“Summa Yihowwaka Jajje”

1-2. Yihowwaka summa balleesinee wodda, maachchi isoꞌn laqemeexxa egenannoshsha noꞌoꞌo gargaartaaxxi yaane heente?

TENNEE yaane hedi: Mitti addattaateki manji, ateꞌe uuddaaxxa elobaaxxa yaane haasoꞌeen. Tinni yaane dharake kaddeexxa egendottolenna weli manni kinni tenne yaane addateen. Yaadissaaxxa kinni, kunni dhari baꞌlataꞌn meꞌeen, ittan weli heddi manninna addateen. Ateꞌn maachchi laqema? Manjokeenna eloke summa atikee xexxeꞌattaatolenna, kunni manji summa atika balleessa haranga yaadissaaxxebaa?—Fakke. 22:1.

² Kunni fakkeenni, Yihowwa summi isiki baꞌeexxa yanna maachchi isoꞌn laqemeexxa egennannoshsha gargaaraan. Isixxe manfasiniinxe oosenaaꞌn mitti, isoꞌo uuddaaxxa dhariinxa yaane keꞌitiinxe manjoꞌn Heewaniꞌn haasoꞌeen. Isenna dhara konneꞌe addatteen. Konne dharixxe buutonni keꞌitiinki hadi noꞌoki Yihowwaꞌn jallateen. Tennenaaꞌn kexxeexxa cubbonna reyo manjiinke beltibaꞌa daggeen. (Dada. 3:1-6; Roome 5:12) Taꞌa buttateꞌn uundaannexxi rakko duuchchi, reyo, bagedi, abari dageeki, Seexani Edene Gennete giddo haasoꞌeeke dharanaaꞌn kexxeexxinniten. Yihowwa summi isiki baꞌeexxeennaa tennenaaꞌn kexxeexxa daggeexxe yaaneꞌn yaadee? Yaadaaxxa mama affeexxe yaanebaan. Kaddoolenna, Yihowwa qaraarfatebaan yookiin halo abixxebaan. Tenne irra “gammashshotike Mageno” kadee hedheen.”—1 Ximo. 1:11.

3. Maa assatixxa bado anfeene?

³ Noꞌonna “Yihowwaka summa jajje” hiyyaꞌneeke konne shollake ajajiꞌaa ajajemati, summi isiki, qulloomaashsha noꞌonaaꞌn heqqendaaxxa assatixxa bado anfeennen. (Faaro 113:1) Tenne assa dandeennannoki konne qullichchi annixxa eloxxa yaane welekeeꞌe haasoꞌatiten. Ati iitta assitaate? Mageni noꞌokika summa woꞌma qalbenni janjannoshsha assaaka sase hunna afeeka yaada uundo.

SUMMA ISIKA JANJANNO WODDA YIHOWWAꞌA GAMMACHCHIINSANNON

4. Saadino noꞌoxxi Yihowwaꞌa gammachchiissaꞌneeki mayeete? Fakkeenniki kulle. (Fakke uudi.)

⁴ Iimatike Anni noꞌokika summa janjanno wodda isi gammadaan. (Faaro 119:108) Iitta hiyyo, duuchchiinxa dandeꞌaaki Mageni, cubbichchi manji saadinonna jajjabeenni hasisammashsha isiꞌaanna jajino hasissaan hiyyotee? Waawwot. Konne fakkeenna hedde. Mitte shiixxooxxi belto jaalalati anna isekike goobaꞌn marxende, “ati butta duuchchaꞌn hedheeke annuwwanaaꞌn haranga gargarit hexxetteken!” hiteen. Annikinna isi hedebaaxxa yaane belto tinni haasooteexxeꞌe haranga gammadeen. Mayee? Anni kunni gammadeexxeꞌe, jajino harsaꞌneeke ifiꞌni addataꞌnebaake anna hine heda hasissaa? Waawwot. Tenneꞌaa irra, belto isixxi jaalalanna saadino leellishshaa wodda uudateꞌe halchaꞌneeke jabake anna kadeexxa addata dandeennannon. Anni kunninna, belto isixxi, konne saadinotikenna jaalalatike adabinni nophphitoole gammashsho alfitaaxxa egeꞌneꞌeen. Tennen weli fakkaattaanxa, lumoki Anni Yihowwa isoꞌo janjanno wodda gammadaan.

5. Mageniinka summa jajati hiini yaane dharake kaddeexxa kokeesinanno?

⁵ Iimateꞌn hedheeka Anna noꞌoka jaja, Seexani noꞌoꞌo uuddaaxxa haasoꞌeexxi yaane dharake kaddeexxa kokeesinannoshsha gargaartaan. Seexani ayyinna Mageniinke summiꞌa addatenshati uurra dandeꞌabaan hiyye haasoꞌeen. Isixxe hedinoshsha kaddoole, ayyinna Magenokeꞌe addatemaaki hedhebaan hiyyoten. Noꞌo Magenokeꞌe ergatemmaanneki alfinaannexxe laꞌoꞌa hineete kaddeexxa haasoꞌeen. (Iyyo. 1:9-11; 2:4) Kaddomaleꞌe, Iyyoobi, Seexani dharichchake kadeexxa leellisheen. Atinata? Noꞌo duuchchiing addatenshat noꞌoke Annike summiꞌa uurratinna addatenshati isiꞌa ergatemati isoꞌo gammachchiisatixxa baalle anfeennen. (Fakke. 27:11) Iitta assa lumoke ulfinnan.

6. Mootichcha Daawitiinna Lewaawoota fakkaata dandeennannoki hittate? (Nehmiya 9:5)

⁶ Addatemeeki manni Magenokeꞌe afeexxi jaalala woꞌma qalbenni summa isika jajaashsha assitaan. Mootichchi Daawitinna: “Yihowwaꞌa jajo; ayyunte anxi duuchchinna qullichcha summa isika jajjowwaal” hiyye borreesseen. (Faaro 103:1) Daawiti Yihowwaka summa jaja, Yihowwaanni jajate kaddeexxa egeꞌneemman. Yihowwaki summi ayyunte isixxa ifisaake kademmaxxee, isika eloka adabanna manbeꞌa assitaaxxa huje isixxa qalli hinannoshsha assaan. Daawiti Anni isikiki summi qulloomaashshanna jajemaashsha hasaamman. Isinna tenne asseeki ayyunte isixxe duuchchinni, tinninna woꞌma qalbenniten. Isishshanni Lewaawootinna, Yihowwaꞌa jajat fakkeenna kadeemman. Insaꞌnenna Yihowwake qullichcha summiꞌa hasissaaxxa jajino, hiyyichchi insaꞌneke callinni woꞌma kadeeke orinni, ifisa dandeennabaaxxa ifi heeshshi assati addanteemman. (Nehmiya 9:5 yaansis.) Tinni ifi heeshshi assat qalbetenaaꞌn shiqqeexxi jajino, Yihowwaxxi qalbe gammaddaashsha assitaaxxe kaddeexxi mama affeexxebaan.

7. Ergachchotinna barra barratinxe hedho noꞌoxxeꞌn Yihowwaka summa jaja dandeennannoki hittate?

⁷ Techchixxe yannaꞌn, noꞌonna Yihowwa uuddaaxxa gammashshot, saadinotinna jaalalati haasoꞌati isoꞌo gammachchiisa dandeennannon. Ergachchoteꞌn heꞌnanno wodda, taakkaki noꞌoki yaadi, manni Yihowwabaꞌa shiiqeexxi isi jaalalatike Anna kadeexxa noꞌoshshanni egeꞌnaashsha gargaaraten. (Yaꞌiqo. 4:8) Maxaafa Qullichchakenaaꞌn Yihowwa, jaalalatike, gamissabaake, beekkumanna hunna ittan wele gammachchiisaaka adabuwwa afeeke kadeexxa, mannakeꞌe kullanno wodda, yoꞌoshsha gammandannon. Isoꞌo fakkaatateꞌe woꞌlaancho assati isoꞌo janjannon ittan gammachchiinsannon. (Efe. 5:1) Tenne fuggaaleette buttaꞌn heꞌne iitta assinaannexxe kaddoole welekenaaꞌn gargarit heꞌneenneke kandeennexxa manni hubataaxxinna hexxaan. (Mat. 5:14-16) Barra barrandeꞌn konne mannini afemmanno wodda, tenne yaane assinaanneki mayeete kaddeexxa ifisa dandeennannon. Tennenaaꞌn kexxeexxa, qajeelto qalbe afeeki manni, Mageniinbaꞌa higa hasissaaxxa heda dandeꞌaan. Konne orinni Yihowwa janjanno wodda qalbe isixxi gammaddaashsha assinannon.—1 Ximo. 2:3, 4.

YIHOWWAKA SUMMA JANJANNO WODDA, YESUUSINNA GAMMADAAN

8. Yihowwaka summa jajati, Yesuusi fakkeenna kadeeki hittate?

⁸ Iimateꞌninna buttateꞌni hexxeexxi hedatixxa dandeette affeexxi dada duuchchi, Belt Anna isika egeꞌneeshsha egendeexxi hexxebaan. (Mat. 11:27) Yesuusi, Yihowwaꞌa eyyammaxxeꞌe, summa isika jajati fakkeenna kadeen. (Yoha. 14:31) Reyeba edi darre hexxemmaxxe hashshaꞌn Anni isikibaaꞌa kadhatee wodda, buttatixxa ergachcho isixxa: “summa atika insaꞌnaaꞌa egeꞌnisheennen” hiyyatiten muuxeeki. (Yoha. 17:26) Iitta hiyyeeki maa hiyyatee haseete?

9. Yesuusi Anni isiki hitta hedheeke kadeexxa ifisatee elo garinni fakkeenna laꞌoonfateeki hittate?

⁹ Yesuusi Mageniinki summi Yihowwate kadeexxa kulatenaaꞌn caldeexxa yaane asseen. Yesuusi barsiisaammaki Ayhudooti Mageniinki summi Yihowwate kadeexxa egeꞌneemman. Kaddomaleꞌe Yesuusi fakkeenna kadat “isixxa ayyunte... ifiseen.” (Yoha. 1:17, 18) Fakkeennakeꞌe, Ibrasixxetixxi qullitte borro, Yihowwa gattowaaliitikenna marartetike kadeexxa kuldaan. (Zets. 34:5-7) Yesuusi tinni dhugaate kaddeexxa, faangoꞌa beltonna anna isika uuddaaxxa haasoꞌeeke fakkeennaꞌn caꞌa asse ifiseen. Aadde aageeke beltiki anni “bayyiiꞌninni” belto isika uudeexxi, “isibaaꞌa gongati, isoꞌo hanqalfedhe qalbe mittenni gattowwaal hiyyeexxa” yaansissanno wodda, Yihowwaxxa gattowwaaliinnaa mararte haranga caꞌa hiteexxe fakkeꞌn uuda dandeennannon. (Luqa. 15:11-32) Konne fakkeennini, Yesuusi Anni isikinna iittanni hedheeke kadeexxa leellisheen.

10. (a) Yesuusi Anna isikika deetichcha summa laꞌoonfataammaxxanna welinna laꞌoonfataa hasaammaxxa hitta egeꞌna dandeennanno? (Marqoosi 5:19) (Fakke uudi.) (b) Yesuusi techchixxe yannaꞌn maa assinonnaa hasaꞌne?

¹⁰ Yesuusi Anni isikika deettichcha summa weli manninna laꞌoonfataashsha hasaamaꞌa? Eenaꞌa. Baro okkoneꞌn hexxemmaxxi mitte mitte addetixxi akeekisanoole, Mageniinki summi qullichcha kademmaxxeꞌe yeꞌa hasissabaan, hitee addattaamman, kaddomaleꞌe, Yesuusi tinni qullitte borroꞌn hundeessendebaaxxi aada Anni isikika summa ulfeessabaashsha gufo kaddoꞌa waalebaan. Gergeesenoon hiyyendaaxxe bakkaꞌn durriisi abideemmaka manjichcho fayyiseemmaxxa yanna kaddeexxa yaane uundo. Ardikinna sodaatatenaaꞌn kexxeexxa, Yesuusi eetene bakkanaaꞌn meꞌaashsha kadhateen, tenneꞌa isinna eettene bakkanaaꞌn welebaaꞌa meꞌeen. (Marqo. 5:16, 17) Koddoolenna, Yesuusi Yihowwaki summi eettene bakkaꞌn egeꞌnemoꞌaa hasaamman. Tenneꞌa, fayyiseemmake manjichchoꞌn, tenne yaane asseeki Yesuusite kadebaaki, Yihowwate kadeexxa mannakeꞌe haasoꞌaashsha kuleen. (Marqoosi 5:19 yaansis.)a Isi techchonna, Anni isikika summa butta duuchchaꞌn egeꞌninshonaꞌa hasaꞌneen! (Mat. 24:14; 28:19, 20) Noꞌonaaꞌn heqqendaaxxa assinonnole Mootichcha noꞌoka gammachchiinsannon.

11. Yesuusi hordofooleeyye isixxi maa hite kadhattaashsha barsiisee? Tinni yaane laꞌo affeeki mayeete? (Hiziqeli 36:23)

¹¹ Yihowwaki yaadi, summa ifika qulloonsatenna xure duuchchanaaꞌn caꞌa assate kaddeexxa, Yesuusi egeꞌneemman. Yesuusi hordofooleeyye isixxa: “Iimateꞌn hexxetteki Anni noꞌoki, summi atiki qulloomowwaal” hite kadhattaashsha barsiiseeki tenneꞌaaten. (Mat. 6:9) Yesuusi, summi konnexxi qullooma, dada duuchcha uudaaxxe yaane kaddeexxa egeꞌneemman. (Hiziqeli 36:23 yaansis.) Iimateꞌninna buttateꞌn hexxeexxi hedatixxa dandeette affeexxi dada duuchchi, Yihowwaka summa qulloonsateꞌe, Yesuusi assee qicixxa assiteenxi hexxebaan. Yesuusi abidemeemmaxxa yanna, naaphi isiki isoꞌo maachcho balleesseen hiyyeemaꞌa? Mageno yowween hineemman! Yesuusiꞌn Anni isikika qullichcha summa balleessa yookiin battoonsa, cubbo duuchchanaaꞌn caaldeexxe cubbo fakkaattaaxxi egeꞌnendeexxen. Tenne yaanenni kuꞌlemanna balleessanjoke hiyyema haranga isoꞌo yaadissaaxxe yaanemman. Isinna abidemee edi darre “jaba qicinni wixixxi” hiyyeeki tenneꞌaate kada dandeettaan.—Luqa. 22:41-44.

12. Yesuusi duuchchiniigi iimi darre hedheeke orinni, Anna isikika summa qulloonseeki hittate?

¹² Yesuusi, Anna isikika summa qulloonsateꞌe hiyyaa wodda, abarinna yowwichchi geyaaꞌnaaꞌa ittan dhariki summa isika balleesinaaꞌnaan dandeꞌe saꞌeemman. Anna isikeꞌe duuchchiinxe yaanenni ajajemaammaxxa egeꞌneemmaxxee isoꞌo shookissaaxxi yaane hexxemmabaan. (Ibra. 12:2) Seexani, eetene haꞌurtite yannaꞌn, toggichcha kadeeke orinni isoꞌo miidhateꞌe hasaammaxxa egeꞌneemman. (Luqa. 22:2-4; 23:33, 34) Seexani, Yesuusi qullummati addatemeꞌe uurrabaashsha assa dandeꞌaaxxa kokiinkemman, Kaddomaleꞌe herregi isiki qabebaan! Yesuusi, Seexani dharichchake kadeexxannaa Yohowwa jabaxxe hega uushsho giddonni, isiꞌa dhugaati addatendaaxxa ergantooleyye afeexxa kokeesseꞌeen!

13. Mootichcha haꞌnooka gammachchiisa dandeetinaaki hittate?

¹³ Mootichcha haꞌnooka gammachchiisa hasinaꞌnee? Yihowwaka summa janjaannexxa leellinshannoki, weli manni Mageni dhugaatike kadeexxa egeꞌnaashsha gargaaratiten. Iitta assitinaꞌnoole Yesuusixxa faana hordofateꞌn hexxineen. (1 Pheex. 2:21) Haꞌnoonna Yesuusishshanni Yihowwaꞌa gammachchiisa dandeetinaan, ittan Seexani shooko afebaake dharichcha kadeexxa kokeesitinaan!

YIHOWWAKA SUMMA JANJANNO WODDA MANJIINXI HEDHO FAYYITAASHSHA GARGAARRANNON

14-15. Yihowwa uuddaaxxa manna barsiinsanno wodda hiini manbeꞌa assitaaxxi yaane kada dandeeta?

¹⁴ Yihowwaka summa janjanno wodda manjiinxa hedho baꞌnetenaaꞌn gargaarrannon. Hitta? Seexani “addatabaake mannixxa sammo doochcheꞌeen.” (2 Qoro. 4:4) Tennenaaꞌn kexxeexxa; ‘Mageni hedhebaan, manjiinke beltinaaꞌn bayyateeken, Manjokee hedaꞌneekebaan, mararabaakenna cubbaaleeyye baro barokeꞌe geebe geeraraake’ hiyyaaka Seexaniinka dhara addantaꞌneen. Seexani konnee dhara haasoꞌeexxi buuto: Yihowwaka qullichcha summa balleessateenna manji isibaaꞌa shiqabaashsha assateeten. Kaddoolenna, huje noꞌoxxi Seexaniinki yaadi qababaashsha assitaan. Anna noꞌoka uuddaaxxa dhugaate kaddeexxa yaane manjokee barsiisat, Mageni noꞌokika qullichcha summa janjannon. Tinni maa laꞌo affee?

¹⁵ Mageniinxe qaalexxi dhugaa, tennete hinabaaxxa jabaxxa hunna affeen. Mannakeꞌe Yihowwa uuddaaxxanna isi hitta hedheeke kadeexxa barsiisat, haranga manbeꞌa assitaaxxa yaane uundannon. Seexaniinke dharinni buqendeexxi, konne mannixxi ille banendaa wodda, insaꞌnenna noꞌoshshanni Yihowwa eloka adaba afeeke Mageno kadeexxa uuda dandeennaan. Insaꞌnenna gabala affebaaxxa hunna isixxa uundaa wodda haranga manbeꞌa hinaan. (Isa. 40:26) Ittan, dhugaatixxa murte murteessaꞌneeke Mageno kadeexxanna egennaan. (Zedag. 32:4) Jabake isike beekumanaaꞌninna heddo yaane barantaan. (Isa. 55:9; Roome 11:33) Isi jaalalatike Mageno kadeexxa egennaa woddanna dayyeeffantaan. (1 Yoha. 4:8) Yihowwabaꞌa shinqaꞌni meneexxe qixxeꞌn isixxe ooseshshanni baro baro hedhatike tasfaꞌn addantaan. Manni insaꞌneke Annibaꞌa shiqaashsha gargaaratixxa ulfinna affeexxa lumoxxa baalle anfeennen! Iitta assinaannexxe kaddoole, Yihowwa “isinni hunjaanneke mannishsha” assee uudaan—1 Qoro. 3:5, 9.

16. Yihowwaka summa egeꞌnatenaaꞌn kexxeexxa, mitti mitti mannixxi hedho jijjiirendeexxa leellishaaka fakkeenna kuli.

¹⁶ Edinsennexxi Mageniinki summi Yihowwate kadeexxa mannakeꞌe barsiinsannoxxi hexxaan. Iitta assandi qajeelto qalbe afeeke mannixxi hedho, jijjiirendaashsha assitaan. Fakkeennakee, dargaggeette Aliyahi nophphiteeki Kirsitaana kadeeke mini hadi giddobaan. Kaddomaleꞌe, adde isexxeꞌn okkone qico gammaddaammabaan ittan Mageniibbaꞌa shiqqeechcho iseꞌn fakkaattaammabaan. Yihowwaxxe Naqaashenni Maxaafa Qullichcha barata saffeechchi uduma, iseki jeeji jijjiiremeen. Isenna Mageno jaalo isekishsha uuda saffeen. Ittan heddo Maxaafi Qullichchiinxe tikanaaꞌn, Mageniinka deettichcha summa balleesineꞌe, bakkateꞌn Gootta hiyyaaka ulfinniinka summa tukkeesineexxa, egendaa wodda manbeꞌa hiteen. Mageniinki summi Yihowwate kadeexxa egeꞌna hedho isexxa jijjiirteen. Isenna iitta hite haasooteen:b “Anki eloki jaali summa afeeken!” Iitta hiteexxi buuto maachcho? “Taꞌixxe yannaꞌn qalbe anxi nageꞌiki woꞌmiteen. Haranga ulfeessemeennechcho aneꞌni labbaꞌneen” hiteen. Isitive hiyyemaaki sirballi nophpheeki aada ifixxee lumoxxa bakka uwwaꞌneeke Ayhuudike ardi giddon. Isinna addetixxe orga giddo uudaꞌneexxe elobaaxxe yaanenaaꞌn kexxeexxa addetixxe organaaꞌn ifi bayyiseemman. Kaddomaleꞌe, ama isixxi rerteeꞌnaaꞌa yaadoteꞌn hedhemmaxxa yanna, Yihowwaxxe Naqaashenni Maxaafa Qullichcha baratateꞌe fedhiitike kadeen. Maxaafa Qullichchakenaaꞌn Mageniinka summa egeꞌnatenaaꞌn kexxeexxa yoꞌoshsha gammadeen. Iittanna hiyyeen: “Mageni summa afeexxa ijjenda egeꞌneennabaan.” Ittan lebeexxi: “Taakkaxxe yannaaꞌa Mageni dhugaandinni hedheexxa egeꞌnennen! Isinna aniꞌa illeti uudaanneke manjishshatemman. Okkoneechchinni uduma jaalo alfeennexxa addatennen”

17. Yihowwaka summa jaja ittin sufatee, murteessexxineeki mayeete? (Fakke uudi.)

¹⁷ Lassatixxenna barsiisatixxe hujeꞌn hexxatto wodda, qullichcha kadeeka Yihowwaka summa mannakeeꞌe kuldaatte? Mageni noꞌoki hitta hedheeke kadeexxa manni egeꞌnaashsha gargaartaatte? Iitta assitinaꞌnoole Mageniinka summa jajateꞌn hexxineen. Manni konne summi uduma hexxeexxa, ayyunte Mageniinxa egeꞌnaashsha gargaarat, Yihowwaka qullichcha summa jaja ittin sufa dandeetinaan. Konne orinni, manjiinxa hedho baꞌnetenaaꞌn gargaartinaan. Ittan, Mootichchi haꞌnookika Yesuusi Kirsitoosika fakkeenna hordofinaan. Duuchchiinxi iimi darre jaalalatika Anna haꞌnooka gammachchiisinaan. Summa [isika] baro baro jajje!—Faaro 145:2.