Rassa Haꞌnooxxe Kadeeke Yihowwaꞌn Addatte

1. Faaro 18:46 keꞌn, Daawiti Yihowwaꞌa maa hiyye yeꞌee?

HEꞌNAANNEKI keekantebeꞌnongi rakko noꞌoꞌni geltaꞌneexxenna hedho noꞌoxxi hexxeeshshani jijjiirendaashsha assitaaxxe haꞌuritaaxxi yaane woꞌmiteexxe buttaꞌniten. Gargaarissakee wirri hinannok Mageno Yihowwaaꞌa afa hittatta galateeffachchissaaxxe yaane! Saxxemmaxxe qoꞌneꞌn, Yihowwa hedho afeeke Mageno kadeexxanna noꞌoꞌo gargaaratee duuchchinii wodda qophphoꞌeeke kadeexxa baranteennan. Isonaaꞌn gargaarsa alfinanno wodda, gargaarsi kunni ‘Yihowwa hedho afeeke kadeexxa’ addantannoshsha assaan. (Faaro 18:46 yaansis.) Kaddomaleꞌe, Daawiti tenne yaane haasoꞌeeke hirbaꞌninni, Mageno “Rassa anxen” hiyye yeꞌeen. Daawiti hedho afeeka Yihowwaꞌa hedho affebaaxxe yaanenni fakkeesseeki mayeete?

2. Daawiti Yihowwaꞌaa ‘rassa ifixxishsha’ asse haasoꞌeeki yaadi miꞌlachcho noꞌoxxa butataꞌneeki mayeete?

² Tenne qoꞌneni, Yihowwa Rassate hiyyemeeki mayeete kaddeexxanna konne fakkeenniinke haasoꞌanaaꞌn iso uuddaaxxa maa barantannoxxa uundannon. Ittan isooꞌo Rassa noꞌoxxishsha assineꞌe uuda dandeennannoki hittate kaddeexxanna barantannon. Muuxxamakeꞌn, rassa fakkaataaka Yihowwaka adabuwwa leellisha dandeennannoka oruwwa uundannon.

YIHOWWA RASSATE HIYYEMEEKI MAYEETE?

3. Heddo yanna Maxaafi Qullichchi “rassa” hitaꞌneexxa hiyya laꞌoonfataꞌneeki hittate? (Afendaaxxa fakke uudi.)

³ Maxaafi Qullichchi giddo “rassa” hitaaxxi hiyya , Yihowwa hitta hedheeka adabuwwa afeexxa sammo noꞌoxxeꞌn fakkeessinannoshsha gargaaritaaxxe hiyyan. Tinni hiyya heddo yanna afendaaki, Mageniki qixxoomaaki hedhebaan heꞌne sandeexxe bakkaꞌnite. Taakkaa, Yihowwa “Rassaten” hiyyemeeki Zedaagimi 32:4 keꞌniten. Haanna, “Mageni noꞌokishsha hexxeexxi rassa hexxebaan” hiteen. (1 Samu. 2:2) Inbaaqoomi Yihowwaꞌaa “anxe Rassa” hiyye yeꞌeen. (Inbaq. 1:12) Faaro 73 ki borreessanjinna Mageno “qalbe anxixxe rassan” hiyyeen. (Faaro 73:26) Ittan Yihowwa ifinni rassate hiyyeen. (Isa. 44:8) Yihowwa rassa fakkaataꞌneeka sase adabuwwa leellishaꞌneeki hittate kadeexxa, ittan isoo “Rassa Noꞌoxxe” assedha dandeennannoki hittate kaddeexxa uundannon.—Zedag. 32:31.

4. Yihowwa golla kadeeki hittate? (Faaro 94:22)

⁴ Yihowwa gollaken. Jabaxxi hobonbalte kexxaa wodda, mitti manji lumoxxe rassa hunda mare gollatammashshanni, Yihowwa hedho noꞌoxxeꞌn haꞌuritaaxxi yaane geltaa wodda noꞌoo gollaan. (Faaro 94:22 yaansis.) Isi nageꞌiki heꞌnannoshshanna uurrichcho affebaaxxi rakko noꞌon geltabaashsha heqqaan. Ittan isi ediꞌaa: Nageꞌanna fayyunte noꞌoxxa rakkoteꞌn ibissaaxxa heene yaanenna balleessateꞌe kako aageen.—Hizi. 34:25, 26.

5. Yihowwa rassatishsha golla noꞌoke kada dandeꞌaaki hittate?

⁵ Yihowwaaꞌa noꞌoke rassatike Golla assedha dandeennannoki mitti ori kadhatiten. Yihowwabaa kadhantanno wodda, qalbenna sammo noꞌoxxa heqqaaka “Mageniinka nageꞌa” noꞌaa uuwwaan. (Filph. 4:6, 7) Addetixxe buutonaaꞌn kexxeexxa usuremeeke Ariteemi hiyyemaake mitte dayyixxa hedhotixxa baranno uundo. Mitti hunnaameesi poolisichchi gaddachchatinna salphisat wonjaliinxa qoꞌne assaamman. “Kunni qoꞌnsanjinna aneꞌe yeꞌaammaxxa yanna yoꞌoshsha yaadaannan. . . . Duuchchinii wodda Yihowwabaa kadhaataannan. Aniꞌaa qalbetika nageꞌanna beekkuma uwwaashsha kadhataannan” hiyyeen. “Konne qoꞌnsalki qoꞌnetik mali aneꞌni hujebaan. . . . Yihowwake gargaarisinni, mitte lumoke kinji uduma gollateennechcho aneꞌn fakkaattaamman.”

6. Duuchchinii wodda Yihowwaꞌn addantaanneki mayeete? (Isayaasi 26:3, 4)

⁶ Yihowwa addatemeeken. Yihowwa noꞌaa duuchchinii wodda, leꞌmitaammabaaxxe rassashshaten. Isi “bari bariinxe Rassa” kademmaxxeꞌe isoꞌn addata dandeennannon. (Isayaasi 26:3, 4 yaansis.) Isi kako aageexxa muuxatee, kadha noꞌoxxa laqateenna noꞌoꞌo gargaaratee duuchchinii wodda hedhaꞌneeken. Yihowwa isiꞌaa ergatemaꞌneeke manniꞌaa addatemeeke kademmaxxeꞌe isoꞌn irkata dandeennannon. (2 Samu. 22:26) Noꞌo isiꞌaa assineennaxxa yaane ijjenda dedha gophaammaxxeꞌe noꞌoo eebbisaan.—Ibra. 6:10; 11:6.

7. Yihowwaꞌn addantanno wodda maa kandano? (Fakke uudi.)

⁷ Yihowwaaꞌa Rassa noꞌoxxa asseꞌnannoki, qalbe woꞌmanni isoꞌn addantanno woddan. Haꞌuritaaxxe yannaꞌninna isiꞌaa ajajema, noꞌaa laꞌo affeexxe yaane kaddeexxa addantaannen. (Isa. 48:17, 18) Isika gargaarsa uundanno wodda isoꞌn anfeennexxi adde nophphitaꞌn meꞌitaan. Okkooꞌn rakko noꞌon gelteexxenaaꞌn noꞌoo fulcha dandeꞌaaki, Yihowwa calla kadeexxa addatati rakkoteꞌn jabaante ossatee qophpheeffantannon. Rakkoteꞌn heꞌneeꞌna noꞌoꞌo gargaaraaka manjo gophphannoxxa yannanna midde, Yihowwa addatemeeke kadeexxa konkannon. Viladmiiri iitta hiyyeen “Usurriinke mineꞌn hedhennaxxa yanna Yihowwan welt jabaxxa jaalunte afeennan. Qofitti hedhaannaxxeenna hunna anxi iimi darre hedheeke jeeji giddo hedhaannaxxeꞌe, Yihowwaꞌn addata hasissaaxxa barateennen.”

8. (a) Yihowwa jijjiiremabaan hinaanneki mayeete? (b) Mageno Rassa noꞌoxxishsha assedha noꞌaa laꞌo affeeki hittate? (Faaro 62:6, 7)

⁸ Yihowwa jijjiiremabaan. Mitte lumoxxe rassashsha, Yihowwa jijjiiremabaakenna leleꞌmabaaken. Ayyunte isixxinna yaadi isiki jijjiiremaakebaan. (Milki. 3:6) Edeni Gennete giddo Addaaminna Heewani isoꞌn jallanteexxa yanna Yihowwa manjii beltiꞌa afeeka yaada jijjiirebaan. Hawaariya Phawuloosi hiyye borreessenshani, Yihowwa “ifi waakkata dandeꞌabaan.” (2 Ximo. 2:13) Iittayyo kinni, hiini yaanenna kaddoole yookiin manji eeyyeexxa yaanenna assoole, Yihowwa adaba isikenaaꞌn, yaada isikenaaꞌn yookiin fulcheeke seeranaaꞌn ijjenda mishikki hiyyabaan hiyyoten. Jijjiiremabaake Mageno noꞌokeꞌn anfeennexxe addenaaꞌn kexxeexxa fayyateenna rakkotixxa yanna gargaarsa isoꞌnaaꞌn alfatee, isibaa wirri hiyya dandeennannon.—Faaro 62:6, 7 yaansis.

9. Tayitaanaxxe hedhotixxe barannonaaꞌn maa barachcho alfiteete?

⁹ Ayyunte isixxeꞌn miꞌachcho assatinna isi manjiinke beltiꞌaa afeeka jijjiiremabaaka yaada sammo noꞌoxxeꞌn shiqise uudat, Yihowwaꞌa Rassa noꞌoxxe asseꞌne uuda dandeennannon. Iitta assinaannexxe kaddoole, rakko noꞌoꞌn geltaa wodda, raankinabeꞌnoke manjo kandannoshsha gargaartaan. (Faaro 16:8) Addetixxe buutonaaꞌn kexxeexxa usurendeemmaxxa Tayitaana hiyyendaaxxe dayyoꞌn tinni yaane dhugaate kaddeexxa leelliteꞌen. Isenna iitta hiteen “Okonne wodda qofitti hedhennan, keꞌitokeꞌn tinni yaane haꞌuriteemman. Addenna woxeennan.” Kaddomaleꞌe, rakko iseꞌn gelteexxa Yihowwanninnaa herrega isikinni qixxeesiteꞌe uuddaa wodda, rakkoteꞌn ossiteen, ittan yaadikinna jabaatteen. Lebbeexxi iitta hiteen: “Tinni yaane kaddaꞌneeki mayeete kaddeexxa egeꞌnanno wodda, tenne rakko giddo eꞌyenneki, Yihowwaa hiyyeete kaddeexxa qalli hiyyannoshsha assiteen. Tinninna ifixxa yaane calla heda uurrisannoshsha gargaarteen.”

10. Yihowwa taꞌa Rassa noꞌoxxe kada dandeꞌaaki hittate?

¹⁰ Shiqoxxe yannaꞌn haꞌurtaaxxi yaane noꞌoꞌn geltaan. Tenneꞌaa edi irran caala Yihowwaꞌn addata hasissaan. Tinni yanna Yihowwa isiꞌaa addatemmeꞌe ossinannoshsha, hasisaaka hoone gargaarsanna noꞌaa assaaxxa anfeennexxa adde jebeesseꞌnannoxxen. Iitta assa dandeennannoki hittate? Maxaafi Qullichchiinka raaganna, baro noꞌokenni hexxeexxe Yihowwaxxe Naqaasheka hedhotika raaga yaansisatiten. Mageni ergantooleeyye isixxa gargaaratee rassati fakkaateeka adabuwwa isika leellisheeki hittate kaddeexxa hubatte. Konne raaguwwa uuddaaxxa adda hedde. Iitta assa haꞌnooxxi, Yihowwaaꞌa Rassa haꞌnooxxe assexxinaashsha gargaartaan.

YIHOWWAKA RASSA FAKKAATEEKA ADABUWWA LEELLISHE

11. Yihowwaka rassa fakkaateeka adabuwwa leellisha hansaanneki mayeete? (“Labbaxxe Dargaggeeyye Dayyuwwiꞌaa Kadaaka Herrega” hitaꞌneexxa kollo uudi.)

¹¹ Yihowwa rassa fakkaateeka adabuwwa isika leellishaꞌneeki hittate kaddeexxa egeꞌniyyo hasissaan. Rassat fakkaateeka adabuwwa isika, leellisha dandeennannok hittate kaddeexxa uundo. Iitta assinaaxxe kaddoole, gubaꞌe jabeessateꞌe qophpheeffanteenneke manna kada dandeennannon. Fakkeennakeꞌe, Yesuusi, Simooniꞌa Kefa (“Pheexiroosi” hiyyoten) hiyyaꞌneeka summa fulcheen, tikatinna “Shiixxooxxa Rassa” hiyyoten. (Yoha. 1:42) Tinni hiyyanna isi gubaꞌe giddo dayyessatixxenna ititeꞌe hedhaaxxa muumme kadaaxxa leellishshaaxxen. Gubaꞌetixxi geedhe “lumoxxe rassake gaaddisishsha” kaddeexxa kulendeen. Kunni fakkeenni, insaꞌne gubaꞌe giddo hedheeka manna heqinaa qico leellishaaken. (Isa. 32:2) Dhugaaten, gubaꞌe giddo afendaaxxi duuchchiniinxi dayyuwwa laꞌo alfitaaki, rassati fakkaateeka Yihowwaka adaba leellishshaa woddan.—Effe. 5:1.

12. Welekeꞌe golla kada dandeennannoki hoone oruwwinnite kaddeexxa ifisse.

¹² Gollake kadde. Mitte mitte wodda dayyuwwa noꞌoxxeꞌn dadumiinxi bala, weliꞌaan weliki loli, yookiin bagedi hedhaaxxa yanna gollake kandannoxxi hexxaan. Tenne ‘muuxamiinxe barruwwaki’ jeeji haranga yoꞌaꞌni meꞌeexxe qixxeꞌn, welekeꞌe gargaarsa assinannoxxa futtii alfinannoxxi mama affeexxebaan. (2 Ximo. 3:1) Ittan, dayyuwwa noꞌoxxeꞌe irriinkanna manfasiinka gargaarsa assa dandeennannon. Iitta assa dandeennannok mitti ori, bukkiitike galmibaa dangaa wodda eebbake hufuurinni adhdhatinna gubaꞌe manji hafuura adhdhaaxxe bakka assatiten. Heꞌnaanneki jaalala qiiddeexxeꞌninna fuggoxxi yaane woꞌmiteexxe buttaꞌniten. Tennexxeꞌe, dayyuwwa bukki daggaa wodda, insaꞌnee eenaannexxa leellishatee, hafuura adhdhinaashshanna, itintaashsha assatee dandeennennexxa yaane duuchcha assa hansaannen.

13. Giddiiꞌninni geedhe welekeꞌe gollake kada dandeettaaki hittate? (Fakke uudi.)

¹³ Geedhe additte hobonbalte yookiin fakkeenniinxi hobonbalte geleteꞌnaa, gubaꞌe giddo jabaate ossateꞌni hedheeke manniꞌaa gollake kada dandeettaan. Bala geltaa wodda yookiin muddansitaaxxi dhibo dayyuwwateꞌn geltaa wodda, geedhe edisseen hasisaaka gargaarsa assatee qophphe assitaan. Iittan manfasikinna jajjabeessitaan. Mitti geerch shaqqunteti, rakko weliinxa ifixxishsha asse uudat, ittan caqasatee fedhiitike kadati egeꞌnemeeke kadoole, dayyuwwa isibaa shiqqaan. Iitta hedheeki adabuwwi geedhe insaꞌnee eetaꞌneexxa insaꞌneꞌn laqendaashsha assaan. Tennenaaꞌn kexxeexxa, geedhe Maxaafa Qullichchakeꞌn hundeesendeexxa akeette uutaa wodda hujeteꞌn hosisa insaꞌneꞌni haꞌuritabaan.—1 Tese. 2:7, 8, 11.

14. Addatemmeenneke manna kandeennexxa leellisha dandeennannoki hittate?

¹⁴ Addatemmeenneke kada. Weli manni, giddiiꞌniꞌni rakko geltaaxxa yanna noꞌoni irkantaake manna kandonnaa hansaannen. (Fakke. 17:17) Addatemmeenneke manna kadatika summa afa dandeennannoki hittate? Duuchchinii wodda Mageniikika adabuwwa afatee jabaxxa woꞌlaancho assatiten, kunniirinna: kako aangennexxa heqqedhanna yanna hinennexxa ulfeessateꞌe dandeennennexxa duuchcha assaten. (Mat. 5:37) Ittan gargaarsi hasisaa wodda hasisaaka gargaarsa assatiten. Ittin lebendaaxxa, mitte huje uwwendeexxe akeettexxe hundaayyeꞌni hunjaannexxa kokeessatiten.

15. Geedhe addatendeexxe kadda wodda, gubaꞌe laꞌo alfitaaki hittate?

¹⁵ Addatendeexxi geedhe gubaꞌete laꞌo affeen. Hitta? Baꞌlisanoole ergatenshatixxe golloke iimike toꞌatalluwwiishsha, hexxeexxe geedhenni sholla qicin afendaꞌneexxe kaddoole, geedhe insaꞌnee gargaartaꞌneechcho fakkaattaan. Baꞌlisanoole geedhe insaꞌnee gargaaratee fedhiitixxe kaddeexxa egendaa wodda, geedhe insaꞌnee eetaꞌnexxa insaꞌnenni laqendaan. Ittan geedhe uutaꞌneeki gorsi ifike yaadaꞌnite kadebaangi Maxaafa Qullichchakeꞌninna addatemeekinna wodantichchi garbichchi qophpheessaꞌneexxe borreesiluwwaꞌn hundeessemeeke kadoole addetiki jaaluwwi insaꞌnee addataan. Mitti geerchi maqo dayyuwwatixxa welekeꞌn haasoꞌa gophaneekenna hiyyeexxa yaane muuxaꞌneeke kadoole, tinni dayyuwwa isooꞌo addattaashsha assitaaxxe wele buuton.

16. Jijjiiremmabeꞌnoke kadda noꞌaanna weleke laꞌo affeeki hittate?

¹⁶ Jijjiiremmabeꞌnoke kada. Toggitte yaaneꞌa anfeennexxi uushsho, jijjiirendaꞌneexxe kada gophphaa woddanna asseꞌnaannexxi murte, Maxaafi Qullichchiinke hundaayyetike seraꞌn hundeessendeexxe kaddaa wodda wele manjiꞌaa eloke fakkeenna kandannon. Addennaa dhugaatixxi egeꞌna noꞌoxxi nophphitaꞌn meꞌitaashshanni dhugaatike oraꞌni jabaante uurrinannoke manjo kandannon. Erqenna kayya daanqabeꞌnoke, hafarsemabeꞌnoke, yookiin sholla qicoꞌn dhariinxe barachchonninna buttatixxe hedinonni sobemmabeꞌnoke manna kandannon. (Effe. 4:14; Yaꞌiqo. 1:6-8) Yihowwaꞌninna isi uwweeke tasfaꞌn anfeenexxi adde, mike ifixxa heqqeꞌnannoshsha assitaan. (Faaro 112:7, 8) Ittan, hega uushshso gelteexxa dayyuwwa gargaara dandeennannon.—1 Tese. 3:2, 3.

17. Geedhe ititati weleke fakkeenna kada dandeettaashsha gargaartaaxxi yaane maachcho?

¹⁷ Geedhe galdumiki miketixxe, fayyaxxa hedino affeexxe, salaliinxenna yaane baꞌlisse uuddaaxxe kadiyyo hasissaan. Iitta hedheeki manji welinna ititeꞌe hedhaashsha assatinnaa ‘addatendeexxa qaale jabaate hordofati’ gubaꞌe jabeessat fakkeenna kadaan. (Tiito 1:9; 1 Ximo. 3:1-3) Geedhetiki fakkeenninna alalatixxe hujenni assinaꞌneexxi yaane, gubaꞌe giddo hexxeexxi baꞌlisanoole duuchchinii wodda bukkiiteꞌn afendaashsha, ergachcho fuldaashshanna ifixxa qoꞌne assitaashsha gargaartaan. Dayyuwwikinna dayyuwwa rakkisaake jeeji giddo hexxaaxxa yanna Yihowwaꞌninna yaada isikeꞌn miꞌlachcho assitaashsha geedhe jajjabeessat heddo yaane assa dandeettaan.

18. Yihowwa jajateenna edi irran caala isibaa shiqatee hansaanneki mayeete? (“Yihowwabaa Shinqannoshsha Gargaaraaka Ora” hitaꞌneexxa kollo uudi.)

¹⁸ Yihowwaka manbeꞌa assaaka adaba egennennechchi uduma, Mootichchi Daawiti: “Rassa anxe kadeeki Yihowwa jajemowwaal” hiyyemmashsha noꞌonna hiyya dandeennannon. (Faaro 144:1) Yihowwa duuchchinii wodda addatemeeke Magenon. Hedho noꞌoxxike baro duuchchaꞌni ittan, cimotixxe yannaꞌinna kaddoole, manfasiinxe hedhonni nophphinaꞌn menannoshsha duuchchinii wodda Yihowwa noꞌoo gargaaraaxxa addatati, “Isi Rassa anxen” hine haasoonnannoshsha assitaaxxi buuto hexxeen.—Faaro 92:14, 15.