მას ქალთა შორის კურთხეული ეწოდა

სᲘᲡᲔᲠᲐ, იაბინის მხედართმთავარი, იზრეელის ველიდან გარბის და თავის მეომრებს სასიკვდილოდ იმეტებს. ის ალბათ ვერც კი იჯერებს, რომ 900 საომარი ეტლით გამოსული მისი ძლევამოსილი ჯარი ისრაელებმა დაამარცხეს, რომელთაც არც ფარები ჰქონდათ და არც შუბები. ახლა სისერა მხოლოდ იმაზე ფიქრობს, რომ სადმე დაიმალოს. ის კენიელი ხებერის კარვისკენ გარბის.

კენიელები მომთაბარე ცხოვრებას ეწევიან და ისრაელების მოკავშირეები არიან. ამ ორ ხალხს შორის კარგი ურთიერთობა ჯერ კიდევ მაშინ ჩამოყალიბდა, როცა მოსემ ცოლად კენიელი ქალი შეირთო. მას შემდეგ ისრაელში ბევრი კენიელი ცხოვრობს, მაგრამ ხებერი თავისიანებისგან განსხვავებით ისრაელის მტრების მოკავშირეა. მას ქანაანელ მეფე იაბინთან მშვიდობიანი ურთიერთობა აქვს. ამიტომ სისერა ფიქრობს, რომ ხებერის კარავში უსაფრთხოდ იქნება. თუმცა რას წარმოიდგენს, რომ ხებერის ცოლს, იაელს, განსხვავებული დამოკიდებულება აქვს.

სისერა კარავთან მიდის, ხებერი კი იქ არ იმყოფება. მისი ცოლი იაელი ხედავს სისერას და ხვდება, რომ რთული გადაწყვეტილება აქვს მისაღები – ან მას უნდა დაუჭიროს მხარი, ან იეჰოვას და მის ხალხს. მან სწრაფად უნდა იღონოს რამე. იაელმა სისერას ვინაობაც იცის და მისი ავკაცობის შესახებაც ბევრი სმენია. დიდი ალბათობით, მას გაგონილი არაფერი აქვს დებორას წინასწარმეტყველების შესახებ და არ იცის, რომ სისერა ქალის ხელით უნდა მოკვდეს. მაგრამ, როგორც ჩანს, მაინც ხვდება, რას მოელის იეჰოვა მისგან.

მოგვიანებით ღვთის შთაგონებით დებორა ამ გამარჯვებას სიმღერას უძღვნის, რომელიც ასე ჟღერს: „კურთხეულია ქალთა შორის იაელი, კენიელი ხებერის ცოლი, კურთხეულია კარვებში მცხოვრებ ქალთა შორის!“. ასე რომ, იაელი მზაკვარი და ბოროტი კი არაა, როგორც ამას ზოგიერთი კრიტიკოსი ამტკიცებს, არამედ ძლიერი და გაბედული ქალი. რახაბის მსგავსად ისიც იეჰოვას ხალხის მხარეს იკავებს. იაელმა იცის, რომ სისერა იეჰოვას მტერია. მას კი ხელსაყრელი შემთხვევა ეძლევა, ეს ბოროტი მხედართმთავარი მოიშოროს და იეჰოვას ნება შეასრულოს. მაგრამ როგორ გააკეთებს ამას?

თუ იაელი პირისპირ შეებრძოლება სისერას, ვერაფერს გახდება, რადგან ის ძლიერი და გამოცდილი მეომარია. ამიტომ კარავში მოსასვენებლად ეპატიჟება. სისერა დასასვენებლად წვება, ქალი კი საბანს აფარებს, ხოლო, როცა წყალს სთხოვს, რძეს აძლევს. სისერა იაელს ეუბნება, რომ კარვის შესასვლელთან დადგეს და თუ ვინმე იკითხავს, არ გაამხილოს მისი ადგილსამყოფელი. მალევე სისერას ღრმად ეძინება.

იაელი ხვდება, რომ მოქმედების დროა და კარვის პალოს და ჩაქუჩს იღებს, რომლის გამოყენებაც კარავში მცხოვრებ ქალებს ხშირად უწევთ. შემდეგ სისერას თავთან ჩაიმუხლება და გადამწყვეტი მომენტიც დგება. ერთი ზედმეტი მოძრაობაც კი შეიძლება სიცოცხლის ფასად დაუჯდეს. მაგრამ იაელი შეცდომას არ უშვებს – ერთი დარტყმა და საფეთქელში პალოჩარჭობილი სისერა უსულოდ გდია მის ფერხთით.

მალევე იაელის კარავთან ბარაკი მიდის, რომელიც სისერას გამოედევნა. იაელი მასთან შესახვედრად გამოდის და ეუბნება: „მოდი და გაჩვენებ იმ კაცს, შენ რომ ეძებ“. ბარაკი შიგნით შედის და საკუთარი თვალით ხედავს, როგორ შესრულდა წინასწარმეტყველ დებორას სიტყვები: „ქალის ხელში ჩააგდებს იეჰოვა სისერას!“.

გამარჯვების სიმღერაში ბარაკი და დებორა ხოტბას ასხამენ იაელს. ამ შემთხვევის შემდეგ იაელი ბიბლიაში აღარ მოიხსენიება, თუმცა დღესაც კი, 3 200 წლის შემდეგ, მისი მაგალითი ბევრ რამეს გვასწავლის. მართალია, ღვთის მსახურები იარაღით ხელში არ ვიბრძვით, მაგრამ ყველანი სულიერ ბრძოლაში ვართ ჩართული. ამიტომ დღეს ისე, როგორც არასდროს, იაელივით ჩვენც გვჭირდება გაბედულება.

წაიკითხეთ:

• მსაჯულები 4:9, 11, 17–22; 5:24–31

იმსჯელეთ:

რაში გამოჩნდა იაელის გაბედულება?

რას სწავლობთ

• იაელის მსგავსად რა შემთხვევებში შეიძლება დასჭირდეს გაბედულება ქრისტიან დას, რომლის მეუღლეც არ იზიარებს მის რწმენას?

  პასუხი:

• იაელი არც წინასწარმეტყველი იყო და არც მეომარი, თუმცა რაც შეეძლო, ყველაფერი გააკეთა. როგორ დაგვეხმარება მისი მაგალითი, თუ რაიმე გარემოებები გვზღუდავს? სურათი 2

  პასუხი:

  

• კიდევ რა მხრივ შეგვიძლია მივბაძოთ იაელს გაბედულებაში?

  პასუხი:

ფართოდ შეხედეთ საკითხს

• რას გასწავლით ეს ისტორია იეჰოვას შესახებ?

  პასუხი:

• როგორ უკავშირდება ეს ისტორია იეჰოვას განზრახვის შესრულებას?

  პასუხი:

• რას ჰკითხავთ მკვდრეთით აღმდგარ იაელს?

  პასუხი:

გაიგეთ მეტი

ნახეთ, როგორ აღძრავს ახალგაზრდა დას იაელის მაგალითი ქადაგებისკენ.

„სიმხდალის ნაცვლად გაბედულება გამოიჩინეთ! – მიჰბაძეთ არა მეროზის მკვიდრთ, არამედ იაელს“ (1:40)

იაელი ერთ-ერთია იმ მრავალ ქალს შორის, რომელთაგანაც ბევრი რამის სწავლა შეგვიძლია. გაეცანით ზოგიერთ მათგანს.

„რისი სწავლა შეგვიძლია ბიბლიაში მოხსენიებული ქალებისგან?“ (ijwbq სტატია 161)