რა არის სულიერება? აუცილებელია, რომელიმე რელიგიას მიეკუთვნებოდე სულიერი სრულყოფისთვის?
ბიბლია გვპასუხობს:
ბიბლიიდან ვიგებთ, რომ სულიერება, იგივე სულიერობა, გულისხმობს ადამიანის ძლიერ სურვილსა და მზადყოფნას, ღვთისმოსაწონად იცხოვროს და იაზროვნოს. ასეთი ადამიანი ცდილობს, ღვთის ნორმების თანახმად იცხოვროს და წმინდა სულისa ხელმძღვანელობას მიჰყვეს (რომაელები 8:5; ეფესოელები 5:1).
ბიბლიაში ხშირად შედარებებია მოყვანილი იმის საჩვენებლად, თუ რა იგულისხმება სულიერობაში. მაგალითად, სულიერი ადამიანისგან განსხვავებით „ხორციელი ადამიანი არ იღებს იმას, რაც ღვთის სულისგან არის“, ანუ ღვთისგან არ სწავლობს (1 კორინთელები 2:14—16). ამასთანავე, ხორციელი ადამიანები შურის თვალით უყურებენ და ედავებიან ერთმანეთს მაშინ, როცა სულიერი ადამიანები ხელგაშლილები და მშვიდობიანები არიან (1 კორინთელები 3:1—3). მათზე, ვინც ცილისმწამებელია და მეგობრებს შორის განხეთქილებას იწვევს, ბიბლიაში ნათქვამია, რომ „ხორციელი ადამიანები [არიან], რომლებსაც სულიერობა არ გააჩნიათ“ (იუდა 19; იგავები 16:28).b
ამ სტატიაშია:
რატომ ვისწრაფვით სულიერი სრულყოფისკენ?
სულიერი მოთხოვნილებები იმიტომ გაგვაჩნია, რომ ღვთის მსგავსებად ვართ შექმნილნი (დაბადება 1:27). ამიტომ ადამიანთა უმეტესობას სურს, მეტი გაიგოს იმის შესახებ, რაც უხილავი, სულიერი და არამატერიალურია.
ჩვენ თანდაყოლილი უნარი გვაქვს, ისეთი თვისებები გამოვავლინოთ, როგორიც ღმერთს აქვს, მაგალითად, მშვიდობიანობა, გულმოწყალება და მიუკერძოებლობა (იაკობი 3:17). ამასთანავე, ღმერთი წმინდა სულს აძლევს მათ, ვინც ცდილობს, დაიცვას მისი მცნებები (საქმეები 5:32).
რატომაა მნიშვნელოვანი, ვიყოთ სულიერი ადამიანები?
სულიერი ადამიანი ღვთისგან ფასდაუდებელ ჯილდოს, „სიცოცხლეს და მშვიდობას“, მიიღებს (რომაელები 8:6).
სიცოცხლე: ღმერთი გვპირდება, რომ მარადიული სიცოცხლით დააჯილდოებს სულიერად მოაზროვნე ადამიანებს (იოანე 17:3; გალატელები 6:8).
მშვიდობა: ამაში იგულისხმება მშვიდობა ღმერთთან. ისინი, ვინც მხოლოდ საკუთარი სურვილების დაკმაყოფილებაზე ფიქრობენ, ღვთის მტრები არიან (რომაელები 8:7). იეჰოვაc სულიერად მოაზროვნე ადამიანებს „ღვთის მშვიდობითაც“ დააჯილდოებს, რომელიც „ნებისმიერ აზრს აღემატება“ (ფილიპელები 4:6, 7). ასეთი შინაგანი სიმშვიდე ბედნიერების საწინდარია (მათე 5:3).
როგორ ვისწრაფოთ სულიერი სრულყოფისკენ
გაეცანით ღვთის მცნებებს და დაიცავით ისინი. ამაში ბიბლიის კითხვა დაგეხმარებათ. სწორედ მასში ჩაწერეს „წმინდა სულით აღძრულმა“ ადამიანებმა ღვთის აზრები (2 პეტრე 1:21). ბიბლიიდან ნასწავლი დაგეხმარებათ, ღმერთს „სულითა და ჭეშმარიტებით“ სცეთ თაყვანი ანუ ღვთის ნებისამებრ, ზუსტად ისე, როგორც წმინდა სული მიგითითებთ (იოანე 4:24).
ლოცვაში ღმერთს დახმარება სთხოვეთ (ლუკა 11:13). ღმერთი დაგეხმარებათ, გამოავლინოთ ისეთი თვისებები, რომლებითაც სულიერი ადამიანები გამოირჩევიან (გალატელები 5:22, 23). იგი ყოფით პრობლემებთან გასამკლავებლად საჭირო სიბრძნესაც მოგცემთ (იაკობი 1:5).
იქონიეთ ურთიერთობა სულიერად მოაზროვნე ადამიანებთან. ისინი თქვენს სულიერ განვითარებას შეუწყობენ ხელს (რომაელები 1:11, 12). მათთან ურთიერთობა კი, ვისაც ღვთისთვის მიუღებელი აზროვნება აქვს, ხელს შეგიშლით, ისწრაფოთ სულიერი სრულყოფისკენ (იაკობი 4:4).
აუცილებელია, რომელიმე რელიგიას მიეკუთვნებოდე სულიერი სრულყოფისთვის?
თუ ადამიანი რომელიმე რელიგიას მიეკუთვნება, ეს თავისთავად არ ნიშნავს, რომ ის სულიერად მოაზროვნეა. ბიბლიაში ნათქვამია: „ვისაც თავი ღვთის თაყვანისმცემელი ჰგონია, მაგრამ ენას არ ლაგმავს, თავს იტყუებს და მისი თაყვანისცემა ფუჭია“ (იაკობი 1:26).
და მაინც, ბიბლიიდან ვხედავთ, რომ სულიერად მოაზროვნე ადამიანები ღმერთს ისე სცემენ თაყვანს, როგორ მას სიამოვნებს. მათ სწამთ, რომ „ერთია სული“, ღვთის წმინდა სული. სწორედ წმინდა სული აღძრავს მათ, ღმერთს გაერთიანებულებმა სცენ თაყვანი. ამგვარად, ისინი „ერთ სხეულს“ ქმნიან, რომელიც „ღვთის სულით ბოძებულ ერთიანობას“ ინარჩუნებს (ეფესოელები 4:1—4).
მცდარი შეხედულებები სულიერობის შესახებ
მცდარი შეხედულება: სულიერობა მოიცავს ყველაფერს, რაც ადამიანს კმაყოფილებას ჰგვრის ან საკუთარი პოტენციალის რეალიზებაში ეხმარება.
სინამდვილე: ბიბლიიდან ვიგებთ, რომ სულიერობა ღვთის ნების თანახმად ცხოვრებას მოიცავს. სულიერი ადამიანი არ შეეცდება, ღვთის გარეშე ისწრაფოს ბედნიერებისკენ. პირიქით, მისთვის ბედნიერების მომტანია ის, რომ იეჰოვაა შემოქმედი და, რომ მისი ნების თანახმად ცხოვრობს (ფსალმუნი 100:3).
მცდარი შეხედულება: ადამიანს შეუძლია სრულყოს სულიერება, თუ ყოველგვარ სიამეზე უარს იტყვის და თვითგვემას მიმართავს.
სინამდვილე: ბიბლიის თანახმად, სხეულის დათრგუნვა არის „თვითნებური თაყვანისმცემლობა“ და ხორციელ აზროვნებაზე მეტყველებს (კოლოსელები 2:18, 23). ბიბლიაში სულიერობა ტკივილთან კი არა, სიხარულთან ასოცირდება (იგავები 10:22).
მცდარი შეხედულება: სულიერ სამყაროსთან ნებისმიერი მეთოდით (მაგალითად, სპირიტიზმის მეშვეობით) კავშირის დამყარება სულიერობის განვითარება უწყობს ხელს.
სინამდვილე: სპირიტიზმი ეფუძნება შეხედულებას, რომ გარდაცვლილთა სულებს შეუძლიათ ცოცხლებთან კონტაქტში შესვლა. ბიბლიიდან კი ვიგებთ, რომ მკვდრები უგრძნობ მდგომარეობაში არიან და „არაფერი იციან“ (ეკლესიასტე 9:5). სინამდვილეში, ვინც სპირიტიზმს მიმართავს, კონტაქტს ამყარებს ღვთის მოწინააღმდეგე სულიერ ქმნილებებთან. სპირიტიზმი ღვთისთვის მიუღებელია და ადამიანს სულიერ განვითარებაში უშლის ხელს (ლევიანები 20:6; კანონი 18:11, 12).
მცდარი შეხედულება: ყველა ქმნილებას გააჩნია სულიერობა.
სინამდვილე: ყველაფერი, რაც ღმერთმა შექმნა, განადიდებს მას (ფსალმუნი 145:10; რომაელები 1:20). თუმცა მხოლოდ გონიერ ქმნილებებს შეუძლიათ სულიერობის განვითარება. ცხოველებს ინსტინქტი მართავთ, ამიტომ ვერ დაუახლოვდებიან ღმერთს. მათი ქცევა, ძირითადად, ფიზიკური მოთხოვნილებებითაა განპირობებული (2 პეტრე 2:12).
a „სულად“ ნათარგმნი სიტყვა ბიბლიის დედნისეულ ენებზე, ძირითადად, „სუნთქვას“ ნიშნავს. უფრო ფართო გაგებით ის შეიძლება აღნიშნავდეს უხილავ ძალას, რომელიც მოქმედებაში ვლინდება. ბიბლია ღმერთს უზენაეს სულიერ პიროვნებად აღგვიწერს. სულიერი ადამიანი ღვთის ნებას შეუსაბამებს თავის ცხოვრებას და მისი წმინდა სულის ხელმძღვანელობას მიჰყვება.
b როდესაც ბიბლიაში სიტყვა „ხორციელი“ ადამიანებთან მიმართებითაა გამოყენებული, ნაგულისხმებია ისეთი ადამიანები, ვისთვისაც ყველაზე მნიშვნელოვანია საკუთარი ხორციელი თუ ფიზიკური მოთხოვნილებების დაკმაყოფილება და ვინც იშვიათად ან საერთოდ არ ითვალისწინებს ღვთის ნორმებს.
c ბიბლიიდან ვიგებთ, რომ იეჰოვა ღვთის სახელია (ფსალმუნი 83:18).