Ĩvuku ya Mbee ya Mavinda

20 Mwambĩĩonĩ wa mwaka,* ĩvinda yĩla asumbĩ maendaa kaũnĩ, Yoavu nĩwaendie kaũnĩ na aananga nthĩ ya Aamimoni vyũ; nĩwaendie atwʼĩkanĩsya Lava, ĩndĩ Ndaviti ekalile Yelusalemu. Yoavu nĩwavithũkĩie Lava na amyomboa. 2 Na ĩndĩ Ndaviti aumya ngovia ya ũsumbĩ mũtwenĩ wa Malikamu, na eethĩa yaĩ na ũito wa talendi ĩmwe* ya thaavu, na yaĩ na mavia ma thooa mũnene; na ngovia ĩsu nĩyeekĩiwe Ndaviti. O na ĩngĩ, nĩwoosie mũtavo mwingĩ mũno kuma ndũanĩ ĩsu. 3 Na nĩwaumaalũkilye andũ ala maĩ ndũanĩ ĩsu na amatwʼĩkĩthya athũkũmi ma kũtila mavia na mũsumeno na ma kũthũkũma na syĩndũ mbũĩ sya kyũma* na mathoka. Ũu nĩwʼo Ndaviti weekanie na ndũa syonthe sya Aamimoni. Mũthya, Ndaviti na asikalĩ make onthe nĩmasyokie Yelusalemu.

4 Ĩtina wa ũu, nĩmokitĩie na Avilisiti kũu Ngeseli. Ĩvindanĩ yĩu Sivekai ũla waĩ Mũuusa nĩwooaie Sivai, ũla waĩ nzyawa ya Alevai, na Avilisiti makĩlwʼa vinya.

5 Na nĩmokitie ĩngĩ na Avilisiti, na Elianani mwana wa Yaili ooaa Lami mwana-a-ĩthe wa Ngoliathi ũla waĩ Mũngathi, na waĩ na ĩtumo yaĩ na mũtĩ wailye ta mũamba wa atumi.

6 Kaũ nĩwaumĩlile ĩngĩ Ngathi, vala vaĩ ĩmũndũ ĩnene yaĩ na syaa 6 kĩla kwʼoko na syaa 6 kĩla kũũ, syaĩ syaa 24 syongelanwʼa; o nayo ĩmũndũ yĩu yaĩ nzyawa ya Alevai. 7 Yatindĩaa kũvũthĩĩsya Aisilaeli. Kwoou Yonathani mwana wa Simea, mwana-a-inyia wa Ndaviti, ayũaa.

8 Asu maĩ nzyawa sya Alevai kũu Ngathi, na mooaiwe nĩ kwʼoko kwa Ndaviti na kwʼoko kwa athũkũmi make.