Ĩvuku ya Mbee ya Mavinda
18 Ĩtina wa ĩvinda yĩana ũna, Ndaviti nĩwasindie Avilisiti na amakĩlya vinya na nĩwaumisye Ngathi na tũtũla twayo* mokonĩ ma Avilisiti. 2 Na ĩndĩ nĩwasindie Moavi, na Amoavi matwʼĩka athũkũmi ma Ndaviti na nĩmamũeteae koti.*
3 Ndaviti nĩwasindĩie Mũsumbĩ Atateseli wa Nzova vakuvĩ na Amathi, mũsumbĩ ũsu e nzĩanĩ akalũlũmĩĩlye ũkũmũ wake kĩsionĩ kya Ũsĩ wa Euvalati. 4 Ndaviti nĩwakwatie makasya make 1,000, atwai make 7,000 ma mbalasi, na asikalĩ make 20,000 ala maendaa na maaũ. Na ĩndĩ Ndaviti atila malangũ ma mbalasi syake syonthe sya kũkusya makasya atialya mbalasi 100. 5 Yĩla Asilia ma Ndamasikũ mookie kũtetheesya Mũsumbĩ Atateseli wa Nzova, Ndaviti nĩwooaie Asilia 22,000. 6 Na ĩndĩ Ndaviti nĩwaseũvisye isese kũu Silia ya Ndamasikũ, na Asilia matwʼĩka athũkũmi ma Ndaviti na nĩmaĩvaa koti. Yeova nĩwanengae Ndaviti ũsindi* kũndũ kwʼonthe kũla wathi. 7 O na ĩngĩ, Ndaviti nĩwavenie athũkũmi ma Atateseli ngao sya kĩlinge sya thaavu na aiete Yelusalemu. 8 Ndaviti nĩwoosie ũthuku mwingĩ mũno kuma Tivathi na Kuni, ndũa sya Atateseli. Solomoni nĩwaũtũmĩie kũseũvya Ũkanga wa ũthuku, ituĩ, na mĩio ya ũthuku.
9 Yĩla Mũsumbĩ Tou wa Amathi weewie kana Ndaviti aĩ anasinda ita syonthe sya kaũ sya Mũsumbĩ Atateseli wa Nzova, 10 ate kwananga ĩvinda, nĩwatũmie mwana wake Aatolamu kũla kwĩ Mũsumbĩ Ndaviti nĩ kana akamũkethye na aimũkatha nũndũ aĩ anokita na Atateseli na akamũsinda (nĩkwĩthĩwa mavinda maingĩ Atateseli nĩwavithũkĩaa Tou), na Aatolamu nĩwaeteie Ndaviti syĩndũ sya mĩthemba yonthe sya thaavu, vetha, na ũthuku. 11 Mũsumbĩ Ndaviti nĩwatheeisye Yeova syĩndũ isu, vamwe na vetha na thaavu ũla woosete mbaĩnĩ syonthe: kuma Etomu na Moavi, kuma kwa Aamimoni, Avilisiti, na Aamaleki.
12 Avisai mwana wa Nzeluia nĩwooaĩe Aetomu 18,000 Mwandanĩ wa Mũnyũ. 13 Nĩwaseũvisye isese Etomu, na Aetomu onthe matwʼĩka athũkũmi ma Ndaviti. Yeova nĩwanengae Ndaviti ũsindi* kũndũ kwʼonthe kũla wathi. 14 Ndaviti nĩwaendeeie kũsumbĩka Aisilaeli onthe, na nĩwatwʼĩĩaa andũ make onthe sila aatĩĩe ũsili wa katĩ na ũlũngalu. 15 Yoavu mwana wa Nzeluia nĩwe waĩ mũnene wa ita, Yeosavati mwana wa Ailuti nĩwe waiaa lekoti, 16 Nzatoki mwana wa Aituvu na Aimeleki mwana wa Aviathali maĩ athembi, na Savisa aĩ mũandĩki. 17 Mbenaia mwana wa Yeoiata aũngamĩe Akelethi na Avelethi. Na ana ma Ndaviti nĩmo maĩ na ianda ila nene ĩtina wa mũsumbĩ.