Yihowwaxxe Orgaaꞌa Affineexxa Saadino Jabeessedhe

1. Keꞌitiinke dhibbeesso baroꞌn hedhemmaki Yihowwaki ardi orgeessemeeki hittatemmaꞌa?

YIHOWWA haanonna arda isikeꞌe huje uwwa wodda, hunjoꞌaa hasaꞌneeki orgeessemeeke orinniten. (1 Qoro. 14:33) Fakkeennakeꞌe, Mageni buttateꞌn hedhaꞌneeke manji duuchchaꞌaa gammachchiissaaxxi odo lassendaashsha hasaꞌneen. (Mat. 24:14) Yihowwa, Yesuusiꞌaa tenne huje akeekatixxa baalle uwween. Yesuusinna huje tinni orgeessemeeke garinni hujendaaꞌnaꞌa uudeen. Keꞌitiinke dhibbeesso baroꞌn, gargarti hexxeexxe bakkaꞌni hexxemaxxe gubaꞌeꞌa, akeette uutoꞌa mellendeexxi geedhe hexxemman. (Huje 14:23) Iyyerusaalemi hexxaammaxxi hawaariyaatenna geedhe, duuchchiniinxi gubaꞌe hordoffaaka seera murteesitaamman. (Huje 15:2; 16:4) Uwwendaꞌneexxa akeetteꞌaa ajajematenaaꞌn kexxeexxa, “gubaꞌuwwatinna addet jabaattaꞌn barra barrandeꞌn laakkoosikinna lebaꞌn meꞌiteen.”—Huje 16:5.

2. Yihowwa 1919 kenaaꞌn safeꞌe, akeettenna manfasiinxa sagale uwwaammaki hittate?

² Yihowwa techchonna arda isika orgeessa ittin ediꞌa sufeen. Yesuusi 1919 kenaaꞌn safeꞌe, lassatixxa huje orgeessateenna hordofooleyye isixxeꞌe manfasiinxa sagale qophpheesatee, heenooka manfasiki hariiremeeka labballo laꞌoonfataꞌn tureen.a (Luqa. 12:42) Yihowwanna tinni gollo hujaꞌneexxa huje eebbisaꞌneexxi mama affeexxe yaanebaan.—Isa. 60:22; 65:13, 14.

3-4. (a) Orgeessemmeenneke kada maa laꞌo affee? Fakkeenniki kuli. (b) Tenne qoꞌneꞌn maachcho uundano?

³ Orgeessemmeenneke manna kada gonpheenele, Yesuusi uwweexxa huje muuxa dandeennannabaan. (Mat. 28:19, 20) Fakkeennakeꞌe, gubaꞌe noꞌoxxi haba lassitaaxxa egeꞌna gonpheenele; duuchchiing haseexxe bakkaꞌn lassamman. Mitte mitte bakkaꞌn gargarti hexxeexxi baꞌlisanoole higge higgeen lassitaaxxe kaddaa wodda, wele kinni ijjenda lassendebaaxxe bakka kada dandeettamman. Orgeessemmeenneke kada wele affeexxi laꞌo maachcho?

⁴ Yesuusi butta hedhemma wodda asseexxi yaane, techchonna noꞌonna orgeessemmeenneke kandannoshsha gargaartaan. Tenne qoꞌneꞌn, Yesuusika fakkeenna, ittan orga noꞌoxxi isika fakkeenna hordoffaꞌneeki hittate kaddeexxa uundannon. Yihowwaxxe orgaaꞌa anfeennexxa saadino, leellisha dandeennannok hittate kaddeexxanna uundannon.

ORGA NOꞌOXXI HORDOFFAꞌNEEKI YESUUSIKE FAKKEENNAN

5. Yesuusika fakkenna hordoffaanneki mitti ori hoonte? (Yohaannisi 8:28)

⁵ Yesuusi maa assaaxxanna maa haasoꞌaaxxa iimatike Anna isikenaaꞌn barateen. Yihowwaxxi organna, Yesuusika fakkeenna hordoffaammaxxeꞌe adabiinxi barachchonna akeette uutaꞌneexxi Mageniinxe Qaaleꞌn hundeessendeexxen. (Yohaannisi 8:28 yaansis; 2 Ximo. 3:16, 17) Mageniinxa Qaale duuchchinii wodda yaansinsannoshshanna hujeteꞌn hosinsannoshsha gorsi uwwemaꞌneen. Konneꞌe gorsa hujeteꞌn hosisati laꞌo alfinannok hittate?

6. Maxaafa Qullichcha qoꞌnsati laꞌo alfinannok mitte ori hoonte?

⁶ Maxaafa Qullichchakeꞌn hundeessendeexxa borro laꞌoonfante Maxaafa Qullichcha qoꞌninsanno wodda caaldeexxa laꞌo alfinannon. Fakkeennakeꞌe, orgatenaaꞌn uwwendaꞌneexxa akeette, Maxaafi Qullichchi barsiisaꞌneexxe yaaneni welt hokkokisiisa dandeennannon. Noꞌaa uwwendaꞌneexxi akeette Maxaafa Qullichchakeꞌni hundeessendeexxe kaddeexxa egenanno wodda, Yihowwaxxe orgaꞌn anfeennexxi adde jabaattaꞌn meꞌitaan.—Roome 12:2.

7. Yesuusi lasseexxi erga heente? Yihowwaxxi orga fakkeenna isika hordofaꞌneeki hittate?

⁷ Yesuusi “Mageniinxe Mootummaxxa gammachchissaaxxa odo” lasseꞌeen. (Luqa. 4:43, 44) Hordofooleeyye isixxinna Mootumma tenne uuddaaxxa lassitaashsha ajajeen. (Luqa. 9:1, 2; 10:8, 9) Techchixxe yannaꞌn Yihowwaxxe orgaxxe una kadeeki duuchchi, habanna hedhoole yookiin orga tenneꞌni heenee baalenna afeekenna kadoole tenne Mootummaxxa erga lassaan.

8. Hiini ulfiniinxi huje noꞌaa uwwendee?

⁸ Mageniinxe Mootummaxxa odo mannakee kula noꞌaa ulfiniinxe hujen! Tinni noꞌaa malee welekeꞌe uwwendeexxe hujebaan. Fakkeennakeꞌe, Yesuusi butta hedhemma wodda, isixxa ayyunte durriisuwwi mannakeꞌe haasoꞌabaashsha kuteemman. (Luqa. 4:41) Techchonna mitti manji, Yihowwake ardinni ergachcho fulati edi darre, tenne hujeꞌaa hasissaaxxa dandeette wonsheeke kadiyyo hasissaan. Haanonna kadde habanna mannakeꞌe lassati, tenne ulfeessendeexxe hujeꞌaa saadino anfeennexxa leellisha dandeennannon. Yesuusishshanni noꞌoki herreginna, tenne Mootummaxxa dhugaatixxa sanne manjiinxe qalbe giddo kaasatennaa wodeꞌe haꞌwisaten.—Mat. 13:3, 23; 1 Qoro. 3:6.

9. Orga Mageniinki summi egeꞌnemaashsha assitaꞌneeki hittate?

⁹ Yesuusi Mageniinka summa egeꞌnisheꞌeen. Yesuusi iimateꞌn hedheeke Anni isikibaa kadhatee wodda: “summa atika insaꞌneꞌa egeꞌnisheennen” hiyyeen. (Yoha. 17:26) Yihowwaxxi organna konneꞌe Yesuusika fakkeenna hordofati, duuchchiing manji Mageniinka summa egeꞌnaashsha gargaarateꞌe dandeetteexxa duuchcha assateꞌn hexxeen. Haarooxxe Buttaxxe Tikaki Maxaafi Qullichchi Mageniink summi edo hedhemmaxxe bakkaꞌn higaashsha assati, konneeꞌe summa egeꞌnishatee lumoka gargaarsa asseꞌen. Taꞌixxe yannaꞌn konne Maxaafi Qullichchixxi tika woꞌmi yookiin gamisi 270 iimi darre hedheeke laagadinni afemaan. Leba tarja A4 nna A5 keꞌn, Mageniinki summi edo hedhemmaxxe bakkaꞌn higa dandeꞌeeki hittate kadeexxa baꞌlaka ifisanjo alfa dandeettatton. Qoꞌnetike Maxaafa Qullichchaꞌn leba tarja C, Kirsitaanike Giriketixxe Qullitte borroꞌn Mageniinki summi 237 le afemaaxxa baꞌla qicoꞌn kokeessaan.

10. Miyanimaari hexxaꞌneexxe mitte manjo haasootteexxe yaanenaaꞌn maa baratano?

¹⁰ Yesuusishshanni heddi manni Mageniinka summa egeꞌnaashsha gargaaratee dandeennannoxxa duuchcha assateꞌe hansaannen. Miyanimaari hexxaꞌneexxi mitte 67 woggaxxi manjo Mageni summa afeexxa egeꞌnatenaaꞌn kexxeexxa indiddo wocci wocci assitaꞌn iitta hiteen: “Mageniink summi Yihowwate kadeexxa taakkaaxxe yannaꞌa laqenneki techchoten. … haꞌno aneꞌe barsiissineexxi konneechchi edi darre laqe egeꞌnebeꞌnoxxe haranga laꞌo affeexxe yaanen.” Tenne hedhotixxe barannonaaꞌn uundaanneshshanni, Mageniinka summa egeꞌna qaajeelto qalbe afeeke mannixxa hedho jijjiiratixxa jabaxxa hunna affeen.

ORGA NOꞌOXXEꞌE ANFEENNEXXA SAADINO LEELLISHA ITTIN EDIꞌAA SUNFO

11. Geedhe Yihowwaxxe orgaaꞌa saadino affeexxa leellisha dandeettaaki hittate? (Fakke uudi.)

¹¹ Geedhe Mageniinxe orgaaꞌa saadino affeexxa leellisha dandeettaaki mitti ori hoonte? Akeette Yihowwaxxe organaaꞌn uwwendaa wodda, tenneꞌe akeette xexxeꞌachchot yaansisanna hujeteꞌn hosisatiten. Fakkeennakeꞌe, insaꞌne bukkiteꞌn kuta hitta shiqinsaaxxanna gubaꞌeteꞌn hitta kadhantaaxxa calla kaddebaang, Kirsitoosika gedhebo hitta karkarsinaaxxa akeette uwwendaan. Orgatenaaꞌn uwwendaaxxa akeette hujeteꞌn hosissaaxxi geedhe, bukkiit giddo hedheeki dayyuwwinna dayyuwwa, Yihowwa insaꞌnee eyyaꞌneexxanna karkassaꞌneexxa addantaashsha assitaan.

12. (a) Akeette uwwaꞌneeke manninni mittoomik huja hasisseeki mayeete? (Ibraawiyaane 13:7, 17) (b) Akeette uwwaꞌneeki mannike eloke adabaꞌn miꞌlachcho assa hasisseeki mayeete?

¹² Geedhe akeette uutaa wodda, akeette tenneꞌe eeti hine ajajemiyyo hasissaan. Iitta assinaannexxe kaddoole, akeette uwwaake manniꞌaa huje shollexxaashsha assinannon. Maxaafi Qullichchi akeette uutaꞌneexxe geedheꞌa ajajemmannoshshanna hiremmannoshsha jajjabeessaan. (Ibraawiyaane 13:7, 17 yaansis.) Kaddoolenna, mitte mitte yanna ajajensha haꞌurtaaxxi yanna hedha dandeettaan. Mayee? Buutotinna, tenneꞌe akeette uutaꞌneexxi geedhe qullite kada gophphemmaxxeeten. Kaddomaleꞌe, eloke adaba insaꞌnekeꞌn miꞌlachcho assat irra, gonphe insaꞌnexxeꞌn miꞌlachcho assinaannole, naapha noꞌoka kiphateꞌn heꞌnennen hiyyoten. Iitta hinaanneki mayeete? Naaphi noꞌoki, Mageni orgati darreꞌn noꞌoꞌo akeekaꞌneexxa mammonnaaꞌa hasaꞌneen. Geedhetixxe gonpheꞌn miꞌlachcho assinaannole, orgatenaaꞌn dedha hansannoxxinna adde iseꞌn gonphannoxxi hexxaan. Naaphi noꞌoki haasoꞌaneeka propagaanda gargarti hiisse egenaꞌteennaa isonaaꞌn bayyatatee maa assa dandeennanno?

WELI MANNI ORGATEEꞌE AFFINEEXXA SAADINO QIIDISOꞌAA WAALDINOQQE

13. Mageniink naaphi orga isixxika summa balleessateꞌe woꞌlaancho assaꞌneeki hittate?

¹³ Mageniinki naaphuwwi orga isixxi assitaꞌneexxa eloxxa yaane, elobaaxxibaa wirri asseꞌe summa balleessateꞌe woꞌlaanaan. Fakkeennakeꞌe, Maxaafa Qullichchakenaaꞌn, Yihowwa mageneefatoole isixxi bisik, adabikinna manfasik caꞌa hitoꞌaa hasaꞌneexxa baranteennen. Isinna aadde aaga gibat battichcha oraꞌn meꞌaaki ayyinna gubaꞌe giddiiꞌn fugussemoꞌaa hasaꞌneen. (1 Qoro. 5:11-13; 6:9, 10) Noꞌonna konne Maxaafi Qullichchiinka ajaja jabaanteꞌe hordonfaannen. Kaddomaleꞌe, noꞌoꞌo moromaꞌneeki manni, weli dandeenneꞌe heꞌnaabennoshsha, welekeꞌn murteesinaanneshshannaa weliꞌaan weli jaalala anfebenno mannishsha asse summa balleesateꞌe, tenne yaane laꞌoonfatatee woꞌlaanaan.

14. Oragateꞌn haasoꞌendaꞌneexxe dhariinxe odoxxi muumme ayyeteꞌe?

¹⁴ Miidhama geesisaꞌneeki ayyete kadeexxa egeꞌne. Dhariinxe odo uduma hedheeki Seexana Daabiloositen. Isinna “dhariinke annan.” (Yoha. 8:44; Gela. 3:1-5) Tenneꞌa, Yihowwaxxe orgaꞌn haasoꞌendaꞌneexxa dhariinxa odo facaasateꞌe, Seexani kiphalluwwa isika laꞌoonfataꞌneexxi egeꞌnendeexxen. Iitta hexxeexxi yaane ketiinke dhibbeesso baroꞌni kaddeemman.

15. Addetixxi akeekisanoole, Yesuusiꞌninnaa hordofooleeyye isixxeꞌn maa assiteemma?

¹⁵ Taakkaake dhibbeesso baroꞌn, qullichchannaa manbeꞌa hujaammaka Mageniinka Belto uuddaaxxa dhara haasoonneemman. Fakkeennakeꞌe, addetixxi akeekisanoole, Yesuusi durriisa fulchatixxa hunna alfeeki ‘durriisiinke sooressanaaꞌniteni’ hinaꞌni mannakeꞌn haasoonnaamman. (Marqo. 3:22) Yesuusi murtetee shiqee wodda, addetixxi akeekisanoole Mageno yowweꞌeen hitee kuꞌliteemman, ittan isoonna shinnaashsha ardi kiphaashsha duchchiinseen. (Mat. 27:20) Udumiiꞌninna Yesuusixxi hordofooleeyye gammachchiissaaxxa odo lassitaamma wodda, insaꞌnee moromaammaki manni, “manna duchchiisati … jibinaashsha [assineexxi]” Kirsitaanekeꞌn shorrichcho geesinseen. (Huje 14:2, 19) Huje 14:2 keꞌn, hedheeka yaada uuddaaxxa Arfaasa 1, 1998 tixxi Heqqecatixxi Xellepho: “Kirsitaana moromaammaki Ayhuudooti, erga laqa giba calla kaddebaangi, Azaabe Kirsitaana jibbitaashsha assateꞌe summa balleessatika duulo duulleemman” hitee ifisaan.

16. Dhariinxa odo lanqano wodda qali hiyyo hasissaaxxi yaane maachcho?

¹⁶ Seexani keꞌitiinke dhibeesso baroꞌn soba isika waalemmabaan. Telchonna ‘butta duuchcha dedhisateꞌn hedheen’. (Leellisha. 12:9) Orga yookiin akeette uwwateꞌn hexxeexxa dayyuwwa udaaxxa, dhugaate kaddebaaxxa yaane laqqinoole, Mageniinki naaphi, Yesuusinna keꞌitiinke dhibbeesso baroꞌn hexxemmaxxa hordofooleeyye maa asseemmaxxa qalli hiyye. Maxaafi Qullichchi edise haasoꞌemmashshanni, techchixxe yannaꞌninna Yihowwake ardaꞌn , shorrichchi geyaꞌneeꞌn ittan summi insaꞌnekinna baꞌaꞌneen. (Mat. 5:11, 12) Dhariinxe odoxxa muumme egennonnole, ittan hirbangeꞌn tarikaaffe adhdhinonnole sobemmabeꞌnon. Heene tarkaaffe adhdhiyyo hasissa?

17. Dhariixxe odonni miidhenshatenaan ifi heqqedha dandeennannoki hittate? (2 Ximootwosi 1:13) (“Dhiriinxa Odo Laqqotole Maa Assitatto?” hitaꞌnexxa kulo uudi.)

¹⁷ Dhariixxe odonaaꞌn bayyatte. Hawaariya Phawuloosi dhariinxa odo lanqanno wodda, maa assiyyo hasissaaxxa eloka gorsa uwween. ‘Mitti mitti manni dhariinxe odoꞌa miꞌlachcho uwwabaashshannaa’ ‘dhariike raaganaaꞌn bayyataashsha’ Ximootwosi ajajaashsha kuleemman. (1 Ximo. 1:3, 4; 4:7) Mitte anno iseꞌe miidhacho egeꞌna gophphemmaxxee, elobaaxxa yaane buttiiꞌn aaxxe afookeꞌn uggudhdha dandeettaan. Ifi egeꞌneeki manji elobaaxxe yaane kaddeexxa egeꞌneemmaxxeeꞌe ijjenda iitta assabaan. Noꞌonna dhariinxe odoxxa muumme egenneennaxxeꞌe dhariinxe odoꞌnaaꞌn bayyantannon. Tenneꞌa irra lanqannoxxi ‘deetitte kaddeexxe barachchoxxe’ dhugaa callan.—2 Ximootwosi 1:13 yaansis.

18. Yihowwaxxe orgaaꞌa saadino anfeennexxa leellisha dandeennannoki hittate?

¹⁸ Mageniinxi orga, Yesuusika fakkeenna hordoffaꞌneeke heddo oranaaꞌn sase uundeennen. Maxaafa Qullichcha qoꞌnisinaa wodda, Yihowwaxxi orga, Yesuusika fakkeenna hordoffaꞌneeka wele oranna hubatatee woꞌlaanne. Gubaꞌe haꞌnooxxeꞌn hedheeki weli manjinna orgatee afeexxa saadino nossedhaashsha gargaarre. Ittan, Yihowwaꞌa addatenshati ergatematinnaa fedhii isixxa muuxatee laꞌoonfataꞌneexxe organni haranga shiqati, saadino affineexxa ittin ediꞌa leellisha suffe. (Faaro 37:28) Tenneꞌa, jaalaltikenna addatemeeke ardixxe kuta kadati, ulfeessemmeennexxeeꞌe duuchchinii wodda galateeffanto.