Gattowwaali Hiyyati Yihowwaa Fakkaata Dandeettinaaki Hittate?

1-2. (a) Mitte noꞌoo miidheeke manjiꞌaa gattowwaali hiyya giddiiꞌnini haꞌurtaaki haanote? (b) Deenisi gattowwaali hitaaxxe manjo kaddeexxa leellishsheeki hittate?

WELEKEE Gattowwaali hiyya ateꞌni haꞌurtee egendee? Giddiiꞌnini mitti manji miitaaxxa yaane assaa wodda yookiin haasoꞌaa wodda heddo manjoꞌni gattowwaali hiyya haꞌurtaan. Kaddoolenna mufennaa aare waallennexxi gattowwaali hiyya dandeennannon. Fakkeennakeꞌe, manbeꞌa assitaaxxa gattowwaali leellishsheexxa Deenisia hiyyendaaxxe dayyoxxa hedhotixxa baranno uundo. Deenisinna iseki mini hadi 2017 woggaꞌni haarooxxa banendeexxa Yihowwaxxe Naqaashexxa Illitte Beero dooyyatee marreemman. Hadiꞌaa higateꞌni heꞌneeꞌnaa, wele kaamole oofaꞌneeki manjichchi kaamole uurrisa gopheexxi kaamole insaꞌnexxa ganeen. Deenisi gelteexxe balanaaꞌni kexxeexxa ifi haakkeen. Wodaanfatteechchi uduma oose isexxi jaba qicini miidhendeexxa, ittan miniinki anni iseki Birayaani reyeexxa affeen. Eettene yanna qalli hiyyati Deenisi iitta hiteen, “Godobi anee lameba qurubbi hiyyeen, ittan assannonxi yaane anenaaꞌni baxxeen.” Udumiiꞌni, insaꞌnee ganeemmaki oofalli miidhemeebaaxxa yookiin gelteexxe yaanenaaꞌni kexxeexxa rifateebaaxxa egendeen. Isenna Yihowwa nageꞌa iseꞌaa uwwaashsha kadhatteen.

² Insaꞌnee ganeemmaki manjichchinna lubbo balleessatike wonjalinni kuꞌlemeemman. Murtetiki mini isoo balleessanjoke hiyye murteesoole usurema dandeꞌaan. Kaddomaleꞌe, murtetiki mini konne manjichchoꞌni tarkaaffe adhdhendaꞌneeki Deenisi haasoottaake yaadixxe hundaayyeshshate kaddeexxa iseꞌni kuleen. Deenisi; “hedho anxeꞌni gelteexxa fuggoxxa yaane qalli hiyyanno wodda, gobendeexxa mada anxa mitti manji dare, garooniki madateꞌni maxine woreeshsha fakkaatteen.” Deenisi heenooxxe torba uduma mini hado isekeꞌni tennee jabaxxa bala geesiseeke manjichchoꞌni naqaashshumma kulatee murte uwwendaꞌneexxe bakkaꞌni ofoldeen. Maa hite? Deenisi, murteessalli konnee manjichcho mararaashsha qorteen.b Ise haasoꞌa birteechchi uduma, Murtichchi indiddo wocci wocci assaꞌni iitta hiyyeen: “Murtetixxe hujeꞌni 25 wogga turanno qicoꞌni iitta hexxeexxa yaane laqe egeꞌnebeꞌnon. Miidhendeexxi maate miidhemmake manjiꞌaa mararte assinaashsha kadhattaaꞌnaa ijjenda laqe egeꞌnebeꞌnon. Jaalalatikanna gattowwaaliitika haasoꞌa laqe egeꞌnebeꞌnon.”

3. Deenisii gattowwaali hitaashsha gargaarteexxi yaane maachcho?

³ Deenisi gattowwaali hitaaxxe kaddaashsha gargaarteexxi yaane maachcho? Yihowwaxxe gattowwaaliiꞌni alalchaten. (Mik. 7:18) Yihowwa noꞌaa leellisheexxe gattowwaaliꞌaa saadino anfeennexxe kaddoole, noꞌonna welekee gattowwaali hiyya dandeennannon.

4. Yihowwa noꞌo assinonnaa hasaꞌneexxi yaane maachcho? (Effesooni 4:32)

⁴ Yihowwa isi noꞌaa tolanga gattowwaali hiyyemmashshani, noꞌonna welekee tolanga gattowwaali hinonnaa hasaꞌneen. (Effesooni 4:32 yaansis.) Ittan noꞌoo miidheeke manjiꞌaa gattowwaali hiyyatee qophpheeffanteenneke manna kandonnaa hasaꞌneen. (Far. 86:5; Luq. 17:4) Tenne qoꞌneꞌni, irran caala gattowwaali hinannoke manna kandannoshsha noꞌoo gargaartaaxxa sase yaane uundannon.

QALBE HAꞌNOOXXEꞌNI LAQENDAꞌNEEXXA YAANE BASHSHI HITINOQQE

5. Fakkeenna 12:18 xxe hundaayyeshsha, mitti manji noꞌoo mufachchiisaa wodda noꞌoo hitta asseechcho fakkaata dandeetta?

⁵ Mitti manji haasoꞌeexxe yookiin asseexxe yaanenaaꞌni kexxeexxa jaba qicini miidhemmannoxxi hexxaan. Giddiiꞌninni tennee yaane asseki shiqike jaalo noꞌoke yookiin mini hado kadaa wodda yaane irraan caala haꞌurtaan. (Far. 55:12-14) Mitte mitte yanna noꞌoꞌni laqendaaxxi yaane cuuphet ochchinni fakkaattoꞌaa dandeettaan. (Fakkeenna 12:18 yaansis.) Eettene yanna noꞌoꞌni laqendaꞌneexxa yaane buqedhatee yookiin bashshi hiyyatee woꞌlaanannoxxi hexxaan. Kaddomaleꞌe, iitta assa otteexxa cuuphe gonshebaangi waalatishshaten. Weli fakkaattaanxa, qalbe noꞌoxxeꞌni laqendaꞌneexxa yaane bashshi hinennexxi, yaane itti jijjiirendaan hine heqqa dandeennaaꞌnon.

6. Mitti manji noꞌoo mufachchiisaa wodda maa assinannoxxi hexxa?

⁶ Mitti manji noꞌoo mufachchiisaa wodda keꞌitokeꞌni assinannoxxi yaane aarate kada dandeettaan. Maxaafi Qulichchi hifantannoxxa haasoꞌaan. Kaddoolenna hifo noꞌoo boojitoꞌaa waallabeꞌnoshsha xexxeꞌachchiisaan. (Far. 4:4; Eff. 4:26) Mayee? Buutotinna hifo heddo yanna mitte yaane assinannoshsha tirtirsitammaxxeeten. Kaddoolenna, mitte mitte yanna kinni eloxxa laꞌonna affeen. (Yaq. 1:20) Mitti manji noꞌoo aarsaa wodda hifata hexxeenxe yaanen, kaddomaleꞌe, hifanteneshshan tura ifixxe filanno kaddeexxa qalliyye.

7. Mitti manji noꞌoo miidhaa wodda wele noꞌoꞌni laqendaaxxi yaane maachcho?

⁷ Mitti manji noꞌoꞌni elobaaxxa yaane assa wodda, wele yaanenna noꞌoꞌni laqendaaxxinna hexxaan. Fakkeennakeꞌe, Ani hiyyendaaxxi dayyo iitta hiteen: “Oosumma hedhennaxxa yanna anni anki ama anxa waaleexxi anee karkarsitaammaxxa manjichcho aadheen. Hunemeennechcho aneꞌni fakkatteen. Oose illaa wodda kinni oose tinni bakka anxa adhdhiteechcho aneꞌni labbeen. Tennenaaꞌni kexxeexxa nophphenneki, anee eeyyaꞌneeki manji hedhebaan hitaaxxe hedinonniten.” Jorjeet hiyyandaaxxi dayyo miniinki anni iseki, iseꞌaa addatema gopheemmaxxa yanna iseꞌni laqendeexxa yaane iitta hitee ifisseemman: “Oosumandenaaꞌninni noꞌo jaaluwwakemman. Qajeellisano kande welt ergatemmaannan! Yaadi ankinna eenqemeen.” Naꞌoomi hiyyendaaxxi wele dayyonna iitta hiteen: “Anki miniinki anni anee iitta miidhaan hiyye ijjenda hede egeꞌnebeꞌnon. Isi anee shoꞌome pornogiraafe uudaammaxxa addateexxa yanna, sobemeennechchonna waakkatemeennechcho aneꞌni fakkaatteen.

8. (a) Wele manjiꞌaa gattowwaali hinannoshsha assitaaxxi mitte mitte buutuwwa heente? (b) Gattowwaali hinanno wodda maa laꞌo alfinanno? (“Mitt Manji Yaadiki Miidhemmannoshsha Assoolenaꞌa?” hitaaxxa kollo uudi.)

⁸ Weli manni haasoꞌaaxxa yookiin assaaxxa yaane kuta dandeennaaꞌnon, kaddoolenna bado hiissa gophatee woꞌlaancho assa dandeennannon. Eloke hiyyemaaki hiissichchi gattowwaali hiyyaten. Mayee? Buutotinna Yihowwaa eenaannaxxeenna isinna gattowwaali hinonnaa hasaamaxxeeten. Mufe sammi hiyye abixxa elobaaxxa yaane hunjanoshsha assitaaxxinna fayyunte noꞌoxxeꞌni rakko idaggaaxxi hexxaan. (Fak. 14:17, 29, 30) Kirsitiinika fakkeenna hubatte. Iitta hiteen: “Aneꞌni geyeeke miidhdhamanaaꞌni kexxeexxa yaaddoti liqiinsemanno wodda albi anki adda farri hiyyabaan. Fayyuntetee eloxxe kaddebaaxxa sagale ita hasaannan. Adda diiphaanabaan, tenneꞌaa yaadi anki qixaana kada gopheen, tinni yaanenna bulii anxeꞌninna weliki afeennexxe mittunteꞌni rakko daddeen.”

9. Halo abixxa waala hasisseeki mayeete?

⁹ Noꞌoo midheeki manji balleessa ifixxa addata gophooleenna noꞌoꞌni geesiseeka miidhdhama heenonsa dandeennannon. Hitta assine? Iimiiꞌni uundennaxxi Jorjeet iitta hiteen: “Heenoxxa yanna adhdhitoolenna edike miniinke anna ankeꞌn abideennaxxa halonna mufe waaleennen. Tennenaaꞌni kexxeexxa qalbe anxi lumoka nageꞌa alfiteen.” Halo abida waallanno wodda qalbe noꞌoxxi aareti miidhendabaashsha assinannon. Iitta assinanno wodda ifiꞌaa eloxxa yaane assinaannen hiyyoten, tinninna elobaaxxa hedino waallannoshshanna gammashshoti heꞌnannoshsha assitaan. (Fak. 11:17) Gattowwaali hiyyatee yaadiki qophpheeffanteebeꞌnoxxa egennonnole maa assa hasissa?

QALBE NOꞌOXXEꞌNI LAQEMAAKA YAADA DANDEꞌA

10. Miidhememmaki yaadi noꞌoki fayyaa qicoꞌni, ifiꞌaa yanna uwwa hasisseeki mayeete? (Fakkuwwa uudi.)

¹⁰ Mufantabeꞌnoshsha yookiin aarrabeꞌnoshsha noꞌoo gargaartaaxxi yaane maachcho? Mitti ori, miidhemeeki yaadi noꞌoki fayyaa qicoꞌni yanna ifiꞌaa uwwaten. Mitti jaba qicini miidhemeeki manji ciꞌloomemeechchi uduma, bisi hige fayyatee yanna hasissaan. Weli fakkaattaanxa, mitte manjiꞌaa qalbet gattowwaali hiyyatee, qophpheeffanteenneke kadati edi darre miidhemeeki yaadi noꞌoki fayyaa qicoꞌni yanna hasissaan.—Mek. 3:3; 1Ph. 1:22.

11. (a) Gattowwaali hitinaashsha kadha gargaartaaki hittate? (b) Gattowwaaliitike kandaaki hittate kaddeexxa leellishshaaxxe viidiyonaaꞌni maachcho barattine?

¹¹ Gattowwaali hitinaashsha Yihowwa gargaaroꞌaa kadhati qorre.c Iimiiꞌni uundennaxxi Ani, kadha isee gargaarteeki hittate kaddeexxa ifisseen. Iitta hiteen: “Mini giddo heꞌnenneki duuchchiingi toggitte kaddebaaxxa yaane haasonnennexxanna assinennexxa Yihowwa gattowwaali hiyyaashsha kadhatennen. Okkooꞌni anna ankeenna isixxe miniinxe amaa daddaabbe borreessennexxi insaꞌnaa gattowwaali hiyyeennexxa kulennen.” Ani, iitta assa shollaxxe kaddeemmabaaxxa shoxxebaangi haasootteen. Kaddoolenna iitta hiteen: “Gattowwaaliiti Yihowwaa fakkaatatee assaannexxi yaane, anni ankinna isixxi miniinxi ama Yihowwaa egennaashsha tirtirsitaaxxa addataannen.”

12. Yaadi noꞌoki irra Yihowwaꞌni addata hasisseeki mayeete? (Fakkeenna 3:5, 6)

¹² Yaada ifikeꞌni kaddebaangi, Yihowwaꞌni addatte. (Fakkeenna 3:5, 6 yaansis.) Duuchchinii wodda noꞌaa eldaaxxa yaane egeꞌneeki Yihowwaten. (Isa. 55:8, 9) Ittan isi assinonna noꞌoo qoreexxi yaane, noꞌoo ijjenda miitaaxxebaan. Tenneꞌaa, isi gattowwaali hinannoshsha jajjabeessaa wodda, iitta assa noꞌaa laꞌo affeexxe yaane kaddeexxa addata dandeennannon. (Far. 40:4; Isa. 48:17, 18) Wele darrenaaꞌni, ifike yaadaꞌni addantaannexxe kaddoole gattowwaali hiyya dandeennaaꞌnon. (Fak. 14:12; Er. 17:9) Iimiiꞌni uundennaxxi Naꞌoomi iitta hiteen: “Taakkaa, pornogiraafe uudaammake miniinke anna ankee gattowwaali hiyyabeꞌnon hiyyee hedeennan. Langaxxa anee miidhaaxxee yookiin hittee qico anee miidheexxa dedhaan hiyyee hedeennan. Ittan Yihowwa qalbe anxi giddo hexxeexxa yaane egeꞌneexxa hubatennen. Kaddomaleꞌe, Yihowwa yaaddo anxa egeꞌneꞌeen hiyyo isi yaada anka duuchchiinga kiphaan hiyyote kaddebaaxxa hubata safennen. Isi maachchi aneꞌni laqemaꞌneexxanna yaadiki fayyanno qicoꞌni yanna hasissaaxxa egeꞌneꞌeen, kaddoolenna gattowwaali hiyyonnaa hasaꞌneen.”d

QAJEELLICHCHA YAADAꞌNI MIꞌLACHCHO ASSE

13. Roome 12:18-21 hedheeke yaadixxe hundaayyeshsha, noꞌo assa hasissaaxxi yaane maachcho?

¹³ Mitte noꞌoo jaba qicini miidheeke manjiꞌaa gattowwaali hinanno wodda, yaane ettene langaxxa keꞌisse haasoꞌatenaaꞌni caaldeexxa yaane assa hasissaan. Noꞌoo miidheeki Kirsitaana kadeeke dayyuwwa noꞌoke kadoole, herregi noꞌoki insaꞌnenni welt nageꞌiki hedhatee woꞌlaancho assate kada hasissaan. (Mat. 5:23, 24) Aare mararteteꞌni, halo gattowwaaliiteꞌni tukkeessinannon. (Roome 12:18-21 yaansis; 1Ph. 3:9) Iitta assinannoshsha noꞌoo gargaartaaxxi yaane maachcho?

14. Maa assatee woꞌlaancho assa hasissa? Mayee?

¹⁴ Noꞌoo mufachchiiseeka manjo, Yihowwashsha uudatee woꞌlaancho assa hasissaan. Yihowwa uudatee hasaꞌneeki manjiinxe qalbe giddo hexxeexxe eloxxe yaanen. (2 Ze. 16:9; Far. 130:3) Manjokenaaꞌni eloxxa yookiin elobaaxxa yaane hansaannole, ettenee hansennenxe yaane alfinannon. Noꞌoo miidheeke manjike eloke adabaꞌni miꞌlachcho assa, okkone manjiꞌaa gattowwaali hiyya noꞌaa shollexxaashsha assitaan. Fakkeennakeꞌe, Jeeroodi hiyyemaaki dayyi iitta hiyyeen: “Mitte dayyixxa balleessa, heddo isi afeexxe elolla yaanenni hokkokisiisa, isiꞌaa gattowwaali hiyya aneꞌni haꞌuratabaashsha gargaarteexxa hubateennen.”

15. Mitte manjiꞌaa gattowwaali hineennexxa kula laꞌo affeꞌeen hinaanneki mayeete?

¹⁵ Wele qalli hiyya hasissaaxxi laꞌo affeexxi yaane, noꞌoo miidheeke manjiꞌaa gattowwaali hineennexxa kulaten. Mayee? Iimiiꞌni uundeennaxxi Naꞌoomi maa hiteexxa hubatte: “Miniinki anni anki, ‘Aniꞌaa gattowwaali hiteette?’ hiyye qoreen. ‘Atiꞌaa gattowwaali hiyyeennen’ hiyyatee haasoꞌonnaa hiyyanno wodda afoꞌi anee abidemeen. Ettene yanna qalbe mitten isiꞌaa gattowwaali hiyyeebeꞌnoxxa hubatennen. Udumiiꞌni, ‘Atiꞌaa gattowwaali hiyyeennen’ hitaaxxa tenne jabaxxa sase hiyya, hiyya dandeꞌennen. Gattowwaali hiyyano woddi, isinna illetenaaꞌni indiddo wocci wocci asseen, tinni yaane noꞌoo laminiinga iitta gammachchiissaan hiyyeꞌe hedeennabaan. Okkoneechchi udumanna isoꞌni afeennaxxi adde higgeenni jabaatteen, ittan bireshshan hinge eloke jaaluwwa kandennen.”

16. Gattowwaalii uuddaaxxa maachcho barattinee?

¹⁶ Yihowwa welekee gattowwaali hiyya haꞌurtaaxxa yannanna gattowwaali hinaanneke manna kandonnaa hasaꞌneen. (Qol. 3:13) Iitta assa dandeenannoki noꞌoꞌni laqendaꞌneexxa yaane bashshi hiyya gonphaannole yookiin mufe waalatee woꞌlaancho assinonnoleten. Okkooꞌni haarooka qajeellichcha yaada afa dandeenannon.— “Gattowwaali Hinannoka Sase Tooruwwa” hitaꞌneexxa kollo uudi.

GATTOWWAALI HIYYA AFFEEXXE LAꞌOꞌNI MIꞌLACHCHO ASSE

17. Gattowwaali hiyya maa laꞌo affee?

¹⁷ Gattowwaali hinannoshsha assitaaxxi heddo buutuwwa hexxeen. Tenneeri giddiiꞌni mitte mitte uundo. Taakkaxxi, marartetika Anna noꞌoka Yihowwaa fakkaantannon, ittan isoo gammachchiinsannon. (Luq. 6:36) Langaxxi, Yihowwa baꞌlunteti noꞌaa gattowwaali hiyyeexxee isoo galateeffantaannexxa leellinshannon. (Mat. 6:12) Sakkaxxi, fayyunte noꞌoxxinna eloxxe kaddaan, ittan jaalunte noꞌoxxinna jabaattaꞌni meꞌitaan.

18-19. Gattowwaali hiyyatenaaꞌni maa gumma alfa dandeennanno?

¹⁸ Welekee gattowwaali hinanno wodda hendebeꞌnoxxa eebba alfinannon. Fakkeennakeꞌe, iimiiꞌni uundeennaxxe Deenisiꞌni futti hiteexxa yaane uundo. Yannatee ise egeꞌna gophphoolenna, insaꞌneꞌni bala geesiseemmaki manjichchi murteti uduma ifi shiꞌwatee mudhdheemman. Kaddomaleꞌe, Deenisixxe gattowwaaliinaaꞌni kexxeexxa, isinna Yihowwaxxe Naqaasheni welt Maxaafa Qullichcha barata safeen.

¹⁹ Welekee gattowwaali hiyya, assinannoxxe yaane duuchchinaaꞌn haranga haꞌura yaane fakkaata dandeettaan. Kaddoolenna tinni lumoka badhaadha alfinannoshsha assitaaxxe yaane kada dandeettaan. (Mat. 5:7) Tenneꞌaa duuchchiingi gattowwaaliiti Yihowwaa fakkaatatee dandeennennexxa duuchcha assino.