Ĩvuku ya Mbee ya Mavinda
19 Ĩtina wa ĩvinda, Naasu mũsumbĩ wa Aamimoni nĩwakwie, na mwana wake atwʼĩka mũsumbĩ vandũ vake. 2 Nũndũ wa ũu, Ndaviti aisye: “Nĩngwonyʼa Anuni mwana wa Naasu wendo ũtathelaa, nĩkwĩthĩwa ĩthe nĩwambonisye wendo ũtathelaa.” Kwoou Ndaviti atũma atũmwa makamũkiakisye nũndũ wa kũkwʼĩĩwa nĩ ĩthe. Ĩndĩ yĩla athũkũmi ma Ndaviti mavikie nthĩ ya Aamimoni nĩ kana makiakisye Anuni, 3 anene me mbee ũsumbĩnĩ wa Aamimoni meeie Anuni atĩĩ: “We wĩona Ndaviti ta watũma akiakisya kũla ũĩ aĩ nũndũ nũkũnenga ĩthe waku ndaĩa? We ndũkwona kana Ndaviti atũma athũkũmi make kũla ũĩ nĩ kana asisye ĩ nthĩ nesa na aimĩthiana na aikũngʼuthũla?” 4 Kwoou Anuni nĩwoosie athũkũmi ma Ndaviti amenza na atilĩla ngũa syoo katĩ matakonĩ na amaeka mathi. 5 Yĩla Ndaviti wataviwʼe ĩũlũ wa aũme asu, vau kwa vau nĩwatũmie angĩ makamakomane, nũndũ aũme asu nĩmeekĩĩthĩtwʼe nthoni mũno; na mũsumbĩ amea atĩĩ: “Ĩkalai Yeliko nginya ingʼee syenyu imee ĩngĩ, na ĩndĩ mũisyoka.”
6 Ĩtina wa ĩvinda, Aamimoni nĩmoonie kana nĩmatwʼĩkĩte mũuke mũthũku kũla kwĩ Ndaviti, kwoou Anuni na Aamimoni nĩmatũmie talendi 1,000* sya vetha maĩve makasya na atwai ma mbalasi kuma Mesovotamia,* Alamu-maaka, na Nzova. 7 Kwoou nĩmaĩvie makasya 32,000, o vamwe na mũsumbĩ wa Maaka na andũ make. Na ĩndĩ mooka mamba kambi mbee wa Meteva. Aamimoni nĩmoombanie vamwe maumĩte ndũanĩ syoo na mooka kaũnĩ.
8 Yĩla Ndaviti weewie ũu, nĩwatũmie Yoavu na ita syonthe, o vamwe na ngũmbaũ syake ila syaĩ vinya vyũ. 9 Na Aamimoni nĩmaendie na meevanga kwondũ wa kaũ mũvĩanĩ wa ndũa namo asumbĩ ala maĩ manooka maĩ oka ũiĩnĩ.
10 Yĩla Yoavu woonie kana asikalĩ mookĩte kũmũvithũkĩa maumĩte mbee na ĩtina wa ita, nĩwanyuvie asikalĩ amwe ala aseo vyũ ma Isilaeli na amavanga kwondũ wa kaũ nĩ kana mokite na Asilia. 11 Aiie aũme ala matialile ungu wa* mwana-a-inyia Avisai, nĩ kana amavange kwondũ wa kaũ makokite na Aamimoni. 12 Na ĩndĩ asya: “Ethĩwa Asilia nĩmekwĩthĩwa na vinya mwingĩ kwĩ inyie, no nginya ũke ũmbonokye; ĩndĩ ethĩwa Aamimoni nĩmekwĩthĩwa na vinya mwingĩ kwĩ uwe, nĩngũũvonokya. 13 No nginya twĩthĩwe na vinya na ũkũmbaũ kwondũ wa andũ maitũ na kwondũ wa ndũa sya Ngai witũ, na Yeova nũkwĩka kĩla kĩseo methonĩ make.”
14 Nĩvo ĩndĩ Yoavu na aũme make maendie makokite na Asilia, na Asilia masemba mamũkĩa. 15 Yĩla Aamimoni moonie kana Asilia nĩmasemba makĩa, o namo nĩmasembie makĩa mwana-a-inyia Avisai na malika ndũanĩ. Ĩtina wa ũu, Yoavu nĩwasyokie Yelusalemu.
16 Yĩla Asilia moonie kana nĩmasindwa nĩ Aisilaeli, nĩmatũmie atũmwa makete Asilia ala maĩ kĩsionĩ kya ũla Ũsĩ,* matongoewʼe nĩ Sovaku mũnene wa ita sya Atateseli.
17 Yĩla Ndaviti wataviwʼe ũndũ ũsu, vau kwa vau nĩwoombanisye Aisilaeli onthe na mainga Yolotani mathi kũla maĩ na meevanga kwondũ wa kaũ mokite namo. Ndaviti nĩweevangie kwondũ wa kaũ nĩ kana akakomane na Asilia, namo mokita nake. 18 Ĩndĩ Asilia nĩmasembie makĩa Aisilaeli; na Ndaviti ooaa atwai ma makasya 7,000 ma Asilia na asikalĩ moo maendete na maaũ 40,000, na ooaa Sovaku mũnene wa ita. 19 Yĩla athũkũmi ma Atateseli moonie kana nĩmasindwa nĩ Aisilaeli, mate kwananga ĩvinda, nĩmeewʼanie na Ndaviti nĩ kana kwĩthĩwe na mũuo katĩ woo na meenyivya matwʼĩka athũkũmi make; na Asilia mayaaenda kũtetheesya Aamimoni ĩngĩ.