Rakko Ateꞌn Gelta Wodda Yihowwa Gargaaraan

1-2. Yihowwaxxe addatendeexxe ergantooleeyyeꞌn huuni huꞌuraaki jeeji geyaꞌne?

YAADISSAAXXI yaane noꞌoꞌn futti hitaa wodda, hedho noꞌoꞌn dukkandaashsha assa dandeettaan. Fakkeennakeꞌe, mitti addatemeeki Liꞌusia hiyyemaaki dayyi jabaka kanseretika dhukkuba afeexxa egeꞌneen. Ciꞌleesichchinna isi hedhoti tura dandeꞌaaki heenoke agenjaan calla kadeexxa kuleen. Moniikanna iseki miniinki anni kinni qeerraaxxa yanna ergatenshatixxe hujeꞌn saꞌissinaamman. Moniika, barra mitte, gubaꞌetike geercho kadeeki miniinki anni iseki heddo wogaꞌa lame hedho akeekaꞌn tureexxa egendeen. Oliva hiyyendaaxxi dayyo mitte, jabaxxi hobonbalte daggaa woddi mine iseka waalde baqatteen. Baqatteemmabaaꞌn higge dagga wodda mini isekinna diigeme mudeemman. Harumaaxxe yanna giddo kaddeexxi tinni yaanuwwa, konne mannixxa hedho dedhaꞌngeꞌn jijjiiriteen. Insaꞌneꞌn gelteexxa yaane gargaadha dandeetatto? Keekkatebexxongi buttin ateꞌn doꞌaashsha assitaaxxi rakko ateꞌn gelte egende?

² Yihowwaxxe addatendeexxe ergantoolenna kandonole, manjo duuchchaꞌn geyaꞌneeki abari ittan dihbo noꞌoꞌninna geltoꞌa dandeettaan. Dedha Mageniinka arda gibaꞌneeki manni geesisaꞌneeka shorrichcho yookiin moronsha jabaatte ossanna hasissaaxxi hexxaan. Yihowwa iitta hexxeexxe jabaxxe rakkonaaꞌn noꞌoꞌo gollanna gophoole, noꞌoꞌo gargaarateꞌe kako aageen. (Isa. 41:10) Isike gargaarsini, gammandeennekenna eloxxa murte asseꞌnannoke manna, ittan, heꞌnenneki jeeji haranga rakkisaakenna kadoole isiꞌa addatemmeenneke manna kadda dandeennannon. Tenne barachchoꞌn hedho noꞌoꞌn dukkanda wodda, Yihowwa noꞌoꞌo gargaaraꞌneeka shoole ora uundannon. Ittan gargaarsa isika alfateꞌe maa assa hasissaaxxa uundannon.

YIHOWWA ATEꞌE HEQQAAN

3. Yaadissaaxxi yaane noꞌoꞌn gelta wodda, maa assa noꞌo ꞌn haꞌurta?

³ Haꞌura jeeja. Yaadissaaxxi yaane noꞌoxxe hedhoꞌn geltaa wodda seeriki hedanna eloxxa murte assedha haꞌura dandeettaan. Mayee? Qalbe noꞌoxxi yaaddoteꞌnaaꞌn kexxeexxa lumoshsha madoottammaxxeete kada dandeettaan. Sammo noꞌoxxeꞌn yaaddo haranga bira saxxeechchonna fakkaata dandeettaan. Wele yanna kinni, menaanneba egennebeꞌnong dukkanateꞌn erqenna kayya hingaꞌn geebemmannechcho noꞌoꞌn fakkaattaan. Iimiiꞌn uundennaxxi lame dayyuwwa abari insaꞌneꞌn geyeexxa yanna maachchi insaꞌneꞌn laqemeexxa hubatte. Oliva iitta hiteen, “Hobonbalte mine anka diiggeechchi uduma, haranga dommi hiyyennen, yaane duuchcha hunna anxi iimi darre hexxeechcho aneꞌn fakkaatteemman.” Miniinki anni waakkateemmaxxi Moniika iitta hiteen: “Tenne yaanenaaꞌn kexxeexxa yoꞌosha yaadennen. Giddo anxinna yaadotenaaꞌn kexxeexxa haranga madootteen. Edo bara barandeꞌn hujaannaxxa shollanxa yaane taꞌa huja aneꞌn haꞌurteen. Tinni aneꞌn gelteexxi yaane addatandeꞌe haꞌurtaaxxe fakkaattaammaxxen.” Hunna noꞌoxxi iimi darre hexxeexxi rakko noꞌoꞌn gelta wodda, Yihowwa noꞌoꞌo gargaaraaxxa kako aageeki hittate?

4. Filiphisiyuusi 4:6, 7 xxe hundayyeꞌn, Yihowwa noꞌaꞌa maa assateꞌe kako aagee?

⁴ Yihowwa assaaxxa yaane. Maxaafi Qullichchi “Mageniinka nageꞌa” hiyyaaka nageꞌa noꞌa uwwaaxxa kako aageen. (Filphisiyuusi 4:6, 7 yaansis.) Kunni nageꞌi, isinni welt anfeennexxe fiixxeexxe mittuntenaaꞌn kexxeexxa alfinannoke, sammonna onna noꞌoxxi miirtaashsha assake nageꞌan. Kunni nageꞌi “hedino noꞌoxxi iimi darre hedheeke”, noꞌo hendaanne iimi darre manbe assaake nageꞌan. Yihowwabaꞌa kadhatetteshshanni qalbe atixxi nageꞌa alfite egendee? Iitta kaddoole kunninna “Mageniinke nageꞌa” hiyyoten.

5. Mageniinki nageꞌi sammonna qalbe noꞌoxxa heqqaꞌneeki hittate?

⁵ Tenne xiqseꞌninni Mageniinki nageꞌi qalbenna sammo “heqqaaxxa” kulendeen. Tinni “heqqa” hitaaxxi hiyya keꞌitokeꞌn qachcha mitteꞌn bala geltabaashsha heqqaaka sannachchuwwa ifisateꞌe laꞌoteꞌn hossaaxxemman. Sannachchi heqqaake qachchi giddo hedhaaki manni sannachchi insaꞌne heqqaaꞌneexxa egeꞌneemmaxxe nageꞌiki diiphaan. Tennen weli fakkaattaanxa, Mageniinki nageꞌi qalbenna sammo noꞌoxxa heqqaꞌneexxa egenneenaxxeꞌe itinte heꞌnannon. (Faaro 4:8) Heꞌnenneki jeeji hirbageꞌn jijjiiremanna gophoole, Haannashshani hasisaaka nageꞌa alfinannon. (1 Samu. 1:16-18) Ittan sammot itintanno wodda seeriki hedanna beekkumixxa murte assecca shollexxaan.

6. Mageniinke nageꞌanaaꞌn laꞌo alfateꞌe maa assa dandeennanno? (Fakke uudi.)

⁶ Noꞌo assa hasissaaxxa yaane. Qachcha mitteꞌn hedhaꞌneeki manni rakko insaꞌneꞌn gelta wodda gargaarsakeꞌe qachchiinka “heqqanjo” yeꞌammashshani, noꞌonna rakko geltaa wodda, Yihowwaka gargaarsa qorrannon. Hitta? Sammo atixxi Mageniinka nageꞌa alfitaa qicoꞌn kadhatat. (Luqa. 11:9; 1 Tese. 5:17) Iimiiꞌn kulemeemmaki Liꞌusinna isixxi miniinxi ama Aana, isi heenooke agenji uduma reyaꞌneexxa egenneechchi uduma, rakko dandeenneeki hittate kaddeexxa ifinseen. Isinna iitta hiyyeen: “Tenne yannaꞌn, fayyunte ifixxa karkarsedhateenna wele yaane assateꞌe murte assedha haranga haꞌurtiteten. Kaddomaleꞌe, tenne haꞌurtite yannaꞌn nageꞌa alfateꞌe kadha haranga hasissaammaxxe yaanen.” Liꞌusinna isixxi miniinxi ama, Yihowwa sammoti nageꞌa alfinaashshanna qalbet itintaashsha, ittan eloxxa murte asseꞌnaashsha beekkuma uwwoꞌa jabeessine higge higgeen kadhantaammaxxa haasooneen. Insaꞌneꞌninna Yihowwa insaꞌne gargaareeshsha laqendeemman. Rakko ateꞌn geltaaxxa yanna jabaatte kadhatottole,Yihowwa qalbenna sammo atixxa heqqaaka nageꞌa uwwaaxxa hubattaton.—Roome 12:12.

YIHOWWA TIꞌNATTATTOSHSHA ASSAAN

7. Jabaxxxi rakko noꞌoꞌn gelta wodda maachchi noꞌoꞌn laqema?

⁷ Haꞌuraa jeeja. Haꞌuraaki abari noꞌoꞌn geya wodda irri, hedino noꞌoxxinna assinaannexxi yaane, edishsha miketixxe kada gopha dandeettaan. Sammo noꞌoxxi jabake yaadinni elqe kayya runkaasendaꞌneechcho noꞌoꞌn fakkaattaan. Iimiiꞌn uundennaxxi Aana, miniinki anni iseki Liꞌusi reyeechchi uduma gargariti hexxeexxi yaaddo iseꞌn laqendaammaxxa haasooteen. Isenna iitta hiteemman: “horomabeꞌnochcho aneꞌn fakkaatta wodda, ifiꞌaan wirri hiyye yaadannon. Isinna reyeexxeꞌe yoꞌosha aarennen.” Tenne iimi darre, Aana qofi gatteechcho iseꞌn fakkaattaamman ittan Liꞌusi edo elo qicin hujaammaxxa yaane huja ise hifachchiissaꞌnemman. Wele wodda kinni abbaayyatixe hobonbalte giddo hexxeechcho iseꞌn fakkaattaamman. Yaado bira saxxaa wodda, Yihowwa noꞌoꞌo gargaaraaki hittate?

8. Isayaasi 33:6 keꞌn Yihowwa noꞌaꞌa maa assaaxxa kokeessee?

⁸ Yihowwa assaaxxa yaane. Isi tiꞌnantannoshsha assaaxxa kokeesseꞌeen. (Isayaasi 33:6 yaansis.) Abbaayyati giddo kexxaaxxi hobonbalte mitte hobolo fuggo qicin elqenna kayyaꞌa runkaassaan. Hobolo runkaasendabaashsha hundiiꞌn duuchchini darrenaaꞌn ugginaaxxi yaane hexxeen. Tinni yaane hobolo runkaatabaashsha assitammaxxeꞌe, iseꞌn meꞌaake manniki jeejinna nageꞌiinke kadaan. Kaddomaleꞌe, tinni yaanenna seeriki huja dandeettaaki hobolo ediꞌa meꞌitaa woddan. Iittani, Yihowwa noꞌoꞌo tiꞌnantannoshsha assaꞌneeki rakko giddonni heꞌne ediꞌa menanno woddan callan.

9. Qoꞌne kiphaaki miyuwwi miketixxa hedino afa dandeennannoshsha gargaaraaki hittate? (Fakke uudi.)

⁹ Noꞌo assa hasissaaxxa yaane. Hobonbaltetisha hexxeexxi rakkoxxe oddooꞌn hexxatto wodda kadhateꞌe, bukkiiteꞌn afemateꞌenna lassateꞌe dandeettetexxa duuchcha assi. Rakkotixxe buutonni edo assitaattaxxa yaane taꞌa huja ateꞌn haꞌurtoolenna, Yihowwa atixxe hunna iimi darra hexxeexxa yaane assitottaꞌa hasaꞌnebaaxxa qalli hiyyi. (Luqqaasi 21:1-4 welt hokkokisiis.) Manfasiinxa yaane assitatto wodda qoꞌnisattoxxanna alalchitatoxxa yanna gargarit foyi. Mayee? Yihowwa orga isixxi gamiiꞌn yaado geltaa wodda ossinannosha gargaartaaxxa barachcho qopheeseꞌeen. Ateꞌe gargaartaaxxa yaane alfateꞌe JW Labreere hiyyendaaxxa appilikeeshiine, Heqqecatixxe Xellephoke Maabariinxxa borroka fulchanjo(Qawwufat)nna Qoꞌne kiphaaka miya Yihowwaxxe Naqaasheꞌa ittan qoꞌnetike miyuwwi giddiiꞌn atiꞌa shiqaake laagadini afemaaka laꞌoonfata dandeetatton. Iimiiꞌn uundeennaxxi Moniika yaadotixxi hobonbalte iseꞌn gelteemmaxxa yanna gorsa alfate konneꞌe qoꞌnetika miyuwwa laꞌoonfatemmaxxa haasooteꞌeen. Fakkeennakeꞌe, “hifo”, “waakkata” yookiin “addatensha” hiyyendaaxxe hiyyuwwaꞌn qoꞌne assitaamman. Okkooꞌn, eloxxi yaane qalbe isexxeꞌn laqenda qicoꞌn yaansissaꞌnemman. Isenna iitta hiteen: “Yaadondeꞌn hedhe qoꞌne safanno wodda, Yihowwa aneꞌe hanqalfedheeshsha aneꞌn laqendaꞌnemman. Yaansisennexxe qixxeꞌn Yihowwa gargarit hexxeexxa aneꞌn geltaꞌneexxa yaaddo gargadhaꞌneexxa addatennen. Ittan isinna aneꞌe gargaaraamman.” Iitta hedheeki Yihowwaki gargaarisi hobonbalte hexxeeke wodiꞌinaaꞌn hobonbalte hexxebaakiba geltatto qicoꞌn erqe kayya daaqqebexxongi geltattoshsha assaan.—Faaro 119:143, 144.

YIHOWWA ATEꞌE KIPHAAN

10. Yaadissaaxxi yaane gelteechi uduma maachchi noꞌoꞌn laqema?

¹⁰ Haꞌuraa jeeja. Rakko noꞌoꞌn gelteechi uduma bisiinxinna hedinotixxi gonphe laqendaaxxi yanna hedha dandeettaan. Dedha gongichchiinxe hokkokkeꞌn fiige gongaammaki manji miidhensha isoꞌn gelteechi uduma hokkolaꞌn meꞌammakisha kandeennechcho noꞌoꞌn fakkaattoꞌa dandeettaan. Konnechchi edi darre shola qicin hunjaannaxxi yaane taꞌa haꞌurtoꞌa dandeettaan, yookiin edo gammashshot hunjaannaxxa huje taꞌa hujateꞌe yorte gonphannoxxi hexxaan. Eliyaasisha, iimiꞌa keꞌa haꞌurteeꞌnaꞌa diiphi calli noꞌoꞌn elaaxxinna hexxaan. (1 Neg. 19:5-7) Gonphannoxxa yanna Yihowwa noꞌaa maa assateꞌe kako aage?

11. Yihowwa noꞌoꞌo gargaaraꞌneeki weli ori hoonte? (Faaro 94:18)

¹¹ Yihowwa assaaxxa yaane. Isi noꞌoꞌo kiphatee kako aageen. (Faaro 94:18 yaansis.) Mitti miidheemeeki gongalli taꞌanna gongatee gargaarsa halsammashshan, noꞌonna Yihowwaxxe ergachchoꞌn ittini ediꞌa meꞌateꞌe gargaarsi hasisaan. Iitta hexxeexxi yaane gelta wodda, Yihowwa iitta hiyye noꞌaa kokeesseen: “Sodaattoxxe ateꞌe gargaarannon, hiyyaanneki Mageni atiki ani Yihowwa, middixxa anga atixxa abideennen.’” (Isa. 41:13) Mootichchi Daawit iitta hedheeka gargaarsa alfeemman. Rakkonna naaphi isoꞌn futti hiyyeemmaxxa yanna Yihowwaꞌa: “Middixxi anga atixxi aneꞌe kiphphaan” hiyyeen. (Faaro 18:35) Yihowwa isoꞌo kiphee qici hittate?

12. Yihowwa noꞌo gonphanno wodda noꞌoꞌo gargaarateꞌe ayyee laꞌoonfata dandeꞌa?

¹² Heddo yanna Yihowwa noꞌoꞌo kiphaaki weli manni noꞌoꞌo gargaaraashsha dammassatiten. Fakkeennakeꞌe, Daawiti gopheemmaxxa yanna jaali isiki Yoonaataani yaadiki kiphateenna eloke haasoꞌinni jajjabeessateꞌe isiba mareemman. (1 Samu. 23:16, 17) Weli fakkaattanxa, Eliyaasiꞌa eloka gargaarsa assaashsha Yihowwa Elisayi melleemman. (1 Neg. 19:16, 21; 2 Neg. 2:2) Telchonna Yihowwa noꞌoꞌo gargaarate mini hado, jaaluwwa, yookiin geedhe laꞌoonfataan. Kaddomaleꞌe, rakko noꞌoꞌn gelta wodda manjokenaaꞌn bayyatate yorrannoxxinna hexxaan. Qofitti hedhateꞌe yora haarooxxe yaanebaan. Yihowwaka kipha alfateꞌe maa assa dandeennanno?

13. Yihowwake kiphanaaꞌn laꞌo alfateꞌe maa assa hasissa? (Fakke uudi.)

¹³ Noꞌo assa hasissaaxxa yaane. Manjokenaaꞌn bayyatatixxa yorte faachcheefat. Manjokenaaꞌn bayyantannoxxa yanna hedino noꞌoxxi cuꞌmattaꞌn meꞌitammaxxeꞌe ifiꞌaanna rakko noꞌoꞌn gelteexxe callaꞌn heda sanfannon. Iitta hexxeexxi hedino eloxxa murte asseꞌnabeꞌnoshsha gufo kaddoꞌa dandeettaan. (Fakke. 18:1) Dhugaaten, noꞌo duuchchiniing yaadisaake jeeji giddo heꞌnannoxxa yanna heenooxxe yannaꞌa qofitt hedhateꞌe hansannoxxi egeꞌnendeexxen. Kaddomaleꞌe, qeerraaxxe yannaꞌa manjokenaaꞌn bayyantaannexxe kaddoole, Yihowwa manjii darrenaaꞌn noꞌoꞌo gargaarateꞌe laꞌoonfataꞌneeka ora cufa dandeennannon. Tenneꞌa hexxetteki jeeji hitte qiconna haꞌuraakenna kadoole, mini hadi, jaaluwwi ittan geedhe assitaaka kipha adhateꞌe fedhiitike kadi. Insaꞌneꞌe Yihowwa ateꞌe kiphateꞌe laꞌoonfataꞌneeke manna assite uudi.—Fakke. 17:17; Isa. 32:1, 2.

YIHOWWA ATEꞌE DAYYEESSAAN

14. Hiini sodaantannoshsha assitaaxxi yaanuwwa geya dandeetta?

¹⁴ Haꞌuraa jeeja. Sodaantannoshsha assitaaxxi yaane noꞌoꞌn futti hiyya dandeettaan. Maxaafi Qullichchi giddo, addatendeexxi mageniinxi ergantooleeyye, naaphi yookiin weli manni geesisaꞌneexxe dhiibbenaaꞌn kexxeexxa yaandeemmaxxinna roqoonsineemmaxxi yanna hexxeexxa haasonneꞌeen. (Faaro 18:4; 55:1, 5) Noꞌoꞌninna iittan, barachchotike minenaaꞌn, hujetixxe bakkabaaꞌn, mini hadinaaꞌnina ittan mootummatenaaꞌn moronsha geya dandeettan. Dhibotixxe buutonaaꞌn kexxeexxa ‘dedha reyunnu’ hine sodaata dandeenannon. Eettene yannaꞌn shiixxaramma ooseshsha mitte yaane assa dandeenabeꞌnochcho noꞌoꞌn fakkaattaan. Iitta fakkaattaaxxi yaane noꞌoꞌn gelta wodda, Yihowwa noꞌo gargaaraꞌneeki hittate?

15. Faaro 94:19 maa hiyyaaki addachchiisaaki yaadi hedhe?

¹⁵ Yihowwa assaaxxa yaane. Isi noꞌoꞌo dayyeessaan ittan miirsaan. (Faaro 94:19 yaansis.) Tinni faaro jabaxxe banqoxxe dindinsonaaꞌn kexxeexxa, rifatte diipho gophpheexxa mitte shiixxooxxa belto qalli hinannoshsha assitoꞌa dandeettaan. Tenne, bararaqqeexxa belto luuꞌmedhe diiphphaa gicoꞌn shuꞌmi assedhe abixxaaka anna sammo noꞌoxxeꞌn heda dandeennannon. Taꞌaanna banqotixxi dindinso hexxeexxenna kaddoole, anni iseki isee luuꞌmedheemmaxxeꞌe sodaattabaan. Noꞌoꞌn sodaachchissaaxxi yaane gelta wodda, itti sodaachchissaaxxi yaane saxxa qicoꞌn iimatiki anni noꞌoki fakkeenniinke kadeeke orinni noꞌoꞌo luuꞌmedhoꞌa hansannon. Iitta hedheeka dayyeefanna, Yihowwabaaꞌn alfa dandeenannoki hittate?

16. Yihowwa noꞌoꞌo dayyeessaashsha noꞌo maa assa dandeennanno? (Fakke uudi.)

¹⁶ Noꞌo assa hasissaaxxa yaane. Duuchchini wodda Yihowwabaꞌa kadhatatinna Qaale yaansisati yanna isini welt saꞌisi. (Faaro 77:1, 12-14) Rakko ateꞌe wixixxi assitaꞌnoole, assa hasissaaxxi taakkaxxi yaane, iimatike Anni atikibaꞌa kadhati wirri hiyyaten. Ateꞌe sodaachchissaꞌneexxanna yaadissaꞌneexxa yaane Yihowwaꞌn kuꞌli. Isinna ateꞌe Maxaafi Qullichchi gamiiꞌn haasoosa woddanna gorsa wodda caqasi. (Faaro 119:28) Maxaafi Qullichchi giddiiꞌn sodaatatto wodda ateꞌe dayyeessaaka yaada alfa dandeetatton. Fakkeennakee, Iyyoobike, Faarotikenna Fakkeeniinke maxaafuwwanaaꞌn ittan Matwoosi hafuura adhdha 6 keꞌn Yesuusi haasoꞌeeke yaadanaaꞌn, jajjabeessaaka yaada alfa dandeetatton. Yihowwabaꞌa kadhatatto woddanna qaale isixxa yaansissatto wodda qalbe atixxi dayyeeffattaan.

17. Heene yaane addata dandeennanno?

¹⁷ Hedho noꞌoꞌn dukkandaaxxa yanna, Yihowwa noꞌonni hedhaaxxa addata dandeennannon. Isi ijjenda qofitti noꞌoꞌo waalabaan. (Faaro 23:4; 94:14) Yihowwa noꞌoꞌo heqqateꞌe, itichchateꞌe, kiphatenna dayyeessateꞌe kako aageen. Yihowwaꞌa, uuddaxxa Isayaasi 26:3 keꞌn iitta hiyyaan: “Shenitte qalbenni ateꞌn addataaka heqqitatton, ateꞌn addantaammaxxeꞌe muuxama afebaaka nageꞌa uutatton.” Tenneꞌa Yihowwaꞌn addatte, ittan gargaarsa isika alfateꞌe dandeetineexxa duuchcha asse. Iitta assitinaꞌneexxe kaddoole rakkoteꞌninni hexxine jabeenna alfitinaan.