gelteexxe kaddoolenna galfanteeshshanni ittin ediꞌaa sunfaashsha hansaamman.

18. Mitti galfateeki Kirsitaani maachcho gopha dandeꞌa? (Fakke uudi.)

¹⁸ Phawuloosi mitti galfateeke Kirsitaani, gaachchanna Mageniinka baro barokeꞌe gopha dandeꞌaaxxa Ibraawoota xexxeꞌachchiiseen. Mitte Kirsitaanixxi qalbe duuddeexxe kaddoole, aadde aage Mageniinxa gattowaali alfa dandeꞌabaan. Gammachchiissaaxxa Ibrawooti iitta hedheeke jeeji giddo hedhemmabaan. (Ibra. 6:4-9) Techchixxe yanna qiideka, yookiin gubaꞌetenaaꞌn fugusseme aadde aageeka manjo uuddaaxxa maa hiyya dandeessissa? Ifi heeshshi assine aadde aaga insaꞌnexxi, Phawuloosi Mageniinka gaachchanna baro barokeꞌe gonphaan hiyye borreesseemmake mannanaaꞌn gargarit heꞌneexxa leellishshaan. Kaddoolenna, isibaa hinga wodda gargaarsi isiki insaꞌnaa hasisaan. (Hiziq. 34:15, 16) Geedhetinna kunni manni manfasiinxe hedhonni higgeen jabaantaashsha insaꞌnee gargaaraaka mitte galfateeka Kirsitaana qophpheessa dandeettaan.

19. Hoone herrega afa hasissa?

¹⁹ Galfateetteke Kirsitaana kadateꞌe woꞌlaandaattole herreeggaatteba geya dandeetatton! Jabaxxa manfasiinxa sagale ita ittin sufi, duuchchii wodda hedino atixxi Yihowwaxxini welt fakkaattaashsha assi. Ittan galfatteetteke Kirsitaana kaddootole galfateetteshshanni ittin ediꞌaa sufi.