Jaalala Lassitinaashsha Tirtirsitowwaal!

1. 2023 woggatixxe bukkiiꞌn maachcho baranteennaꞌa?

MITTE MITTE adde noꞌoxxanna ergachchotixxa huje uuddaaxxa gammachchiisaaka egeꞌnishanjo 2023 xxe woggatixxe bukkiiꞌn,a lanqeennan. Fakkeennakeꞌe, Lumoxxi Baabiloone baxxeechchi uuduma mitti mitti manni, Yihowwake ardike gamaꞌn uurratixxa futtii alfaaxxa baranteennan. Sadaasa 2023 keꞌn, Mootummatixxi baꞌlisanoole ergachchotixxa ripoorte hiissa hasissabaaxxa lanqeennan. Tinni jijjiirra ergatenshatee anfeennexxi hinaaffe qiiddaashsha assitaaxxee? Ijjenda waawwot!

2. Barra barrandeꞌni ergachchotixxi huje edi irran caala wiinamiinxe kaddeeki mayeete? (Marqoosi 13:10)

² Hashshe soodaashshani ergachchotixxi huje edi irran caala wiinamiinxe kaddaꞌn meꞌitaꞌneen. Mayee? Gatteexxi yanna shiixxooxxe kaddemmaxxeeten. Muuxamiinxe barruwwaxxa lassatixxa huje uuddaaxxa Yesuusi maa hiyyeexxa qalli hiyye. (Marqoosi 13:10 yaansis.) Matwoosinna borreessemmashshani, Yesuusi “muuxami” dagebaa edi darre butta duuchchaꞌni hedhaꞌneeke manjiꞌa gammachchiissaaxxi odo lassendaaxxa haasoꞌeen. (Mat. 24:14) Kunni haasoꞌinna Seexaniinxi fuggoxxi aada hexxemmashshanni baxxaaxxa ifisaꞌneeken. Yihowwa tinni yaane shiqixxe yannaꞌni haano kaddaaxxa “barranna saate” mureꞌeen. (Mat. 24:36; 25:13; Huje 1:7) Hashshe soodaashshanni muuxamiinxe barrabaaꞌa shinqaꞌni meꞌinaannen. (Roome 13:11) Muuxami dagaa qicoꞌn lassa ittin sufiyyo hasissaan.

3. Lassinannoshsha tirtirsitaaxxi yaane maachcho?

³ Ergachchotixxa huje uuddaaxxa, noꞌo duuchchiingi heda hasissaaki qortumuwwi hedheen: Gammachchiissaaxxa odo lassinaanneki mayeete? Buutotinna, lassinannoshsha jaalala tirtirsitaammaxxeeten. Ergachchotixxe hujeꞌn assinaannexxi yaane; gammachchiissaaxxe odoꞌa anfeennexxa jaalala, manjoke anfeennexxa jaalalanna, duuchchiinxi iimi darre Yihowwanna summa isikeꞌe anfeennexxa jaalala leellishshaan. Mitte mittenda uundo.

GAMMACHCHIISSAAXXE ODOꞌA ANFEENNEXXA JAALALA

4. Gammachchiissaaxxa odo lanqanno wodda maa assinnano?

⁴ Maate atixxi giddo manji ilemeexxa laqqatto wodda, hassaatteexxa huje alfa dandeettatoxxa kullaa wodda maachchi ateꞌn laqemaaxxa qalli hitatto? Tennee gammachchiissaaxxa odo hado atikeenna jaaluwwa atikeꞌe kuldattoxxi mama affeexxebaan. Duuchchiinxenaaꞌn caaldeexxa gammachchiissaaxxa Mageniinxe Mootummaxxa odo laqqeetta wodda iitta ateꞌn laqendeemmaꞌa?

5. Taakkaa dhugaa Qaale Mageniinxenaaꞌn baratteetta wodda ateꞌn maachchi laqemeemmaꞌa? (Fakkuwwa uudi.)

⁵ Taakkaaꞌa, Qaale Mageniinxenaaꞌn dhugaa baratteetta wodda machchi ateꞌn laqemeemmaxxa hekki hite hedi. Iimatiki Anni atiki ateꞌe eeyyaꞌneexxa, isoꞌo mageneeffataꞌneeke mannixxe una kaddottaa hasaꞌneexxa, yaaddonna rakko balleesatee kako aageexxa, eetaateki reyeeki manji haarooxxe buttaꞌn higgeen reyoteenaaꞌn keꞌeeꞌnaa uuda dandeettattoxxa, ittan baca yaane baratteeten. (Marqo. 10:29, 30; Yoha. 5:28, 29; Roome 8:38, 39; Leellisha. 21:3, 4) Tinni dhugaanna qalbe atixxi gammadaashsha assiteꞌeen. (Luqa. 24:32) Tenne baratteettexxa yaane eetaattaxxeeꞌe, tennee fiixa kaddeexxa dhugaaꞌa ifiꞌaan calla buqqexxe abixxa dandeettebexxon!—Erimiyaasi 20:9 welt hokkokisiis.

6. Erinsitixxenna Roozaxxe hedhotixxe barannonaaꞌn maachcho baratteete?

⁶ Tenneeꞌe hedhotixxa baranno hubbatte. Dayyi Erinsitib anni isiki reeyaa wodda tomme woggake beltomman. Erinsit iitta hiyyeen: “Iimaatee meꞌeeki? Reyeeshshanni baro baro gata hiyyotee?’ Hiyyaꞌni qoraannan: Anna affeexxa oose uudanno wodda gaabbaannan.” Erinsiti duuchchinii wodda anna isika moongeeke hirreesiba maraꞌn: “Maganneten Mageno anni anki haba hedheexxa egeꞌnonnaa hasaannen” hiyyaꞌn guluffatee kadhataamman. Erinsiti anni isiki reyeexxe 17 wogga uuduma, Maxaafa Qullichcha barataashsha lanqaa woddi ishshi hiyye adhdheen. Isinna reyeeki manji egeꞌneechchi hedhebaaxxa, jabake diiphoꞌni hedheeshshate kaddeexxanna Maxaafi Qullichchi giddo reyotenaaꞌn keꞌatiki tasfi hedheexxa baratatenaaꞌn kexxeexxa haranga gammadeen. (Meki. 9:5, 10; Huje 24:15) Isinna, qeerraaxxe yannaa isooꞌo rakkisaꞌn tureemmake qortumiꞌa hiissichcho alfeen. Isixxi miniinxi amanna Rooza Maxaafa Qullichcha isinni welti barata saffeen, tennee barattaammaxxa yaanenna eetemman. 1978 woggaꞌn cuuphemmeen. Insaꞌnenna tenneeꞌe baranteexxa yaane hadokee, jaaluwwakee, ittan laqaake duuchchiꞌa gammashshoti kullaamman. Tennenaaꞌn kexxeexxa, Erinsitinna Rooza 70 iimi darre hedheeki manni Yihowwaꞌa egeꞌneꞌe cuuphemaashsha gargaarreen.

7. Qalbe noꞌoxxi giddo Maxaafi Qullichchiinxe dhugaaxxi jaalala hidda oltitaa wodda maa kandano? (Luqqaasi 6:45)

⁷ Maxaafi Qullichchiinxi jaalala qalbe noꞌoxxi giddo hidda oltitaa wodda sammi hiyya dandeennabeꞌnoxxi egeꞌneendeexxen. (Luqqaasi 6:45 yaansis.) Keꞌitiinke dhibbeesso baroꞌni hexxemmaxxi Yesuusixxi hordofooleeyye: “Uundennexxannaa lanqennexxa yaane haasoꞌaatenaaꞌn uduma hingabeꞌnon” hitemmaxxishsha noꞌoꞌninna iittani laqendaan. (Huje 4:20) Dhugaa qalbe giddixxeni eenaannaxxeeꞌe dandeessiissee qicoꞌni heddi manniꞌa kullonnaaꞌa hansaannen.

LASSINANNEKI MANNA EENANNAXXEETEN

8. Welekee gammachchiissaaxxa odo kullannoshsha noꞌoꞌo tirtirsitaaxxi yaane maachcho (“Manjo Eeyye—Hordofooleeyye Asse” hitaꞌneexxa kollo uudi.) (Fakke uudi.)

⁸ Noꞌonna Yihowwashshanna Belti isikishsha manjo eenaannen. (Fakke. 8:31; Yoha. 3:16) “Mageni belo”nna “tasfibelo” hedhaꞌneeke manniꞌa qalbe giddixxa mararte anfeennen. (Effe. 2:12) Insaꞌne hedho insaꞌnexxeꞌni geltaꞌneexxe rakkonaaꞌn kexxeexxa bale giddo inbeeshshaten, noꞌo kinni eettenne bakkanaaꞌn insaꞌne fulchitaaxxa Mageniinxe Mootummaxxa gammachchissaaxxa odo anfeennen. Tinni fiixa kaddeexxi erga kinni qalbe insaꞌneexxi addeti woꞌmitaashshanna taꞌanna eloxxa hedho heꞌnaashsha gargaartaan ittan Mageniinxe haarooxxe buttaꞌn ‘dhugaatixxa’ bari bariinxa hedho heꞌnaashsha assitaan.—1 Ximo. 6:19.

9. Ediꞌa hexxeexxa yanna uuddaaxxa manna xexxeꞌachchiinsaannexxi yaane maachcho? Mayee? (Hiziqeli 33:7, 8)

⁹ Manjokeeꞌe anfeennexxi jaalala, tenne fuggoxxe buttaki muuxami shiqeexxa manna xexxeꞌachchiinsannoshsha tirtirsitaan. (Hiziqeli 33:7, 8 yaansis.) Ollaꞌa noꞌokee, Yihowwaꞌa egeꞌnebaake hado noꞌokee yaandaannen. Heddi manni buttatike safonaaꞌn konne qicoꞌn, kade egeꞌneebaaki laangaxxa kadabaaki “lumoki abari” dagaꞌneexxa qalli hiyyebaangi maaliinxa yaane gussateꞌn hedheen. (Mat. 24:21) Murtetixxa barra dhariinxi adde baxxaaxxanna okkooꞌn tinni fuggitte aada hexxeeshshanni Armaageedoonike bagedinni baxxaaxxa manni egeꞌnoꞌa hansaannen. (Leellisha. 16:14, 16; 17:16, 17; 19:11, 19, 20) Dandeessiisse qicoꞌni heddi manni xexxeꞌachchiinsaannexxa yaane laqati, qullitte mageneeffachchoꞌni noꞌoni mitteba bukki hiyyaashsha kadhantaannen. Taꞌa noꞌo xexxeꞌachchiinsaannexxa yaane laqabaaka, eenaanneka mini hado, ittan wele manna uuddaaxxa maa hinano?

10. Shiqixxe yannaꞌn kaddaꞌneexxe yaaneꞌaa manna xexxeꞌachchiisa hasisseeki mayeete?

¹⁰ Saxxeexxe qoꞌneꞌn uundeennashshanni, Lumoxxe Baabiloonexxa baꞌne uudati Yihowwabaa higaaki manni dedha fayya dandeꞌaaxxa uundeennan. Iittate kaddoole, manjo xexxeꞌachchiisa edi irran caala haranga hasissaaxxe yaanen. Tenne yaane deetinnoqqe: Taꞌa kullaannexxi yaane okkone wodda kaddaaxxa yaane qalli hinaashsha assitaaxxi hexxaan. (Hiziqeli 33:33 welt hokkokisiis.) Dedha noꞌo taꞌa xexxeꞌachchiinsaannexxa yaane qalli hineexxi, yanna muddebaangi dhugaatixxe mageneeffachchoꞌni noꞌoni welt mageneeffatatee dangaaxxi hexxaan. Filphisiyuusike bogaꞌn hedhemmaki ussuriinke miniki heqqanji yaada isika jijjiidheeki “jabaxxi buttiniinxi leleꞌma” kexxeechchi uduman, taꞌixxe yannaꞌninna kullaannexxa erga laqabaaki mitti mitti manni, dedha okkone manjichchishshanni Lumoxxe Baabiloonixxe baꞌneexxi lelemma kaddaa wodda yaada insaꞌneeka jijjiirraaxxi hexxaan.—Huje 16:25-34.

LASSINAANNEKI YIHOWWANNA SUMMA ISIKEE JAALALA ANFEENNAXXEETEN

11. Yihowwaꞌa lumminne, ulfinna, ittan hunna uwwa dandeennannoki hittate? (Leellisha. 4:11) (Fakkuwwa uudi.)

¹¹ Gammachchiissaaxxa odo lassinannoshsha assitaaxxi taakkaxxi buuto Mageno noꞌoke Yihowwanna qullichcha summa isikeeꞌe anfeennexxe jaalalan. Ergatensha noꞌoxxi, eenaanneka Mageno noꞌoka janjaannexxa leellinshaanneke orinaaꞌn mitteten. (Leellisha Yohaannisixxa 4:11 yaansis.) Iimatixxi faarsanoole: Mageno Yihowwaꞌa lumminni, ulfinninna hunna addatendeexxe mageneffatoole isixxenaaꞌn, isiꞌa hasissaaxxa faarsiteexxa faaro addantannon. “Duuchchiinxa yaane dadeeki” isote kadeexxanna hedhoti hedha dandeennenneki isixxe buutonnite kaddeexxa mannakeeꞌe kullanno wodda isiꞌa lumminnenna ulfinne uunannon. Isiꞌa hunna noꞌoxxa uunannoki, jeeji noꞌaa uwwedhee qicoꞌni, ergachchoteꞌni saꞌissatee yanna, hunnanna karra noꞌoxxa laꞌoonfantanno woddan. (Mat. 6:33; Luqa. 13:24; Qola. 3:23) Sholla qicini iitta hiyyo, eenaanneka Mageno uuddaaxxa haasoꞌa gammachchiissaan hiyyoten. Isika summannaa isi hitta hedheeke Mageno kadeexxa kullonnoshsha jaalala noꞌoꞌo gaddachchitaan. Mayee?

12. Ergachchoteꞌn summa Yihowwaka qulloonsinannoki hittate?

¹² Yihowwaa anfeennexxi jaalala summa isika qulloonsinannoshsha noꞌoꞌo tirtirsitaan. (Mat. 6:9) Seexani dharki balleeseeka Mageniinka summa caꞌa assinoonna haansaannen. (Dada. 3:1-5; Iyyo. 2:4; Yoha. 8:44) Ergachchoteꞌni Mageno noꞌokeeꞌe uurrati isoꞌo uuddaaxxa dhugaate kaddeexxa yaane caqasaake manji duuchchiꞌa kullannon. Duuchchiniingi manji, isiki taakkaki adabi jaalalate kadeexxa, isixxi galchanna qullitteteenna ille uusho beloxxe kadeexxa, ittan shiqixxe yannaꞌni isixxi Mootumma abara duuchcha buttatenaaꞌn balleesiteꞌe manji duuchchiꞌa nageꞌanna gammashsho idaggaaxxa egeꞌnoꞌaa hansaannen. (Faaro 37:10, 11, 29; 1 Yoha. 4:8) Ergachchoteꞌn Yihowwaꞌa uuddaaxxa yaane haasoonnanno wodda summa isika qulloonsinaannen. Ittan, noꞌonna summi noꞌokishshani heꞌnaannexxa egennanno wodda gammandannon. Iitta hinaanneki mayeete?

13. Yihowwaxxe Naqaashe hiyyeme yeꞌema noꞌaa ulfinna kaddeeki mayeete? (Isayaasi 43:10-12)

¹³ Yihowwa noꞌoꞌo isixxe “naqaashe” kandannoshsha melledheꞌeen. (Isayaasi 43:10-12 yaansis.) Shiixxooxxe wogguwwa edi darre, Iimike Bisinaaꞌn ergendeexxi daddaabbe iitta hiteemman: “Ayyetenna kandonnole alfinannoke ulfinni duuchchinaaꞌn caaleeki ulfinni, Yihowwaxxe Naqaashe hiyyeme yeꞌematen.” Iitta hinaanneki mayeete? Konnee fakkeenna hubbatte. Mitte murtetike mineꞌni affeettexxe yaaneꞌa atiꞌa naqaashe kadaaka manjo hassaattole mellexxattoki egendeettekenna addattattoken, eloka summa afeeki manji kulaaxxi dhugaa addachchiissaaxxe kaddaan. Yihowwanna isixxe Naqaashe kandannoshsha noꞌoꞌo melledhati, noꞌoꞌo adda egeꞌneexxanna dhugaatiki Mageni isoon calla kadeexxa welekee kullannoshsha noꞌoꞌo melledhati addataꞌneexxa leellisheꞌeen. Anfennexxe futtii duuchchaꞌni summa isika egeꞌnishatinna summa isika uuddaaxxa haasoꞌeendeexxi yaane duuchcha dharake kaddeexxa kokeessati isixxe naqaashe kada noꞌaa ulfinnaken. Iitta assati Yihowwaxxe Naqaashe hiyyemmeꞌe yeꞌemmenneke summishsha heꞌnaannaxxee hollinaannen!—Faaro 83:18; Roome 10:13-15.

MUUXAMII QICOꞌNI LASSINANNON

14. Ediꞌaa shiqixxe yannaꞌni hitta hexxeexxe gammachchiissaaxxe yaane noꞌoꞌo heqqitaꞌne?

¹⁴ Ediꞌa nꞌoꞌo heqqitaꞌneexxi yanna hittatta gammachchiissaꞌneexxe! Yihowwake gargaarsinni, baci manni lumoki abari safebaa edi darre dhugaatibaa dagaaxxa adde asseꞌnaanen. Ittan manjiinke raagaꞌni dukkanatixxe yanna kaddeexxe, lumoke abarixxa yanna heddi manni Seexaniinxe buttanaaꞌn fule noꞌonni welt Yihowwaꞌa jaja dandeꞌaaxxa egeꞌna gammandannoshsha assitaan!—Huje 13:48.

15-16. Ittin ediꞌa huja sunfannoxxi yaane maachcho? Haani qicoꞌn?

¹⁵ Okkone qicoꞌn, langaxxa higgaꞌnebaaxxa gammachchiissaaxxa Mageniinxe mootummaxxa odo, butta duuchchaꞌn lassatixxa bado anfeennen. Wele darrenaaꞌn kinni manjo xexxeꞌachchiisa ittin sufiyyo hasissaan, manji tenne fuggitte buttaki muuxami wiinamiki dagateꞌn hedheexxa egeꞌniyyo hasissaan. Murtetixxi yanna gelta wodda noꞌo lassateꞌn heꞌnennaxxi erga Mageno Yihowwabaaꞌn daggeexxe kaddeexxa egennaan.—Hizi. 38:23.

¹⁶ Iittate kaddoole maa assatee mudhdhineenne? Gammachchiissaaxxe odoꞌa anfeennexxe jaalalan, mannakee anfeennexxe jaalalaninna duuchchiinxi iimi darre Mageno Yihowwanna summa isikee anfeennexxe jaalalani tirtirsemati; halchati, wiinamikinna hinaaffeti Yihowwa “gelteꞌeen” hiyyaa qicoꞌni lassa ittin sunfannon!