Maxaafi Qullichchiinxi Barattoole Dhugaatike Oraꞌni Jabaattaashsha gargaarre

1-2. (a) Mitte mitte Maxaafi Qullichchiinxi barattoole dhugaateꞌni jabaatateꞌe tarkaaffe adhdha hooddaꞌneeki mayeete? (b) Tenne qoꞌneꞌni mariꞌantaannexxi yaanuwwa maachcho?

YIHOWWAXXE Naqaashe kaddabexxoshsha atee sodaachchisseemmaxxi yaane hexxemmaꞌa? Dedha atinni hujaꞌneeki manni, jaaluwwinna mini hadi atiki atee moromaaxxeꞌe sodaateettaxxi hexxaan. Yookiin ‘Seera Mageniinka saꞌe cubbo hujunnuu?’ hite sodaateettaxxinna hedha dandeettaan. Ati iitta sodaattoottole, Maxaafi Qullichchiinxi barattoole tarkaaffe adhdhite Yihowwaxxe Naqaashe kadateꞌe hoodaꞌneeki mayeete kaddeexxa egeꞌna dandeettatton.

² Yesuusi iitta hexxeexxi sodaꞌa mitti manji manfasiinxe hedhonni nophphabaashsha solla qicini kuttaaxxa haasoꞌeen. (Mat. 13:20-22) Kaddoolenna, Yesuusi isoo hordofateꞌe hoodaꞌneeke mannaꞌni adde woxeemmabaan. Tenne irra hordofooleeyye isixxi iitta hedheeki manni (1) nophphinjokee gufo kaddeexxa yaane foye egeꞌnaashsha (2) Yihowwaa afeexxa jaalala jabeessedhaashsha (3) hedho insaꞌnexxeꞌni Yihowwaa edinsaashshanna (4) hega uushsho injifataashsha gargaartaaki hittate kaddeexxa leellisheen. Baro Baro Gammadiki Hedhi! hiyyaꞌneeka maxaafa laꞌoonfantennexxi, Maxaafi Qullichchiinxi barattoole dhugaatike oraꞌni meꞌitaashshanna tarkaaffe adhdhitaashsha gargaarateꞌe, Yesuusi hordofooleeyye isixxeꞌe haasoꞌeexxa yaane hujeteꞌni hosinsannoki hittate?

NOPHPHINJOKEE GUFO KADDEEXXA YAANE FOONE EGENNAASHSHA GARGAARRE

3. Niqodimoosi Yesuusike hordofeessa kadabaashsha gufo kaddaaxxi yaane maachcho kada dandeetta?

³ Niqodimoosi lumoxxa bakka afeemmake Ayhuudotiinke akeekisanjon, tinni yaane Yesuusike hordofeessa kadabaashsha gufo kaddeen. Yesuusi ergatensha saffeeke jaane agenji uduma, Niqodimoosi Yesuusiꞌi, Mageni ergeeꞌnaa dageeke kadeexxa addateen. (Yoh. 3:1, 2) Kaddomaleꞌe, “Ayihuudota sodaantaammaxxeꞌe” Niqodimoosi Yesuusinni afemaammaki shoꞌomaꞌnitemman. (Yoh. 7:13; 12:42) Isi Yesuusike hordofeessa kadoole heddo yaane gophaaxxa heda gopheebaan.a

4. Yesuusi, Niqodimoosii Mageni isonaaꞌni hasaꞌneexxi yaane maachcho kaddeexxa hubataashsha gargaareeki hittate?

⁴ Niqodimoosi Mageni Israꞌeelootakee uwweeka seera egeꞌneeke manjomman. Kaddomaleꞌe, Mageni isonaaꞌni hasaꞌneexxi yaane maachcho kaddeexxa hubataashsha gargaarsi isiꞌaa hasisaamman. Yesuusi isoo gargaareeki hittate? Yesuusi hashshatenna kaddoole Niqodimoosii yanna uwwee barsiisaamman. Yesuusi, Niqodimoosii hordofeessa isike kadateꞌe: cubbo hujeexxee aadde aaga, wodeꞌekeꞌni cuuphemanna Mageniinke Beltoꞌni adde afeexxa leellishsha hasissaaxxa caꞌa assee kuleen.—Yoh. 3:5, 14-21.

5. Maxaafa Qullichcha barataꞌneeki manji nophphinjokeꞌe isoꞌni gufo kaddeexxa yaane egeꞌnaashsha gargaarrannoki hittate?

⁵ Maxaafa Qullichcha barataꞌneeki manji xiqsuwwa elo qicinni hubataꞌnoolenna, nophphinjokee isoꞌni gufo kaddeexxa yaane foye egeꞌnaashsha gargaarsi hasissaaxxi hexxaan. Huje yookiin mini hadixxi moronsha, manfasiinxe hedhoke herregaꞌni geyabaasha isoo udumiꞌaa harkissaaxxi hexxaan. Tenneꞌaa atinna, barsiissaatteka manjo yanna uuteꞌe Yesuusishsha gargaari. Fakkeennakeꞌe, buno welti haꞌwitinaꞌni yookiin mammarendinaꞌni geeba dandeettinaan. Tinni yaanuwwa, isoꞌni haꞌurtaꞌneexxi yaane maachcho kaddeexxa egendattoshsha ora atiꞌaa bandaaxxi hexxaan. Kunni manji atee gammachchiisateete kaddebaangi, Yihowwaa afeexxa jaalala leellishateꞌe hasissaaxxa jijjiirra assaashsha jajjabeessi.

6. Maxaafa Qullichcha barsiissaateki manji, sodaatebaangi dhugaatike oraꞌni uurrateꞌe tarkaaffe adhdhaashsha gargaartattoki hittate? (1 Qorontoosi 16:13)

⁶ Maxaafa Qullichcha barataꞌneeki manji Mageniinke seerishsha hedhaashsha Yihowwa gargaaraaxxa egeꞌna, barateexxa yaane sodaꞌa belo hujeteꞌni hosisaashsha assitaan. (1 Qorontoosi 16:13 yaansis.) Ati assitattoxxa yaane mitti barachchotike miniki barsiisanji assaaxxe yaanenni fakkeessa dandeettatton. Barachchotike mineꞌni atee barsiiseeka barachchiisanjuwwi giddiiꞌni yoꞌoshsha eetaattaki hitta hedhee barsiisanjo? Dedha ifixxe dandeetteꞌni addattattoshsha ossunteti gargaareeke barsiisanjo kada dandeꞌaan. Weli fakkaattaanxa, eloke Maxaafi Qullichchiinke barsiisanjo hiyyeemaaki manji Mageni maa asinonnaa hasaꞌneexxa barsiisaake calla kadebaangi, Maxaafa Qullichcha barataꞌneeki manji hedho ifixxeꞌni hasissaaxxa jijjiirra assaashsha, Yihowwa gargaaraaxxa egeꞌnaashsha kokeessaaken. Iitta assa dandeettattoki hittate?

YIHOWWAA ANFEEXXA JAALALA JABEESSEꞌNAASHSHA GARGAARRE

7. Yesuusi isoo caqasaammaki manni Yihowwaa afeexxa jaalala jabeessedhaashsha gargaareeki hittate?

⁷ Yesuusi, hordofooleeyye isixxi Magenokee affeexxi jaalala baratteexxa yaane hujeteꞌni hosissaashsha tirtirsitaaxxa egeꞌneemman. Isi heddo yanna hordofooleeyye isixxeꞌe barsiisaammaxxi yaane iimatike Anna insaꞌnekee anfeexxi jaalala nophphitaashsha assitaaxxemman. Fakkennakeꞌe, Yihowwaaꞌa oose isixxeꞌe eloxxa yaane uwwaake anninni fakkeesseen. (Mat. 7:9-11) Yesuusii caqasaamake manni giddo iitta hedheeka jaalaltichcha anna afebaaki hedha dandeꞌaan. Annakeꞌni jallateꞌe meꞌeemmaki belti hige dagee wodda adhdheeke jaalaltichchi annika fakkeenna, Yesuusi haasoꞌeexxa yanna konne mannaꞌni maachchi laqemaaxxa hedde. Yesuusi kinni, Yihowwa insaꞌnee yoꞌoshsha eeyyaꞌneexxanna insaꞌnee gargaaroꞌaa hasaꞌneexxa egennaashsha asseen.—Luq. 15:20-24.

8. Maxaafa Qullichcha barsiissaatteki manji Yihowwaa afeexxa jaalala jabeessedhaashsha gargaartattoki hittate?

⁸ Atinna barsiissatto wodda Yihowwake adabuwwaꞌni miꞌlachcho assati. Barsiissaatteki manji Yihowwaa afeexxa jaalala jabeessedhaashsha gargaara dandeettatton. Barsiissattoxxa yanna duuchcha, barataꞌneexxi yaane Yihowwaxxe jaalalanni welt abidendaaki hittate kaddeexxa hubataashsha gargaari. Wodoteꞌni mariꞌattinaaxxa yanna, Yihowwa tennee uwwa uwweeki isoo eeyyaꞌneexxeete kaddeexxa egeꞌnaashsha assi. (Rom. 5:8; 1 Yo. 4:10) Maxaafa Qullichcha barataꞌneeki manji Yihowwa isoo hittee qico eeyyaꞌneexxa egeꞌnaa wodda isinna edi irran caala Yihowwaa eeyyaꞌni meꞌaan.—Gel. 2:20.

9. Mikaꞌeelii jijjiremaashsha gargaarteexxi yaane maachcho?

⁹ Indoneezhiya hedhaꞌneeke Mikaꞌeelika fakkeenna uundo. Isi oosumandenaaꞌninni dhugaa egeꞌneexxe kaddoolenna cuuphemeemmabaan. Isinna 18 wogga geyeexxi lumolla kaamole oofateꞌe gadhike bogibaa meꞌeen. Udumiiꞌni aadheexxi Indoneezhiyi giddo maate isixxa waaleexxi gadhike bogaꞌni huja ittin sufeen. Ettene yanna miniinxi amanna belto isixxi Maxaafa Qullichcha barata sanfeꞌe manfasiinxe hedhonni nophphateꞌni heꞌnemman. Mikaꞌeeli, ama isixxi rerteechchi uduma anna isika karkarsateꞌe hadiꞌaa higeexxi Maxaafa Qullichcha barata safeen. Baro Baro Gammadiki Hedhi! hiyyaꞌneeke maxaafaꞌni hafuura adhdha 27 keꞌni “Baꞌlaxxa Qoꞌne” hitaꞌneexxi kuta Mikaꞌeelixxa qalbe tuqqeemman. Yihowwa Belto Isika geebbe geerrarraaꞌnaa uudaa wodda hittee qico yaadaaxxa hedeexxi, Mikaꞌeeli oodhishsha safeen. Wodotee afeexxi saadino nophphiteen, meꞌinjo isikeꞌni jijjiirra asseexxi muuxamakeꞌni cuupheemeen.

HEDHO INSAꞌNEXXEꞌNI YIHOWWAA EDINSAASHSHA GARGAARRE

10. Yesuusi keꞌitiinxi hordofeeleeyye isixxi hedho insaꞌnexxeꞌni Yihowwaa edissaashsha gargaareeki hittate? (Luqqaasi 5:5-11) (Faakketanna uudi.)

¹⁰ Keꞌitiinxi Yesuusixxi hordofooleeyye isi Mesihchoke kadeexxa hirbangeꞌni egendeemman, kaddoolenna ergatenshatixxa huje hedho insaꞌnexxeꞌni edinsaashsha gargaarsi hasisaamman. Yesuusi, Pheexiroosinna Indiriyaasi woꞌma yanna isoo hordonfaashsha yeꞌeexxa yanna, insaꞌne edonni hordofoole isixxemman. (Mat. 4:18, 19) Ettene yanna insaꞌne Yaꞌiqoobinninna Yohaannisinni mitteba hingeexxi eloka maallaqa afissaaxxe qulxuꞌme daddalatixxe hujeꞌni heꞌnemman. (Mar. 1:16-20) Pheexiroosinna Indiriyaasi, Yesuusii hordofateꞌe hine ‘marabe insaꞌnexxa waalexxa’ yanna isoo hordonfaꞌninni mini hado insaꞌnekee hasissaaxxa yaane qophpheessinaaki hittate kaddeexxa heda gonpheebaan. Hedho insaꞌnexxeꞌni lumoxxa bakka uunaammaxxa yaane waalleꞌe Yesuusii hordonfeeki mayeete? Luqaasixxi Wengeele, Yihowwa insaꞌnaa hasissaaxxa yaane qophpheessatixxa dandeette afeexxa addantaashsha assitaaxxa maso Yesuusi hujeexxa haasoottaan.—Luqqaasi 5:5-11 yaansis.

11. Maxaafa Qullichcha barsiinsaanneke manjixxa adde jabeessateꞌe ifixxa hedhotixxa baranno laꞌoofantannoki hittate?

¹¹ Noꞌo Yesuusishsha maso hujatixxa dandeette anfeeꞌnon, kaddomaleꞌe, hedho ifixxeꞌni Yihowwaa edisaaka manjo isi hitta gargaaraaxxa leellishshaaxxa hedhotixxa baranno kula dandeennannon. Fakkennakeꞌe, gubaꞌe mara saffettexxa yanna Yihowwa atee hittee qico gargaareexxa qalli hitaatte? Dedha hujetike sooreessa atikeꞌni hujetixxe saate uduma hunjaaxxi huje gubaꞌetixxe saatenni afendaꞌnoole konnechchinni udmiꞌaa hujjabexxoxxa haasooteettexxi hexxaan. Hedhotixxa baranno barsiissaatteke manjoꞌni haasottatto wodda hedho atixxeꞌni mageneeffachcho isixxa edisateꞌe murteessexxeettexxa murte, Yihowwa eebbiseexxa uuda adde atixxa jabeessiteeki hittate kaddeexxa ifisi.

12. (a) Mitte manjo Maxaafa Qullichcha barsiinsanno wodda gargariti hexxeexxe dayyuwwanni barsiisa hasisseeki mayeete? (b) Barsiisateꞌe viidiyuwwa elo-garinni laꞌoonfattattoki hittate? Fakkeenniki kuli.

¹² Wele dayyuwwa hedho ifixxeꞌni Yihowwaa edisateꞌe maa jijjiirra assiteexxa haasoottaaxxi yaane Maxaafa Qullichcha barsiissaatteke manjiꞌaa laꞌo affeen. Tenneꞌaa barsiissatto wodda gargariti hedhee orinni nophphiteexxe dayyuwwanni welti barsiis. Tinni dayyuwwa dhugaatibaa hitta daggeexxanna Yihowwaxxa ergatenshatixxa huje hedho insaꞌnexxeꞌni edisateꞌe maa assiteexxa haasoottaashsha qori. Ittan lebendaaxxa barsiissatto wodda Baro Baro Gammadiki Hedhi! hiyyaꞌneeke maxaafaꞌni “Baꞌlaxxa Qoꞌne” yookiin “Firfirsi” hitaꞌneexxe kutaꞌni hexxeexxa viidiyuwwa welti uudde. Fakkeennakeꞌe, hafuura adhdha 37 keꞌni mariꞌatinaa wodda Yihowwa Noꞌaa Hasissaaxxa Yaanuwwa Qophpheessaan hitaꞌneexxe viidiyoꞌni kuleemeeke hundaayyeteke seeruwwaꞌni miꞌlachcho assa dandeettinaan.

HEGA UUSHSHO INJIFANTAASHSHA GARGAARRE

13. Yesuusi hordofooleeyye isixxa moronsha kexxaa woddaa qophpheesseeki hittate?

¹³ Yesuusi hordofooleeyye isixxeꞌni wele manni darreeꞌni yookiin hado insaꞌnegenaaꞌninni moronsha kexxaaxxa higge-higgeen haasoꞌaamman. (Mat. 5:11; 10:22, 36) Yesuusi reyebaangi shiixxooxxe yanna edi darre, hordofooleeyye isixxa shiya dandeennaaxxa xexxeꞌachchiiseemman. (Mat. 24:9; Yoh. 15:20; 16:2) Mageniinxa Mootumma lassinaaxxa yanna xexxeꞌantaashshanna gorseen. Insaꞌnee moromaꞌneeka manna maliki abindaashshanna lassatixxa huje ittin sufateꞌe qalbaameeyye kandaashsha xexxeꞌachchiiseen.

14. Maxaafa Qullichcha barsiinsaanneka manjo moronsha kexxaa woddaa qophpheessinannoki hittate? (2 Ximootwosi 3:12)

¹⁴ Maxaafa Qullichcha barsiinsaanneka manjo insaꞌnenni hujaaki manni, jaaluwwinna hadi insaꞌneki maa hiyya dandeꞌaaxxa kulati moronsha kexxaa woddiꞌaa qophpheessa dandeennannon. (2 Ximootwosi 3:12 yaansis.) Insaꞌnenni hujaꞌneeki manni konne haarooke hedhotike orixxe buutonni insaꞌnee cooraaxxi hexxaan. Weli manni ittan hadi insaꞌneki Maxaafa Qullichchakeꞌni hundeessendeexxa adde insaꞌnexxa tuffataaxxi hexxeen. Hundanni Maxaafi Qullichchiinxa barattoole qophpheessinaannole moronsha kexxaa woddiꞌaa elo qicinni qophpeefanteeke kandaan.

15. Mitte Maxaafa Qullichcha barataꞌneeke manjoꞌni mini giddiiꞌni moronsha kexxaa wodda dandeꞌe hedhaashsha gargaartaaxxi yaane maachcho?

¹⁵ Ati barsiissaatteke manjoꞌni mini giddiiꞌni moronsha kexxaa wodda hadi isiki isoꞌni aaraꞌneeki mayeete kaddeexxa hedaashsha jajjabeessi. Insaꞌne aarraꞌneeki isoo sonbeechcho fakkaattammaxxeꞌe yookiin Yihowwaxxa Naqaashe tola jibbinammaxxeete kada dandeettaan. Matanga Yesuusiinni hadi isiki tuffataamman (Mar. 3:21; Yoh. 7:5) Barsiissaatteki manji wele manjo ittan mini hado isika ossuntetinna maliki abidaashsha barsiisi.

16. Maxaafa Qullichcha barsiinsaanneki manji barateexxa yaane maliki welekee kulaashsha gargaara dandeennannoki hittate?

¹⁶ Matanga hadi isiki dhugaa egeꞌnatee hasaa wodda egeꞌneexxa yaane duuchcha mittenba kula gopha eloxxen. Barateexxa yaane duuchcha obaasaꞌneexxe kaddoole, laqaꞌneeke manjoꞌni gargaadhdhateꞌe haꞌurtaaxxinna wele wodda mariꞌatateꞌe jigi-giji hiyyaaxxi hexxaan. Tenneꞌaa barsiissaateki manji, addataꞌneexxa yaane welekee kulaa wodda ikki manji wele woddanna laqatixxa halcha afaashsha assaake garinni kulaashsha jajjabeessi. (Qol. 4:6) Yookiin jw.org hiyyendaaxxa noꞌoxxa websayite hado isikee leellishshanna dandeꞌaan. Iitta hexxeexxa yaane assa insaꞌne Yihowwaxxa Naqaashe uuddaaxxa mitte mitte yaane ifiꞌaani egennaashsha assitaan.

17. Barsiissaatteki manji Yihowwaxxa Naqaashe uuddaaxxa manni haasoꞌaꞌneexxe seeri beloxxe yaaneꞌaa hiissichcho uwwaashsha leenjissattoki hittate? (Fakketanna uudi.)

¹⁷ Maxaafa Qullichcha barsiissaatteki manji, hadi isiki yookiin isinni hujaꞌneeki manni qoraake qortumuwwaaꞌa sholla qicinni hiissichcho hiissaashsha gargaarateꞌe jw.orgteꞌni “Heddole Qorraaka Qortumuwwa” hiyyaꞌneeka aanchi aanchi fulaaka yaada laꞌoonfata dandeettatton. (2 Xi. 2:24, 25) Baro Baro Gammadiki Hedhi! hiyyaꞌneeke maxaafaꞌni, duuchchiinge hafuura adhdhaꞌni “Mitti Mitti Manni Iitta Hiyyaan” hitaꞌneexxe kutaꞌni mariꞌatte. Barsiissaatteki manji ifixxe hiyyanni hiissichcho hiissaashsha jajjabeessi. Addataꞌneexxa yaane elo-qicinni welekee kulaaki hittate kaddeexxa yaada uwwatee hooddoxxe. Iitta hexxeexxi leenjo isi adde ifixxeꞌe mitte sodaꞌa belo uurraashsha gargaartaan.

18. Barsiissaateki manji ergatensha fuleꞌe barateexxa yaane manjokee kulaashsha jajjabeessitattoki hittate? (Matwoosi 10:27)

¹⁸ Yesuusi hordofooleeyye isixxi gammachchiissaaxxa odo baꞌlinnakeꞌni manji edo lassitaashsha ajajeen. (Matwoosi 10:27 yaansis.) Mitti Maxaafa Qullichcha barataꞌneeki manji hundanni addataꞌneexxa yaane welekee kula saffoole Yihowwaꞌni addata barataꞌni meꞌaan. Maxaafa Qullichcha barataꞌneeki manji iitta assaashsha gargaartattoki hittate? Gubaꞌeteꞌni laassatiki duuli hedheexxa egeꞌnishanji kulemaa wodda barsiissaateki manji baꞌlisanjo kadateꞌe maa assa hasissaaxxa hedaashsha gargaari. Iitta hedheeke lassatike duuli wodda lassa safa heddo manjoꞌni shollexxaaꞌneeki mayeete kaddeexxa isoꞌni kuli. Torbatixxe oddoxxe bukkiiꞌni ardiinka haasoꞌa shiqinsaa qico leenjo adhdhatinna laꞌo alfa dandeꞌaan. Tinni leenjo addataꞌneexxa yaane sodaꞌa belo elo qicinni manjokee kulaashsha gargaartaan.

BARSIISSAATEKA MANJO ADDATAATTEXXA LEELLISHI

19. Yesuusi hordofooleeyye isixxa addataammaxxa leellisheeki hittate? Noꞌo isika fakkeenna hordonfannoki hittate?

¹⁹ Yesuusi iimiꞌaa meꞌebaa edi darre, hordofooleeyye isixxenni higgeen welti heꞌnaaxxa haasoꞌeemman. Yesuusi tennee yaane haasoꞌeeki insaꞌne iimiꞌaa menaaxxa kuloꞌaate kaddeexxa hubanteemmabaan. Kaddoolenna, Yesuusi miꞌlachcho asseemmaki addatensha insaꞌnexxeꞌnite maleꞌe, qalbe insaꞌnexxi giddo hedhemmake mamaꞌnitebaan. (Yoh. 14:1-5, 8) Iimatika tasfa uuddaaxxa adda egeꞌnatee insaꞌnaa yanna hasissaaxxa egeꞌneemman. (Yoh. 16:12) Noꞌonna isishshanni, Maxaafa Qullichcha barsiinsaanneki manni Yihowwaa gammachchiisateꞌe hasaꞌneexxa addantannon.

20. Maalaawi hexxaꞌneexxi dayyo ise Maxaafa Qullichcha barsiissaammaxxa manjo addattaꞌneexxa leellishsheeki hittate?

²⁰ Maxaafa Qullichcha barsiinsaanneki manji toggitte kaddeexxa yaane assatixxa halcha afeexxa mammabeꞌnon. Malaawi hexxaꞌneexxe Chifundo hiyyendaꞌneexxe dayyoka fakkeenna uundo. Isenna Baro Baro Gammadiki Hedho! hiyyaꞌneeke maxaafinni Katooliketixxa adde hordofaꞌneexxa Alinaafi hiyyendaꞌneexxa dargaggeette belto Maxaafa Qullichcha barsiisa saffen. Hafuura adhdha 14 keꞌni mariꞌantechchi uduma Chifundo, mageneeffachchoteꞌe fakke laꞌoonfata hasissaaxxanna hasissabaaxxa Alinaafiꞌi qorteen. Alinaafi aarteexxi “murte tinni ifi-ifixxen!” hiteen. Chifundo ise Maxaafa Qullichcha barata waaldaan hitee heddeemman. Issenna yaane iseꞌni laananni aggaꞌni metaaxxa heddaꞌni ossunteti isee barsiisa ittin suffeen. Heenooke aganjuwwi uduma hafuura adhdha 34 keꞌni mariꞌantaaꞌnaa Chifundo iseeꞌe: “Maxaafa Qullichcha baratatinna Dhugaatika Mageno Yihowwaa egeꞌnati konne qicoꞌni maa laꞌo alfiteette?” hite qorteen. Chifundo Alinaafi maa hite hiissiteexa haasoottaa wodda, “Ise mitte mitte gammachchiissaaxxa yaanuwwa haasotteen, tenneeri giddiiꞌni mitte Yihowwaxxi Naqaashe Maxaafi Qullichchi kiphabaaxxa mitte yaanenna assitabaan” hitteen. Okkooꞌni heenooxxe yanna uduma Alinaafi fakkuwwa laꞌoonfata waaldeexxi hirbangeꞌni cuuphendeen.

21. Mitti Maxaafa Qullichcha barsiinsaanneki manji dhugaatike oraꞌni meꞌatee tarkaaffe adhdhatixxa halcha jabeessedhaashsha gargaarrannoki hittate?

²¹ “Nossaaki” Yihowwate kadoolenna, barsiinsaanneki manji nophphaashsha noꞌonna gargaara dandeennannon. (1 Qo. 3:7) Barsiinsaaneki manji maa assoꞌaa Mageni hasaꞌneexxa barsiisatenaaꞌni caaldeexxa yaane assinannon. Yihowwaa afeexxi jaalala jabaattaꞌni metaashsha gargaarrannon. Yihowwaa jaalala afeexxa fedhii isixxa hedho ifixxeꞌni edisati leellishaashsha jajjabeessanna hasissaan. Ittan hega uushsho geltaa wodda Yihowwaꞌni addataaki hittate kaddeexxa barsiinsannon. Barsiinsaanneka manjo addantaannexxa haasoꞌati, Yihowwake seerishsha hedhateenna dhugaatike oraꞌni meꞌatee tarkaaffe adhdhaashsha jajjabeessa dandeennannon.