Yihowwa Ateꞌe Qalbe Giddixxen Eeyyaꞌneen

1. Yihowwaꞌa, heddatto wodda sammo atixxibaꞌa daggaꞌneexxi yaane maachcho?

YIHOWWA maa fakkaataaxxa hedate woꞌlaande egendette? Kadhati isoꞌo haasoositatto wodda sammo atixxibaꞌa daggaꞌneexxi yaane maachcho? Yihowwa ille noꞌoxxeꞌn leellanna gophoole Maxaafi Qullichchi gargarit hedheeke orinni isoꞌo ifisaan. Isi “arishshonna wonte” ittan “ittaaxxe giira” hiyyemeen. (Faaro 84:11; Ibra. 12:29) Isi hedhaꞌneexxi bakkanna sanpeeretike kinjinni, calacala hiyyaake sibiljininna waꞌa hiyyaake dowwichchinni fakkaattaaxxa kulendeen. (Hiziq. 1:26-28) Konne ifisanjonaaꞌn mitti mitti manbeꞌa hinannoshsha yookiin Yihowwaꞌa ulfiniinxa sodaꞌa anfannoshsha assa dandeꞌaan.

2. Mitti mitti manni, Yihowwabaꞌa shiqabaashsha gufo kaddaaxxi yaane maachcho?

² Yihowwaꞌa illeti uuda gonphaannaxxeꞌe, isi noꞌoꞌo eeyyaꞌneexxa addata dedha haꞌura dandeettaan. Mitti mitti manni kinni hedho insaꞌnexxeꞌn gelteexxe rakkonaaꞌn kexxeexxa Yihowwa ijjenda insaꞌne eeyyaꞌnebaachcho fakkaattaan. Dedha, insaꞌnee eeyyaꞌneeki anni ijjenda hedhebaashsha assine hendaan. Yihowwa iitta hexxeexxa hedinonna hedino tinni hittee qico miitaaxxe kaddeexxa egeꞌneꞌeen. Tenneꞌa isi noꞌoꞌo gargaarateꞌe hiyya wodda biifoondeexxa ayyunte isixxa Qaaleteꞌn borreesiseen.

3. Yihowwaxxa jaalala jabeessine qoꞌnisa hasiseeki mayeete?

³ Yihowwaxxa ayyunte adda ifissaaxxi mitte hiyya jaalalaten. (1 Yoha. 4:8) Jaalala isixxa ayyunte ifissaan. Isi duuchchiinxa yaane assaꞌneeki jaalalatiten. Mageniinxi jaalala qiiddabaaxxenna jabaxxe kaddemmaxxeꞌe isoꞌo eeyyaꞌnebaake manniꞌaan tenne jaalala leellishaan. (Mat. 5:44, 45) Tenne barachchoꞌn Yihowwaꞌninna isixxe jaalalaꞌn hubanno assinannon. Mageno adda egennennexxe qixxeꞌn irran caala isoꞌo eeyyinaꞌn menannon.

YIHOWWA NOꞌOꞌO YOꞌOSHSHA EEYYAꞌNEEN

4. Yihowwa marartetixxa jaalala leellishaꞌneexxa addatattoshsha assaꞌneeki hittate? (Fakke uudi.)

⁴ “Yihowwa haranga jaalaltichcha Magenon.” (Yaꞌiqo. 5:11) Maxaafa Qullichchakeꞌn, Yihowwa ifi, mitte jaalala affeexxe amanni fakkeesseen. (Isa. 66:12, 13) Anno shiixxooxxa jaalalati karkarisitaaxxa ama mitte hedde. Isenna gudeedakeꞌn uggudhdhite luuꞌmexxe kookkissaꞌni haasoositaan. Ooxxa wodda yookiin dhibendaa wodda, anno isexxi hassaaxxa yaane uutaan. Noꞌonna yaandanno wodda Yihowwa jaalalati noꞌaanna iittanni assaaxxa addata dandeennannon. Faarsajinna iitta hiyye borreesseen: Yaaddoti liqiinsemeennaxxa yanna aneꞌe dayyeesiteten ittan miirsiteten.”—Faaro 94:19.

5. Yihowwaxxa addatendeexxa jaalala hiyyo atiꞌa maa hiyyote?

⁵ Yihowwa addatemeeke Magenoni. (Faaro 103:8) Dedha hunjanno woddanna isi noꞌoꞌn adde woxabaan. Isiraꞌeelooti higge higgeen cubbo hujati isoꞌo yaadisoolenna, isi aadde aageke ardiꞌa addatendeexxa jaalala afeexxa iitta hiyyati ifiseen; “Atinna ille anxi edo fiixxeteken, ulfeessendeeteken, aninna ateꞌe eeyyeennen.” (Isa. 43:4, 5) Yihowwaxxi jaalala haanonna jijjiirendaaxxebaan. Noꞌonna duuchchin wodda jaalala isixxeꞌn addata dandeennannon. Jabaxxa balleessa hunjonnolenna Yihowwa noꞌoꞌo hune waalabaan. Aadde aange isibaꞌa hinganno wodda isi noꞌoꞌo taꞌaanna eeyyaꞌneexxa konkannon. Isinna “gattowwaali isixxi bacate” kaddeexxa kokeesseen (Isa. 55:7) Maxaafi Qullichchi isixxe gattowwaaliinni “haaroꞌmatiki bari Yihowwabaaꞌn noꞌa dagaaxxxa” haasoꞌaan.—Huje 3:19.

6. Zeekkaariyaasi 2:8 ti Yihowwa uuddaaxxa noꞌa maachcho barsiisa?

⁶ Zekkaariyaasi 2:8 yaansis. Yihowwa noꞌoꞌo eeyyaammaxxeꞌe yaaddo noꞌoxxa duuchcha egeꞌneꞌeen, ittan noꞌoꞌo gargaarateꞌe hasaꞌneen. Noꞌo yaandanno wodda isinna yaadaan. Tenneꞌa shenunteti “atike illetike gummichchishsha aneꞌe heqqi” hine kadhata dandeenannon. (Faaro 17:8) Bisi noꞌokixxe kuta giddiiꞌn ille sholla qicinni midhendaaxxenna fiixxa yaanen. Yihowwa noꞌoꞌo isike illetike gummichchinni fakkeessa wodda, ‘ayyinna arda anka haꞌnoꞌo miidhaaki, anxa fiixxa yaane midhaan hiyyeeshshatemman.’

7. Yihowwaxxe jaalalaꞌn anfeennexxa adda jabeessedha hasisseeki mayeete?

⁷ Yihowwa isi noꞌoꞌo anni annitin eeyyaꞌneexxa addantonaaꞌa hasaꞌneen. Konneechchi edi darre saꞌisineennexxa hedho Yihowwa egeꞌneemmaxxee dedha noꞌoꞌo eeyyaaxxa mammannoxxinna hexxaan, yookiin taꞌixxe yannaꞌn noꞌoꞌn geltaꞌneexxi rakko Yihowwaxxe jaalalaꞌn anfeennexxi adde hega uudendaashsha assitoꞌa dandeettaan. Jaalala isixxeꞌn anfeennexxa adde jabeessitaaxxi yaane maachcho? Yihowwa, Yesuusiꞌa, hariiremeeke Kirsitaaniꞌanna noꞌaa duuchchiniingeꞌe jaalala leellishaꞌneeki hittate kaddeexxa baratatiten.

YIHOWWA JAALALA LEELLISHAꞌNEEKI HITTATE

8. Yesuusi Anni isikixxe jaalalaꞌn addataammaki mayeete?

⁸ Yihowwanna eeyyemeeki belt isiki konnete hinabaake bariꞌa, turteexxa jabaxxa eeyyuntenna jaalala anfeen. Insaꞌnexxe mittunte qico iimateꞌninna buttateꞌn qeerraake bariꞌa turteexxi mittunte hexxeebaan. Matwoosi 17:5 keꞌn Yihowwa Yesuusi eeyyaꞌneexxa toggichchi kadeeke orinni haasoꞌeen. Yihowwa silaati, sholla qicin ‘isi ani gammadaanneken’ hiyye haasoꞌa dandeꞌamman, kaddomaleꞌe, isi Yesuusiꞌi hitte qico eeyyaꞌneexxa egenonnaꞌa hasaammaxxee, isoꞌo “eeyyaneeke belto anken” hiyyeen. (Effe. 1:7) Yihowwa Yesuusixxe ayyunteꞌninna isi ediꞌa assaaxxe yaaneꞌn gammadaamman. Yesuusinna anni isiki isoꞌo eyyaammaxxa mamaammabaan. Yihowwaxxi jaalala Yesuusiꞌa addatendeexxe kaddemmaxxe isoꞌo eeyyaꞌneexxa qalbe mitten addatamman. Tenneꞌa Anni isiki isoꞌo eeyyaꞌneexxa shenuntet higge higgeen haasoꞌaamman.—Yohaannisi 3:35; 10:17; 17:24.

9. Yihowwa hariiremeeka Kirsitaana eeyyaꞌneexxa leellishaaki hoone yaada? Ifisi. (Roome 5:5)

⁹ Yihowwa hariiremeeka Kirsitaana eeyyaꞌneexxa kokeesseꞌeen. (Roome 5:5 yaansis.) “Dunendeen” hitaꞌneexxa hiyya hubatte. Maxaafi Qullichchiinxa hiyya tikaaki mitti maxaafi tenne hiyya “galaaniinsha noꞌoꞌn dunendeen” hiyye tikeen. Yihowwa hariiremeeke Kirsitaaniꞌa afeexxa birasaxxeexxa jaalala leellishaake hittatta hedheeke fakkeenna! Hariiremeeki Kirsitaani Mageni insaꞌneꞌe eeyyaꞌneexxa egeꞌneꞌeen. (Yihu. 1) Hawaarya Yohaannisi hariireemaake Kirsitaannixxa hedino iitta hiyye ifiseen: “Aabi noꞌaa hitte qico lumoxxe kaddeexxa jaalala leellisheexxa uudde, noꞌonna oose isixxen!” (1 Yoha. 3:1) Yihowwa jaalala leellishaꞌneeki hariiremeeke Kirsitaana callaatee? Waawo, isi jaalala leellishaꞌneeki duuchchiingeeten.

10. Yihowwa ateꞌe eeyyaꞌneexxa kokeesseeki haranga gargarit hedheeki ori hoonte?

¹⁰ Yihowwa jaalala leellishaꞌneexxa gargarit hedheeke orinni kokeessitaaxxi yaane heente? Wodo iimateꞌninna buttateꞌn haranga manbeꞌa assaake orinni Yihowwa jaalala afeexxa leellisheeke oran! (Yoha. 3:16; Roome 5:8) Yihowwa cubbo noꞌoxxi gattowwaal hiyyendaashshanna isinni welt jaalo kandannoshsha manji duuchchixxe cubboꞌa reyaashsha fiixxa belto isika uwween. (1 Yoha. 4:10) Yihowwanna Yesuusi kaffalleeke hiraꞌn alalchinennexxe qixxeꞌn noꞌoꞌo duuchchiinga insaꞌne hitte qico eenaꞌneexxa adda egeꞌna dandeennannon. (Gela. 2:20) Wodo hasisseeki sholla qicoꞌn seera wonshatee calla hiyyateetebaan. Isenna jaalalatixxe uwwan. Yihowwa noꞌoꞌo eeyyaꞌneexxa leellisheeki, haranga eeyyaꞌneeka belto isika Yesuusiꞌi tolcha assatiten. Yihowwa belt isiki noꞌa hiyye rakkataashshanna reyaashsha fedhiitike kadeen.

11. Erimiyaasi 31:3 kenaaꞌn maachcho barantanno?

¹¹ Iimiiꞌn uundenneshshanni, Yihowwa jaalala afeexxa farra asseꞌe kula maleꞌe ifi giddo abixxabaan. (Erimiyaasi 31:3 yaansis.) Yihowwa isibaꞌa shinqonnaꞌa hasaꞌneeki noꞌoꞌo eeyyaammaxxeeten. (Zedaagimi 7:7, 8 ki hokkokkisiis.) Ayyetenna kadoole, hiini yaanenna tenne jaalalanaaꞌn noꞌoꞌo gargarit hiissa dandeꞌaaki hedhebaan. (Roome 8:38, 39) Tinni jaalala maa hite heddattoshsha assita? Faaro 23 yaansis, ittan Yihowwaxxa jaalala Daawit uuddammaki hittate kaddeexxanaa, tinni ati hitta hexxeexxa hedino affattoshsha assitaaxxe kaddeexxa hubat.

YIHOWWAXXI JAALALA ATEꞌN MAACHCHI LAQEMAASHSHA ASSITA?

12. Faaro 23 harumaa qicoꞌn ifissatoki hittate?

¹² Faaro 23:1-6 yaansis. Faaro 23 keꞌn hexxeexxi faaro Yihowwaxxi jaalalanna isixxi shaqquntetetiki karkarsi addachchiissaake kadeexxa ifissaaxxen. Tenne faaroki borreessanji Daawit, isixxenna isike allalsanjixxe, Yihowwaxxe oddooꞌn hexxeexxa jabaxxa jaalunte ifiseꞌeen. Daawiti Yihowwa isoꞌo akeekoꞌa eetiitike kada wodda, nageꞌi isoꞌn laqemaamman, ittan woꞌma qalbenni isoꞌn irkataamman. Daawit Yihowwaxxi jaalala hedho isixxika baro duuchcha hordoffaammaxxa egeꞌneemman. Iitta addattaashsha assiteexxi yaane maachcho?

13. Daawit Yihowwa isoꞌo karkarsaꞌneexxa addataammaki mayeete?

¹³ “Anenaaꞌn xeꞌyitaaxxi mitte yaane hexxebaan.” Yihowwa duuchchinii wodda hasissaaxxa yaane kuta belo isiꞌa shiqisaammaxxee, Daawit elo qicin Mageni isoꞌo karkarsaꞌneexxa addataamman. Daawit, Yihowwa isike jaalo kadeexxa egꞌneemman, ittanni Yihowwanna isoꞌo eeyyaamman. Tinninna hiini yaanenna ediꞌa isoꞌn futti hiteexxe kaddoole, Yihowwa isiꞌa hasissaaxxa yaane duuchcha wonshati karkarsaaxxe kaddeexxa addataasha assitaaxxen. Daawit Yihowwaxxe marartetixxe jaalalaꞌn afeexxi adde, isoꞌo yaadissaꞌneexxe yaane iimi derre hunna affeexxanna qalbe giddixxen gammadaashsha assitaaxxen. Ittan itite hedhaashsha assitaan.—Faaro 16:11.

14. Yihowwa ateꞌe jaalalati karkarsaꞌneeki hittate?

¹⁴ Yihowwa jaalalati noꞌoꞌo karkarsaaki, hedho noꞌoxxeꞌn haranga elobaaxxi yaane gelta woddaten. Kileer a hiyyendaaxxi dayyo 20 woggaꞌa Beetele ergatendeexxi, hado isekeꞌn kuta affebaaxxi jabaxxi rakko gelteemmaxxa yanna ifi laꞌo affebaaxxe manjoshsha assiteꞌe heddeemman. Anni iseki gophissaammaxxixxe istirooki hiyyendaaxxe dhibonni abidemeen, dayyuwwa isexxenaaꞌn mitte gubaꞌetenaaꞌn fugussendeen ittan hadi iseki shiixxooxxa afeemmaxxa daddaliinxa hujenna mine gopheen. Yihowwa insaꞌneꞌe jaalalat karkarsee qici hittate? Isenna iitta hiteen: “Yihowwa hado ankeꞌe hasissaaxxa yaane bara barandeꞌn uwwat insaꞌnee uudeen. Heddo yanna, Yihowwa asseexxi yaane hedino anxi iimi darre hexxeexxen. Yihowwa noꞌaa asseexxa yaane duuchchini wodda qalliyyannon, isi noꞌa asseexxa yaane haanonna dedhabeꞌnon. Tennee yaane qalliyya hedho anxeꞌn hega uushsho gelta wodda, adde woxabeꞌnoshsha gargaarteen.”

15. Daawitiꞌn hunna isixxi haaroꞌmiteechcho fakkaateeki mayeetemaꞌa?(Fakke uudi.)

¹⁵ “Hunna anxa haaroonsaan.” Daawiti rakko isoꞌn gelteexxenaaꞌninna hega uushshotenaaꞌn kexxeexxa haranga yaadeexxi yanna hexxemman. (Faaro 18:4-6) Kaddolenna, Yihowwaxxi jaalalanna karkarisi hunna isixxa haaroonsiteemman. Yihowwa gopheeka jaalo isika “haanjaaxxi baddaꞌa” hexxeebaanna “wodiꞌi hedheexxe hafuura adhatixxe bakkabaꞌa” akeekeen. Tennenaaꞌn kexxeexxa Daawit jabaateexxi Yihowwaꞌa gammashshoti ergatema ediꞌaan sufa dandeꞌeen.—Faaro 18:28-32.

16. Yihowwaxxi jaalala hunna atixxa haaroonsiteeki hittete?

¹⁶ Techchonna iittan hega uuddaaxxinna woꞌlaancho abixxinannoxxi yaane hexxoolenna “addatendeexxe Yihowwaxxe jaalalanaaꞌn kexxeexxa baꞌneebeꞌnon.” (Siqo. 3:22; Qola. 1:11) Raheelika fakkeenna uundo. Koroniixxa yanna iseki miniinki anni iseenna Yihowwa waalemmaxxa yanna haranga alalteemman. Yihowwa iseꞌe gargaareeki hittate? Isenna iitta hiteen: “Yihowwa, ani isi edo eeyyemaannexxe manjo kadeennexxa addatannoshsha asseen. Isi aneꞌe, ani welt yanna saꞌissaake jaaluwwinni, sagale aniꞌa idagaake mannin, eloxxa erganna xiqsuwwa ergaake mannin, aninni osoꞌlaake mannin ittan isi aneꞌe eeyyaꞌneexxa qalliyyanoshsha assaake manninni buqeꞌeen. Yihowwa aniꞌaa tenne lumoxxa jaalalatixxa maate uwweexxeꞌe duuchchini wodda galateefataannen”

17. Daawiti “miitaaxxa yaane sodaata” gopheeki mayeete?

¹⁷ “Ati anini hexxetaxxeꞌe miidhensha aneꞌn geltaan hiyye sodaataꞌnon .” Daawitixxe hedhoꞌn heddo yanna bala geltaamman ittan heddi jabaxxa hunna afeeki naaphuwwinna hedhemman. Kaddomaleꞌe, Yihowwaxxi jaalala isoꞌn nageꞌinna fayya laqendaashsha assitaamman. Daawiti hoone jeeji giddonna, Yihowwa isinni welt hedheexxa addataamman. Tennenaaꞌn kexxexxa heene rakkoꞌninna ossa dandeꞌeen. Iittanna hiyye faarseen; “Yihowwa soodaataannexxe yaane duuchchanaaꞌn aneꞌe gargaareen.” (Faaro 34:4) Daawit sodaataanxe sodaateen, kaddolenna Yihowwaxxi jaalala isoꞌo sodaachchissaꞌneexxe yaane iimi darre hunna affeexxen.

18. Sadaachchissaaxxi yaane gelta wodda, Yihowwaxxe jaalalaꞌn anfeennexxi adde noꞌo jabeesitaaki hittate?

¹⁸ Yihowwaxxe jaalalaꞌn anfeennexxi adde sodaachchisaake jeeji giddo heꞌnanno wodda noꞌoꞌo jabeesitaaki hittate? Qajeellisanjo kaddeemmaxxi Suzinna iseki miniinki anni, belt insaꞌneki ifi shiꞌwe wodda maachchi insaꞌneꞌn laqemeemmaxxa ifinseemman: “Dedhakeꞌn yaadissaaxxi yaane futti hiteechchi uduma, mitti manji balateꞌn banqareeshshanna mitte yaanenna assa dandeꞌabaachcho fakkaata dandeettaan. Kaddomale, Yihowwaxxi marartetixxi jaalala nageꞌanna heqqo alfinannoshsha assitaan.” Iimiiꞌn uundennexxi Raheel qalli hiyyat iitta hiteen: “mitte hashsha onna anxi sodaꞌat jaba qicoꞌn gaꞌniteexxa yanna yoꞌoshsha yaadeennan, eettene yanna kadhat Yihowwabaꞌa oodhennen. Ama mitte anno ifixxa, maxxisse diiphissammashsha, eettene yanna qalbe anxinna ititeen, aninna miirennen, okkooꞌn muginna aneꞌe adhdheen. Tinni yaane anenaaꞌn baꞌinna hineeꞌnaꞌa baxxabaan.” Taasosi hiyyemaaki gubaꞌetiki geerchi sannachcha kada gibatenaaꞌn kexxeexxa shoole wogga usuriinke mineꞌn tureen. Isi Yihowwaka karkarsanna jaalala isixxa uudeeki hittate? Iitta hiyyeen: “Yihowwa aniꞌa hasissaaxxi iimi darre hexxeexxa yaane uwwat ane karkarseen. Tinninna woꞌma qalbenni isoꞌn addatanoshsha jabeenna aniꞌa uuteen. Tenne elobaaxxe bakkaꞌninna hedhennexxe kaddoole Yihowwa manfasi isikin gammadannoshsha asseen. Tinninna isinni welt shiqe hujannoshshanna elle isixxa irrancaala uudannoshsha assiteen. Tannenaaꞌn kexxeexxa usuriinke mineꞌnin hedhe duuchchi woddike qajeellisanjo kade ergatema safennen.”

MARARTETIKE KADEEKE MAGENI ATIKIBAꞌA SHIQI

19. (a) Mageni noꞌoꞌo eeyyaꞌneexxa egennonole kadhantanno qici hittate? (b) Yihowwaxxi jaalala ifisendee qiconaaꞌn ati ifixxe hedhoꞌn uudeetteki hoonte? (“Yihowwa Qiiddabaaxxa Jaalala Afeexxa Egenannoshsha Gargaartaaxxa Hiyyuwwa” hitaaxxa kollo uudi.)

¹⁹ Duuchchiinxi iimiiꞌn mariꞌantaꞌn dangennexxi barachcho “jaalalatike mageno” kadeeki Yihowwa noꞌonni welt hedheexxa kokeessitaan! (2 Qoro. 13:11) Isi noꞌaa anni annitini hedaꞌneen. “Isixxe addatendeexxe jaalalanni” buqemmeennexxa addata dandeenannon. (Faaro 32:10) Isi jaalala isixxa noꞌa leellishshaꞌneeki hittate kaddeexxa alalchinennexxe qixxeꞌn, isooꞌo, adda egennaꞌn meꞌinannon, tinninna isibaꞌa shinqaꞌn meꞌinannoshsha assitaan. Isibaꞌa sodaꞌa belo shinqennexxi isixxa jaalala hansaannexxa kula dandeenannon. Noꞌoꞌn geltaꞌneexxa yaane egeꞌneexxanna noꞌoꞌo gargaarateꞌe hasaꞌneexxa addantaannaxxeꞌe, noꞌoꞌo yaadisaꞌneexxa yaane duuchcha isoꞌn kuꞌla dandeenannon.—Faaro 145:18, 19.

20. Yihowwaxxi jaalala isibaꞌa shinqannoshsha assitaaki hittate?

²⁰ Boojjoꞌinanno wodda bisi noꞌoki eebboꞌa giirati biriꞌa shikki hinannashshanni, eebbaxxe Yihowwaxxe jaalalabaꞌa shikki hino. Yihowwaxxi jaalala jabaxxenna kaddoole marartetixxen. Yihowwaxxa eebbaxxa jaalala hedho haꞌnooxxeꞌn uudateꞌe fedhiitike kadde. Ittan noꞌo duuchchiing isixxa jaalala jajati “Yihowwa ateꞌe eeyyaannen” hiyya dandeennannon!—Faaro 116:1.